San Lucas 12 - Nuevo Testamento Tzeltal de Amatenango

Te Jesuse la yalbe skꞌoplal te ma-tsaꞌamuk-oꞌtanile

¹ Jich ora a stsob sbaik tal bayal genteetik te ba ay te Jesuse. Stenten sbaik tal ta stojol. Jich te Jesuse lijk yalbe primero te jnopojeletik yuꞌune: —Ila me abaik sok te levadura yuꞌun te fariseoetike, jaꞌ bi, jaꞌ te tutꞌil ma tsaꞌamuk yoꞌtanike.

² Porke maꞌyuk te tut nakꞌal te ma xchiknaje sok maꞌyuk tut a te mukul te ma xꞌakꞌot ta aꞌiyele.

³ Spisil te tuti awalojik ta ijkꞌal kꞌinale, ya me xꞌaꞌiyot sluwar ta sakil kꞌinal. Jich te tut mukul la awal ta yutil anae, jaꞌ me ya xꞌawutayot ta sbaba nantik.

Machꞌa a te ya skꞌan xiꞌele

⁴ Te jaꞌex, te kamigo jbatike, ya kalbeyex ma me xiꞌanik yuꞌun te machꞌa ya smilbeyex te atibalulike, pero ta patil maꞌyuk tut ya xjuꞌ ya spasbeyex xan.

⁵ Joꞌon ya kalbeyex te machꞌa ya skꞌan ya axiꞌike: Jaꞌ me xꞌaxiꞌik te machꞌa ya xjuꞌ yuꞌun ya smilate sok te ay yaꞌtel te ya xjuꞌ ya yakꞌex bael ta kꞌajkꞌ te ma xtupꞌ sbajtel kꞌinale. Batsꞌi jich ya kalbeyex: Jaꞌ me xꞌaxiꞌik stukel.

⁶ ¿Meꞌn ma wan chebuk pesu stojol ta chonel te joꞌkojt chꞌin mutetike? Pero ni jkojtuk ya xchꞌay ta yoꞌtan te Diose.

⁷ Jich euk te jaꞌexe, asta te stsotsil ajolike ajtabil yuꞌun ta jujulijk. Jaꞌ yuꞌun ma me xiꞌanik te jaꞌexe. Mas me tulan akꞌoplalik ta yoꞌtan ke te chꞌin mutetike.

Aꞌ me kaltik ta jamal te jchꞌuunejtik te Jesucristoe

⁸ “Ya kalbeyex, te machꞌa jamal ya yal ta stojol genteetik te tutꞌil joꞌon yajwalone, jich euk te Nichꞌanile, jamal me ya yal ta stojol te chꞌul angeletik yuꞌun te Diose te tutꞌil ay ta skuentae.

⁹ Yan te machꞌa ma jamaluk ya yalon ta stojol te genteetike, jich euk te joꞌone ma jamaluk ya kal ta stojol te chꞌul angeletik yuꞌun te Diose.

¹⁰ Dios ya spasbot perdon yuꞌun te machꞌa ya skontra-kꞌoptay te Nichꞌanile. Yan te machꞌa ya stoyba-kꞌoptay te Chꞌul Espiritue ma xjuꞌ ya spasbot perdon yuꞌun stukel.

¹¹ “Te kꞌalal ya yikꞌelex bael ta sinagogaetike, o teme ya stejkꞌanelex ta stojol te alkaletike, sok ta stojol te juꞌeletike, ma me xꞌawakꞌ yajtal awoꞌtanik yuꞌun te tut ya skꞌan ya ajakꞌbeyik te skꞌopike sok te tut xkꞌo awalike.

¹² Porke te kꞌalal ya sta yorail te ya xkꞌopojexe, te Chꞌul Espiritue ya me yaꞌbeyex anaꞌik te tut xkꞌo awalike —xchi te Jesuse.

Ay peligro yuꞌun te kꞌulejalile

¹³ Ay jtul winik ta yolil te genteetike la yalbe te Jesuse: —Maestro, albeya te jbankile te yauk yaꞌbon oliluk euk te tut yakꞌojbon sok jilel te jtate —xchi.

