San Lucas 2 - Nuevo Testamento Tzeltal de Amatenango

Jicha ayin te Jesuse

¹ Jaꞌ stiempo a te la yal mantal te mukꞌul rey César Agusto te ya yichꞌ pasel senso ta spisil te nasion yuꞌune.

² Jaꞌ primero senso te la spas te ay yaꞌtel ta gobiernoil ta estado Siria te Cirenio sbiile.

³ Spisil genteetik puersa ba yakꞌ ta najkanel sbiilik te ba slumal te smeꞌ-statike.

⁴ Jich te Josee lokꞌ bael ta jtejklum Nazaret te ay ta estado yuꞌun Galilea. Bajt ta Belen ta estado Judea, yuꞌun jaꞌ slumal te antibo rey David, sok jaꞌ stsꞌumbal jDavid te Josee.

⁵ Teꞌ ba yakꞌ ta najkanel sbiil a sok te xMariae te trate ya xnujpun soke, te ayix tut staoje.

⁶ Te tutꞌil ayik ta Belen ae, la sta skꞌaalel te ya xpajt yoꞌtan te xMariae.

⁷ Teꞌ ayin a te xchꞌin ba-yale. La sbetsꞌ ta pakꞌ y la swayan ta yawil sweꞌel wakax, yuꞌun ma staikix ta majanel te lekil nae te ba ya xwaye.

Te chꞌul angeletike sok te jkanan-karneraetike

⁸ Nopol ta jtejklum Belen ay jkanan-karneraetik. Spꞌejel ajkꞌubal yipalik ta skanantayel skarneraik ta stenle.

⁹ Ora chiknaj tal ta stojolik jtul chꞌul ángel yuꞌun te Kajwaltike. Xlemet julel xojobil te Kajwaltik ta sjoylejal te ba ayike. Beno xiꞌik yuꞌun.

¹⁰ Pero altalanbot yuꞌun te chꞌul ángele: —Ma me xiꞌanik, porke ay me tut kichꞌojbeyex tal te ben tsaꞌam ya kalbeyexe. Ben me sniꞌ xꞌawaꞌiyik yuꞌun ta apisilik.

¹¹ Tsꞌin to nax a ayin te ba slumal jDavid te jkoltawane awuꞌunike, jaꞌ te Kajwaltik Cristoe.

¹² Jaꞌ seña xkꞌo awilik te alale te potsbil ta pakꞌ y wayal ta yawil sweꞌel wakax te ba sna te wakaxe —xchi te chꞌul ángele.

¹³ Ora nax a chiknaj tal ta xujk te jtul chꞌul ángel bayal chꞌul angeletik yuꞌun te chꞌulchane. Yipalik ta skꞌayojinel te Diose, jich a yalik:

¹⁴ “¡Ben tsaꞌam slekil te Dios te ay ta chꞌulchane! Ya yakꞌ bujtsꞌan kꞌinal ta balmilal ta stojol te machꞌatik ayik ta kꞌuxutayel yuꞌune”, xchiik.

¹⁵ Kꞌalal laj sujt bael ta chꞌulchan te chꞌul angeletike, te jkanan-karneraetike lijk yalbe sbaik ta jujutul: —Konik ta Belen abi. Yax ba kiltik te tut kꞌoemix ta pasel te la yalbotikix te Kajwaltike —xchiik.

¹⁶ Jicha laj bajt ta ora. Y kꞌo staik te xMariae sok te Josee y sok te chꞌin alale te wayal ta sna wakaxe.

¹⁷ Te kꞌalal la yilike lijk yaꞌabiyanbeyik te tuti altalanbot yuꞌun chꞌul ángel te skꞌoplal chꞌin alale.

¹⁸ Spisil te machꞌatik la yaꞌibe sluware toj cham a yaꞌiyik yuꞌun te tuti yal te jkanan-karneraetike.

¹⁹ Yan te xMariae spisil a snaꞌulan ta yoꞌtan sok la snopilan te tut kꞌoem ta stojole.

