San Lucas 1 - Nuevo Testamento Tzeltal de Amatenango

Tut sluwaril te la yichꞌ pasel te jun to

¹ Ayix bayal machꞌa la stsꞌibayik ta jun ta skajalskaj te tut kꞌot ta pasel ta jtojoltike.

² La stsꞌibayikix jilel te tuti yalbelotik kaꞌitik ta jpisiltik yuꞌun te machꞌatik la yilik ta sitik ta slijkibale te la yichꞌik yaꞌtelik ta yalel ta bayuk te tuti kꞌot ta pasel ta slijkibal tale.

³ Jich euk te joꞌone, Teófilo te ben lek awoꞌtane, la kalix ta koꞌtan te jaꞌ lek ya jtsꞌibabeyat awil spisil te tut skajalskaj te kꞌot ta pasele. La jojkꞌoyix ta lek te tutꞌil ay ta slijkibal tale.

⁴ Jich me yaꞌ anaꞌbe sluwaril ta lek te tut batsꞌi jich nojpesbilate.

Jtul chꞌul ángel la yal te ya xꞌayin te Juan Akꞌ-ichꞌjaꞌe

⁵ Te kꞌalal ochem ta reyil a te jHerodes te ba Judeae, ay jtul saserdote te Zacarias sbiile te jaꞌ sgrupo te jꞌAbiase. Te yiname sꞌElisabet sbiil, te jaꞌ stsꞌumbal te antibo saserdote jꞌAarone.

⁶ Ta xchebalik lek yaꞌtelik ta stojol te Diose. Xchꞌuunejbeyik spisil te smantal te Kajwaltike, jaꞌ yuꞌun ma xwejtꞌ ta leel te smulike.

⁷ Pero maꞌyuk yuntikilik, yuꞌun ma xꞌalaj te sꞌElisabete. Lom mamalix y lom meꞌelix ta xchebalik.

⁸ Ay jun kꞌaal la sta sturno ta abatinel ta stojol Dios te ba templo te Zacarias sok te jtijkꞌ saserdoteetik yuꞌune.

⁹ Jich tutꞌil skostumbreik te saserdoteetike, la yichꞌ tsael ta numeroetik te Zacariase te ya xꞌoch ta xchikꞌel pom ta yutil templo yuꞌun te Kajwaltike.

¹⁰ Yipal ta xchikꞌel a te pome, sok spisil te jtejklume yipalik ta skꞌoponel Dios ta yamakꞌul te temploe,

¹¹ ay jtul chꞌul ángel yuꞌun te Kajwaltik chiknaj ta stojol te Zacarias teꞌae. Tekꞌel ta sbatsꞌil skajanibal xchijkꞌil pom.

¹² Te kꞌalal la yil te chꞌul ángele, te Zacariase toj cham a yaꞌi, y xtꞌuxtꞌun lijkel yoꞌtan.

¹³ Pero te chꞌul ángele la yal: —Zacarias, ma me xiꞌan, yuꞌun te Diose yaꞌiyojbeyatix te akꞌope. Te awinam sꞌElisabete ya mex ayin xchꞌin yal, y te xchꞌin yale Juan me ya awaꞌbe sbiilin.

¹⁴ Ben me sniꞌ xꞌawaꞌiy yuꞌun, y bayal me machꞌa ben sniꞌ xyaꞌiyik yuꞌun te tut ora ya xꞌayine.

¹⁵ Yuꞌun te anichꞌane mukꞌ me ya xkꞌot ta sit te Diose. Makꞌ me yuchꞌ bino sok te yanetik uchꞌbalile. Nojelix ta yoꞌtan te Chꞌul Espíritu te tut ora ya xꞌayine.

¹⁶ Ya me sujtesbe yoꞌtan bayal ta jtul te alumal Israel ta stojol te Kajwaltik Dios awuꞌunike.

¹⁷ Te Juane ya me xnalaj ta yalel skꞌoplal te Kajwaltike. Jich me yoꞌtan te tutꞌil te jꞌElias te antibo jꞌalwaneje, y pajal me yaꞌtel sok. Ya me yakꞌ jelonuk xkuxlejalik te meꞌil-tatiletike sok te yuntikilike, sok ya me yaꞌbe snopik xchꞌuunel mantal te jkꞌaxintayej-mantaliletike. Jich me chapalix yoꞌtanik a te jtejklume te ya smaliyik a te Kajwaltike —xchi te chꞌul ángele.

