San Juan 1 - Nuevo Testamento Tzeltal de Amatenango

Te Machꞌa Skꞌop Diose jicha kꞌot tut winik

¹ Ta slijkibal ayix a te machꞌa Skꞌop Dios sbiile. Sjoyinej sba sok te Diose y jaꞌ mismo te Diose.

² Ta slijkibal to tal sjoyinej sba sok te Diose.

³ Spisil te tutik aye stukel ta skuenta te Dios a spase. Ni maꞌyuk jkajuk te tutik pasbile te ma jaꞌuk la spase.

⁴ Stukel ay ta skuenta te kuxlejale, y te kuxlejale jaꞌ ya sakub kꞌinal yuꞌun te genteetike.

⁵ Te machꞌa sakil kꞌinale tilemix ta ijkꞌal kꞌinal, y te ijkꞌal kꞌinale ma xjuꞌ yuꞌunik stupꞌel.

⁶ Ay jtul winik tikonot yuꞌun te Diose, te Juan sbiile.

⁷ Jaꞌ a tal yalbe skꞌoplal te machꞌa ya sakub kꞌinal yuꞌune, yuꞌun jich me ya xchꞌuunik spisil te tut ya yale.

⁸ Te Juane ma stukeluk te sakil kꞌinale, yuꞌun nax tal yalbe skꞌoplal te machꞌa ya sakub kꞌinal yuꞌune.

⁹ Te machꞌa batsꞌi sakil kꞌinal te ya xtil ta stojol spisil te genteetike, ya xtalix ta balmilal.

¹⁰ Te machꞌa Skꞌop Diose ayix ta balmilal. Stukel ta skuenta te Dios a spas te balmilale, pero te machꞌatik ayik ta balmilale maꞌ snaꞌbeyik sba.

¹¹ Jul ta yolil te jtejklum yuꞌun Diose, pero ma akꞌot ta jkuenta yuꞌun te slumale.

¹² Pero te machꞌatik la yakꞌik ta jkuentae Y la xchꞌuunik te tikonbil tal yuꞌun te Diose, akꞌtalanbot ta skuentaik te yal xnichꞌan Dios ya xlaj kꞌotike.

¹³ Jaꞌ yuntikil Dios. Ma pajaluk skꞌoplal sok te machꞌatik te ayinemik ta skuenta nax stiꞌbalulike sok te skꞌanojel yoꞌtan stiꞌbalulik te smeꞌ-statike, yuꞌun ta skuenta Dios te ya xꞌayinikixe.

¹⁴ Te machꞌa Skꞌop Diose jicha kꞌot tutꞌ winik y kuxuyin ta koliltik, nojel tal ta yoꞌtan te slekile y te tut batsꞌi jiche. Te joꞌotike la kilbetik te slekile, jaꞌ slekil te úniko Xnichꞌan Dios te aꞌbot yuꞌun te jTatik Diose.

¹⁵ Te Juane la yakꞌ sba ta testigo yuꞌun. Jich a yal: —Jaꞌ to jaꞌ te machꞌa la kalbe skꞌoplal te ya xtal ta patil kuꞌune, te jaꞌ mas ay ta jkuenta stukel ke te joꞌone. Porke ayix a stukele te kꞌalal ma to ayukon a te joꞌone —xchi te Juane.

¹⁶ Jpisiltik kichꞌojbetik te bendision te ya xtal ta skuenta te slekil yoꞌtane.

¹⁷ Te mantaliletike Dios a yaꞌbotik tal ta skuenta te jMoisese. Yan te slekil yoꞌtane sok te tut batsꞌi jiche jaꞌ a chiknaj ta skuenta stukel te Jesucristoe.

¹⁸ Ni jtul machꞌa yilojbe sit te Diose. Pero te úniko jtul xNichꞌan, te jaꞌ mismo Dios, sok jun nax ay sok te Tatile, jaꞌ la yaꞌbotik jnaꞌbetik sba te sTate.

Te Juan Akꞌichꞌjaꞌe la yalbe skꞌoplal te Jesucristoe

¹⁹ Te juriyoetik ta Jerusalene la stikonik bael saserdoteetik sok levitaetik ta stojol te Juane, yuꞌun ba sjojkꞌobeyik machꞌa a.

