Hechos 9 - Nuevo Testamento Tzeltal de Amatenango

Sujtesbot yoꞌtan yuꞌun Dios te Sauloe

¹ Te Sauloe ma xlaj yoꞌtan ta yalbeyel skꞌoplal ta milel te hermanoetik ta stojol te Kajwaltike. Jaꞌ yuꞌun ba skꞌopon te statal saserdotee

² y la skꞌanbe junetik te ya xkꞌo yaꞌbe te machꞌatik ay ta skuenta te sinagogaetik te ay ta jtejklum Damascoe, yuꞌun ya xba sle te machꞌatik stamojik te achꞌ bee, winik o ants, y ya yikꞌtalan bael ta prexo ta Jerusalen.

³ Pero te kꞌalal xnopetix ya xkꞌot a te ba jtejklum Damascoe, ora nax a tal xojob ta chꞌulchan, xlemet julel y jul joyek yuꞌun.

⁴ Te Sauloe tꞌuxaj kꞌoel ta lum y ay machꞌa kꞌopoj a yaꞌi te jicha yale: —Saulo, Saulo, ¿tuꞌun te ya awilbajinone? xchi.

⁵ Te Sauloe la sjojkꞌobe: —¿Machꞌaat a Kajwal? —xchi. La sjakꞌ te machꞌa xkꞌopoje: —Joꞌon Jesuson, jaꞌ mismo te machꞌa yipalat ta yilbajinele. Jaꞌat mismo ya awilbajin aba jich tutꞌil te wakax te ya stꞌim ta tekꞌel te tut ya stojutesot ae —xchi.

⁶ Jich te Sauloe ben xꞌaꞌbot sik yuꞌun xiꞌel. La yal: —Kajwal, ¿tut ya skꞌan awoꞌtan te ya jpase? —xchi. Y albot yuꞌun te Kajwaltike: —Jajchan y ochan bael te ba jtejklume. Teꞌ me ya yalbelat a te tut ya skꞌan ya apase —xꞌutot.

⁷ Te machꞌatik sjoyinej sba sok ta beel te Sauloe ben xlaj xiꞌ yuꞌun, porke la yaꞌiyik te machꞌa kꞌopoje pero maꞌyuk machꞌa a yilik.

⁸ Te nax a te Sauloe la stam sba jajchel; pero te kꞌalal la swikꞌ te site, ma spas yilix kꞌinal a. Te sjoꞌtake la xchechbeyik skꞌab y la yikꞌik bael ta jtejklum Damasco.

⁹ Oxeꞌ kꞌaal teꞌey a ma xyil kꞌinal y ni maꞌ weꞌ y ni ma tut ya yuchꞌ.

¹⁰ Te ba jtejklum Damascoe teꞌey jtul hermano a te jꞌAnanias sbiile te kꞌoponot yuꞌun Kajwaltik ta stekꞌlejal yilele. Albot yuꞌun: —Ananias —xꞌutot. La sjakꞌ te jꞌAnaniase: —Liꞌ ayon to, Kajwal —xchi.

¹¹ Jicha albot yuꞌun te Kajwaltike: —Jajchan y baan te ba Tojil Kaya sbiile. Te ba sna Judase jojkꞌoya te jtul winik te talem ta jtejklum Tarso te Saulo sbiile te yipal ta skꞌoponel Dios a.

¹² Yuꞌun la yilix ta stekꞌlejal yilel jtul winik te jꞌAnanias sbiile te ya xtal skajanbey skꞌab ta sjole, yuꞌun jich ya xwijkꞌ a te site —xchi a yaꞌiy.

¹³ Kꞌalal la yaꞌi te jicha albote, te jꞌAnaniase la yal: —Kajwal, bayal machꞌa yalojbon tutꞌil ay te winik abi, y spisil te tut ma tsaꞌamuk spasojbe te machꞌatik xchꞌuunejat te ba Jerusalene.

¹⁴ Y te ora to jaꞌ talemix liꞌye yuꞌun tulan albil tal yuꞌun te stataletik yuꞌun saserdoteetike te ya yikꞌ bael ta prexo spisil te machꞌatik ya staik ta alel te stsaꞌamul te abiile —xchi.