¹⁸ Te Zacariase la sojkꞌobe te chꞌul ángele: —¿Tutꞌil ya jnaꞌbe sluwaril teme jich ya xkꞌot ta pasele? Yuꞌun lom mamalonix y lom meꞌelix euk te kiname —xchi.

¹⁹ Te chꞌul ángele la sjakꞌ: —Joꞌon Gabrielon te ayon ta abatinel yuꞌun te Diose. Stukel a stikonon tal ta atojol yuꞌun tal kalbeyat te tut lek ya xꞌkot ta pasel ta atojole.

²⁰ Pero ma la achꞌuun. Jaꞌ yuꞌun ya me xkꞌajtajat ta umaꞌ. Ma xlokꞌ akꞌop jaꞌ to te tut ora ya sta skꞌaalel te tuti kalixe —xchi te chꞌul ángele.

²¹ Yan te genteetik yuꞌun te jtejklume yipalik ta smaliyel ta yamakꞌul templo te ya xlokꞌ tal te Zacariase. Lijk sojkꞌobe sbaik yuꞌun ma xlokꞌ tal ta ora te ba yutil temploe.

²² Kꞌalal lokꞌ tal tsꞌin te Zacariase, ma lokꞌix skꞌop ta skꞌoponel a te jtejklume. Jich a snaꞌbeyik sluwar te yuꞌun ay tuti yil ta yutil te temploe. La xanix xbechulan skꞌab ta seña ya yil te jtejklume, jich a spasulan yuꞌun ma xlokꞌix skꞌop a.

²³ Kꞌalal tsꞌakay te jayeb kꞌaal ay ta abatinel ta temploe, te Zacariase sujt bael ta sna.

²⁴ Te nax abi te yinam sꞌElizabet sbiile ay tuti sta. Joꞌeb u maꞌyuk a lokꞌ ta sna. Jich la yal ta yoꞌtan:

²⁵ “Te Kajwaltike ay tut yakꞌojbonix te ora to. Te genteetike makꞌ spꞌajikonix a”, xchi te yoꞌtane.

Jtul chꞌul ángel ya yal te ya xꞌayin te Jesuse

²⁶ Ayix wakeb u a te tut staoj te sꞌElisbete, tikunot xan yuꞌun Dios te chꞌul ángel Gabriel ta jtejklum Nazaret te ay ta estado Galileae.

²⁷ Ba skꞌopon jtul soltera achꞌix teꞌa te xMaria sbiile, te makbilix yuꞌun jtul winik te ya xnujpun soke te Jose sbiil te stsꞌumbal te rey Davide.

²⁸ Te kꞌalal och kꞌoel te chꞌul ángel te ba ay te xMaria, jicha kꞌo yalbe: —Xkoltanukat, jaꞌat te kꞌuxutaybilat yuꞌun te Diose. Te Kajwaltike sjoyinejat. Maꞌyuk yan ants jich aꞌbil bendision ta stojol te tutꞌilate —xchi.

²⁹ Te xMaria la yakꞌ yajtal yoꞌtan yuꞌun te tuti yal te chꞌul ángele, y bayal a yal ta yoꞌtan tut sluwar te spajtil yoꞌtan yuꞌun te chꞌul ángele.

³⁰ Albot xan yuꞌun: —Maria, ma me xiꞌan. Ya me awichꞌ kꞌuxutayel yuꞌun te Diose.

³¹ Ora to ay me tut ya ata. Ya me xꞌayin achꞌin kerem. Jesus me sbiil ya awaꞌbe.

³² Mukꞌ me ya xkꞌot sok Xnichꞌan te Chꞌul Dios ay ta chꞌulchan xchi te sbiil ya xkꞌote. Te Kajwaltik Diose ya me yaꞌbe yaꞌtel ta reyil. Jaꞌ me sjelol ya xkꞌot te antibo rey David te jaꞌ stsꞌumbale.

³³ Sbajtel me kꞌinal ay ta reyil ta stojol te nasion Israele. Maꞌyuk tut ora ya xlaj yaꞌtel ta reyil —xchi te chꞌul ángele.

³⁴ Te xMariae la sjojkꞌobe te chꞌul ángele: —¿Tutꞌil ay sluwar te jich ya awalbone? Ma to ayuk jmamlal —xchi.

³⁵ Te chꞌul ángele la sjakꞌ: —Ya me xjul ta akuenta te Chꞌul Espiritue. Ya me yaxintesat ta spoder te Chꞌul Dios te ay ta chꞌulchane. Jich te alal te ya xꞌayin awuꞌune, yuꞌun Dios stukel sok Xnichꞌan Dios ya xkꞌot te sbiile.

