San Juan 11 - Nuevo Testamento Tzeltal de Amatenango

Cham te Lazaroe

¹ Ay jtul winik tabil ta chamel te jLazaro sbiil te ay ta jtejklum Betaniae. Jaꞌ slumal te xMariae y sok te xwixe jaꞌ te xMartae.

² Jaꞌ te xMaria te xwix te jLazaroe te la smalbe perpume ta yok te Kajwaltike y la stakutesbe ta stsotsil sjol.

³ Jaꞌ yuꞌun xchebal te wixiletike la stikonik mantal ba albek te Jesuse: —Kajwal, te awamigoe tabil ta chamel —xyut bael.

⁴ Kꞌalal la yaꞌi te Jesuse la yal: —Te chamel te tabil ae makꞌ xcham yuꞌun. Yuꞌun nax ya xꞌakꞌot ta ilel slekil a te Diose, sok ya me xꞌakꞌot ta ilel slekil euk te xNichꞌan Diose —xchi te Jesuse.

⁵ Te Jesuse manchuk me ben kꞌux ta yoꞌtan te xMartae sok te yijtsꞌine sok euk te jLazaroe,

⁶ te kꞌalal la yaꞌi te tabil ta chamel te jLazaroe jalaj to xan cheꞌ kꞌaal te ba aye.

⁷ Patil la yalbe te jnopojeletik yuꞌun: —Konik xan ta Judea —xchi.

⁸ Te jnopojeletike la yalbeyik: —Maestro, ma to nax ayuk kꞌaal te juriyoetike kꞌan smilat ta wolel ta ton teꞌa. ¿Tut yuꞌun ya akꞌan sujtat bael teꞌa? —xchiik.

⁹ Te Jesuse la yaltalanbe: —¿Me ma wan lajchayebuk ora yichꞌoj te jun kꞌaale? Jaꞌ yuꞌun te machꞌa ya xbeen ta kꞌajkꞌaltike makꞌ xkꞌochin yok, yuꞌun ya yil te sakil kꞌinal te ay ta balmilale.

¹⁰ Pero te machꞌa ya xbeen ta ajkꞌubale ya xkꞌochin yok stukel, porke ma sakubenuk kꞌinal ta stojol —xchi.

¹¹ Patil te Jesuse la yal xan: —Te kamigotik jLazaroe wayalix, pero ya xba jtij jajchel —xchi.

¹² Te jnopojeletike la yalbeyik: —Kajwal, teme wayalixe, jaꞌ seña te lekubixe —xchiik.

¹³ Pero te tutꞌil jich a yal te Jesuse, yuꞌun chamenix te jLazaroe. Yan te jnopojeletike la skuyik te batsꞌi wayel naxe.

¹⁴ Jich te Jesuse jamal a yaltalanbe: —Te jLazaroe chamix, y ben jun koꞌtan te ma teyuk ayon ae, yuꞌun jich me ya achꞌuunikon ta lek euk te jaꞌexe.

¹⁵ Pero konik, ya xba kiltik —xchi.

¹⁶ Jich te jTomas, te “Loꞌalal” xꞌalbote, la yalbe te yan xan jnopojeletike: —Konikik euk. Koꞌn chamukotik sok —xchi.

Te Jesus ya yakꞌ chaꞌkuxel sok ya yakꞌ kuxlejal

¹⁷ Kꞌalal kꞌot teꞌa te Jesuse, xchanebalix kꞌaal smukel a te jLazaroe.

¹⁸ Te Betania tijil nax ay sok te Jerusalene, chꞌin xanix maꞌyuk ol lewa.

¹⁹ Talemik bayal juriyoetik ta yulutayel te xMartae sok te xMariae yuꞌun tal sjunutesbe yoꞌtan te yuꞌun cham te yijtsꞌine.

²⁰ Kꞌalal la yaꞌi te xMarta te ya xkꞌotix te Jesuse, lokꞌ bael ba staj tal. Pero te xMariae teꞌ jil ta sna.

²¹ Te xMartae la yalbe te Jesuse: —Kajwal, te liyuk ayate, te kijtsꞌine ma cham te jichuke.

