San Juan 16 - Nuevo Testamento Tzeltal de Amatenango

¹ La yal xan te Jesuse: —Spisil te tuti kalbeyexe yuꞌun jich makꞌ xchebaj awoꞌtanik ta jtojol a.

² Ya me stenelex lokꞌel ta sinagoga, y ya me sta yorail te machꞌauk ya smilexe, yuꞌun skuyojik te jaꞌ yaꞌtel Dios te ya spasike.

³ Jich ya spasik yuꞌun ni ma snaꞌbeyik sba te jTate sok ma snaꞌbikon jba euk.

⁴ La kalbeyex awaꞌiyik to yuꞌun jich me ya anaꞌik a te kꞌalal ya xkꞌot yorail te tut kalojbeyexix ae. “Ma kalbeyex ta primero porke joyinejex to a.

Te tut ya spas te Chꞌul Espiritue

⁵ Pero te ora to ya xba joyinix te Machꞌa la stikonon tale. Pero ni jtuluk te jaꞌexe ya ajojkꞌobikon te ba ya xboone.

⁶ Jaꞌ nix baem ta awoꞌtanik te ajtal-oꞌtane, skꞌaj te la kalbeyexix awaꞌiyik to.

⁷ Pero ya me kalbeyex ta jamal te jaꞌ lek ta atojolik te ya xboone, porke teme makꞌ xboone, makꞌ xtal ta atojolik te Joyinwanej awuꞌunike. Pero teme boone, ya me jtikonbeyex tal.

⁸ Te kꞌalal ya xtale, jaꞌ me ya yakꞌ kꞌotuk ta yoꞌtanik te genteetik ta balmilal te tut a te mulile, sok te tut lek ta pasele, sok te Dios ya xꞌilbot yaꞌtelik yuꞌune.

⁹ Ya me yaꞌbe snaꞌ te smulike yuꞌun te ma skꞌan xchꞌuunikone.

¹⁰ Sok ya me yakꞌ kꞌotuk ta yoꞌtanik te tut lek ta pasele, yuꞌun ya xboonix te baꞌ ay te jTate, y te jaꞌexe makꞌ ya awilbikonix jsit.

¹¹ Sok ya me yaꞌbe snaꞌ te Dios ya xꞌilbot yaꞌtelilk yuꞌune, yuꞌun ya yichꞌix kastigo te machꞌa ya xmantale liꞌ ba balmilal to.

¹² “Ay to xan bayal te tut ya jkꞌan kalbeyexe, pero te ora to ma to jxuꞌ awuꞌunik snaꞌbeyel sluwar.

¹³ Yan te kꞌalal ya xtal te Espíritu te ya yakꞌ ta naꞌel sluwar te tut batsꞌi jiche, jaꞌ me ya yaꞌbeyex anaꞌbeyik sluwar. Porke ma stukeluk yuꞌun te tut ya yale. Jaꞌ me ya xtal yalbeyex spisil te tut yaꞌiyeje, y jaꞌ me ya yalbeyex te tut ya xkꞌot ta pasele.

¹⁴ Jaꞌ me ya yaꞌbon ta ilel te jlekilale, yuꞌun jaꞌ me ya xkꞌot ta skuenta yalel te tut ya jkꞌan ya kale.

¹⁵ Spisil te tut ay yuꞌun te jTate joꞌon kuꞌun euk. Jaꞌ yuꞌun la kalbeyex te jaꞌ te Espíritu ya xkꞌot ta skuenta yalel te tut ya jkꞌan ya kalbeyexe.

Te ajtal-oꞌtane ya sujt ta bujtsꞌan kꞌinal

¹⁶ Liꞌ xanix ta jtsꞌine makꞌ ya awilbikonix jsit. Pero ta patil ya awilikon xan, porke ya xboon te ba ay te Tatile —xchi te Jesuse.

¹⁷ Jich a lijk sjojkꞌobe sbaik te jnopojeletik yuꞌune: —¿Tut xyal tsꞌin to te ya yalbotik te liꞌ xanix ta jtsꞌin te makꞌ kilbetikix site, sok te ta patil ya kilbetik xan site, sok te la yal te ya xbajt te ba ay te jTatile?

¹⁸ ¿Tut xyal te liꞌ xanix ta jtsꞌine”, te xchie? Ma xkaꞌibetik sluwar te tut ya yale —xchiik.

