San Juan 21 - Nuevo Testamento Tzeltal de Amatenango

Te Jesuse la yakꞌ sba ta ilel ta stojol te juktul jnopojeletike

¹ Ta patil te Jesuse la yakꞌ sba xan ta ilel ta stojol te jnopojeletik yuꞌune te ba tiꞌ jaꞌ yuꞌun te Tiberiase. Jich a spas te la yakꞌ sba ta ilele:

² Stsoboj sbaik a te Simon Pedroe sok te jTomas, te Loꞌalal xꞌalbote, sok te jNatanael te talem ta jtejklum Cana te ay ta slum Galileae, sok te xnichꞌnab Zebedeoe, sok xan te cheb jnopojeletik yuꞌun te Jesuse.

³ Te Simon Pedroe la yaltalanbe: —Ya xboon ta tsak-chay —xchi. La sjakꞌik te yane: —Jich euk te joꞌotike ya joyintikat bael —xchiik. Jich laj bajtik y moik bael ta jun barko. Pero ni jkꞌot chay a staik a te ajkꞌubal abi.

⁴ Te kꞌalal xnopetix ya sakꞌub tal a te kꞌinale, la yilik te ay ta tiꞌ jaꞌ te Jesuse, pero te jnopojeletike maꞌ snaꞌik me jaꞌ te Jesuse.

⁵ Te Jesuse la sjojkꞌolanbe: —Jkentik, ¿me ayix atsakojik te chaye? —xchi. La sjakꞌik: —Maꞌyuk —xchiik.

⁶ Te Jesuse la yaltalanbe: —Akꞌaik ochel ta jaꞌ te stsajkil achayik ta sbatsꞌil te barkoe, jich me ya ataik te chaye —xchi. Jich a spasik y ta patil ma snaꞌik tut ya yutik ya slokꞌesik tal te stsajkil xchayike, yuꞌun ben bayal a och teꞌa te chaye.

⁷ Jich te jtul jnopojel, te machꞌa ben kꞌux ya yaꞌi sba sok te Jesuse, la yalbe te jPedroe: —Jaꞌ te Kajwaltike —xchi. Y kꞌalal la yaꞌi te Simon Pedroe te jaꞌ te Kajwaltike, ba slap ta ora te skꞌuꞌ-spakꞌe yuꞌun tꞌaxal, y la xchoj sba ochel ta jaꞌ.

⁸ Te yan xan jnopojeletike laj kꞌot te ba tiꞌjaꞌ sok te barkoe snitojik te stsajkil xchayike te ben nojel ta chaye. Beenik sien metro te xlaj lokꞌ jul a te ba tiꞌjaꞌe.

⁹ Kꞌalal koik ta barko te ba lume, ay tsumbil kꞌajkꞌ a kꞌo staik, sok tsꞌajal ta yakꞌalel ay jkojt chay a, sok ay waj.

¹⁰ Te Jesuse la yaltalanbe: —Ichꞌaik tal chaꞌox kojtuk te chay te laj to nax atsakik tale —xchi.

¹¹ Te Simon Pedroe mo bael te ba barkoe y la xoch tal ta tiꞌjaꞌ te stsajkil xchaye nojel ta niwak chay. Ay siento sinkuenta y tres. Y aunke ben bayal, pero ma chꞌiꞌ te stsajkil xchayike.

¹² Te Jesuse la yaltalanbe: —Laꞌ me, weꞌanik —xchi. Ni jtuluk te jnopojeletike la sjojkꞌobeyik machꞌa a, yuꞌun snaꞌojikix te jaꞌ te Kajwaltike.

¹³ Te nax a te Jesuse tijilaj bael te ba kꞌajkꞌe, la stsak ta skꞌab te waje, y la yakꞌtalanbe te jnopojeletike, y jich mismo spas sok te chaye.

¹⁴ Jaꞌ to jaꞌ yoxmelalix ya yakꞌ sba ta ilel a te Jesus ta stojol te jnopojeletik yuꞌune te kꞌalal chaꞌkuxemix tal ae.