¹⁵ Pero te Kajwaltike la yalbe: —Baan, porke jtsaojix tal te winik me to. Yuꞌun ya me yalbon jkꞌoplal ta stojol te genteetik ta yanetik nasione, y sok euk te reyetik yuꞌune, y sok te israeletike.

¹⁶ Joꞌon me ya kaꞌbe snaꞌ spisil te tutik swokolil ya sta ta jkuentae —xchi.

¹⁷ Te jꞌAnaniase jicha bajt te ba na ba ay te Sauloe. Och bael kꞌo skajanbe skꞌab ta sjol y la yalbe: —Hermano Saulo, te Kajwaltik Jesus te la yakꞌ sba ta ilel ta atojol te ayat tal ta be ae, jaꞌ a stikonon tal yuꞌun jich me ya xjam a te asite y yame xnoj jil ta awoꞌtan te Chꞌul Espiritue —xchi.

¹⁸ Y ora nax a chꞌay koel ta sit te Sauloe pajal yilel sok te tutꞌil sulil chaye, y jich a yil kꞌinal. Jicha jajch te Sauloe y aꞌbot yichꞌja.

¹⁹ Ta patil weꞌ y la xchaꞌ yichꞌ xan spuersa te stiꞌbalule. Y teꞌ jil cheꞌoxeꞌ kꞌaal a sok te hermanoetik te aylan ta jtejklum Damascoe.

Te Sauloe la yal skꞌop Dios ta Damasco

²⁰ Te nax a te Sauloe lijk ta yalel te ba sinagogaetik te jaꞌ Xnichꞌan Dios te Jesuse.

²¹ Spisil te machꞌatik la yaꞌiyike lom cham a yaꞌiyik y la yalik: —¿Me ma jaꞌuk tsꞌin to te ya yilbajinlan te machꞌatik ya staik ta alel te stsaꞌamul te sbiil te Jesus te aylan ta Jerusalene? ¿Me ma wan jaꞌuk mismo talem yuꞌun liye te ya xchuktalan bael te hermanoetik sok te ya xba yakꞌ entregal ta stojol te stataletik yuꞌun te saserdoteetike? —xchiik.

²² Pero te Sauloe mas a yakꞌ xan puersa ta yalel te jaꞌ Cristo te Jesuse. Te juriyoetik te aylan ta Damascoe maꞌ snaꞌ tuti yalik yuꞌun.

Kol bael ta skꞌabik te juriyoetik te Sauloe

²³ Kꞌaxix bayal kꞌaal a, te juriyoetike la snopbeyik skꞌoplal ta milel te Sauloe. Pero te Sauloe la yaꞌi te yipal ta nopbeyel skꞌoplale.

²⁴ Kꞌajkꞌal y ajkꞌubal ya smaliyik te ba spuertaul lokꞌibal yuꞌun te jtejklume yuꞌun ya smilik.

²⁵ Pero te hermanoetike la yakꞌik ta jun mam moch y ta ajkꞌubal a slijkanik koel te ba spajkꞌul smakteꞌal te jtejklume. Jicha kol bael.

Te Sauloe kꞌot xan ta Jerusalen

²⁶ Te kꞌalal kꞌot ta Jerusalen te Sauloe, kꞌan stsob sba sok te hermanoetike, pero spisilik ya xlaj xiꞌik yuꞌun, yuꞌun ma xchꞌuunik teme jnopojelix yuꞌun te Jesuse.

²⁷ Pero te jBernabee la yikꞌ bael y ba yakꞌ ta stojol te apostoletike. Te Bernabe la yaltalanbe te tutꞌil a yil ta be te Kajwaltike sok te tuti albot yuꞌun Kajwaltik te Sauloe, sok te tutꞌil jamal la yalix ta Damasco te Sauloe te tutꞌil ay skꞌoplal te Jesuse.

