San Juan 4 - Nuevo Testamento Tzeltal de Amatenango

Te Jesus sok te samaria-antse

¹ Te fariseoetike la yaꞌiybeyik sluwar te bayalix machꞌa tsꞌaklibil yuꞌun te Jesuse y mas yipalix ta yakꞌel ichꞌjaꞌ ke te Juane.

² Pero ma jaꞌuk a yakꞌ ichꞌjaꞌ te Jesuse, jaꞌ a yakꞌ ichꞌjaꞌ te jnopojeletik yuꞌune.

³ Kꞌalal la yaꞌi te Jesuse, lokꞌ bael ta estado yuꞌun Judea, y chaꞌ sujt bael ta estado yuꞌun Galilea.

⁴ Te been bale, puersa kꞌax ta estado yuꞌun Samaria.

⁵ Jicha kꞌot ta jun jtejklum Sicar sbiil te ay ta estado Samariae, te serka ay sok slum Jacob te yakꞌojbe jilel te Josee te xnichꞌane.

⁶ Teꞌey a te posoe te spasoj Jacob. Te Jesuse ben lubenix yuꞌun beel a, y kꞌo snajkan sba te ba posoe. Nopolix ol kꞌaal a.

^7-8 Te jnopojeletik yuꞌune baemik ta jtejklum ta smanel tal tut ya sweꞌik. Ben te ora a tal ta lik-jaꞌ jtul samaria-ants. Te Jesuse la yalbe: —Aꞌbon chꞌinuk awaꞌal —xyut.

⁹ Te samaria-antse la yal: —¿Tut yuꞌun te ya akꞌanbon jaꞌ ya awuchꞌe?, porke juriyoat y te joꞌone samariaon —xchi. Yuꞌun te juriyoetike ma spas ya sta sbaik ta kꞌop sok te samariaetike.

¹⁰ Te Jesuse la sjakꞌbe: —Te yauk anaꞌ te tut ya yakꞌ te Diose sok te yauk anaꞌbon jba, joꞌon te ya jkꞌanbeyat jaꞌe, jaꞌat me ya akꞌanbon jaꞌ te jichuke. Jich me ya kaꞌbeyat te kuxul jaꞌ stukele —xchi.

¹¹ Te antse la yalbe: —Xiꞌlel, maꞌyuk tut ay awuꞌun yuꞌun ya alokꞌes tal a te jaꞌe, yuꞌun ben toyol te posoe. ¿Ba xba ata te kuxul jaꞌ te ya awaꞌbone?

¹² Te antibo jtatik Jacobe la yaꞌbotik jilel te poso to te liꞌ mismo la yuchꞌ jaꞌ euk te yuntikile sok te xchambalamike. ¿Meꞌn jaꞌat mas nailat yuꞌun? —xchi te antse.

¹³ Te Jesuse la sjakꞌbe: —Spisil te machꞌatik ya yuchꞌbeyik yaꞌlel te poso to ya xchaꞌtakej yoꞌtanik.

¹⁴ Pero te machꞌa ya yuchꞌ te jaꞌ ya kakꞌ joꞌone, sbajtel kꞌinal ma xtakej yoꞌtan yuꞌun. Porke te jaꞌ ya kakꞌ joꞌone jich ya xkꞌot tutꞌil lokꞌi-jaꞌ ta yoꞌtan te ya xkuxuyin sbajtel kꞌinal yuꞌune —xchi te Jesuse.

¹⁵ Te antse la yalbe: —Xiꞌlel, aꞌbon te jaꞌ ya awale, yuꞌun makꞌ xtakejix koꞌtan a, y makꞌ xtalonix ta lik-jaꞌ a liꞌ ba posoe —xchi.

¹⁶ Te Jesuse la yalbe: —Baan, ban ikꞌa tal te amamlale y sujtan tal liye —xyut.

¹⁷ Te antse la sjakꞌbe: —Maꞌyuk jmamlal —xchi. Te Jesuse la yalbe: —Batsꞌi jich te tut ya awal te maꞌyuk amamlale,

¹⁸ porke joꞌtulix winik a kꞌaxat a. Y te machꞌa awikꞌoj aba sok te ora to ma amamlaluk. Batsꞌi jich te tut la awale —xyut.

¹⁹ La yalbe te antse: —Xiꞌlel, la jnaꞌix te jꞌalwanejat yuꞌun te Diose.