²⁰ Te jkanan-karneraetike kꞌalal sujtik baele la skꞌayojimbeyik slekilal te Diose yuꞌun te tuti yaꞌibeyik sluwarile sok te tuti yilik ta sitike. Yuꞌun spisil a kꞌot ta pasel te tuti altalanbot yaꞌiyike.

Te chꞌin alal Jesuse akꞌot ta stojol Dios ta templo

²¹ Ayix waxkeb kꞌaal a te ayin te chꞌin alale, la yaꞌbeyik sirkunsision ta stiꞌbalul. Jesus a yaꞌbeyik sbiilin, jich te tut albil yuꞌun chꞌul ángel te xMariae te kꞌalal ma to ayuk tut staoj aye.

²² Te kꞌalal kꞌaxix a te jayeb kꞌaal te ya skanantay sba, jich tutꞌil ya yal te mantal yuꞌun te jMoisese, la yikꞌik bael ta Jerusalen te alale yuꞌun ba yakꞌik ta stojol te Kajwaltike.

²³ Jicha kꞌo spasik, yuꞌun jich tsꞌibabil jilel ta smantal te Kajwaltike: “Spisil ba alal te ya xꞌayine teme kereme jaꞌ me yuꞌun te Kajwaltike”, xchi me.

²⁴ Jicha kꞌo yaꞌbeyik smajtan Dios te tut ya yal ta smantal te Kajwaltike, chikan teme chaꞌkojt purise o chaꞌkojt paloma.

²⁵ Ay jtul mamal te ay ta Jerusalen te Simeon sbiile. Toj ta mamalil, sok lek xchꞌuunej te Diose. Jun yoꞌtan yipal ta smaliyel te tut ora ya xkoltayot te jꞌisraeletike. Te Simeone joyimbil yuꞌun te Chꞌul Espiritue.

²⁶ Aꞌbot snaꞌbe sluwar yuꞌun te ma to xcham a te ya yilbe sit te Cristo te ya xtikonot tal yuꞌun te Kajwaltike.

²⁷ Jicha ikꞌot tal ta templo yuꞌun te Chꞌul Espíritu te mam Simeone te tut kꞌaalil a laj tal te smeꞌ-stat te alal Jesuse, tal spasbeyik te tut ya yal te mantaliletike.

²⁸ Te mam Simeone la spet te alale y la yalbe slekilal yaꞌtel te Diose. Jich la yal:

²⁹ —Te ora to Kajwal, kꞌotix ta pasel te tuti awalojbone. Jun koꞌtan xchamon joꞌon te awaj-aꞌtelone.

³⁰ Porke la kilix ta sit te tutꞌil ay te jkoleltik awuꞌune.

³¹ Chapalix awuꞌun ta stojol spisil te nasionetike.

³² Ya me sakub kꞌinal yuꞌun te ba ay te yan jtejklumetike, y ay me slekilal ya xkꞌot yuꞌun te jtejklum Israel awuꞌune —xchi te mam Simeone.

³³ Te Jose sok te smeꞌ te Jesuse lom cham a yaꞌiyik yuꞌun te tuti yal te mam Simeon yuꞌun te alale.

³⁴ Te mam Simeone la skꞌambe bendision ta stojolik, sok la yalbe te xMaria te smeꞌ te alal Jesuse: —Aꞌiybeya awaꞌi sluwar, ta skuenta te alal to ay me bayal te jꞌisraeletike ya xjim yuꞌun, y ay me bayal ya xtojob yuꞌun. Te alale jaꞌ seña yakꞌoj Dios te bayal machꞌa ya xpꞌajot yuꞌune.

³⁵ Ya mex chiknaj te tut ay ta yoꞌtanik te jujutule. Y te jaꞌate ya me xkꞌax awokol ta ajtal-oꞌtan yuꞌun. Jaꞌ me pajal kꞌoem sok ya awaꞌi te lowel ta puñale —xchi te mam Simeone.

³⁶ Sok ay jtul ants teꞌa te xꞌAna sbiile te jꞌalwanej yuꞌun te Diose. Jaꞌ yantsil-nichꞌan te Fanuele te stsꞌumbal Asere. Lom meꞌelix. Te kꞌalal bikꞌit to ae nujpun, pero ma jalaj sok te smamlale. Yal jukeb jaꞌbil a kuxuyin sok.

