San Juan 9 - Nuevo Testamento Tzeltal de Amatenango

Te Jesuse la slekutes jtul winik te chok a ayine

¹ Te kꞌalal yipal kꞌael ta kꞌaxel ta jun luwar a te Jesuse, la yil jtul winik te chok ayineme.

² Te jnopojeletik yuꞌune la sjojkꞌobeyik: —Maestro, ¿tut yuꞌun te chok a ayin te winik to? ¿Me jaꞌ smul te state o stukel ta smul? —xchiik.

³ Te Jesuse la sjakꞌtalanbe: —Ma ta skajuk smul, ni ma ta skajuk smul te smeꞌ-state. Yuꞌun nax jich ya xꞌakꞌot ta ilel te tut ya xjuꞌ ya spas a te Diose.

⁴ Te tutꞌil ayotik to ta kꞌajkꞌaltike, puersa me ya jpasbe yaꞌtel te Machꞌa la stikonon tale. Yuꞌun ya xꞌijkꞌub te kꞌinale, te kꞌalal maꞌyukix machꞌa ya xꞌaꞌtej ae.

⁵ Te tutꞌil liꞌto ayon ta balmilale, joꞌon sakil kꞌinalon yuꞌun te genteetik ta balmilale —xchi.

⁶ Laj yoꞌtan ta yalel a to, te Jesuse la stubutay koel te lume. La spas ta ajchꞌal te yaꞌlel stiꞌe, y la sbekbe ta sit te choke.

⁷ Te nax a la yalbe: —Baan, ban poka asit lum ba estanke yuꞌun Siloe sbiile —xyut. Te Siloee, “Tikonbil”, xchi kꞌoem. Te choke bajt ba spokel sit, y te kꞌalal sujt baele ya yilix kꞌinal a.

⁸ Te sbersinatake sok te machꞌatik ilbil yuꞌun te ya xkꞌanbaje la sjojkꞌobe sbaik: —¿Me ma wan jaꞌuk te ya snajkan sba ta kꞌanojel to? —xchiik.

⁹ Ay yan la yalik: —Jaꞌ a nix a —xchiik. Te yane la yalik: —Manchuk me pajal sok, pero ma jaꞌuk —xchiik. Pero stukel mismo la yal sba: —Joꞌon a nix a —xchi.

¹⁰ Jich a sjojkꞌobeyik: —¿Tutꞌil ay te ya awilix kꞌinale? —xyutik.

¹¹ Te winik la sjakꞌtalanbe: —Jaꞌ te winik te Jesus sbiile la spas ajchꞌal, sok la sbekbon ta jsit, y la yalbon: “Baan lum ba estanke yuꞌun Siloe y poka asit”, xyuton. Boon, y te kꞌalal la jpok jsite, jich a kil kꞌinal —xchi.

¹² Jich a sjojkꞌobeyik xan: —¿Ba ay te winik ya awale? —xchiik. Te winike la yaltalanbe: —Ma jnaꞌ ba ay —xchi.

Te fariseoetike la sjojkꞌobeyik tutꞌil a lekub te site

¹³ La yikꞌik bael ta stojol fariseoetik te machꞌa jambot sit yuꞌun te Jesuse.

¹⁴ Skꞌaalel kuxo-oꞌtan a te la spas ajchꞌal te Jesuse sok te la sjambe sit a te choke.

¹⁵ Te fariseoetike la sjojkꞌobeyik tutꞌil ay te ya yilix kꞌinale. La sjakꞌtalanbe: —La yaꞌbon ajchꞌal ta sit, y la jpok te jsite, y jich a kil kꞌinal —xchi.

¹⁶ Ay chaꞌox tul fariseoetik te la yalbeyike: —Te machꞌa jich a spas to ma ta skuentauk Dios, porke ma xyakꞌ ta jkuenta te skꞌaalel kuxo-oꞌtane —xchiik. Pero te yane la yalik: —¿Tutꞌil ya xjuꞌ yuꞌun spasel te seña milagroetik teme jmulawile? —xchiik. Jich maꞌyuk akuerdo a kꞌot yuꞌunik.

¹⁷ La sjokꞌobeyik xan te machꞌa chok te nail toe: —Jal tsꞌin jaꞌate, ¿tut xchat yuꞌun te machꞌa la sjambeyat asite? —xyutik. Te machꞌa jamenix site la sjakꞌ: —Te joꞌone ya kal te jaꞌ jꞌalwanej yuꞌun te Diose —xchi.

¹⁸ Pero te juriyoetike maꞌ skꞌan xchꞌuunik teme jaꞌa nix a te chok te nail toe te ya yilix kꞌinale. Jaꞌ yuꞌun ba yikꞌbeyik tal te smeꞌ-state,

¹⁹ y la sjojkꞌobeyik: —¿Me jaꞌ anichꞌan to te ya awalik te chok a ayine? ¿Tutꞌil ay a te ya yilix kꞌinal te ora to? —xchiik.