²⁰ Te Juane la yal ta jamal: —Ma joꞌukon te Cristoone —xchi.

²¹ La sjojkꞌobeyik xan: —¿Machꞌaat ate? ¿Me jaꞌat te jꞌalwanej Eliasate? —xchiik. Te Juane la yal: —Ma joꞌukon —xchi. La xchaꞌjojkꞌobeyik xan: —¿Me jaꞌat te jꞌalwanej te skꞌoplal ya xtale? —xchiik. La sjakꞌ: —Ma joꞌukon —xchi.

²² La yalbeyik: —¿Machꞌaat ate? Yuꞌun puersa ya skꞌan te ay tut ya xkꞌo kalbeytik te machꞌatik la stikonotik tale. ¿Tut ya awalbotikix bael te jaꞌate? —xchiik.

²³ Te Juan la sjakꞌtalanbe: —Joꞌon te ya xꞌawunon ta jochol tꞌantꞌan luwar. Jich tutꞌil te la yal te jꞌalwanej Isaiase: “Lek me xꞌachapbeyik sbe te Kajwaltike”, xchi me —xchi te Juane.

²⁴ Te machꞌatik tikonlanbil bael yuꞌun te fariseoetik

²⁵ la sjojkꞌobeyik xan: —Teme ma jaꞌukat te Cristoate, sok teme ma jaꞌukat te jꞌEliasate, sok teme ma jaꞌukat te jꞌalwanej te skꞌoplal ya xtale, ¿tuꞌun te ya awakꞌ ichꞌjaꞌ te? —xchiik.

²⁶ Te Juane la sjakꞌtalanbe: —Te joꞌone ya nax kakꞌ ichꞌjaꞌ ta jaꞌ. Pero ay jtul ta machꞌa ay ta awolilik te ma xanaꞌbeyik sbae,

²⁷ jaꞌ te machꞌa patil ya xtal kuꞌune. Te joꞌone ni ma spas ya jkujan jba ta spolbeyel te yakꞌil swawe —xchi te Juane.

²⁸ Spisil to jicha kꞌot ta pasel te ba luwar Betania sbiile te ay ta stojil te ba xlokꞌ tal kꞌajkꞌale ta jejch jaꞌ Jordan te ba yipal ta yakꞌel ichꞌjaꞌ te Juane.

Jaꞌ karnera yuꞌun Dios te Jesuse

²⁹ Ta xchebal kꞌaal te Juane la yil te yipal tal ta tijilajel te Jesus te ba aye, y la yal: —Ila awilik: jaꞌ to jaꞌ te mera karnera yuꞌun Dios te ya xchꞌaybe smul te machꞌatik ayik ta balmilale.

³⁰ Jaꞌ to jaꞌ te la kalbe skꞌoplal te patil ya xtal kuꞌune te jaꞌ mas tulan skꞌoplal stukel ke te joꞌone, porke stalel ayix a stukele te kꞌalal ma to ayukon a te joꞌone.

³¹ Te joꞌone ma jnaꞌ machꞌa a. Pero te joꞌone talemon nax ta yakꞌel ichꞌjaꞌ ta jaꞌ, yuꞌun jich me ya snaꞌbeyik sba a te jtejklum Israele —xchi te Juane.

³² Te Juane jich a yal xan: —La kil te Chꞌul Espíritu te koj tal ta chꞌulchane, jich yilel te tutꞌil palomae.

³³ Te joꞌone ma to jnaꞌ ekꞌa teme jaꞌe, pero te machꞌa la stikonon tal ta yakꞌel ichꞌ jaꞌe la yalbon: “Te machꞌa ya awil te ya xkoj tal ta stojol te Espiritue jaꞌ me ya yakꞌ ichꞌjaꞌ ta skuenta te Chꞌul Espíritu stukel”, xyuton.

³⁴ Te joꞌon kilojix, y joꞌon testigoon yuꞌun te jaꞌ Xnichꞌan te Diose —xchi te Juane.

Te primero jnopojeletik yuꞌun te Jesuse

³⁵ Ta yoxebal kꞌaal, te Juane teꞌeyix sok xan a te cheb jnopojeletik yuꞌune.

