San Juan 5 - Nuevo Testamento Tzeltal de Amatenango

Te Jesuse la slekutes jtul jchamel ta Betesda

¹ Patil la sta stiempoil kꞌin yuꞌun te juriyoetike, y te Jesuse sujt xan bael ta Jerusalen.

² Ta Jerusalen ay estanke yuꞌun jaꞌ te tijil ay sok te yochibal stsꞌajkꞌul te jtujklume, te Yochibal Chijetik sbiile te Betesda sbiil ta hebreo-kꞌope. Te estanke yuꞌun jaꞌe ay joꞌeb parte yaxinal,

³ sok ay bayal jchameletik te ba yaxinale. Balajtik ta lum ay choketik sok koxoetik sok te machꞌatik sikuben xchial yok-skꞌabike. Yipalix ta smaliyel te ya xlijk stij sba te jaꞌe,

⁴ porke ay jtul chꞌul ángel ya xkoj tal sok ya stijulan jilel te jaꞌ te ba ay te estankee. Y te machꞌa primero ya xꞌoch te kꞌalal ya xtal tijek jilel te jaꞌe, ya xlekub jilel tutikuk chamelil te yichꞌoje.

⁵ Teꞌa ay jtul mamal te ayix treinta y ocho jaꞌbil te ay ta chamele.

⁶ Kꞌalal la yil te Jesus te teꞌ wayal ae, la snaꞌ te ayix bayal jaꞌbil te jich aye. La sjojkꞌobe: —¿Me ya akꞌan xlekubat? —xyut.

⁷ Te machꞌa xchame la sjakꞌbe: —Kajwal, maꞌyuk machꞌa ay kuꞌun te ya yakꞌon ochel te ba estanke te kꞌalal ya xlijk stij sba te jaꞌe. Juju-mel te ya jkꞌan xꞌochon bale, ay yan machꞌa nail ya xꞌoch ta ora —xchi.

⁸ Te Jesuse la yalbe: —Jajchan tal. Jacha bael te awayibe y baan —xyut.

⁹ Mismo tiempo a lekub te mamale. La xjach bael te swayibe, y lijk bael ta beel. Pero skꞌaalel kuxo-oꞌtan a.

¹⁰ Jaꞌ yuꞌun te juriyoetike la yalbe te machꞌa lekubixe: —Te ora to skꞌaalel kuxo-oꞌtan. Ma spas te awichꞌoj te awayibe —xyutik.

¹¹ Te mamale la sjakꞌtalanbe: —Te machꞌa la slekutesone jaꞌ a yalbon: “Jacha bael te awayibe, baan”, xyuton —xchi.

¹² La sjojkꞌobeyik: —¿Machꞌa a te la yalbeyat: “Jacha bael te awayibe y baan”, te xyutate? —xchiik.

¹³ Pero te mamale ma snaꞌ te machꞌa lekutesot yuꞌune, porke te Jesuse la xchꞌay sba bael ta yolil te ba ay bayal gentee.

¹⁴ Ta patil te Jesuse la sta ta mukꞌul templo y la yalbe: —Ila awil, ya kalbeyat: Te ora to lekubatix, ma me aleix amul, yuꞌun ma me masuk pewor ya sujtat ke te tut ayat nail toe —xꞌutot.

¹⁵ Te mamale bajt y la yalbe te juriyoetike te jaꞌ te Jesus a lekutesot yuꞌune.

¹⁶ Jaꞌ sluwar te la skontrainik Jesus te juriyoetike, yuꞌun ta skaj te jich ya spas ta skꞌaalel kuxo-oꞌtane.

¹⁷ Pero te Jesuse la yaltalanbe: —Te Jtate yipal ta aꞌtel y jichon euk yipalon ta aꞌtel —xchi.

¹⁸ Jaꞌ yuꞌun te juriyoetike mas a lijk snopik tut ya yut ya smilik te Jesuse porke ma jaꞌuk nax ya xkꞌaxintay ta skꞌopik te skꞌaalel kuxo-oꞌtane, jaꞌ smul ta skꞌopik ekꞌa te ya yal sba te pajal sok Diose, kꞌalal ya yal te jaꞌ sTat te Diose.

Te tut yaꞌtel yichꞌoj te xNichꞌan Diose

¹⁹ Te Jesuse la yaltalanbe: —Jamal ya kalbeyex: Maꞌyuk tut ya xjuꞌ yuꞌun spasel ta stukel nax te Nichꞌanile. Jaꞌ ya spas te tut ya yil ya spas te Tatile. Spisil te tut ya spas te Tatile, jich ya spas euk te Nichꞌanile.

²⁰ Yuꞌun te Tatile ben skꞌanoj te Nichꞌanile. Ya yaꞌbe yil spisil te tutik ya spase, y ya to yaꞌbe yil te mas mukꞌ te ya xkꞌot ta pasele te lom cham ya awaꞌiyik yuꞌune.

²¹ Porke jich tutꞌil te Tatile ya xchaꞌkuses te animaetike y ya yaꞌbe xkuxlejal; jich euk te Nichꞌanile, ya yaꞌbe xkuxlejal te machꞌa ya skꞌan ya yaꞌbeye.

²² Te Tatile ma stukeluk ya xꞌichꞌawan jkuenta; jaꞌ a yakjbe ta skuenta te Nichꞌanile.

²³ Yuꞌun me spisilik ya yakꞌik ta jkuenta a te Nichꞌanile, jich tutꞌil te aꞌbil ta jkuenta te Tatile. Te machꞌa ma xyakꞌ ta jkuenta te Nichꞌanile, jich ma xyakꞌ ta jkuenta a te Tatil te la stikon tale.

