San Juan 13 - Nuevo Testamento Tzeltal de Amatenango

Te Jesuse la spokbe yok te jnopojeletik yuꞌune

¹ Pajel xanix ya xlijk a te kꞌin Pascuae. Te Jesuse snaꞌoj te kꞌotix yorail te ya sjiles te balmilal to, yuꞌun ya sujt bael te ba sTate. Te Jesuse sil tiempo kꞌux a yaꞌiy ta yoꞌtan te machꞌatik ay yuꞌun ta balmilale, y jich lom kꞌux ta yoꞌtan jaꞌto te kꞌalal bajte.

^2-4 Te pukuje ochemix ta yoꞌtan a te Judas, te xnichꞌan te Simon Iscariote, te snopoj ya yakꞌ entregal te Jesuse. Te Jesuse snaꞌoj te talem ta stojol Dios sok te ya sujtix bael ta stojol Diose, y snaꞌoj ta yoꞌtan te aꞌbilix tulan yaꞌtel yuꞌun te sTate. Jaꞌ yuꞌun te yipalik to ta weꞌel ta mexae, tejkꞌa jajchel, la slokꞌes te xkamixe y la xchuk ta xchꞌujt te jun toayae.

⁵ Te nax a la skꞌeb jaꞌ ta jun basija y lijk spokbe yok te jnopojeletik yuꞌune, y la stakutesbe ta toaya te chukul ta xchꞌujte.

⁶ Te kꞌalal kꞌan kꞌo spokbe yok te Simon Pedroe, jich a yal te jPedroe: —Kajwal, ¿me jaꞌat wan ya apokbon te koke? —xyut.

⁷ Te Jesuse la sjakꞌbe: —Te ora to ma xꞌanaꞌbe sluwaril te tut ya jpase, pero ta patil ya anaꞌbe sluwaril —xchi.

⁸ Te jPedroe la yal: —Te joꞌone ma xkaꞌbeyat apokbon te koke —xchi. La yal te Jesuse: —Teme makꞌ jpokbeyate, ma spas te jun nax ya xkꞌootike —xchi.

⁹ La yal te Simon Pedroe: —Teme jich Kajwal, ma me jaꞌuk nax ya apokbon te koke, ya me apokbon jkꞌab sok jol —xchi.

¹⁰ Pero te Jesuse la sjakꞌbe: —Te machꞌa nuxemixe ma puersauk te ya xpokot xan skojtole. Tey a teme ya xpokbot te yoke, porke skojtolix sakuben. Y te jaꞌexe sakubenexix, aunke ma apisilikuk —xchi.

¹¹ Te tutꞌil jich a yal te Jesuse, yuꞌun snaꞌoj te ma spisilikuk te sakubenikixe, yuꞌun ya snaꞌ te machꞌa ya xꞌakꞌot entregal yuꞌune.

¹² Ta patil te laj yoꞌtan ta spokbeyel yok te jnopojeletike, te Jesuse la slap xan te xkamixe, ba nakluk xan ta snaktajib te ba mexae. Y la yaltalanbe: —¿Me ya anaꞌbeyik sluwaril te tut la jpasbeyexe?

¹³ Te jaꞌexe ya awalbikon: “Maestro” y “Kajwal”. Ay rason te jich ya awalike, yuꞌun joꞌon a nix a.

¹⁴ Jaꞌ yuꞌun ya skꞌan ya apokbeya aba awokik jich tutꞌil te la jpokbeyex awokik te joꞌon te maestroon awuꞌunike sok te Ajwalilon awuꞌunike.

¹⁵ Te joꞌone la kaꞌbeyex awilik jun ejemplo yuꞌun jich me ya apasik te tut la jpas la awilike.

¹⁶ Jamal ya kalbeyex: Ni jtuluk aj-aꞌtelil te mas kꞌaxem yuꞌun te yajwale. Sok ni jtuluk te machꞌa tikonbil te jaꞌ mas kꞌaxem ta stojol te machꞌa tikonbil tal yuꞌune.

¹⁷ Teme kꞌot ta awoꞌtanike, sok teme jich ya apasike, ben me tsaꞌam alekilik.

¹⁸ Ma apisilikuk te jich ya kalbeyexe, yuꞌun jnaꞌoj te machꞌatik jtsaoje. Pero puersa me ya xkꞌot ta pasel te tut tsꞌibabil ta Sjun te Diose: “Te machꞌa jun nax ya xweꞌon soke, sujtix ta jkontra”, xchi me.

¹⁹ Nail me ya kalbeyex, yuꞌun te kꞌalal ya xkꞌot ta pasele, jich me ya xchꞌuun awoꞌtanik te yuꞌun nanix joꞌon ae.