³⁶ Kꞌalal la yil a kꞌax bael te Jesuse, te Juane la yal: —Ila awilik me to. Jaꞌ me te mera karnera yuꞌun te Diose —xchi.

³⁷ Te chaꞌtul jnopojeletik yuꞌun te Juane la yaꞌi te jich a yale, y la stsꞌakliyik bael te Jesuse.

³⁸ Te Jesuse la skꞌelu sujtel y la yil te stsꞌaklajan tal ta spat te chaꞌtule. La sjojkꞌolanbe: —¿Tut ya aleik? —xchi. La yalik: —Maestro, ¿ba talemat? —xchiik.

³⁹ Te Jesuse la sjakꞌtalanbe: —Laꞌik me. Laꞌ ila awilik —xchi. Jicha laj bajtik y la yilik te ba olaneme. Teꞌ malubix kꞌaal yuꞌunik a, yuꞌun las kuatro mal kꞌaalix a.

⁴⁰ Jtul te ta xchebal te la yaꞌibe sluwar skꞌop te Juane sok te la stsꞌakliyik bael te Jesuse, jaꞌ te jꞌAndres te yijtsꞌin Simon Pedroe.

⁴¹ Te jꞌAndrese jaꞌ a bajt ta yoꞌtan ta sleel ta ora te sbankile, jaꞌ te Simone, y la yalbe: —La jtatikix te jMesiase —xchi kꞌoel. Te jMesias, “Cristo”, xchi kꞌoeme.

⁴² Te nax a te jꞌAndrese la yikꞌ bael te Simon te ba ay te Jesuse. Kꞌalal la yil te Jesuse, la yalbe: —Jaꞌat te Simon te xnichꞌanat Jonase. Pero Cefas abiil ya xkꞌoat —xyut. Te Cefas, “Pedro”, xchi kꞌoem abi.

Te Jesuse la yikꞌ te jFelipee sok te jNatanaele

⁴³ Ta yoꞌebal kꞌaal te Jesuse la snop te ya xbajt ta estado yuꞌun Galileae. La sta sba sok te Felipee, y la yalbe: —Laꞌ tsꞌakliyaon bael —xyut.

⁴⁴ Te jFelipee jaꞌ slumal te Betsaidae. Teꞌ talem ekꞌa te jꞌAndrese sok te jPedroe.

⁴⁵ Te jFelipee ba slej tal te jNatanaele, y la yalbe: —La jtatikix te machꞌa stsꞌibayejbe jilel skꞌoplal te jMoisese te ba sjunal te mantaliletike, sok te tsꞌibabil jilel skꞌoplal yuꞌun te jꞌalwanejetike. Jaꞌix te Jesus te xnichꞌan Jose te talem ta jtejklum Nazarete —xchi.

⁴⁶ La yal te jNatanaele: —¿Me yuꞌun ay tut lek ya xlokꞌ te ba Nazarete? —xchi. Te Felipe la sjakꞌbe: —Laꞌ koꞌn kiltik awil —xyut.

⁴⁷ Kꞌalal te Jesuse la yil te yipal tal ta tijilajel te jNatanaele, la yal: —Liꞌ ayix tal te jtul batsꞌi israel te maꞌyuk lot ta yoꞌtane —xchi skꞌoplal.

⁴⁸ Te jNatanaele la sjojkꞌobe: —¿Tuꞌun tutꞌil la anaꞌbon jba? —xchi. Te Jesuse la yalbe: —La kilatix a te ma to ya yikat tal te Felipee te kꞌalal ayat ta yanil te ikuxe —xchi.

⁴⁹ Te jNatanaele la yalbe: —Maestro, jaꞌat te xNichꞌanat te Diose, sok jaꞌat Reyat yuꞌun te Israele —xchi.

⁵⁰ Te Jesuse la sjakꞌbe: —¿Me jaꞌ ya achꞌuunon te la kalbeyat te la kilat te ayat ta yanil ikuxe? Ya to xba awil tutik mas mukꞌ xan ke to —xchi.

⁵¹ Te Jesuse la yalbe xan: —Jamal ya kalbeyex te jaꞌexe, ya me awilik jamal te chꞌulchane, y te angeletik yuꞌun te Diose ya me awilik te xko xmo ta stojol te Nichꞌanile.