San Juan 7 - Nuevo Testamento Tzeltal de Amatenango

Ma xchꞌuunot te Jesus yuꞌun te yijtsꞌinabe

¹ Ta patil tsꞌin to te Jesuse been bael ta estado yuꞌun Galilea, yuꞌun ma skꞌan a anin ta Judea porke te juriyoetik te teꞌey ae ya sleik ta milel.

² Pero xnopetix tal te jun kꞌin te ya spasik yax-na te juriyoetike.

³ Te yijtsꞌinab te Jesuse la yalbeyik: —Ma me liyuk xꞌanat to; baan me ta Judea. Jich me ya xkꞌo yil teꞌa te machꞌa stsꞌakliyejat te tut ya apase.

⁴ Maꞌyuk machꞌa mukul ya xꞌaꞌtej teme ya skꞌan ya xnaꞌbot sba ta bayuke. Te tut ya xjuꞌ awuꞌun spasel, pasa ta sitil komon ta stojol spisil te genteetike —xchiik.

⁵ Yuꞌun ni ma xchꞌuunot yuꞌun te yijtsꞌinabe.

⁶ Te Jesuse la yaltalanbe: —Ma to sta te koraile. Yan te jaꞌexe tutikuk nax orail lek ya awaꞌiyik.

⁷ Te genteetik yuꞌun te balmilale makꞌ spꞌajex. Pero te joꞌone ya spꞌajikon, porke ya kalbe ta jamal te tut ma tsaꞌamuk ya spasike.

⁸ Te jaꞌexe baanik ba kꞌine. Yan te joꞌone makꞌ xboon, porke ma to xkꞌot te koraile —xchi.

⁹ Y laj yalbe tsꞌin to, y jil ta Galilea.

Te Jesuse bajt ta kꞌin te ba pasbil yax-nae

¹⁰ Pero bajtix a te yijtsꞌinabe, jich euk te Jesuse bajt ba kꞌine, yuꞌun mukul nax a bajt. Ma skꞌan a yakꞌ sba ta ilel te sitil komon.

¹¹ Te juriyoetike la sleik te ba kꞌine y la yalik: —¿Ba wan ay te winike? —xchiik.

¹² Te ba yolil te genteetik bayal machꞌatik ya xꞌalot yuꞌun. Te yane ya yalik: —Te winike ben lek —xchiik. Pero ay yan ya yalik: —Ma lekuk; ya sloꞌlay te gentee —xchiik.

¹³ Pero mukul nax yipalik ta yaꞌbiyanel skaj te ya xiꞌik te statal juriyoetike.

¹⁴ Chꞌin ma oliluk a te kꞌine, te Jesuse och bael ta templo y lijk nojpeswanuk.

¹⁵ Te juriyoetike ay yajtal yoꞌtanik y la yalik: —¿Tuti snaꞌtalan te tut ya yale?, si maꞌyuk ba yichꞌoj nojptesel —xchiik.

¹⁶ Te Jesuse la sjakꞌtalanbe: —Te tut ya kakꞌ ta nopele ma joukon kuꞌun; jaꞌ yuꞌun te Machꞌa la stikonon tale.

¹⁷ Teme ay machꞌa ya skꞌan spasbe te sboluntar Diose, jich me ya snaꞌbe sluwar te tut ya kakꞌ ta nopele me talem ta stojol Dios o joꞌon nax ya jnop te tut ya kale.

¹⁸ Te machꞌa stukel nax ya snop te tut ya yale, jich ya spas yuꞌun ya skꞌan akꞌel ta jkuenta yuꞌun te gentee. Yan teme jaꞌ ya skꞌan ya yakꞌ ta akꞌel ta jkuenta te machꞌa tikonbil tal yuꞌune, batsꞌi jich te tut ya yale sok maꞌyuk loꞌlawanej ta yoꞌtan.

¹⁹ ¿Ma me jaꞌuk te jMoises te la yaꞌbeyex te mantaliletike? Pero ni jtuluk te jaꞌexe ya achꞌuunik. ¿Tut yuꞌun te ya akꞌan ya amilikone? —xchi.

²⁰ Te gentee la sjakꞌtalan: —Ay pukuj ta awoꞌtan. ¿Machꞌa a te ya smilate? —xchiik.

