Hechos 28 - Nuevo Testamento Tzeltal de Amatenango

Te jPabloe ay ta Malta

¹ Te kꞌalal kolotikix lokꞌel ta mar jpisiltik ae, la jnaꞌtik te Malta sbiil te luwar te joybil ta jaꞌe.

² Te machꞌatik teꞌ ayinemik aye lom lek a xkꞌuxutayotik jpisiltik. Yuꞌun beno jaꞌal a y beno sik a, la stsunik jun mukꞌul kꞌajkꞌ, y la yikꞌotik bael te ya xtijilajotik ochele.

³ Te jPabloe la stsob tal chꞌinuk takin siꞌ. Kꞌalal la yakꞌ ochel ta kꞌajkꞌ a, lokꞌ tal ta anel kojt chan yuꞌun xkꞌixnal te kꞌajkꞌe, y tsakꞌbot ta tiꞌel skꞌab te jPabloe.

⁴ La yil te machꞌatik teꞌey slumalik aye te jokꞌol chan ta skꞌab te jPabloe. La yalbe sbaik: —Te winik to jmilaw wan. Manchuk me kolix tal lokꞌel ta mar, pero ma xꞌakꞌotix kuxuyinuk yuꞌun te dios kuꞌuntike —xchiik yuꞌun.

⁵ Pero te jPabloe la slilin koel ta kꞌajkꞌ te chan te ya xtiꞌawane, y maꞌyuk tuti pasbot yuꞌun.

⁶ Spisilik ya smaliyik teme ya sijtꞌub o teme jtsꞌin nax ya xtꞌuxaj te ya xchame. Lom jal a smaliyik. Kalal la yilik te maꞌyuk tuti pasbot yuꞌun te chane, yanej te tut snopojike, y lijk yalik te jaꞌ jtul dios te jPabloe.

⁷ Tijil nax ay a te slum jtul winik te japubil yuꞌun te machꞌa ay yaꞌtel teꞌae, te jPublio sbiile. Jaꞌ a yikꞌotik ochel ta sna. Ben jun yoꞌtan a smaklinotik oxeb kꞌaal.

⁸ Te stat jPublioe tabil ta chamel. Wayal ta swayib, yuꞌun yichꞌoj kꞌajkꞌ sok chꞌich tsaꞌanel. Jicha ba yulutay tal te jPablo, y patil te laj skꞌoponbe Diose, la skajanbe skꞌab ta sjol y lekub.

⁹ Yuꞌun te jich a spase, tal xan yan jchameletik te aylan te ba luwar te joybil ta jaꞌe, y lekubik bael ta chamel.

¹⁰ Jaꞌ yuꞌun la yaꞌbotik jmajtantik, y ta patil te mootik xan bael ta barkoe, la yaꞌbotik bael spisil te tut ya xtuun kuꞌuntik ta beele.

Te jPabloe kꞌot ta Roma

¹¹ Jalajotik oxeb u te ba luwar te joybil ta jaꞌe. Mootik bael ta jun barko te talem ta jtejklum Alejandria te teꞌ kꞌax yuꞌun a te skomil kꞌaale. Ta sba te barkoe teꞌ loktabil a te diosetik yuꞌunik te Cástor sok Pólux te sbiilike.

¹² Kꞌootik ta jtejklum Siracusa, te ba ya xꞌolan barkoe. Teꞌ jalajotik oxeb kꞌaal a.

¹³ Y teꞌ lijkotik xan ta beel ta barko a ta stiꞌil-stiꞌil nax asta lokꞌotik kꞌoel ta jtejklum Regio. Ta xchebal kꞌaal la kaꞌitik ay a tal ikꞌ ta stojil sur, y mal kꞌaal ta xchebal kꞌaal kꞌootik ta jtejklum Puteoli.

¹⁴ Teꞌ kꞌo jtatik chaꞌoxtul hermanoetik a, y la yalbotik te ya joyintik chebuk semanae. Y último xanix a kꞌootik ta Roma.

¹⁵ Te hermanoetik te ayik ta Romae, yaꞌiyebotikix jkꞌoplaltik te ayotik tal ta beele, jicha lokꞌik tal ta staotik ochel. Teꞌ staotik a ba chꞌin luwar te Foro de Apio sbiile sok te ba ay na te Tres Tabernas sbiile. Te kꞌalal la yil te jPabloe, la yalbe kolayal Dios yuꞌun, y ben kontento a kꞌajta.

¹⁶ Te kꞌalal kꞌootik ta Romae, te statal soltaroe la yakꞌ entregal te jprexojeletik ta stojol te statal soltaro te ay tulan yaꞌtele. Pero te jPabloe la yichꞌ permiso te parte ya xꞌanin stukele. Jtul nax soltaro ya xkanantayot yuꞌun.