Te Jesuse kꞌopoj sok te Simon Pedroe

¹⁵ Lajikix ta weꞌel a, te Jesuse la sjojkꞌobe te Simon Pedroe: —Simon, te xnichꞌanat te Jonase, ¿me mas kꞌux ya awaꞌiyon ta awoꞌtan jich tutꞌ yan to? —xchi. Te jPedro la sjakꞌ: —Jich, Kajwal. Anaꞌoj te kꞌuxat ta koꞌtane —xyut. Te Jesuse la yalbe: —Kanantaybon me te jkarneraetik kuꞌun cheꞌe —xchi.

¹⁶ La xchaꞌ jojkꞌobe xan: —Simon, te xnichꞌanat Jonase, ¿me kꞌux ya awaꞌiyon ta awoꞌtan? xchi. Te jPedroe la sjakꞌ: —Jich, Kajwal. Anaꞌoj te kꞌuxat ta koꞌtane —xchi. Te Jesuse la yalbe: —Kanantaybon me te karneraetik cheꞌe —xchi.

¹⁷ La sjojkꞌobe xan ta yoxmelal: —Simon, te xnichꞌanat te Jonase, ¿me kꞌuxon ta awoꞌtan? —xchi. Te jPedroe la yakꞌ yajtal yoꞌtan yuꞌun; porke yoxmelalix a te jojkꞌobot teme kꞌux ya yaꞌi ta yoꞌtane. La sjakꞌ: —Kajwal, anaꞌoj spisil. Anaꞌoj te kꞌuxat ta koꞌtane —xchi. Te Jesuse la yalbe: —Kanantaybon me te jkarneraetik cheꞌe.

¹⁸ Jamal me ya kalbeyat te kꞌalal bikꞌit winikat to ae, jaꞌat ya alap te akꞌuꞌ-apakꞌe yuꞌun ya xbaat te ba ya akꞌan ya xbaate. Pero te kꞌalal ya xmamalubate, jaꞌ xanix ya awakꞌ te akꞌabe, yan machꞌa ya slapbeyatix a te akꞌuꞌ-apakꞌe y ya yikꞌat bael te ba ma xꞌakꞌan ya xbaate —xyut.

¹⁹ Te tutꞌil jich a yal te Jesuse, jaꞌ a yaꞌbe snaꞌ te tutꞌ ya xkꞌo chamuk te jPedroe, yuꞌun me jich ya yakꞌ ta ilel slekilal a te Diose. Ta patil la yalbe: —Laꞌ me, tsꞌakliyaon bael —xyut.

Te jnopojel te ben kꞌux a yaꞌi sba sok te Jesuse

²⁰ Te jPedroe sujt skꞌelu la yil te tsakal tal ta spat te jnopojel te machꞌa ben kꞌux a yaꞌi sba sok te Jesuse. Jaꞌ mismo te lotol ta weꞌel a te ay tuti sjojkꞌobeye: “Kajwal, machꞌa a te ya yakꞌat entregale”, te xchi aye.

²¹ Te kꞌalal la yil te jPedroe, la sjojkꞌobe te Jesuse: —Kajwal, jal winik to, ¿tut ya xkꞌot ta skuenta? —xchi.

²² Te Jesuse la sjakꞌbe: —Teme ya skꞌan koꞌtan te kuxul to a te ya xchaꞌtalone, ¿tuti wochel a te jaꞌate? Laꞌ me, laꞌ tsꞌakliyaon —xyut.

²³ Jich a pujk skꞌoplal ta yolil hermanoetik te makꞌ xcham stukel te jtul jnopojele. Pero te Jesuse ma jaꞌuk a yal te makꞌ xchame. Jaꞌ nax a yal: “Teme jich ya skꞌan koꞌtan te kuxul to a te kꞌalal ya xchaꞌtalone, ¿tuti wochel a te jaꞌate?” xchi nax.

²⁴ Jaꞌ mismo te jnopojel to te la yalix tal ta spisile y te stsꞌibayojix ta june. Y jnaꞌotik te tut ya yale batsꞌi jich te tuti stsꞌibaye.

²⁵ Te Jesuse ay to xan bayal tuti spas. Te spisiluk ya yichꞌ tsꞌibayel ta skajal-skaje, te ya kale max och a te balmilale te spisiluk ya yichꞌ tsꞌibayel ta june.