²⁰ Jamal ya kalbeyex: Te machꞌa ya yakꞌ ta jkuenta te machꞌa joꞌon ya jtikone, joꞌon a yakꞌonix ta jkuenta abi. Y te machꞌa ya yakꞌon ta jkuentae, jaꞌ a yakꞌix ta jkuenta euk te Machꞌa la stikonon tale —xchi te Jesuse.

Te Jesuse la yal te ya xꞌakꞌot ta entregal yuꞌun te Judase

²¹ Patil te laj yal to te Jesuse, bayal a yakꞌ yajtal yoꞌtan, y jamal a lijk yal xan: —Jamal ya kalbeyex: Ay jtul te jaꞌexe te ya awakꞌikon entregale —xchi.

²² Te jnopojeletike lijk skꞌelube sba sitik, yuꞌun ni ma snaꞌik te machꞌa skꞌoplal te ya xꞌalote.

²³ Ay jtul te jnopojeletike te bayal skꞌanoj ta yoꞌtan te Jesuse te lotol ta weꞌel soke,

²⁴ y te Simon Pedroe la yaꞌbe yil ta xchꞌin seña ta sjojkꞌoyel machꞌa skꞌoplal te la yale.

²⁵ Jich te machꞌa ben lek yil sba sok te Jesuse tijilaj bael ta sjojkꞌoyel: —Kajwal, ¿machꞌa wan a? —xchi.

²⁶ Te Jesuse la sjakꞌbe: —Jaꞌ te machꞌa ya jmulbe xejtuk waj te ya kaꞌbe sweꞌe. Jaꞌ me abi —xchi. Jicha smulbe xejt waj y la yaꞌbe te Judas te xnichꞌan Simon Iscariotee.

²⁷ Y te Judase ora stsak te waje y och Satanas ta yoꞌtan. Te Jesuse la yalbe: —Te tut ya apase, pasa me ta ora —xyut.

²⁸ Pero ni jtul te machꞌa yipalik sok ta weꞌel ta mexae ma yaꞌibeyik sluwar tuꞌun te jich a yalbeye.

²⁹ Yuꞌun te Judas jaꞌ skanantayej te yawil stakꞌinike, jaꞌ yuꞌun la skuyik te ay tut ya yakꞌ xan tal ta manel te Jesuse yuꞌun te kꞌine, o yuꞌun ay tut ya yaꞌbeyik xan chꞌinuk te meꞌbaꞌetike.

³⁰ Te Judase stsakojix a te waje lokꞌ bael ta ora. Y ajkꞌubalix a.

Te achꞌ mantale

³¹ Lokꞌemix bael a te Judase, te Jesuse la yal: —Te ora to ya xꞌakꞌot ta ilel te slekilal te Nichꞌanile, y te slekil te Diose ya xchiknaj ta stojol.

³² Teme jaꞌ te Nichꞌanile ya yakꞌ ta ilel slekilal te Diose, jich te Diose ya yakꞌ ta ilel slekilal. Y jich me ya xkꞌot ta pasel ta ora.

³³ Jchꞌin kuntikil, ma jalukix kꞌaal te joyinejexe. Te jaꞌexe ya aleikon, pero jich mismo te la kalbe te juriyoetike, ora to jich ya kalbeyex euk: Ma spas ya xbaex te ba ya xboone.

³⁴ Ya kaꞌbeyex te achꞌ mantal to: Te kꞌux me xꞌawaꞌi abaik ta juju-tule, jich te tutꞌil kꞌux a kaꞌiyexe, jich me kꞌux ya awaꞌi abaik ta juju-tul te jaꞌexe.

³⁵ Teme kꞌux ya awaꞌi abaik ta juju-tule, spisil genteetik ya me snaꞌik te jnopojelex kuꞌune —xchi te Jesuse.

Te Jesuse la yal te ya xmukot ta yoꞌtan yuꞌun te jPedroe

³⁶ Te Simon Pedroe la sjojkꞌobe te Jesuse: —Kajwal, ¿ba ya xbaat? —xyut. La sjakꞌ te Jesuse: —Te ba ya xboone, te ora to ma spas ya atsꞌakliyikon bael. Pero ta patil ya me atsꞌakliyikon bael —xchi.

³⁷ Te jPedro la yal: —Kajwal, ¿tuꞌun te ma spas ya jtsꞌakliyat bael te ora to? Dispuesto ayon te ya kakꞌ jba ta milel ta akaje —xchi.

³⁸ Te Jesuse la sjakꞌbe: —¿Me jicha ya awal te dispuesto ayat te ya awakꞌ aba ta milel ta jkaje? Yuꞌun jamal ya kalbeyat: Antes ma to xꞌok a te tat kꞌoe, oxmelix la amukon ta awoꞌtan a —xyut.