²⁰ Te smeꞌ-state la sjakꞌtalanbey: —Jnaꞌojtik te jaꞌ kal jnichꞌantik te chok a ayine.

²¹ Pero ma jnaꞌtik tutꞌil ay te ya yilix kꞌinal te ora to, y ni ma jnaꞌtik machꞌa jambot sit yuꞌun. Jojkꞌobeyaik stukel, porke winikix. Stukel ya yalbeyex tutꞌil ay —xchiik.

²² Te smeꞌ-state jich a yalik yuꞌun xiꞌik yuꞌun te juriyoetike. Jaꞌ yuꞌun te juriyoetik snopojikix te ya xchꞌojik lokꞌel ta sinagoga machꞌauk a teme ya yal te jaꞌ Cristo te Jesuse.

²³ Jaꞌ sluwar te la yalik te smeꞌ-state: “Jojkꞌobeyaik awaꞌi stukel, porke winikix” te xchiike.

²⁴ Te juriyoetike la yikꞌik xan tal te winik te machꞌa chok nail toe, y la yalbeyik: —Albotik jamal ta stojol Dios te machꞌa la sjambeyat te asite. Te joꞌotike jnaꞌojtik te jmulawil te winik ya awale —xchiik.

²⁵ Te machꞌa jamenix site la sjakꞌtalanbe: —Te joꞌone ma jnaꞌ me jmulawil o ma jmulawiluk. Jaꞌ nax ya jnaꞌ te joꞌone te chokon te nail toe, pero te ora to ya kilix kꞌinal —xchi.

²⁶ La sjojkꞌobeyik xan: —¿Tuti yut te la sjambeyat te asite? —xchiik.

²⁷ La sjakꞌtalanbe: —La kalbeyexix, pero ma xꞌawakꞌik ta jkuenta. ¿Tuꞌun te ya akꞌanik te ya jchaꞌalonbeyexe? ¿Me yuꞌun ya akꞌan ya atsꞌakliyik euk? —xyut.

²⁸ Jicha lijk yutik te winike y la yalbeyik: —Te jaꞌate jaꞌ atsꞌakliyej te winike, pero te joꞌotike jaꞌ sigue ya jtsꞌaklitik te jMoisese.

²⁹ Te joꞌotike jnaꞌojtik te Dios a kꞌoponot yuꞌun te jMoisese, yan te machꞌa ya awale, ni ma jnaꞌtik ba talem —xchiik.

³⁰ Pero te winik la sjakꞌtalanbe: —Lom yan ya kaꞌi te ya awalik te ma xꞌanaꞌik ba taleme. Yan te joꞌone la sjambonix jsit.

³¹ Lom lek ya jnaꞌtik te Diose ma xyaꞌibe skꞌop te mulawiletike. Jaꞌ nax ya yaꞌibe skꞌop te machꞌatik ya xchꞌuunik sok te ya spasbe te sboluntare.

³² Maꞌyuk ba ya kaꞌitik xꞌalot ni jtuluk te ya sjambe sit te machꞌa chok ya xꞌayine.

³³ Te jichuk ma talemuk ta stojol Dios te winike, ma tut xjuꞌ yuꞌun spasel —xchi.

³⁴ Jich a altalanbot yuꞌunik: —Te jaꞌate nojel ta mulil a ayinat. ¿Me yuꞌun ya akꞌan ya apꞌijutesotik? —xyutik. Y jich a stenik lokꞌel ta sinagoga.

Te machꞌatik chok ta stojol Dios

³⁵ Te Jesuse la yaꞌi te tenotix lokꞌel a te machꞌa chok ta nail toe. Te kꞌalal la sta sba soke, la sjojkꞌobe: —¿Me ya achꞌuun te Nichꞌanile? —xchi.

³⁶ Te winik la yal: —Kajwal, albon machꞌa a, yuꞌun jich ya jchꞌuun —xchi.

³⁷ Te Jesuse la sjakꞌbe: —Awilojix. Joꞌon te yipalat sok ta kꞌope —xchi.

³⁸ Jich te winike la skejan sba ta sit te Jesuse y la yalbe: —Ya jchꞌuun, Kajwal —xchi.

³⁹ Te nax a la yal te Jesuse: —Joꞌon te talemonix liꞌ ba balmilal to yuꞌun jich me ya xchiknaj a te machꞌa leke sok te machꞌa ma lekuke. Yuꞌun jich te machꞌatik chokike ya me yilik kꞌinal; y te machꞌatik ya yilik kꞌinal ta skꞌopike, ya me xlaj sujt ta chok —xchi.

⁴⁰ Ay chaꞌoxtul fariseoetik te teꞌeyik sok ae la yaꞌiyik te jich a yale. La sjojkꞌobeyik: —¿Me yuꞌun wan chokotik euk te joꞌotike? —xchiik.

⁴¹ Te Jesuse la sjakꞌtalanbe: —Te chokukex te jaꞌexe, maꞌyuk amulik te jichuke. Pero ya awalik te ma chokukexe. Jaꞌ ma xchꞌay amulik yuꞌun —xchi te Jesuse.