²² Pero ya jnaꞌ te ora to spisil te tut ya akꞌanbe te Diose ya yaꞌbeyat —xchi.

²³ Te Jesuse la sjakꞌbe: —Te awijtsꞌine ya xchaꞌkux tal —xchi.

²⁴ Te xMartae la yalbe: —Jich. Ya jnaꞌ te ya xchaꞌkux tal ta slajibal kꞌaale te kꞌalal ya xchaꞌkux tal te animaetike.

²⁵ Te Jesuse jich a yalbe xan: —Joꞌon ya kakꞌ chaꞌkuxel sok kuxlejal. Te machꞌa ya xchꞌuunone manchuk me ya xcham, pero ya xchaꞌkux tal.

²⁶ Y spisil te machꞌa kuxajtik to a te ya xchꞌuunone makꞌ xcham sbajtel kꞌinal. ¿Me ya achꞌuun tsꞌin to? —xchi.

²⁷ La yal te xMartae: —Jich, Kajwal. Jchꞌuunej te jaꞌat Cristoat te xNichꞌanat te Diose te kaꞌiyejbetik sluwar te ya xtal ta balmilale —xchi.

Te Jesuse okꞌ te ba mukul te jLazaroe

²⁸ Patil te laj yal to, te xMartae ba yikꞌ tal te yijtsꞌine, jaꞌ te xMariae. Jicha kꞌo yalbe ta mukul: —Liꞌiyix to te Maestroe. Baan laj me —xchi.

²⁹ Te kꞌalal la yaꞌi te xMariae, tsꞌin a jajch bael ba yil te Jesuse.

³⁰ Te Jesuse ma to xꞌoch bael a te ba jtejklume, teꞌ to ay a ba kꞌo taek yuꞌun te xMartae.

³¹ Te juriyoetik te talemik ta sna ta sjunutesbeyel yoꞌtane, la yilik te tsꞌin a jajch bael ta ora te xMariae. La stsꞌakliyik bael, yuꞌun la skuyik te ya xba okꞌuk te ba mukul te jLazaroe.

³² Kꞌalal kꞌot te xMaria te ba ay te Jesuse la skejan sba ta yok sok la yal: —Kajwal, te liyuk ayate maꞌ cham te kijtsꞌin te jichuke —xchi.

³³ Te Jesuse la yil te ya xꞌokꞌ te xMariae sok te juriyoetik te sjoyinejik kꞌoele. La xpichꞌin yoꞌtan y lom triste sujt yuꞌun te yajtal yoꞌtane.

³⁴ La sjojkꞌolanbe: —¿Ba la amukik? —xyut. La yalik: —Laꞌ ila awil, Kajwal —xchiik.

³⁵ Y te Jesuse okꞌ.

³⁶ Te juriyoetike jich a yalbe sbaik: —Ila awilik, lom skꞌanoj ta yoꞌtan —xchiik.

³⁷ Pero ay chaꞌoxtul te juriyoetik te jich a yalike: —Jaꞌ to jaꞌ te la sjambe sit te choke. ¿Meꞌn ma wan xjuꞌ yuꞌun te maꞌ yakꞌ chamuk te jLazaroe? —xchiik.

Chaꞌkux tal te jLazaroe

³⁸ Te Jesuse beno yajtal yoꞌtan a tijilaj bael te ba mukule. Te ba mukule jun chꞌen. Te stiꞌile makbil ta ton.

³⁹ Te Jesuse la yal: —Lokꞌesaik te tone —xchi. La yalbe te xMarta te xwix te animae: —Kajwal, tuix, porke ayix chane kꞌaal te chame —xchi.

⁴⁰ Te Jesuse la sjakꞌbe: —¿Meꞌn maꞌ kalbeyat teme ya xchꞌuun awoꞌtane ya me awilbe slekil te Diose? —xchi.

⁴¹ La slokꞌesik te tone, y te Jesuse la skꞌelu moel chꞌulchan. Jich la yal: —JTat, ya kalbeyat kola awal te la awaꞌibonix te jkꞌope.