²¹ Te Jesuse la yaltalanbe: —Apisilik te jaꞌexe jaꞌ ya yaꞌbeyex yajtal awoꞌtanik te tuti jpas ta skꞌaalel kuxo-oꞌtane.

²² Pero te jMoisese la spasex ta mantal te ya awaꞌbeyik yichꞌ sirkunsision te anichꞌanik teme kereme; manchuk me ma jaꞌuk a lijk spas te jMoisese, porke jaꞌ jich lijkem tal ta pasel yuꞌun te antibo ameꞌ-atatike. Y te jaꞌexe ya awaꞌbeyik yichꞌ sirkunsision jtul chꞌin kerem manchuk me ta skꞌaalel kuxo-oꞌtan.

²³ Jaꞌ yuꞌun teme ya awaꞌbeyik yichꞌ sirkunsision jtuluk chꞌin kerem ta skꞌaalel kuxo-oꞌtan ta skaj te ma xꞌakꞌan ya akꞌaxintaybeyik te smantal te jMoisese, ¿tut yuꞌun te ya awilintayikone te yuꞌun la jlekutesbe skojtol stiꞌbalul jtul winik ta skꞌaalel kuxo-oꞌtane?

²⁴ Ma me xkꞌax akꞌopik yuꞌun te tut ya awilike. Nopaik lek nailuk te tutꞌil ya xchapawanexe —xchi te Jesuse.

Jesus ya yal ba talem

²⁵ Ay jtul cheb te machꞌatik ayik ta Jerusalene lijk sjojkꞌobe sbaik: —¿Me ma wan jaꞌuk te winik to te ya xleot ta milele?

²⁶ Ila awil ba ay yipal ta kꞌop ta sitil komon, y maꞌyuk machꞌa ay tut xba yalbe. ¿Me yuꞌun wan kꞌot ta yoꞌtanik te juꞌeletik te batsꞌi jaꞌ mismo Cristo te winik to?

²⁷ Pero te joꞌotike jnaꞌojtik ba talem. Yan te kꞌalal ya xtal te Cristoe, ni maꞌyuk machꞌa ya snaꞌ te ba ya xtale —xchiik.

²⁸ Te Jesuse la yaꞌi te tut yipalik ta yalele. Yipal ta nojpeswanej ta templo ae, sok tulan a kꞌopoj: —¿Me jich awalik te ya anaꞌbikon jbae y te ya anaꞌik te ba talemone? Pero te joꞌone ma skꞌanojeluk nax koꞌtan te talemone. Jaꞌ tikonbilon tal yuꞌun te Machꞌa stalel jun yoꞌtan te ma xꞌanaꞌbeyik sbae.

²⁹ Te joꞌone ya jnaꞌbe sba porke teꞌ talemon a y stukel stikonejon tal —xchi te Jesuse.

³⁰ Jich yoꞌtanikuk kꞌan stsakik ta ora, pero maꞌyuk machꞌa yal skꞌab, yuꞌun ma to xkꞌot yorail a.

³¹ Bayal machꞌa chꞌuunot yuꞌun y la yalik: —Kꞌalal ya xtal te Cristoe, ¿me kꞌo jich wan ya yakꞌ ta ilel seña smilagro jich tutꞌil te winik to? —xchiik.

Te fariseoetike la stikon ta stsakel tal te Jesuse

³² Te fariseoetike la yaꞌiyik te tut ya yal te gente ta stojol te Jesuse, y jaꞌik sok te statal saserdoteetike la stikonik bael polisiaetik yuꞌun templo ta stsakel tal te Jesuse.

³³ Jich a yal te Jesuse: —Ma jalukix kꞌaal te ya joyinexe, y patil ya me sujton bael ta stojol te Machꞌa la stikonon tale.

³⁴ Te jaꞌexe ya aleikon, pero ma xꞌantayikon ta leel, porke ma spas ya xbaex te ba ya xkꞌoone —xchi.

³⁵ Te juriyoetike jich a lijk sjojkꞌobe sbaik ta juju-tul: —¿Ba ya xbajt te winik to te ma jtatik ta leel te ya yale? ¿Me yuꞌun wan ya xbajt te ba lokꞌemik bael te jlumaltik te ba griegoetike? ¿Me yuꞌun wan jaꞌ xba spꞌijutes te griegoetike?