³⁷ Ayix 84 jaꞌbil yaꞌbilal a te jil ta biudae. Sil tiempo ay ta templo. Kꞌajkꞌal ajkꞌubal ay ta abatinel yuꞌun te Kajwaltike y ya skomilan sweꞌel ta skꞌoponel te Diose.

³⁸ Te kꞌalal yipal ta kꞌop a te mam Simeone, tal euk te xꞌAnae. La yalbe kola yal Dios yuꞌun te alal Jesuse. Sok la yalbe skꞌoplal te alal ta stojol spisil te machꞌatik yipal ta smaliyel te tutꞌil ya xkol te Jerusalene.

Sujtik bael ta Nazaret

³⁹ Kalal juꞌ yuꞌunik spasel spisil te tut ya yal ta smantal te Kajwaltike, jich a sujtik bael ta Galilea te ba slumalik, jaꞌ te jtejklum Nazarete.

⁴⁰ Yipal ta chꞌiel te alale y yipal ta yichꞌel spuersa, y yipal ta pꞌijubel. Y yichꞌoj bayal bendision yuꞌun te Diose.

Te chꞌin kerem Jesuse xkꞌotuk ta templo

⁴¹ Te smeꞌ-stat te Jesuse kꞌayemik te jujun jaꞌbil ya xbajtik ta spasel kꞌin Pascua ta Jerusalen.

⁴² Jich te kꞌalal lokꞌ lajchayeb jaꞌbil yaꞌbilal te Jesuse, bajtik ta il-kꞌin ta Jerusalen, jich tutꞌil kꞌayemik ta spasel te smeꞌ-state.

⁴³ Te kꞌalal kꞌaxemix cheꞌoxeb kꞌaal a te kꞌine, sujtik bael. Yan te chꞌin kerem Jesuse jil ta Jerusalen. Te smeꞌ-state makꞌ snaꞌ me teꞌ jil a.

⁴⁴ La skuyik te ay kꞌael ta yolil genteetik te Jesuse. Jicha beenikix bael jun kꞌaal a. Lijk sleik te ba sbersinatake y sok te machꞌatik ya xnaꞌbot sba yuꞌune.

⁴⁵ Pero ma staik teꞌa. Jicha sujtik bael ta Jerusalen, ba sleik tal.

⁴⁶ Ta yoxebal to kꞌaal a kꞌo staik ta templo nakal sok te maestroeetik yuꞌun te mantaliletike. Te Jesuse yipal ta yaꞌiyel te tut ya yalike sok ya sjojkꞌobeyik sluwar.

⁴⁷ Spisil te machꞌatik la yaꞌibeyik sluwar skꞌop te Jesuse, lom cham a yaꞌiyik, yuꞌun beno spꞌijil ta sjakꞌel te aꞌabiyeje.

⁴⁸ Te kꞌalal ilot yuꞌun te smeꞌ-state, la sjikꞌ yoꞌtanik yuꞌun. Jicha albot yuꞌun te smeꞌe: —Jchꞌin kal, ¿tuꞌun te jich la apasbotik to? Te atate sok te joꞌone beno yajtal koꞌtantik ya jlejtikat —xchi.

⁴⁹ La sjakꞌ te Jesuse: —¿Tuꞌun te ya aleikone? ¿Me yuꞌun ma xꞌanaꞌik te ya skꞌan ya kaꞌtelin te tut ay yuꞌun te Jtate? —xchi te Jesuse.

⁵⁰ Pero maꞌ snaꞌik te tuti altalanbot yuꞌune.

⁵¹ Jich te Jesuse la sjoyin sujtel ta Nazaret. Jun yoꞌtan a xchꞌuun mantal ta stojolik. Te smeꞌe la snaꞌulan ta yoꞌtan spisil te tuti kꞌot ta pasele.

⁵² Yanyan yipal ta chꞌiel te Jesuse, sok yanyan ta pꞌijubel. Yanyan yipal ta mukꞌubel slekil yoꞌtan ta stojol Dios sok ta stojol te genteetike.