¹⁴ Te Jesuse la sjakꞌbe: —Kere, ¿meꞌn ay machꞌa yakꞌojbon kaꞌtel ta xchapel o ta xatꞌel te stutik yuꞌun atate? —xchi.

¹⁵ Sok la yaltalanbe: —Ila me abaik te jaꞌexe, ma me xbikꞌta awoꞌtanik yuꞌun te kꞌulejalile. Porke ma jaꞌuk ya xkuxuyinat yuꞌun teme ay bayal tut ay awuꞌune —xchi te Jesuse.

¹⁶ Jich a lijk yaltalanbe seña-kꞌop: —Ay jtul jkꞌulej winik te lom bayal skꞌal te lom lek a lokꞌ te skosechae.

¹⁷ Te jkꞌulej winike lijk ta pensar: “¿Tut ya skꞌan ya jpas? Yuꞌun maꞌyuk ba ya jkꞌej te jkosechae.”

¹⁸ Nojp yuꞌun tsꞌiin: “Te ora to la jnaꞌix tut ya jpas. Ya me jim spisil te yawil kixime. Ya me jpas mas mukꞌ. Yuꞌun teꞌ ya jkꞌej spisil a te jkosechae sok spisil te tutik ay kuꞌune.

¹⁹ Y ya me kalbe te jchꞌulele: ‘Jchꞌulel, bayalix te tut kꞌejel awuꞌune, yuꞌun ya xtuun awuꞌun bayal jaꞌbil. Ya jkux koꞌtantik. Weꞌukotik, uchꞌaukotik. Ben junuk koꞌtantik yuꞌun’”, xchi ta yoꞌtan.

²⁰ Pero albot yuꞌun te Diose: “Ma xꞌanaꞌ kꞌinal. Mismo ajkꞌubal to ya me xchamat. Spisil te tut kꞌejbil awuꞌune, ¿machꞌa me ya yichꞌbeyat jilel?” xchi te Diose.

²¹ Jich me ya xkꞌot te winik teme jaꞌ nax baem yoꞌtan stsobel te skꞌulejal te ya xtuun yuꞌun stukel naxe, pero meꞌbaꞌ ta stojol Dios —xchi te Jesuse.

Dios ya skanantay te yal-xnichꞌane

²² Ta patil te Jesuse jicha yalbe te jnopojeletik yuꞌune: —Jaꞌ sluwar te ya kalbeyexe, ma me xꞌawakꞌ yajtal awoꞌtanik yuꞌun te tut ya xkuxuyinexe, ni te tut ya aweꞌike ni te akꞌuꞌ-apakꞌik te ya alapike.

²³ Jaꞌ mas tulan skꞌoplal te akuxlejalike ke te tut ya aweꞌike. Y mas tulan skꞌoplal te atibalulike ke te akꞌuꞌ-apakꞌike.

²⁴ Ila awilik tut kuxajtik te jokjok mutetike. Makꞌ xꞌawalejik, sok ni makꞌ xkꞌajojinik, sok maꞌyuk yawil yiximik, sok maꞌyuk yawil stutik yuꞌunik. Pero jaꞌ makꞌlilanbil yuꞌun te Diose. Yan te jaꞌexe mas baleex ke te mutetike.

²⁵ Sok ¿meꞌn ya wan xjuꞌ awuꞌun te ya anajtꞌutes aba xan chꞌin kꞌaxem chaꞌjot teme lom yajtal awoꞌtan te lom kꞌoxate?

²⁶ Teme ma xjuꞌ awuꞌun spasel te tut chꞌin skꞌoplale, ¿tuꞌun te ya awakꞌ yajtal awoꞌtan yuꞌun te yan tutike?

²⁷ “Ila me awilik te tutꞌil ya xchꞌi te nichimetike. Makꞌ xꞌaꞌtejik ni makꞌ sjal skꞌuꞌ-spakꞌik. Pero ya kalbeyex manchuk me ben tsaꞌam te skꞌuꞌ-spakꞌ te rey Salomone, pero maꞌ spajbe tsaꞌamul te nichim to.

²⁸ Yuꞌun teme Dios a yakꞌ te ben tsaꞌam te xnichimul te witse y ta pajel chijkꞌix ta yawil kꞌajkꞌ a, ¿me yuꞌun wan ma jichuk ya skꞌuꞌultesex te jaꞌexe? Genteex te ma xchꞌuun awoꞌtanike.