²⁸ Jich te Sauloe la sjoyinlan te apostoletik te ba Jerusalene, y la sjoyinlan ta beel. Jamal a yalbe skꞌoplal te Kajwaltike.

²⁹ La skꞌopon te juriyoetik te ya xkꞌopojik ta griego-kꞌope ta yaꞌbiyanel te tutꞌil ay skꞌoplal te Kajwaltike. Pero kꞌan smilik yuꞌun.

³⁰ Kꞌalal la yaꞌiybeyik sluwar te hermanoetike, la yikꞌik bael ta jtejklum Cesarea te Sauloe, y te nax a la stikonik bael ta jtejklum Tarso.

³¹ Jich te hermanoetik te aylan ta estadoetik yuꞌun Judeae sok ta Galilea y sok ta Samaria ben jun yoꞌtanik yipalik ta pꞌijubel ta skuenta Espíritu. La xchꞌuunik ta lek te Kajwaltike, y koltalanot yuꞌun te Chꞌul Espiritue jich yipalik ta pꞌolel ta mas.

Kol ta chamel te jꞌEnease

³² Te jPedroe yipal kꞌael ta yuluꞌtayel a te hermanoetike, y bajt ba yil euk te hermanoetik te aylan ta jtejklum Lidae.

³³ Teꞌ kꞌo sta jtul winik a te jꞌEneas sbiile te ayix waxkeꞌ jaꞌbil te ay ta swayib te kꞌolbil xchial yok-skꞌabe.

³⁴ Te jPedroe la yalbe: —Eneas, te Jesucristoe ya slekutesat. Jajchan y chapa bael te awayibe —xyut. Te jꞌEnease ora jajch,

³⁵ y spisil te machꞌatik aylan ta jtejklum Lida sok ta jtejklum Saron la yilik te jajch te jꞌEnease. Jich a sujtes yoꞌtanik ta stojol te Kajwaltike.

Chaꞌkux te xDorcase

³⁶ Ta jtejklum Jope ay jtul jnopojel ants xTabita sbiil, te Dorcas xchi ta griego-kꞌope. Te ants to ben lek sok te xkuxlejale y ya skoltay te machꞌatik ay swokolike.

³⁷ Jaꞌ stiempo a taot ta chamel te xDorcase, y cham. Kꞌalal lajix ta pokbeyel a te stiꞌbalule ba xchawanik ta jun kuarto te ba xchaꞌkajal snae.

³⁸ Te jtejklum Jopee nopol ay sok te jtejklum Lidae te ba ay te jPedroe, y te hermanoetike la yaꞌiyik te teꞌey a te jPedroe. La stikonik bael cheb winketik, ba yalbeyik tal: —Awokoluk, laꞌ me ta ora liꞌ ba aytike —xchiik.

³⁹ Y te jPedroe laj bajt sok ta ora. Te kꞌalal laj kꞌot ta Jopee, la yikꞌik bael te ba kuarto baꞌ xchawanejbeyik te stiꞌbalule. Spisil te meꞌba antstike la sjumik te jPedroe, ben xlaj okꞌik, y la yaꞌbeyik yil te skꞌuꞌ-spakꞌik te pasbil yuꞌun te xDorcase te kꞌalal kuxul to ae.

⁴⁰ Te jPedro spisil a stikonlan lokꞌel y la skejan sba sok la skꞌopon Dios. Te nax a sujt skꞌelu te animae, y la yalbe: —Tabita, jajchan —xchi. Te antse la swikꞌ sit. La yil te teꞌey a te jPedroe, la snajkan sba.

⁴¹ Te jPedroe la xchechbe te skꞌabe y la xjach. Te nax a la yikꞌ tal te hermanoetik y sok te meꞌba antstike, y la yakꞌtalanbe yil te kuxulix te xDorcase.

⁴² Spisil te jtejklum Jopee la yaꞌiyik te jich a kꞌot ta pasele, y ben bayal a xchꞌuunik te Kajwaltike.

⁴³ Te jPedroe jalaj bayal kꞌaal te ba jtejklum Jopee te ba sna jtul jkꞌaꞌutesej-nujkule te Simon sbiile.