²⁰ Te antibo jmeꞌ-jtatike sok te samariaetike la skejan sbaik ta stojol Dios liꞌ ba wits to. Pero te jaꞌex juriyoexe ya awalik te ta Jerusalen te ya skꞌan ya xba jkejan jbajtike —xchi.

²¹ Te Jesuse la sjakꞌbe: —Ants, chꞌuuna te tut ya kalbeyate: Ya me sta yorail te ma liyuk ba wits to ni ta Jerusalen te ya xba akejan abaik ta stojol te jTatik Diose.

²² Te jaꞌexe ma xꞌanaꞌik te machꞌa ya akejan abaik ta stojole. Yan te joꞌotike ya jnaꞌtik te machꞌa ya jkejan jbajtik ta stojole, yuꞌun te kolele talemix te ba ay te juriyoetike.

²³ Pero ya sta yorail, y yorailix te ora to, te kꞌalal te machꞌa batsꞌi ya skejan sbaik ta stojol te jTatik Diose ya me snaꞌbeyik lek sluwaril ta skuenta te Chꞌul Espíritu yuꞌun te Diose. Yuꞌun te jTatik Dios ya skꞌan te jich ya spasik te ya skejan sbaik ta stojole.

²⁴ Espíritu te Diose y te machꞌatik ya skejan sbaik ta stojole, ya skꞌan ya spasik sok spisil yoꞌtanik, te tutꞌil ya skꞌan te Espíritu yuꞌun Diose —xchi.

²⁵ Te antse la yalbe: —Ya jnaꞌ te ya xtal te jMesias te Cristo xchi ta alele, y te kꞌalal ya xtale ya me yalbotik spisil stukel —xchi.

²⁶ Te Jesuse la yalbe: —Joꞌonix abi, te ya xꞌaꞌabiyanat soke —xchi.

²⁷ Ben te ora a kꞌot te jnopojeletik yuꞌune. Lom cham a yaꞌiyik yuꞌun te tutꞌil yipal sok ta aꞌbiyej te ants te Jesuse. Pero ni jtuluk machꞌa sjojkꞌobe te tut a te ya skꞌanbeye sok tut a te ya yaꞌbiyanike.

²⁸ Te antse la sjiles te skꞌibe y sujt bael te ba jtejklume. Ba yalbe te gentee:

²⁹ —Laꞌik, laꞌ ila awilik, ay jtul winik te la yalbon spisil te tut ma tsaꞌamuk jpasoje. Naꞌtik me ma jaꞌuk te Cristoe —xchi.

³⁰ Jich te genteetike lokꞌik tal te ba jtejklume, laj bajt te ba ay te Jesuse.

³¹ Mientras baem tal ta jtejlum a te antse, te jnopojeletike la yalbeyik te Jesuse: —Maestro, ¿me makꞌ xweꞌat chꞌinuk? —xyutik.

³² Pero te Jesuse la yaltalanbe: —Te joꞌone ay tut ya jweꞌ te ma xꞌanaꞌbeyik sluware —xchi.

³³ Te jnopojeletike lijk sjojkꞌobe sbaik: —¿Meꞌn ay wan tut ichꞌbil tal yuꞌun ya sweꞌ? —xchiik.

³⁴ Pero te Jesuse la yaltalanbe: —Te jweꞌele jaꞌ te ya jpasbe sboluntar te machꞌa la stikonon tale, y jaꞌ to teme juꞌ kuꞌun te yaꞌtele.

³⁵ Te jaꞌexe ya awalik: “Ay to skꞌan chaneb u te kꞌajoje”, xchaex. Pero joꞌon ya kalbeyex: Kꞌeluya awilik te tut stsꞌuntalanbile. Yijubenix, ya skꞌanix kꞌajel.

³⁶ Te machꞌa ya xꞌaꞌtej ta kꞌajoje ya yichꞌ stojol yuꞌun, y te sit te tut ya skꞌajike ya xkuxuyin sbajtel kꞌinal. Jich te machꞌa awaleje sok te machꞌa kꞌajojine, pajal me ben jun yoꞌtanik yuꞌun.

³⁷ Porke yuꞌun batsꞌi jich te tut yipal ta alele: “Yan machꞌa ya yaw y yan machꞌa ya skꞌaj”, xchi me.

