San Juan 20 - Nuevo Testamento Tzeltal de Amatenango

Jich a chaꞌkux tal te Jesuse

¹ Te primero kꞌaal yuꞌun te semanae, te xMaria Magdalenae ben sab a bajt te ba mukule. Ijkꞌ to kꞌinal a. La yil te lokꞌesbilix a te ton te makbil a te stiꞌile.

² Jich xyalet kaꞌel te ba ay te Simon Pedroe sok te jtul xan jnopojele te machꞌa ben kꞌux a yaꞌi sba sok te Jesuse, y la yaltalanbe: —La yichꞌbeyikix lokꞌel stiꞌbalul te ba mukul te Kajwaltike, y ma jnaꞌtik ba la yakꞌik —xchi kꞌoel.

³ Te jPedroe sok te jtul xan jnopojele lokꞌik bael, bajtik te ba mukule.

⁴ Xchebalik xyalajan kꞌael, pero tsalot jilel te jPedroe, jaꞌ nail a kꞌot te ba mukule te jtul xane.

⁵ La skujan sba ta yilel, y la stabe ta ilel te xpixile, pero ma och bael.

⁶ Ta spat nax a kꞌot te Simon Pedroe y och bael ta ba mukule. Jicha kꞌo yil euk te pakꞌ pixil ae,

⁷ sok la yilbe euk te spojtsil sjol te Jesuse te ma junuk nax ay sok te xpixil stiꞌbalule. Parte balal jilel.

⁸ Jicha och bal euk te jtul xan jnopojele, te machꞌa nail a kꞌot te ba mukule. La yil te tutiꞌ kꞌot ta pasele y la xchꞌuun.

⁹ Yuꞌun ma to kꞌoemuk ta yoꞌtanik a te tut tsꞌibabil jilel ta Sjun te Dios te puersa ya xchaꞌkux tal te Jesuse.

¹⁰ Te nax a laj sujtik bael ta snaik te cheb jnopojeletike.

Te Jesuse la yakꞌ sba ta ilel te stojol te xMaria Magdalenae

¹¹ Te xMariae jil ta jwera te ba stiꞌil xchꞌenale; yipal jilel ta okꞌel. La skujan sba ta skꞌeluyel ochel te ba yutil ba mukule,

¹² y la yil cheb chꞌul angeletik te ben sak te skꞌuꞌ-spakꞌike. Teꞌ najakajtik te ba aꞌbot stiꞌbalul te Jesuse, jtul ta sjol y jtul ta yok.

¹³ Te chꞌul angeletike la yalik: —Ants, ¿tuꞌun te ya xꞌokate? —xchiik. Te antse la yalbe: —Yuꞌun la yichꞌbeyik bael stiꞌbalul te Kajwale, y ma jnaꞌ ba la yakꞌik —xchi.

¹⁴ Jich to nax yipal ta yalel a, sujt skꞌelu y teꞌ yil a te Jesuse, pero ma snaꞌ me jaꞌ te Jesuse.

¹⁵ La yal te Jesuse: —Ants, ¿tuꞌun te yax okꞌate? ¿Machꞌa a te ya alee? —xchi. Te xMaria la skuy te jaꞌ te jkanan-huertae. La yalbe: —Mam xiꞌlel, teme jaꞌat la awichꞌbon bale, albon ba la awakꞌ, yuꞌun ya xba jlej tal —xchi.

¹⁶ La yal te Jesuse: —Maria —xyut. Te antse sujt skꞌelu y la yalbe ta hebreo-kꞌop: —¡Raboni! —xchi. “Maestro”, xchi kꞌoem abi.

¹⁷ Te Jesuse la yalbe: —Ma me apikon, porke ma to moemukon bael ta ba ay te jTate. Pero baan, ban albeya te kermanotake yuꞌun ya xboon te ba ay te jTate, te aTatik euk te jaꞌexe, te Dios kuꞌune, sok te Dios awuꞌunik euk te jaꞌexe —xchi.