³⁶ Sok ya kalbeyat awaꞌi: Te awermana sꞌElisabete ay me tut staojix euk, aunke lom meꞌelix. Manchuk me albil skꞌoplal te makꞌ xꞌalajixe, pero swakebalix u te ay tut staoje.

³⁷ Te Diose maꞌyuk tut ma xjuꞌ yuꞌun stukel —xchi te chꞌul ángele.

³⁸ Te xMariae la yal: —Lek ay, yabaton te Kajwaltike. Jicha wakꞌ spasbon Dios te tut ya awalbone —xchi te xMariae. Jicha sujt bael te chꞌul ángele.

Te xMariae ba yuluꞌtay tal te sꞌElisabete

³⁹ Ma jaluk kꞌaal ta patil te bajt ta jtejklum ta witstikil ta estado Judea te xMariae.

⁴⁰ Och kꞌoel ta sna te Zacariase, kꞌo spatbe yoꞌtan te sꞌElisabete.

⁴¹ Te kꞌalal patbot yoꞌtan te sꞌElisabete, la snik sba te xchꞌin-baale. Te sꞌElisabete noj ta yoꞌtan te Chꞌul Espiritue,

⁴² y ben tulan a kꞌopoj. Jich a yal: —Dios yakꞌojbeyat bendision ke te yan antstike. Sok yichꞌoj bendision euk te achꞌin-wale.

⁴³ ¿Tutꞌil ayon a te jaꞌat a tal awuluꞌtayone te smeꞌat te Kajwale?

⁴⁴ Yuꞌun te kꞌalal jul apatbon koꞌtane, te jchꞌin kal te kikꞌoje nijk yuꞌun sbujtsꞌ yoꞌtan.

⁴⁵ Ben me tsaꞌam alekil yuꞌun te la achꞌuumbe skꞌop te Kajwaltike. Jich me ya xkꞌot ta pasel te tuti yalixe —xchi te sꞌElisabete.

⁴⁶ Te xMariae la yal: —Te koꞌtane ya skꞌayojimbe slekil te Kajwale.

⁴⁷ Ben jun koꞌtan ta stojol te Dios te jkoltawane kuꞌune. Porke Dios teꞌe sit a te ba ayone, manchuk me chꞌin ayon te yabatone.

⁴⁸ Ta ora bael to spisil te genteetike ya me yalik te ben tsaꞌam jlekile.

⁴⁹ Porke te Dios te spisil ya xjuꞌ yuꞌune mukꞌ te tutik yakꞌojbone. Chꞌul Dios sbiil stukel.

⁵⁰ Ya me skꞌuxutay spisil ta jkaj te genteetik teme ya xꞌakꞌot ta jkuenta yuꞌune.

⁵¹ Yuꞌun mukꞌ te tut spasoj ta spodere. La sjimbeyix te tut snopoj te machꞌatik te ya stoy sbaik ta yoꞌtanike.

⁵² La skoesix ta snaktajib te reyetike, yan te machꞌatik chꞌin ayike la smukꞌutesbeyix skꞌoplal stukele.

⁵³ Te machꞌatik ayik ta wiꞌnale la snojesbeyix xchꞌujtꞌik ta lekil weꞌelil. Yan te machꞌatik jkꞌulejetike maꞌyukix tutiꞌ yaꞌbe bael ta skꞌab.

⁵⁴ La skoltay te jtejklum Israel te yaj-aꞌtele, y ma chꞌay ta yoꞌtan te ya to xkꞌuxutaye.

⁵⁵ Jich yalojbe euk te antibo jmeꞌ-jtatike, jaꞌ to te jꞌAbrahame sok spisil te stsꞌumbal sbajtel kꞌinale —xchi te xMariae.

⁵⁶ Te xMariae ay wan oxeꞌ u a soyin te sꞌElisabete. Patil a sujt bael ta sna.

Ayin te Juan Akꞌichꞌjaꞌe

⁵⁷ La sta yuil te ya xꞌayin xchꞌin yal te sꞌElisbete. Kerem te xchꞌin yale.

⁵⁸ Kꞌalal la yaꞌiyik te sbersinatake sok te machꞌatik ma yanuke te tutꞌil bayal kꞌuxutaybil yuꞌun te Kajwaltike, ba yuluꞌtayik. Ben jun yoꞌtanik sok te sꞌElisabete.

⁵⁹ Waxkebix kꞌaal a la yikꞌik bael ta yichꞌel sirkunsision ta stiꞌbalul te chꞌin kereme. Kꞌan yaꞌbeyik sjelolin sbiil te state, jaꞌ te Zacariase.