³⁸ Joꞌon ya jtikonex bael ta skꞌajel te ma jaꞌukex a aꞌtejex ta stsꞌunele. Yan machꞌa aꞌtejik teꞌae, y jaꞌex a ochex te ba aꞌtejemike —xchi te Jesuse.

³⁹ Bayal te genteetik te ba jtejklum Samariae la xchꞌuunik te Jesuse yuꞌun te tutiꞌ ba yal te antse. Jaꞌ te la yale: “Spisil a yalbon te tut ma tsaꞌamuk jpasoje”, te xchie.

⁴⁰ Jich te kꞌalal laj tal te samariaetike la skꞌanbeyik pawor te Jesuse te teyuk ya xꞌaninik sok ae. Jaꞌ yuꞌun anin cheb kꞌaal teꞌa te Jesuse.

⁴¹ Y bayal xan a xchꞌuunik te la yaꞌiybeyik sluwar te tut yipal ta yalel te Jesuse.

⁴² Y la yalbeyik te antse: —Te ora to ma jaꞌuk xanix te tut la awalbotik te ya jchꞌuuntike. Yuꞌun mismo joꞌotik a kaꞌibetik sluwar te skꞌope, y la jnaꞌtikix te batsꞌi jich te jaꞌix te Cristo te jkoltaywane yuꞌun spisil te genteetike —xyutik.

Te Jesuse la slekutesbe xnichꞌan jtul yaj-aꞌtel te reye

⁴³ Kꞌaxix cheb kꞌaal yuꞌun teꞌa te Jesuse. Lokꞌ bael te ba Samariae y la spas bael seguir beel te ya xbajt ta Galileae.

⁴⁴ Porke te Jesuse stukel mismo a yal te jtul jꞌalwaneje ma xꞌakꞌot ta jkuenta yuꞌun te slumale.

⁴⁵ Te kꞌalal kꞌot te ba Galileae, te genteetik yuꞌun te estadoe ben sniꞌ xyaꞌiyik te kꞌote. Yuꞌun xkꞌotikuk ta kꞌin Pascua euk te ba Jerusalene, y teꞌ yilik a spisil te tuti spas te ba kꞌin te Jesuse.

⁴⁶ Te Jesuse chaꞌsujt xan bael ta jtejklum Cana te ay ta estado yuꞌun Galileae te ba la skꞌajtates ta bino te jaꞌe. Ay jtul mamal teꞌey a te ay aꞌbil tulan yaꞌtel yuꞌun te reye. Ay ta chamel jtul xnichꞌan te ay ta jtejklum Capernaum.

⁴⁷ Te kꞌalal ya yaꞌi te mamal te kꞌotix ta estado yuꞌun Galilea a te Jesuse te lijk bael ta estado yuꞌun Judea, ba yil y la skꞌanbe pawor te yauk xbajt ta sna yuꞌun xba slekutesbe te xnichꞌane, yuꞌun ya xchamix.

⁴⁸ Te Jesuse la sjakꞌbe: —Te jaꞌexe ma xꞌachꞌuunuk te jichuk makꞌ ya awilik te señaetik sok te milagroetike —xyut.

⁴⁹ Pero te mamale la yalbe: —Kajwal, konik ta ora antes te ya xcham te jnichꞌane —xchi.

⁵⁰ Te Jesuse jich a yalbe: —Sujtanix bael ta ana. Te anichꞌane kuxix —xchi. Te mamale la xchꞌuun te tuti albot yuꞌun te Jesuse, y ora bajt.

⁵¹ Te kꞌalal nopol xkꞌotix ta sna ae, te yaj-aꞌteltake lokꞌik tal ta staik bael. La yalbeyik: —Te anichꞌane kuxix —xchiik.

⁵² Te mamale la sjojkꞌolanbe te tut ora a te lijk lekubuk te xnichꞌane. La sjakꞌbeyik: —Wojey la una a te kom bael te skꞌajkꞌe —xchiik.

⁵³ Te state la snaꞌ te jich ora a te albot yuꞌun te Jesuse: “Te anichꞌane kuxix” te xꞌutote. Jaꞌ yuꞌun te mamale sok swololik ta na la xchꞌuunik te Jesuse.

⁵⁴ Jaꞌ to jaꞌ xchaꞌmelal la yakꞌ ta ilel seña smilagro a te Jesuse te kꞌalal chaꞌsujt bael ta Galilea te lijk bael ta Judea ae.