Hechos 5 - Nuevo Testamento Tzeltal de Amatenango

La sta smul te jꞌAnanias sok te Safirae

¹ Pero ay jtul, Ananias sbiil, sok Safira te jaꞌ yiname, la xchonik jlom slumik.

² Te mamal to komon a snop sok te yiname te la yichꞌik jilel olil te takꞌine, y te olil xane tal yaꞌbe ta skꞌab te apostoletike.

³ Te jPedroe la yalbe: —Ananias, ¿tuꞌun te och pukuj ta awoꞌtane? Yuꞌun la apasix ta lot te Chꞌul Espiritue te tutꞌil la akꞌej jilel oliluk te stojol alume.

⁴ ¿Meꞌn ma jaꞌukat awuꞌun te lume? Y te kꞌalal la achone, ¿meꞌn ma jaꞌukat awuꞌun te takꞌine? ¿Tuꞌun te jich la anope? Ma jaꞌuk la aloꞌlay te winketike, jaꞌ la aloꞌlay te Diose —xchi te jPedro.

⁵ Te kꞌalal laj yaꞌiye, te jꞌAnaniase jawtsꞌo bael y cham. Spisil te machꞌatik la yaꞌiyike beno la xiꞌ yuꞌun.

⁶ Jicha laj tal chaꞌoxtul kermetik, la spotsbeyik te stiꞌbalule, y la yichꞌik bael y ba smukik.

⁷ Ay wan oxebuk ora ta patil a, och bael euk te yinam jꞌAnaniase. Ni makꞌ snaꞌ te tuti kꞌotix ta pasele.

⁸ Te jPedroe la sjojkꞌobe: —Albon kaꞌitik: ¿me jachik stojol te lum te la achonik te la awalike? xchi. Te antse la sjakꞌ: —Jicha nix a te stojole —xchi.

⁹ Te jPedroe la yalbe: —¿Tuꞌun te jich la anopik te ya awilbeyik yoꞌtan te Chꞌul Espíritu yuꞌun te Kajwaltike? Teꞌ talix a te machꞌatik xkꞌoj smukik jilel te amamlale, y te ora to ya me yikꞌelat bael euk —xyut.

¹⁰ Mismo tiempo a te antse jawtso bael ta yok te jPedroe, y cham. Kꞌalal och bael te kermetike, chamenix a kꞌo staik. Y la yikꞌik bael ba smukik jilel ta xujk te ba mukul te smamlale.

¹¹ Y beno laj xiꞌ yuꞌun spisil te machꞌatik xchꞌuunejix Diose y spisil te machꞌatik la yaꞌiyik te jicha kꞌot ta pasele.

Bayal milagroetik y señaetik

¹² Te apostoletike juꞌ yuꞌunik spasel bayal señaetik y milagroetik ta yolil te gentee. Y spisil te hermanoetike jun yoꞌtanik la stsobilan sbaik te ba yamakꞌ te Salomone.

¹³ Ni jtul maꞌyuk machꞌa te lom nax a tal stsob sbaik soke. Pero te genteetike ben akꞌtalanbil ta jkuenta yuꞌun.

¹⁴ Y yan yan a pꞌol te machꞌa la xchꞌuune, ay winketik sok antstik a xchꞌuun te Kajwaltike.

¹⁵ Y la yikꞌik lokꞌel ta kayailtik te yaj-chamelike. La swayanlanik ta wayibal y ta kꞌabalteꞌ, yuꞌun te kꞌalal ya xkꞌax teꞌa te jPedroe, chaꞌoxtul ya me xtaot yuꞌun te skeawe.

¹⁶ Jich ay bayal a laj tal jtejklumetik te tijil nax ay sok te Jerusalene, yikꞌojlanik tal yaj-chamelik y sok machꞌatik ayik ta ilbajinel yuꞌun te pukujetike. Y spisil a laj lekubik.

Ilbajinot te jPedroe sok te Juane

¹⁷ Te statal saserdotee y sok te sgrupo saduseoetik te jun nax ay soke, lijk bayal slaꞌ-yoꞌtanik.

¹⁸ La stsakik bael te apostoletike y la yotsesik ta prexo te ba jtejklume.

¹⁹ Pero jtul chꞌul ángel yuꞌun te Kajwaltike ta ajkꞌubal a tal sjeꞌ te puerta yuꞌun prexoe, y la yiktalan lokꞌel, y la yaltalanbe:

²⁰ —Baanik. Ban tejkꞌana abaik te ba temploe. Albeyaik te jtejklume spisil te tutꞌil ay te achꞌ kuxlejale —xchi.

²¹ Te tutꞌil jicha altalanbote, ta yan kꞌaal ben sab a laj och bael ta templo, y lijkik ta pꞌijuteswanej. Te tutꞌil ayikix ta templo ae, te statal saserdotee y te machꞌatik teꞌeyik sok ae, la yikꞌik tal spisil te moletik yuꞌun te israeletike yuꞌun tal stsob sbaik sok te machꞌatik ay yaꞌtelike. Y la yakꞌik mantal te ya xlokꞌesot tal ta prexo te apostoletike.

²² Pero te kꞌalal a laj kꞌot te jkananetike, maꞌyuk a kꞌo staik te ba prexoe. Jicha sujtik tal ta yalel.