²⁹ Jaꞌ yuꞌun te jaꞌexe ma me xꞌawakꞌ yajtal awoꞌtanik sleel te tut ya aweꞌ sok ya awuchꞌike.

³⁰ Porke spisil te tutik to jaꞌ nax baem ta yoꞌtanik sleel te machꞌatik ma snaꞌbe sba te Diose. Yan te jaꞌexe ay jtul Atatik te snaꞌoj te tutik ya xtuun awuꞌunike.

³¹ Te jaꞌexe jaꞌ me xꞌawajwalinik stukel te Diose, y ya me awichꞌik spisil te tutik to.

Kꞌulejalil ta chꞌulchan

³² “Ma me xiꞌanik, karneraetik kuꞌun, jaꞌex te ma bayalukexe. Te Jtatike ben jun yoꞌtan ya yakꞌex teꞌa te ba ya xmantaleje.

³³ Chonaik te tut ay awuꞌunike, y kꞌebenbeya te meꞌbaꞌetike. Leaik yawil atakꞌinik te ma xꞌixtaje. Kꞌejaik ta chꞌulchan te akꞌulejalik te makꞌ xlaje, te makꞌ xꞌoch elekꞌ aye, sok te ba makꞌ xjochꞌube.

³⁴ Yuꞌun te ba kꞌejbil te akꞌulejalike, teꞌuk me ay ekꞌa te awoꞌtanike.

Chapalukotik me

³⁵ Chapalukex me sil tiempo sok tilemuk akꞌajkꞌik kꞌoem.

³⁶ Jichukex me te tutꞌil te jꞌaꞌteletik te chapajtik ta smaliyel te yajwalik te baem ta il-nujpunele, te ora ya sjeꞌbeyik te stiꞌpuerta te kꞌalal ya xjul skꞌojkꞌutay te puertae.

³⁷ Ben tsaꞌam slekil te jꞌaꞌteletik te kuxul yoꞌtanik ya xjul taek yuꞌun te yajwalike. Jamal ya kalbeyex, te yajwalike ya me xchap sba, ya me yakꞌ sba ta mantaltesel yuꞌunik, ya me yikꞌ tal ta mexa, y ya me xꞌaꞌbot sweꞌelik yuꞌun.

³⁸ Ben tsaꞌam slekilik teme kuxul yoꞌtanik ya xjul tajtalaneke manchuk me ta ol ajkꞌubal o ta nopol sakub xjul tajtalanek te jꞌaꞌteletike.

³⁹ Naꞌbeyaik me sluwaril to: Jich tutꞌil te yajwal nae te yauk snaꞌ tut ora xtal te jꞌelekꞌe, ma xyakꞌ ta jeꞌel te sna te jichuke, yuꞌun makꞌ xꞌelkꞌanbot bael te stutik yuꞌune.

⁴⁰ Jich euk te jaꞌexe, chapalukex me ta maliwanej, porke te Nichꞌanile, jaꞌ ya xtal a te makꞌ ya amaliyik aye —xchi te Jesuse.

Te lekil jꞌaꞌtele sok te ma lekil jꞌaꞌteluke

⁴¹ Te jPedroe la sjojkꞌoy: —Kajwal, ¿me joꞌotik nax ya awalbotik te seña-kꞌop to, o ta spisil ya awalbe te yan xane? —xchi.

⁴² La yal te Kajwaltike: —Te lekil jkanan te ay spꞌijil yoꞌtane, ya xꞌaꞌbot ta skuenta te tutik ay yuꞌun ta sna te yajwale, yuꞌun ya spukbey te tutik ya sweꞌik te juju-chꞌoj te ya yichꞌike.

⁴³ Ben me tsaꞌam slekil te aj-aꞌtelil te jich yipal ta spasel a te kꞌalal ya xjul taek yuꞌun te yajwale.

⁴⁴ Batsꞌi jich ya kalbeyex, te yajwale ya me yaꞌbe skanantay spisil te tutik ay yuꞌune.