¹⁸ Jich te xMaria Magdalenae ba yalbe te jnopojeletike te la yilix te Kajwaltike, y jich a yaltalanbe te tuti albot yuꞌune.

Te Jesuse la yakꞌ sba ta ilel yuꞌun te jnopojeletike

¹⁹ Xꞌijkꞌubix kꞌinal a, mismo primero kꞌaal yuꞌun a te semanae, te jnopojeletike stsꞌusoj sbaik ta na yuꞌun ya xiꞌik te statal juriyoetike. Te Jesuse och kꞌoel y xtekꞌlo kꞌoel ta yolil te jnopojeletike. La spatalanbe yoꞌtanik y jich a yal: —Junuk me awoꞌtanik —xchi.

²⁰ Te kꞌalal jich a yaltalanbeye, la yakꞌtalanbe yil te skꞌabe sok te skostiyae. Te jnopojeletike junub yoꞌtanik yuꞌun te la yilik te Kajwaltike.

²¹ Te nax a te Jesuse la yaltalanbe xan: —Junuk me awoꞌtanik. Jich te tutꞌil la stikonon tal te jTate, jich ya jtikonex euk te jaꞌexe —xchi.

²² La xujchꞌilan, y la yaltalanbe: —Ikꞌaik te Chꞌul Espiritue.

²³ Te machꞌa ya achꞌaybe smule, pasbilix me perdon abi. Yan te machꞌa ma xꞌachꞌaybe te smule, jich makꞌ sta perdon abi —xchi te Jesuse.

Te jTomase la yil te chaꞌ kuxemix tal te Kajwaltike

²⁴ Te jTomas, te Loꞌalal xꞌalbote, jaꞌ te jtul te ta xlajchaytulul te jnopojeletike, jaꞌ ma teꞌeyuk a ba ay te sjoꞌtake te kꞌalal kꞌot te Jesuse.

²⁵ Ta patil te yan xan jnopojeletike la yalbeyik: —La kiltikix te Kajwaltike —xchiik. Pero te jTomase la sjakꞌtalanbe: —Teme maꞌ kilbe te skꞌab te ba ejchenajemik yuꞌun te lawuxe sok teme ma kotses yal jkꞌab a ba ejchenajemik yuꞌun te lawuxe, sok te ba skostiyae, ma xjuꞌ ya jchꞌuun —xchi.

²⁶ Waxkeꞌ kꞌaal ta patil te jnopojeletike la stsob sbaik xan ta jpꞌej na, y teꞌeyix ekꞌa te jTomase. Lek tsꞌusajtik yuꞌunik te tiꞌ puertaetike, pero te Jesuse och bael xtekꞌlo kꞌoel ta yolilik. La spatalanbe yoꞌtan y la yaltalanbe: —Junuk me awoꞌtanik —xchi.

²⁷ Te nax a la yalbe te jTomase: —Otsesa liꞌ te yal akꞌab y ila awil te jkꞌabe. Y akꞌa tal te akꞌabe, otsea liꞌ ba jkostiyae. Ma me jichukat te tutꞌil machꞌa ma xchꞌuune. Chꞌuuna me —xchi.

²⁸ La yal te jTomase: —¡Kajwal kuꞌun! ¡Dios kuꞌun! —xchi.

²⁹ Te Jesuse la yalbe te jTomase: —Ya achꞌuun porke yuꞌun la awilonix. Ben tsaꞌam slekilik te machꞌa ya xchꞌuun manchuk me makꞌ ya yilone —xyut.

Te tut sluwar te jun to

³⁰ Te Jesuse ay to xan bayal seña smilagroetik la spas ta sit te jnopojeletik yuꞌune te ma ochemuk ta tsꞌibayel liꞌ ba jun to.

³¹ Pero jaꞌ nax a yichꞌ tsꞌibayel to yuꞌun jich me ya achꞌuunik a te jaꞌ Cristo sok jaꞌ te xNichꞌan Dios te Jesuse. Y teme la achꞌuunike, ay akuxlejalik sbajtel kꞌinal ta skuenta te Jesuse.