San Lucas 14 - Nuevo Testamento Tzeltal de Amatenango

Te Jesuse la slekutes jtul jchamel te ay ta sijtꞌubele

¹ Ta skꞌaalel kuxo-oꞌtane te Jesuse bajt ta weꞌel ta sna jtul statal fariseo. Te yan fariseoetike tal yilik tutꞌ ay te Jesuse.

² Y ay jtul winik teꞌa te ba ay te Jesuse te yichꞌoj sijtꞌubele.

³ Te Jesuse la sjojkꞌolanbe te maestroetik yuꞌun te mantaliletike sok te fariseoetike: —¿Me lek wan te ya xjuꞌ ta lekutesel jtuluk jchamel ta skꞌaalel kuxo-oꞌtane, o ma lekuk? —xchi.

⁴ Pero maꞌ kꞌopojik yuꞌun. Jich te Jesuse la yikꞌ tal te jchamele, la slekutes, y la yalbe te ya xbajte.

⁵ Sok jich a yaltalanbe te fariseoetike: —Jal tsꞌin jaꞌexe, ¿Meꞌn ma orauk xba alokꞌesik tal teme chꞌay koel ta chꞌen awakaxik o aburuik teme ta skꞌaalel kuxo-oꞌtane? —xchi te Jesuse.

⁶ Ma juꞌ yuꞌunik sujtesel te tuti altalanbote.

Te machꞌatik ikꞌtalanbil ta nujpunele

⁷ Te Jesuse la yil te machꞌatik ikꞌtalanbile te yipalik ta stꞌujel te primero naktajibal te ba mexae yuꞌun ya skꞌanik akꞌel ta kuenta. Jich a yaltalanbe ta seña-kꞌop:

⁸ —Teme ay machꞌa ya yikꞌat ta nujpunele, ma me anajkan aba te ba primero naktajibale. Ke tal ay to machꞌa ya xtal te mas aꞌbil ta jkuentae ke te tutꞌilate.

⁹ Te machꞌa yikꞌojat soke ya me yalbeyat: “Awokoluk, jajchan to, yuꞌun jaꞌ ya xnajkaj a te jtul xan to”, ya me yutat. Jich me sok kꞌexalal ya xba anajkan aba te ba último naktajibale.

¹⁰ Jaꞌ yuꞌun te kꞌalal ya yikꞌelate, teꞌ xnaklat te ba último luware. Yuꞌun te kꞌalal ya xtal te machꞌa yikꞌojate jich me ya yalbeyat: “Amigo, liꞌ xkꞌaxat tal to. Naklan liꞌ ba primero naktajibale”, ya me yutat. Jich te machꞌatik sjoyinejat ta mexae ya me yilik te tutꞌil aꞌbilat ta jkuentae.

¹¹ Porke te machꞌa ya skꞌan akꞌel ta jkuentae ma me aꞌbiluk ta jkuenta ya xkꞌot stukel. Yan te machꞌa chꞌin yakꞌoj sbae jaꞌ me ya xꞌakꞌot ta jkuenta stukel —xchi te Jesuse.

¹² Sok la yalbe te machꞌa ikꞌbil ta weꞌel yuꞌune: —Te kꞌalal ya xꞌikꞌawanat ta weꞌele, ma me jaꞌuk xꞌawikꞌ ta weꞌel te awamigotake, ni te abankiltake, ni te machꞌatik ma yanuke, ni te abersinatak te ay skꞌulejalike. Porke ya me yikꞌat ta weꞌel ta patil euk. Jaꞌ nax me sjelol ya xkꞌot te ya yikꞌat ta weꞌele.

¹³ Yan te kꞌalal ya apas kꞌine, jaꞌ me xꞌawikꞌ tal ta weꞌel te machꞌa maꞌyuk tut ay yuꞌune, sok te jtumu-kꞌabetike, sok te koxoetike, sok te choketike.

¹⁴ Jich me ben tsaꞌam alekil yuꞌun, porke ma xjuꞌ yuꞌun te ya sujtesbeyat sjelol stukelike. Pero ya me awichꞌbe sjelol te kꞌalal ya xchaꞌkuxat tal sok te machꞌatik toj yoꞌtanik ta stojol Diose —xchi te Jesuse.

Seña-kꞌop te mukꞌul kꞌine

¹⁵ Ay jtul te machꞌa nakal sok ta mexa te Jesuse te kꞌalal la yaꞌi te tut la yale, jich a yalbe: —Ben tsaꞌam slekil te machꞌa ya xꞌikꞌot ta weꞌel te ba ay ta ajwalil te Diose —xchi.

¹⁶ Te Jesuse la yalbe: —Ay jtul winik te la xchap weꞌelile y la yakꞌ ta ikꞌel tal bayal genteetik.

