San Lucas 17 - Nuevo Testamento Tzeltal de Amatenango

Ya xchꞌayawan te yalesel ta mulile

¹ Te Jesuse la yalbe te jnopojeletik yuꞌune: —Puersa me ay yalesel ta mulil. Pero oꞌol me sba te machꞌa ya syaleswan ta mulile.

² Te machꞌa ya syales ta mulil jtuluk te machꞌatik chꞌin yakꞌoj sbaike, jaꞌ lek te yauk yichꞌ chukel ta snukꞌ junuk chaꞌ, ya xchꞌojot ochel ta mar.

³ Ila me abaik yuꞌun. “Teme ay jtuluk awermano te ay tut ma tsaꞌamuk ya spasbeyate, ban kꞌopona ta lek nax. Teme la sujtes yoꞌtane, pasbeya me perdon yuꞌun.

⁴ Manchuk me ya sta smul awuꞌun jukeb buelta te jun kꞌaale, teme ay jukeb buelta ya xtal yalulanbeyate: “Makꞌ jpasix a”, teme xchie, pasbeya perdon —xchi te Jesus.

Te tutꞌil ay spoder te machꞌa ay xchꞌuunel yoꞌtane

⁵ Te apostoletike la skambeyik te Kajwaltike: —Aꞌbotik xan mas xchꞌuunel koꞌtantik —xchiik.

⁶ Te Kajwaltike la sjakꞌtalanbe: —Teme jich ay xchꞌuunel awoꞌtanik chꞌinuk jich tutꞌil te xchꞌin bakꞌ mostesia, ya me xjuꞌ ya awalbeyik te sikomoro-teꞌ to: “Bula aba lokꞌel liye, ban tsꞌuna aba ta mar”, teme ya awute, y te teꞌe jich me ya xchꞌuunbeyat amantal.

Te tut ya skꞌan spas te aj-aꞌtelile

⁷ Teme ay jtuluk te jaꞌexe teme ay awaj-aꞌtelik te sujtix tal ta jokꞌojel ta alume o ta skanantayel te awakaxe, ¿me ya wan awalbey: “Ochan, naklan, baan weꞌan”, me ya wan awut?

⁸ Njuꞌu. Sino ke ya awalbe: “Ban chapa jweꞌel y ban chapa aba. Ya me akꞌasesbon tal yuꞌun ya xweꞌ-xꞌuchꞌaon nailuk. Patil ya me xweꞌ-xꞌuchꞌaat euk”, ya awut.

⁹ ¿Sok me ya wan awalbe kola yal te awaj-aꞌtel te la spasbeyat te awaꞌtel te la awalbeye? Maꞌuk.

¹⁰ Jich euk te jaꞌexe teme la apasix spisil te tut la yalbeyat te Diose, ya skꞌan te jich ya awalike: “Ma tsaꞌamukotik ta mantaltesel. Porke ma juꞌemuk kuꞌuntik spasel ta mas te kaꞌteltike”, xchaex me —xchi te Jesuse.

Te Jesuse la slekutes lajuntul jkꞌaꞌel-chameletik

¹¹ Te tutꞌil yipal bael ta beel ta Jerusalen te Jesuse, kꞌax ta stiꞌil estado yuꞌun Samaria y sok Galilea.

¹² Kꞌalal kꞌot ta jun kolonya, tal taek yuꞌun lajuntul winketik te yichꞌojik kꞌaꞌel-chamele. Jakal tekꞌajtik julel ta stojol, y xꞌawlajan:

¹³ —¡Jesus, Maestro, kꞌuxutayaotik! —xchiik ta aw.

¹⁴ Kꞌalal la yil te Jesuse, jicha yaltalanbe: —Baanik, ban akꞌa abaik ta ilel ta stojol te saserdoteetike —xchi. Te tutꞌil yipalik kꞌal ta beel ae, chꞌay bael te xchamelike.

¹⁵ Ay jtul te ta spisilike la yil te lekix te stiꞌbalule, jicha sujt tal ta stojol te Jesuse. Tulan yipal tal ta yalbeyel kola yal te Diose.

¹⁶ Jul skejan sba ta sit te Jesuse, la snijan sba ta lum ta yalbeyel kola yal. Te winik to, samaria-winik.

¹⁷ La yal te Jesuse: —¿Meꞌn ma lajuntuluk te machꞌatik kolik ta chamele? ¿Ba ay te baluntul xane?