¹⁹ Te Jesuse la snaꞌ te yoꞌtanikuk ya sjojkꞌoyike y la yaltalanbe: —La kalbeyex te “liꞌ xanix ta jtsꞌin te makꞌ ya awilbikonix jsite, pero ta patil ya awilbikon xan jsit”, te xchone. ¿Me jaꞌ te yipalex ta yalele?

²⁰ Jamal ya kalbeyex: Te jaꞌexe ya me xꞌokꞌex sok bayal me yajtal-awoꞌtanik. Yan te genteetik te ayik ta skuenta balmilale ben sniꞌ xyaꞌiyik yuꞌun. Pero te yajtal-awoꞌtanike ya me sujt ta bujtsꞌan kꞌinal.

²¹ Jich tutꞌil jtul ants te kꞌalal ya xpajtix yoꞌtane. Bayal ya yakꞌ yajtal yoꞌtan yuꞌun te ya xkꞌotix skꞌaalel te ya xpajt yoꞌtane. Pero ta patil te kꞌalal ayinemix a te xchꞌin yale, makꞌ snaꞌix a te swokole, yuꞌun ben sniꞌ xyaꞌi te julemix ta balmilal te xchꞌin kereme.

²² Jich euk te jaꞌexe, ayex ta ajtal-oꞌtan te ora to, pero ya me kilbeyex xan asitik, y jich me ya xjunub awoꞌtanik. Te sbujtsꞌ awoꞌtanike maꞌyuk machꞌa ya spojbeyex.

²³ “Te tut kꞌaalil ya xkꞌot ta pasele, ma me ayuk tut ya ajojkꞌobikonix a. Jamal ya kalbeyex spisil te tut ya akꞌambey te Tatil ta joꞌon jkuentae ya me yaꞌbeyex.

²⁴ Te ora to te jaꞌexe ma to ayuk tuti kꞌanojik ta joꞌon jkuenta. Kꞌanaik te tut ya akꞌanike, ya me yaꞌbelex. Jich me ya xjunub lek awoꞌtanik yuꞌun.

Te Jesucristoe stsalojix te yaꞌtel balmilale

²⁵ “La kalbeyex spisil to ta puru seña kꞌop, pero ya me sta yorail te makꞌ ya kalbeyexix ta seña kꞌopetike. Jamal me ya kalbeyex te tutꞌil ay skꞌoplal te Tatile.

²⁶ Te tut kꞌaalil ya kale, te jaꞌexe ya akꞌanik ta joꞌon jkuenta. Y makꞌ ya kal te ya xkꞌopojon awuꞌunik ta stojol te Tatile,

²⁷ porke te Tatile kꞌux ya yaꞌiyex ta yoꞌtan. Jaꞌ kꞌuxex ta yoꞌtan porke kꞌuxon ta awoꞌtanik, sok xchꞌuunej awoꞌtanik te talemon ta stojol te Diose.

²⁸ Lokꞌemon tal ta sit te Tatile yuꞌun te talon ta balmilale, y te ora to ya jilesix te balmilale. Ya sujtonix bael ta stojol te Tatile —xchi te Jesuse.

²⁹ Jich te jnopojeletike la yalik: —Te ora to jamal la awalbotikix, ma ta seña kꞌopuk.

³⁰ Te ora to la jnaꞌtikix te spisil ay ta awoꞌtane, jich ma puersaukix te ay machꞌa ya sjojkꞌobeyat xane. Jaꞌ yuꞌun ya jchꞌuuntik te talemat ta stojol te Diose —xchiik.

³¹ Te Jesuse la sjakꞌtalanbe: —¿Me la achꞌuunikix te ora to?

³² Yuꞌun ya kalbeyex te ya staix yorail, y yorailix te ora to, kꞌalal te jaꞌexe ya xpujkejex bael ta juju-tul y ya ajilesikon ta jtukel nax. Pero ma wololukon, porke te Tatile sjoyinejon.

³³ Ya kalbeyex pisil to, yuꞌun jich me bujtsꞌan kꞌinal ya awaꞌiyik ta jtojol. Yan te liꞌ ba balmilale, te jaꞌexe ya me xkꞌax awokolik. Pero ayuk me spuersa awoꞌtanik, yuꞌun joꞌon jtsalojix te balmilale —xchi te Jesuse.