²³ Jich a yalik: —Lom lek tsꞌusul a kꞌo jtatik te puerta yuꞌun prexoe y te soltaroetik lek skanantayejik te puertaetike. Pero te kꞌalal la jeꞌtike, maꞌyuk machꞌa jtajtik te ba yutile —xchiik.

²⁴ Te kꞌalal la yaꞌi te statal saserdotee sok te statal jkanan yuꞌun temploe sok te stataletik yuꞌun te saserdoteetike, lijk sjojkꞌobe sbaik tutꞌil batsꞌi ya xlaj kꞌot tsꞌin me to.

²⁵ Ben te ora a, kꞌot jtul y altalanbot yuꞌun: —Te machꞌatik la awotsesik ta prexo aylanix ta templo, yipal ta snojpesel te jtejklume —xchi.

²⁶ Te statal jkanane sok te jkananetike laj bajt ta sleel. Pero ma yilbajinik, yuꞌun ya xiꞌ yuꞌun teme wolotal ta ton yuꞌun te gentee.

²⁷ Kꞌalal la jkꞌote, la yikꞌik bael te ba tsobolik te machꞌatik ay yaꞌtele. Te statal saserdotee la yaltalanbe:

²⁸ —Te joꞌotike jkomojtikix te ma xjuꞌix te ya snojpeswanex tutꞌil ay skꞌoplal te winik abi. ¿Y tut a te ya apasike? Pujkejix awuꞌunik ta spisil ta Jerusalen te tut ya awakꞌik ta nopele. Y ya akꞌan ya awaꞌbotik jkuchtik te tutꞌil a cham te winik abi —xchi.

²⁹ Te jPedroe y sok te yan xan apostoletike la sjakꞌik: —Puersa jaꞌ ya jchꞌuunbetik smantal te Diose; ma jaꞌuk ya jchuunbetik smantal te winketike.

³⁰ Te Dios yuꞌun te antibo jmeꞌ-jtatike jaꞌ a xchaꞌkuses tal te Jesuse. Jaꞌ mismo te la amilik te la ajojkꞌanik ta kruse.

³¹ Dios a yakꞌ ta akꞌel ta jkuenta, y la yakꞌix ta sbatsꞌil kꞌab, y la yakꞌix ta ajwalil sok ta jkoltawanej, yuꞌun jich me ya sujtes yoꞌtanik yuꞌun smulik ta stojol Dios te nasion israele, y jich me ya staik perdon yuꞌun te smulike.

³² Joꞌotik testigootik yuꞌun tsꞌin to, y jich euk te Chꞌul Espiritue te Dios a akꞌtalanbot yuꞌun te machꞌatik ya xchꞌuunike —xchi te Pedroe.

³³ Kꞌalal jich a yaꞌiyike, kꞌajkꞌubik yuꞌun y kꞌan smilik.

³⁴ Pero te ba stsoboj sbaik te machꞌatik ay yaꞌtelike ay jtul fariseo tey a te Gamaliel sbiile, te jaꞌ maestro yuꞌun te mantaliletike te ben lek aꞌbil ta jkuenta yuꞌun te jtejklume. Jaꞌ a tejkꞌaj jajchel y la yakꞌ mantal te ya to xlokꞌ bael jtsꞌinuk te apostoletike.

³⁵ Te nax a la yalbe te machꞌatik ay yaꞌtele: —Jaꞌex israeletik, ila me abaik yuꞌun te tut ya apasik sok te winketik to.

³⁶ Naꞌaik me te ay jich kꞌot ta pasel te nameye, te ay jtul winik Teudas sbiil te la yal te ay tulan yichꞌoj yaꞌtele. Y ay wan kuatro sien ta jtul winketik a stsꞌakliyik. Pero te winik abi milot. Y te machꞌatik stsꞌakliyeje laj pujke bael y teꞌ kꞌo chꞌayuk spisil a.

³⁷ Patil jich a spas euk ta skꞌaalel senso te Judas te talem ta Galileae. La sloꞌlay bayal ta jtul la sjoyin sba sok, pero jicha milot euk y spisil te machꞌatik stsꞌakliyejike laj pujke bael.

³⁸ Jaꞌ yuꞌun ya kalbeyex sluwar: Ijkitayaik jilel te winketik me to y ma chꞌik abaik sok. Porke teme ta skꞌop nax winketik te tut ya yalike, ya me xlaj skꞌoplalik.

³⁹ Yan teme ta skuenta Diose, ma xjuꞌ awuꞌunik skomel. Ila me abaik, ma me xꞌakontrain abaik sok te Diose —xchi te Gamaliele.

⁴⁰ Spisil te machꞌatik ay yaꞌtele la xchꞌuunik. Jicha yikꞌik ta ochel te apostoletike. La yaꞌbeyik aresial y la skomik te makꞌ yalikix a te skꞌoplal Jesuse. Patil la skolesik bael.

⁴¹ Te apostoletike lokꞌik bael te ba stsoboj sbaik te machꞌaik ay yaꞌtele. Ben kontentoik yuꞌun, porke Dios jich a skꞌan te kꞌax swokolik ta ilbajinel ta skaj te Jesuse.

⁴² Jujun kꞌaal a nojpeswanik y la yalik ta templo y ta nantik te lek achꞌ kꞌop yuꞌun te Jesus te jaꞌ Cristoe.