¹⁷ Te kꞌalal la sta yorail te kꞌine, la stikon bael yaj-mantal te ya xba yaltalanbe tal te machꞌatik ikꞌtalanbile. Jicha kꞌo yal te jmantale: “Laꞌik me, yuꞌun chapalix spisil”, xyut.

¹⁸ “Pero spisilik ay tuti smak sbaik a. Primero te jtule la yal: “Laj to nax jman lum. Ya to jkꞌan xba kil tal. Pasbon perdon, ma to xjuꞌ kuꞌun”, xchi.

¹⁹ La yal te jtul xane: “La jman joꞌchap jwakax. Ya to xba jpas prewa tut yilel ya xꞌaꞌtej. Pasbon perdon, ma to xjuꞌ kuꞌun”, xchi.

²⁰ Te jtul xane la yal: “Jnupunelon to. Ma to spas xboon”, xchi.

²¹ Te jꞌmantale sujt bael. Spisil a kꞌo yalbe te yajwale. Jich te ajwalile ilin yuꞌun, y la yalbe te yaj-mantale: “Baan ta ora te ba mukꞌul kayailtik sok ba chꞌin kayailtik te ba jtejklume. Ikꞌa tal te meꞌbaꞌetike, sok te jtumu-kꞌabetike, sok te choketike, sok te koxoetike”, xyut.

²² “Patil sujt tal te jmantale, jich a yal: “Kajwal, la jpasix te tut la awalbon baele, pero ay to jochol te naktajibale”, xchi.

²³ Jich te ajwalile la yalbe te yaj-mantale: “Baan te ba bebetike sok te ba joybil kꞌalkꞌaltike. Ikꞌa tal ta puersa te machꞌa ya atae, jich me ya xnoj a te jnae.

²⁴ Porke ya kalbeyex: Te machꞌatik a kikꞌ ta primero maꞌyuk tut ora ya xꞌaꞌbot skꞌupinik te weꞌel chapal kuꞌune”, xchi te ajwalile —xchi ta yalel te Jesuse.

Te tutꞌil ay swokolil ta chꞌuunel te Cristoe

²⁵ Ay bayal genteetik stsꞌakliyejik te Jesuse. Te Jesuse sujt skꞌopon, jich a yalbe:

²⁶ —Te machꞌa ya xtal ta jtojole, teme ma xchꞌoj ta yoꞌtan te smeꞌ-state, te yiname, te xnichꞌnabe, te sbankiltake, te xwixitake, te yijtsꞌinabe, sok te skuxlejal ta balmilale, ma spas te jnopojel kuꞌun ya xkꞌote.

²⁷ Sok te machꞌa ma skꞌan ya xkuch skruz kꞌoeme teme ya stsꞌakliyone, ma spas teme jnopojel kuꞌun ya xkꞌote.

²⁸ “Teme ay jtuluk te jaꞌexe teme ya skꞌan spas junuk torree, ¿meꞌn ma wan nailuk ya snajkan sba ta snopel teme tik ya xjuꞌ a te jayeb takꞌin stsoboje?

²⁹ Jich teme jaꞌ nax ya slijkes te simientoale y ta patil teme ma juꞌ yuꞌun sjuꞌutesele, spisil te machꞌatik ya yilike ya me xlijk ikꞌtinek yuꞌun.

³⁰ Ya me yalik: “Te winik to lijk spas, pero maꞌ juꞌ yuꞌun sjuꞌutesel”, xchiik me.

³¹ “Sok teme ay jtul rey teme ya skꞌan xba yaꞌbe sba sok guerra te jtul xan reye, ¿me ma wan nailik ya xba snajkan sba ta snopel teme ya xjuꞌ yuꞌun sok te diez mil yaj-soltaro te ya xba stsal ta guerra te beinte mil soltaroetik yuꞌun te skontrae?

³² Teme ma xjuꞌ yuꞌun ya yaꞌiye, teme jakal to ay tal a te jtul xan reye, ya me stikon bael yaj-mantal ta skꞌanel paz ta skomel te kꞌope.

³³ Jaꞌ yuꞌun machꞌauk a te jaꞌexe teme ma xꞌajiles ta awoꞌtanik spisil te tut ay awuꞌunike, ma spas te jnopojel kuꞌun ya xkꞌote.

Te kꞌalal ya xchꞌay xchiꞌil te atsꞌame

³⁴ “Te atsꞌame lek ay, pero teme chꞌay te xchiꞌile, ¿tutꞌil kꞌan chiꞌubuk xan?

³⁵ Ni ma xtuunix yuꞌun a te lume sok ma xkꞌaꞌix yuꞌun a te kꞌaꞌpale. Jmel ya xchꞌojot lokꞌel ta jwera. Te machꞌa ay xchikine a me yaꞌibe sluwaril —xchi te Jesuse.