⁶⁰ Yan te smeꞌ te alale la yal: —Njuꞌu. Puersa Juan ya sbiilin —xchi.

⁶¹ La sjakꞌik: —¿Tuꞌun te jich ya awaꞌbe sbiile? Yuꞌun maꞌyuk machꞌa jich sbiil te machꞌa ay awuꞌune —xchiik.

⁶² Jicha sjojkꞌobeyik te state ta seña skꞌabik te tut sbiil ya yaꞌbe te xnichꞌane.

⁶³ Jich te state la skꞌan tal jlejch chꞌujteb, yuꞌun ya stsꞌibay a te tut sbiil ya xkꞌote. Teꞌ stsꞌibay a: “Juan xchi te sbiile.” Spisilik toj cham a yaꞌiyik.

⁶⁴ Te kꞌalal laj yoꞌtan ta stsꞌibayele te Zacariase, jam stiꞌ. Lijk yalbe kola yal te Diose.

⁶⁵ Spisil te sbersinatake aꞌabiyan yoꞌtanik yuꞌun. Pujk skꞌoplal ta spisil witstikil ta estado Judea te tutꞌil jicha kꞌot ta pasele.

⁶⁶ Spisil te machꞌatik la yaꞌiybe sluware la snaꞌulan ta yoꞌtanik sok la sjojkꞌobe sbaik: —¿Tut me yilel ya xkꞌot ta patil te chꞌin alal to? —xchiik. Porke la snaꞌbeyik sluwar te joyimbil yuꞌun te Kajwaltik te chꞌin alale.

Te skꞌayoj te Zacariase

⁶⁷ Te Zacariase te stat te chꞌin alale, noj ta yoꞌtan te Chꞌul Espiritue. Lijk yalbey ta skuenta te Diose, jich a yal:

⁶⁸ Ben tsaꞌam slekil te Kajwaltik Dios yuꞌun te Israele. Yuꞌun tal slebotik jkoleltik joꞌotik te jtejklumotik yuꞌune.

⁶⁹ La stikombotik tal jkoltawane te ay spodere te jaꞌ stsꞌumbal te jDavid te yaj-aꞌtele.

⁷⁰ Jich te tutꞌil yaloj ta stojol te antibo chꞌul jꞌalwanejetik yuꞌune

⁷¹ te ya skoltayotik lokꞌel ta skꞌab te jkontratike sok ta skꞌab te machꞌatik ya spꞌajotike.

⁷² Yaloj te ya xkꞌuxutay te antibo jmeꞌjtatike, sok te ma xchꞌay ta yoꞌtan te chꞌul trate yaloje.

⁷³ Jaꞌ te jmel nax yaloj ta stojol te antibo jtatik Abrahame

⁷⁴ te ya me skoltayotik tal lokꞌel ta skꞌab te jkontratike. Jich me maꞌyuk machꞌa ya xiꞌotik yuꞌun teme ya kakꞌ jbatik ta mantaltesel yuꞌune.

⁷⁵ Jich lek kaꞌteltik sok jun koꞌtantik ta stojol te jayeb kꞌaal kuxulotike.

⁷⁶ I te jaꞌate, jchꞌin-nichꞌan, jꞌalwanej ya xkꞌoat yuꞌun te Chꞌul Dios te ay ta chꞌulchane. Ya me xnalajat bael ta xchapbeyel sbe te Kajwaltike.

⁷⁷ Ya me awaꞌbe snaꞌik sluwar te jtejklum yuꞌune te tutꞌil ya spastalanbot perdon yuꞌun te smulike. Jich me ya sta skolelik sbajtel kꞌinal.

⁷⁸ Porke te Dios kuꞌuntike, ta skuenta te slekil yoꞌtane, ya yakꞌ lokꞌuk tal kꞌalal ta chꞌulchan te machꞌa ya yakꞌ sakubuk kꞌinal ta jtojoltike.

⁷⁹ Ya me yakꞌ sakubuk kꞌinal ta stojol te machꞌatik ayik ta ijkꞌal kꞌinal sok ayik ta yaxinal lajele. Sok ya me stojutesotik bael ta sbelel te sbujtsꞌan kꞌinale —xchi te Zacariase.

⁸⁰ Chꞌi te chꞌin kereme, y la yichꞌ spuersa te yoꞌtane. Bajt ta tꞌantꞌan luwar jaꞌto te kꞌalal la yakꞌ sba ta ilel ta stojol te jꞌisraeletike.