⁴⁵ Pero te aj-aꞌtelile teme lijk yal ta yoꞌtan: “Ma to wan xtal ta ora te kajwale”, tem xchie, ya xlijk yutalan te yan jꞌaꞌteletike sok te kriaraetike, y ya xlijk ta weꞌel uchꞌajel sok ta yakꞌubel.

⁴⁶ Ja skꞌaalel a te makꞌ smaliye, sok te tut ora chꞌayem yoꞌtan ta smaliyel aye, ya xkꞌot te yajwale. Ya me yaꞌbe kastigo. Teꞌ me ya xbajt a te ba ya xbajt te machꞌatik te ma xchꞌuunejuk te Diose.

⁴⁷ Jich te jꞌaꞌtele te snaꞌoj te tut ya skꞌan yoꞌtan te yajwale pero ma chapaluk ni ma xchꞌuun, ya me xꞌaꞌbot stoj ta majel.

⁴⁸ Yan te jꞌaꞌtel te ma snaꞌojuk te tut ya skꞌan yoꞌtan te yajwale, te jaꞌ a spas te tut ay kastigo yuꞌune, chꞌin nax me ya stoj ta majel stukel. Te machꞌa bayal tut ya xꞌaꞌbote, bayal me te tut ya xkꞌambote. Jich euk te machꞌa bayal tut ya xꞌaꞌbot skanantaye, jich me bayal ya xkꞌambot sujtel stukel.

Te Jesuse ya yakꞌ xjatꞌ sbaik te genteetike

⁴⁹ Tal kakꞌ tiluk kꞌajkꞌ ta balmilal. Koꞌtanuk te tilemixe.

⁵⁰ Pero puersa me ya xkꞌax bayal jwokol nailuk. Beno yajtal koꞌtan yuꞌun. Koꞌtanuk te kꞌaxemukixe.

⁵¹ ¿Meꞌn ya akuyik te tal kakꞌ bujtsꞌan kꞌinal ta balmilale? Ya kalbeyex te ma jichuke. Tal kakꞌ xjatꞌ sba te genteetike.

⁵² Jaꞌ yuꞌun liꞌ nax kꞌalal to te ba ay joꞌtul ta snaike, ya me xjatꞌ sbaik. Te oxtule ya me skontrain te chaꞌtule, y te chꞌatule ya me skontrain te oxtule.

⁵³ Te tatile ya skontrain te xnichꞌane. Te nichꞌanile ya me skontrain te state. Te meꞌile ya me skontrain te yantsil-ale. Te yantsil-ale ya me skontrain te smeꞌe. Te meꞌalibale ya me skontranin te yalibe y te alibale ya me skontrain te smeꞌ yalibe —xchi te Jesuse.

Te señaetik tut ay te tiempoe

⁵⁴ Te Jesuse la yaltalanbe te genteetike: —Kꞌalal ya awilik te ay tokal te ba xchꞌay bael kꞌajkꞌale, jich ya awalik te ya xtal jaꞌale, y jich ya xkꞌot ta pasel.

⁵⁵ Y te kꞌalal ya xtal ikꞌ ta stojil sur, jich ya awalik: “Lom kꞌux kꞌajkꞌal yoꞌtik”, xchaꞌex, y jich ya xkꞌot ta pasel.

⁵⁶ Te jaꞌexe, te ma tsaꞌamuk awoꞌtanike, teme ya anaꞌik yilel tut ay te chꞌulchan y sok te balmilale, ¿tuꞌun tsꞌiin te ma xꞌanaꞌik tut yipal ta kꞌoel ta pasel te ora to?

Chapa aba sok te kontrae

⁵⁷ “¿Tuꞌun te ma xjuꞌ awuꞌunik snopel te tut lek ta pasele? Teme ay machꞌa ya yikꞌat bael te ba ay te jꞌuꞌeletike, chapa aba sok nailuk mientras ay to tiempo, yuꞌun makꞌ yikꞌat bael a te ba alkale.

⁵⁸ Porke te mauke, te alkale ya yakꞌat bael entregal ta skab te mayole, y te mayole ya me yotsesat ta prexo.

⁵⁹ Ya kalbeyat, ma me xlokꞌat tal teꞌa jaꞌ to teme tsꞌakal la atoj te amultae —xchi te Jesuse.