Te jPabloe la yal skꞌop Dios ta Roma

¹⁷ Oxeb kꞌaal ta patil skꞌoel a te jPabloe la yakꞌ tal ta ikꞌel te krensipaletik yuꞌun te juriyoetik ta Romae. Te kꞌalal stsoboj sbaikix aye, la yaltalanbe: —Kermanotak, te joꞌone maꞌyuk tut jpasoj ta stojol te jlumaltik juriyoetike ni ayuk jkontrainej te kostumbre yuꞌun te antibo jmeꞌjtatike. Pero ta Jerusalen la yakꞌelon entregal ta stojol te jromaetike.

¹⁸ Kꞌalal la sjojkꞌobikone te jromaetik te tutꞌil ay te jmule, kꞌan skolesikon, porke ma staik te tut sluwar te ya yakꞌelon ta milel yuꞌune.

¹⁹ Pero te juriyoetike maꞌ skꞌanik stukel. Jaꞌ sluwar te la jkꞌan te jaꞌ ya smeltsaanon te mukꞌul rey Cesare. Ma yuꞌunuk jaꞌ a tal jlebe smul te jlumaltike.

²⁰ Jaꞌ yuꞌun te la kakꞌex tal ta ikꞌele, yuꞌun ya awilik sok ya awaꞌiyik. Porke te tutꞌil chukulon ta kadena ya awilike, jaꞌ nax ta skaj te tut yipalotik ta smaliyel joꞌotik te israelotike —xchi te jPabloe.

²¹ Te krensipaletike la yalik: —Te joꞌotike ni maꞌyuk kichꞌojtik junuk karta te ya xtal ta judea te tut ay akꞌoplale. Sok ni jtuluk kermanotakti juriyoetik te julem liye te tal a yalbotik te tut ma tsaꞌamuk lebil amule.

²² Ya jkꞌan kaꞌibetik sluwar te tutiꞌ anopoje, porke jnaꞌojtik te bayuk nax kontrainbil te achꞌ nopojibal to —xchiik.

²³ Jich a xchapik jun kꞌaal te ya xtalik bayal ta jtul gente te ba smajanej na te jPabloe. Pajtajel nax a lijk y asta smalel kꞌaal a yal te jPablo tut ay ta ajwalinel te Diose. Yuꞌun yoꞌtanuk te ya yaꞌbe xchꞌuun te Jesuse, jich tutꞌil te tsꞌibabil ta mantaliletik yuꞌun te jMoises sok te tsꞌibabil yuꞌun te jꞌalwanejetike.

²⁴ Te yane la xchꞌuun te tuti yal te jPabloe, pero te yane maꞌ xchꞌuunik.

²⁵ Jich maꞌyuk akuerdo a kꞌot yuꞌunik, y lijk bajtikuk. Te jPablo la yaltalanbe: —Leka kꞌopoj te Chꞌul Espíritu ta stojol te antibo ameꞌ-atatike ta skuenta te jꞌalwanej te jich a yale:

²⁶ “Baan, jich me ya awalbe te jtejklum to: ‘Manchuk me ya awaꞌi ta lek yilel, pero ma xꞌanaꞌbeyik sluwar. Manchuk me ya awilik ta lek yilel, pero ma xyaꞌiybeyik sluwar’, ya me awut.

²⁷ Porke tulanejemix te yoꞌtan te jtejklum to. Majkem te xchikinike, y te sitike ma xyilik sok kꞌinal. Yuꞌun ma skꞌan yilik, sok ma skꞌan xyaꞌiyik, ni ma skꞌan xyaꞌibeyik sluwar. Yuꞌun ma skꞌan sujtes yoꞌtanik ta jtojol y makꞌ ya jlekuteslan”, xchi me.

²⁸ “Jaꞌ yuꞌun, naꞌbeyaik me sluwar: Te ora to sok pajel chabe baele te kolel yuꞌun te Diose jaꞌ me ya xkꞌot ta skuenta te machꞌa ma juriyouke. Jaꞌ ya yaꞌibe sluwar stukelik —xchi te Pabloe.

²⁹ Te kꞌalal jich a yal te jPabloe, te juriyoetike laj bajt, y bayal tuti lijk yalbe sbaik bael yuꞌun.

³⁰ Pero te jPabloe tsꞌakal cheb jaꞌbil a jalaj te ba na te slokꞌoje. Y la yikꞌtalan ochel pisil te machꞌatik ya xtal ilek yuꞌune.

³¹ Jamal a yalbe yaꞌiy te tutꞌil ay ta ajwalinel te Diose, y la snojpeslan tut ay sluwar te Kajwaltik Jesucristoe. Maꞌyuk machꞌa komot yuꞌun.