²⁴ Jamal ya kalbeyex, te machꞌa ya yaꞌibon sluwar te tut ya kale, y teme la xchꞌuun te machꞌa la stikonon tale, ay xkuxlejal sbajtel kꞌinal. Ma chꞌayueluk ya xbajt, yuꞌun kꞌaxemix a te ba lajele, ayix ta kuxlejal.

²⁵ Jamal ya kalbeyex, ya staix yorail, y yorailix te ora to te ya yaꞌibe sluwar te animaetik te skꞌop te xNichꞌan Diose. Y te machꞌa ya yaꞌiye, ya xkuxuyinik yuꞌun.

²⁶ Porke jich tutꞌil te Tatile ya xjuꞌ yuꞌun yakꞌel kuxlejal; jaꞌ nax jich yakꞌojbe ta skuenta euk te Nichꞌanile te ya xjuꞌ ya yakꞌ kuxlejale.

²⁷ Y yakꞌojbe yaꞌtel ta yichꞌel jkuenta te genteetike te tutꞌil jaꞌ te Nichꞌanile.

²⁸ Ma me lom chamuk ya awaꞌiyik yuꞌun, porke ya me sta yorail te spisil te animaetike ya me yaꞌibon jkꞌop,

²⁹ y ya me xlaj lokꞌ tal te ba mukajtike. Te machꞌatik lek te tuti spasike, ya xchaꞌkuxik tal y ya me staik xkuxlejal. Pero te machꞌatik ma tsaꞌamuk te tuti spasike, ya xchꞌakuxik tal y ya me xbajtik ta chꞌayel.

Te machꞌatik testigoetik yuꞌun te Cristoe

³⁰ “Te joꞌone maꞌyuk tut ya xjuꞌ kuꞌun spasel ta jtukel nax. Ya kichꞌ jkuenta jich tutꞌil ya yalbon te Tatile, y toj te ya smeltsaꞌanwanone yuꞌun ma jaꞌuk ya jpas te tut skꞌan koꞌtane. Jaꞌ ya jpasbe sboluntar te Machꞌa te la stikonon tale.

³¹ Teme joꞌon jkꞌoplal te ya kal ta testigoe ma baleuk ya xkꞌot te tut ya kale.

³² Pero ay yan te machꞌa ya yal jkꞌoplal ta testigoe, y jnaꞌoj te batsꞌi jich te jkꞌoplal te ya yal ta testigoe.

³³ Te jaꞌexe la atikonik ta jojkꞌoyel ta stojol te Juane, y te tuti yale batsꞌi jich.

³⁴ Pero te joꞌone makꞌ xtuun kuꞌun teme ya yalbon jkꞌoplal ta testigo te gentee. Jaꞌ nax ya kalbeyex to yuꞌun te jaꞌexe jich me ya xkolex.

³⁵ Te Juane jich a kꞌot tutꞌil lampara te ya xtil y ya sakutes kꞌinale; y te jaꞌexe kꞌan junubuk awoꞌtanik jun chebuk kꞌaal yuꞌun te sakil kꞌinal yuꞌune.

³⁶ Pero ay testigo kuꞌun te mas tulan skꞌoplal ke te tutiꞌ yal te Juane. Jaꞌ testigo kuꞌun te tut ya jpase; jaꞌ mismo yakꞌojbon jpas te Tatile. Jaꞌ ya yakꞌ ta naꞌel a te batsꞌi jich te la stikonon tal te Tatile.

³⁷ Y jich te Tatil te la stikonon tale jaꞌ ya yakꞌon ta naꞌel stukel. Manchuk teme maꞌyuk awaꞌiyejbeyik te skꞌope, sok te ni maꞌyuk awilojike,

³⁸ ni jaꞌuk te skꞌop te ay ta awoꞌtanik te jaꞌexe, porke ma xꞌachꞌuunik te jaꞌ tikonbilon tal yuꞌun te Tatile.

³⁹ Te jaꞌexe ya anopilanik te tut tsꞌibabil ta Sjun Diose, porke ya awalik te teꞌ ya ataik a te kuxlejal sbajtel kꞌinale. Pero jaꞌ ya yalbon jkꞌoplal te tutik tsꞌibabile.

⁴⁰ Te jaꞌexe ma xꞌakꞌan xtalex ta jtojol yuꞌun te ya ataik a te kuxlejale.

⁴¹ “Te joꞌone ma jkꞌan akꞌel ta jkuenta yuꞌun te genteetike.

⁴² Sok ya jnaꞌ tutꞌ ay te awoꞌtanike sok jnaꞌoj te ma akꞌanojikuk te Diose.

⁴³ Te joꞌone talemon ta skuenta te jTate, pero te jaꞌexe maꞌ xꞌakꞌanikon. Yan teme ay machꞌa ya xtal ta skꞌanojel yoꞌtan naxe, jaꞌ akꞌanojik stukel.

⁴⁴ ¿Tutꞌil kꞌan achꞌuunik te jaꞌexe, teme jaꞌ nax ya akꞌanik te ya yakꞌex ta jkuenta te genteetike? Ma jaꞌuk ya aleik te tutꞌil ya yakꞌex ta jkuenta te Diose.

⁴⁵ Ma xꞌachꞌuunik te joꞌon ya xba kalbeyex amulik ta stojol te jTate. Ay te machꞌa ya yalbeyex amulike, jaꞌ mismo te jMoisese te jaꞌ yipinej awoꞌtanike.

⁴⁶ Porke te jaꞌuk achꞌuunnejik te tuti la yal te jMoisese, ya achꞌuunikon euk te jichuke. Porke te jMoisese jaꞌ jkꞌoplal te la stsꞌiba jile.

⁴⁷ Pero teme ma xꞌachꞌuunik te tuti stsꞌiba jile, ¿tutꞌil kꞌan achꞌuunik te tut ya kalbeyexe? —xchi te Jesuse.