⁴² Ya jnaꞌ te sil tiempo ya awaꞌibon te jkꞌope, pero la kal yuꞌun slekilik a te genteetik te liꞌ aylane, yuꞌun jich me ya xchꞌuunik a te jaꞌat la atikonon tale —xchi.

⁴³ Ta patil te jich a yale, tulan a kꞌopoj: —¡Lazaro, lokꞌan tal teꞌa me to! —xyut.

⁴⁴ Y te animae lokꞌ tal. Te yok-skꞌabe betsꞌbil ta pakꞌ sok te yelawe pixil ta chujkilal. Te Jesuse la yaltalanbe: —Polaik, y aꞌ bajtuk —xchi.

Chapbot skꞌoplal ta milel te Jesuse

⁴⁵ Te juriyoetik te sjoyinejik tal te xMariae ay bayal a xchꞌuunik te Jesuse yuꞌun la yilik te tuti spase.

⁴⁶ Pero ay chaꞌoxtul te ba skꞌoponik te fariseoetike, jaꞌa kꞌo yalbeyik te tuti spas te Jesuse.

⁴⁷ Jich te fariseoetike sok te stataletik yuꞌun te saserdoteetike la stsob sbaik sok te machꞌa ay yaꞌtele. La yalik: —¿Tut ya skꞌan jpastik yuꞌun? Te winik to yipal ta spasel bayal señaetik smilagro.

⁴⁸ Teme jich nax a jilestike, spisil ya xba xchꞌuunik. Y te juꞌeletik yuꞌun te romaetike ya me xtal sjimbotik te templo kuꞌuntike sok te jlumaltike —xchiik.

⁴⁹ Pero ay jtul te ta spisilike te jCaifas sbiile, te jaꞌ statal saserdote a te jaꞌbil abi, la yaltalanbe: —Te jaꞌexe ni ma tut ya anaꞌik.

⁵⁰ ¿Meꞌn makꞌ ya anaꞌik te jaꞌ lek ya xkꞌot awuꞌunik te jtul nax winik ya xlaj yuꞌun te jtejklume, ke te spisil nasion ya xjime? —xchi.

⁵¹ Pero te jCaifase ma stukeluk a snop te tut la yale. Dios a albot ta yoꞌtan yuꞌun te jich a yale, yuꞌun statal saserdote a te jaꞌbil abi. Yuꞌun te Jesuse puersa ya xkꞌo chamuk yuꞌun te nasion juriyoe.

⁵² Y ma jaꞌuk nax yuꞌun te juriyoetike, jaꞌ yuꞌun euk spisil te alnichꞌanetik yuꞌun Dios te chꞌayemik ta ya stsob ta jun naxe.

⁵³ Jaꞌ to tal te kꞌaal abi te juꞌeletik yuꞌun te juriyoetike la xchapbeyik skꞌoplal ta milel te Jesuse.

⁵⁴ Jaꞌ yuꞌun te Jesuse maꞌ beenix ta sitil komon a te ba juriyoetike. Lokꞌ bael teꞌa te ba estado yuꞌun Judea y bajt ta jun luwar ta jun jtejkꞌum te Efrain sbiil te nopol ay sok te jojchol luware. Teꞌ anin sok a te jnopojeletik yuꞌune.

⁵⁵ Xnopetix a te kꞌin Pascua yuꞌun te juriyoetike, y bayal genteetik yuꞌun te jtejlumetik yipalik ta bael ta Jerusalene yuꞌun ya xba yakꞌ sbaik ta lekutesel ta stojol Dios antes ke ya xkꞌot te kꞌin Pascuae.

⁵⁶ Yipalik ta sleel te Jesuse. Talel bael ya sjojkꞌobe sbaik te ba temploe: —¿Tut xchaex? ¿Me ya wan xtal ta kꞌin o ma wan? —xchiik.

⁵⁷ Te fariseoetike sok te stataletik yuꞌun te saserdoteetike yalojik mantal teme ay machꞌa ya yil ba ay te Jesuse, a me ba yal, yuꞌun jich me ya stsakik a.