¹⁸ ¿Me jaꞌ nax wan te jyanlum winik to te sujt tal ta yalbeyel kola yal te Diose? —xchi te Jesuse.

¹⁹ Y la yalbe te winike: —Jajchan y baan. Ta skuenta te xchꞌuunel awoꞌtan te lekubenatixe —xchi.

Te tutꞌil ya xtal ta ajwalinel te Diose

²⁰ Te fariseoetike la sjojkꞌobeyik te Jesuse tut ora ya xlijk ta mantal te Kajwaltik Diose. Te Jesuse la sjakꞌtalanbe: —Ma chikanuk ta ilel te tut ora ya xlijk ta mantal te Kajwaltik Diose.

²¹ Maꞌyuk machꞌa ya yal: “Liꞌiyix to”, o “Lum ayix to”, maꞌyuk machꞌa xchi ta yalel. Porke ayix ta mantal ta awolilik te Diose —xchi te Jesuse.

²² Y la yalbe te jnopojeletik yuꞌune: —Ya me sta yorail te awoꞌtanikuk ya awilik jun xanix me kꞌaal a te Nichꞌanile, pero makꞌ ya awilikix a.

²³ Ay me machꞌatik ya yalbeyex: “La, ilawil liꞌ ayix to”, o “Koꞌn kiltik lum ayix to”, ya me yutex. Pero ma me baanik, ni ma me tsꞌakliyik bael.

²⁴ Yuꞌun te tut ora ya sujt tal te Nichꞌanile, jich me ya xchiknaj tal te tutꞌil ya xtil te sansewal ta juju-mejch te chꞌulchane.

²⁵ Pero nail ya xkꞌax bayal swokol, sok pꞌajbil me ya xkꞌot yuꞌun te genteetike te kuxajtik te ora to.

²⁶ Jich te tutꞌil ayik a te genteetik ta yorail te jNoee, jich mismo ayik a te ya xtal te Nichꞌanile.

²⁷ Te genteetike xweꞌik xꞌuchꞌaik a, sok yipalik ta nujpunel a, sok yipalik ta chꞌom a, jaꞌto te tut kꞌaalil a och ta arka te jNoee. Tal te nojel jaꞌe, y spisil a laj cham.

²⁸ Jich mismo a kꞌot ta pasel ta yorail te jLote. Te genteetike xweꞌik xꞌuchꞌaik a, sok yipalik ta mambajel, y chombajel, y tsꞌumbajel, y yipalik ta spasel snaik a.

²⁹ Pero te kꞌalal lok bael ta jtejklum Sodoma te jLote, koj tal kꞌajkꞌ sok azufre ta chꞌulchan y spisil a laj cham.

³⁰ Jich mismo yipalik ta spasel a te genteetik te kꞌalal ya xchiknaj tal te Nichꞌanile.

³¹ “Te tut kꞌaalil te jich ya xkꞌot ta pasele, te machꞌa moem bael ta sba te snae, y teme ay stutik yuꞌun ta yutil snae, ma me wakꞌ kouk tal ta slokꞌesel. Sok te machꞌa baem ta kꞌaltik, ma me wakꞌ sujtuk bael ta sna.

³² Naꞌaik me te yinam jLote.

³³ Te machꞌa ya sle tutꞌ ya xkol sok te xkuxlejale, ya me xchꞌay sok te xkuxlejale. Pero te machꞌa ya xchꞌay sok te xkuxlejale, jaꞌ me ya xkuxuyin stukel.

³⁴ “Ya kalbeyex, teme ta ajkꞌubal ya xkꞌot ta pasele, ay me chaꞌtul wayajtik ta jun nax wayibal, jtul ya xꞌikꞌot bael y jtul ya sjilesot.

³⁵ Sok ay cheb antstik te sjoyinej sbaik ta juchꞌunele, jtul ya xꞌikꞌot bael y jtul ya sjilesot.

³⁶ Sok ay cheb winketik te sjoyinej sbaik ta aꞌtel ta kꞌaltike, jtul ya xꞌikꞌot bael y jtul ya sjilesot —xchi te Jesuse.

³⁷ Te kꞌalal la yaꞌiyike, la sjojkꞌobeyik: —¿Ba ya xkꞌot ta pasel tsꞌin to, Kajwal? —xchiik. Te Jesuse la sjakꞌtalanbe: —Te ba ay pojol stiꞌbalul te tut chamene, teꞌ ya stsob sba tal ekꞌa te tsaꞌlose —xchi.