³⁶ ¿Tut xyal te ya yal: “ya aleikon pero ma xꞌataikon ta leel, porke ma spas ya xbaex te ba ya xkꞌoone” te xchie? —xchiik.

Te kuxul jaꞌ te ya xlokꞌ ta oꞌtanile

³⁷ Jaꞌ ben tulan skꞌoplal yuꞌunik te último kꞌaal yuꞌun te kꞌine. Te kꞌaal abi, te Jesuse tekꞌa jajchel, y tulan a kꞌopoj. Jich a yal: —Teme ay machꞌa takin yoꞌtane, a me taluk ta jtojol, a me tal yuchꞌ te jaꞌe.

³⁸ Jich tut ya yal te Sjun Diose, te machꞌa ya xchꞌuunone ya me xlokꞌ kuxul jaꞌ ta yoꞌtan —xchi te Jesuse.

³⁹ Te tutꞌil jich a yal te Jesuse, jaꞌ a yalbe skꞌoplal te Chꞌul Espíritu te ya xꞌakꞌtalanbot ta yoꞌtan te machꞌatik ya xchꞌuunike. Porke ma to xtal a te Chꞌul Espiritue, yuꞌun ma to xꞌakꞌot ta ilel slekil a te Jesuse.

Yanetik skꞌoplal aꞌ kꞌot yuꞌunik te Jesuse

⁴⁰ Ay chaꞌoxtul ta yolil te gentee kꞌalal la yaꞌiybeyik sluwar te tuti yal te Jesuse, la yalik: —Batsꞌi jaꞌix te jꞌalwanej yuꞌun Diose —xchiik.

⁴¹ Te yanetik la yalik: —Jaꞌix te Cristo to —xchiik. Pero te yane la yalik: —Ma jaꞌuk. Porke te Cristoe ma ta slumuk Galilea ya xtal.

⁴² Te Sjun Diose ya yal te Cristoe puersa ta stsꞌumbal te rey jDavid ya xtal, y ta jtejklum Belen ya xtal, te jaꞌ slumal te jDavide —xchiik yuꞌun.

⁴³ Jich te genteetike la xatꞌ sbaik ta skaj te Jesuse.

⁴⁴ Ay machꞌatik a kꞌan xchukik bael te Jesuse, pero maꞌyuk machꞌa juꞌ yuꞌun.

Te juꞌeletike ma xchꞌuunik te Jesuse

⁴⁵ Te polisiaetik yuꞌun te temploe la sujt bael te ba ay te fariseoetike sok ba ay te statal-saserdoteetike. Jicha kꞌoj jojkꞌolanbek te polisiaetike: —¿Tuꞌun te ma la awikꞌik tal teꞌ? —xchiik.

⁴⁶ Te polisiaetik la sjakꞌik: —Maꞌyuk machꞌa jich ya xkꞌopoj te tutꞌil ya xkꞌopoj jaꞌi winik to —xchiik.

⁴⁷ Jich te fariseoetike la yalbeyik: —¿Me jich euk te jaꞌexe la achꞌuunik loꞌlayel?

⁴⁸ ¿Me yuꞌun ay machꞌa xchꞌuunix te statal kuꞌuntike o xchꞌuunejik te fariseoetike?

⁴⁹ Pero te genteetik to te ma snaꞌik te mantaliletike chꞌayemik stukelik —xchi skꞌoplalik yuꞌun.

⁵⁰ Te jtul fariseo te jNicodemo biile, te ta ajkꞌubal xtaluk skꞌopon te Jesuse, jich a yal:

⁵¹ —Te mantaliletik kuꞌuntike ya yal te ma spas te ya kaꞌbetik kastigo jtul winik teme ma nailuk ya jojkꞌobetik te tut spasoje —xchi.

⁵² Te fariseoetike la sjakꞌik: —Jich euk te jaꞌate, ¿me yuꞌun Galileoat? Nopa ta lek te Sjun Diose; teꞌ me ya awil a te ni jtul jꞌalwanej ya xtal ta Galileae —xyutik.