Hechos 26 - Nuevo Testamento Tzeltal de Amatenango

Te jPabloe la yal tut ay skꞌoplal ta stojol te rey Agripae

¹ Jich te jꞌAgripae la yalbey te jPabloe: —Ya xjuꞌ ya awal te tut ayate —xchi. Te jPabloe la xbech skꞌab y jicha lijk yal to:

² —Ben jun koꞌtan ya xjuꞌ xkꞌopojon ta asit, jaꞌat rey Agripa, yuꞌun ya kal spisil te tutik mulilil sleojbon te juriyoetike.

³ Porke ya anaꞌ spisil te skostumbre juriyoetik y sok te tut ya kaltike. Jaꞌ yuꞌun te ya kalbeyex awokolikuk te ya awaꞌiyik ta ben lekilal te tut ya kale.

Te tutꞌil ay te jPablo te ma to xchꞌuunejuk a te Jesuse

⁴ “Spisil te juriyoetike snaꞌojik te tutiꞌ kuxuyinon te ayon ta yolilik ta jlumal te kꞌalal bikꞌiton to aye, sok ta Jerusalene.

⁵ Y snaꞌojik, sok ya xjuꞌ ya yalik teme ya skꞌanike, te fariseoon ta jchꞌiibale. Jaꞌ te jtijkꞌ te kuidado ayik ta xchꞌuunel te jreligiontike.

⁶ Te ora to ayon ta meltsaanel yuꞌun te tutꞌil ay xchꞌuunel koꞌtan te tut yaloj Dios ta skuenta te antibo jmeꞌ-jtatike te ya spase.

⁷ Te lajchaytijkꞌ jtsꞌumbaltik Israele ya smaliyik tut ora ya xkꞌot ta pasel te jich yaloj te Diose. Y jaꞌ yuꞌun te kꞌajkꞌal ajkꞌubal ya yakꞌ ta jkuenta te Diose y ben jun yoꞌtanik ta mantaltesel yuꞌun. Rey Agripa, jaꞌ sluwaril te juriyoetike ya slebikon jmul te ora to, yuꞌun te jich jchꞌuunej te joꞌone.

⁸ ¿Tuꞌun ma xꞌachꞌuunik te jaꞌexe te Dios ya xchaꞌkuses tal te animaetike?

Te jPabloe la yal te tutꞌil a yilbajin te hermanoetike

⁹ “Joꞌon mismo nail a jnop te tutik bayal a jkontrain a te Jesus te talem ta Nazarete.

¹⁰ Y jich a jpas ta Jerusalen. Ta orden yuꞌun te stataletik yuꞌun te saserdoteetike la kotses ta prexo bayal hermanoetik te xchꞌuunejik te Jesuse. Y te kꞌalal ya smilike, akuerdo ayon ekꞌa.

¹¹ Bayal buelta a kilbajinlan yuꞌun jaꞌ ya jkꞌan te puersa ya xchꞌoj jilel te tut xchꞌuunej yoꞌtanike, y jicha jpasulan ta spisil sinagogaetik. Skaj te lijkem bayal slaꞌ-koꞌtan yuꞌunik, jicha ba kilbajinlan ta yanetik jtejklum.

Te jPabloe la yal xan te tutꞌil a sujtes yoꞌtane

¹² “Te tutꞌil jich jnopoje, boon ta jtejklum Damasco. Aꞌbilon kaꞌtel y tikonbilon bael yuꞌun te stataletik yuꞌun te saserdoteetike.

¹³ Pero ayon kꞌael ta be a, rey Agripa, ol wan kꞌaal a, la kil jun xojob ta chꞌulchan, mas tulan ke te xojobil kꞌajkꞌale xlemet julel jul sjoyon sok te machꞌatik joyinej kꞌaele.

¹⁴ Jpisiltik a tꞌuxajotik koel ta lum. Y ay a kaꞌiy jun kꞌop ta hebreo te jich a yalbone: “Saulo, Saulo, ¿tuꞌun te ya awilbajinone? Jaꞌat mismo ya awejchentes aba jich tutꞌil wakax te stukel ya yejchentes sba ta sniꞌ spunyail te stojotesibale.

¹⁵ Jich a kalbey: “¿Machꞌaat a, Kajwal?” xoon. Te Kajwaltik la sjakꞌbon: “Joꞌon Jesuson, jaꞌ mismo te yipalat ta yilbajinele.

¹⁶ Pero jajchan, tekꞌlan. Porke la kakꞌ jba ta ilel ta atojol yuꞌun ya xtuunat kuꞌun. Yuꞌun jaꞌat testigo ya xkꞌoat te tut la awil te ora to y sok te tut ya awil xan ta jkuentae.

¹⁷ Ya me jkoltayat ta stojol te juriyoetike y sok te machꞌatik ma juriyouke, y te ora to ya jtikonat bael ta skuentaik.

¹⁸ Yuꞌun ya xba awikꞌtalanbe sit, jich makꞌ xbeenikix ta ijkꞌal kꞌinal a, ta sakil kꞌinal xlaj beenix a. Yuꞌun ma sigueuk ya xjapuyot yuꞌun a te pukuje, jaꞌ ya xjapuyotix yuꞌun a te Diose. Yuꞌun teme la xchꞌuunikone, jich me ya staik perdon yuꞌun a te smulike. Sok ya me kakꞌ ayinuk te ba aylan te chꞌul jtejklum yuꞌun Diose”, xyuton te Jesuse.

Te jPabloe la xchꞌuun te tuti aꞌbot yile

¹⁹ “Jaꞌ yuꞌun, rey Agripa, la jchꞌuunbe smantal te machꞌa stekꞌlejal a kil ta chꞌulchane.

²⁰ Yuꞌun primero a kalbey te skꞌop Dios te machꞌatik aylan ta Damascoe, sok te nax ta Jerusalen, y sok spisil te estado yuꞌun Judeae, y sok te machꞌatik ma juriyouke. La kaltalanbe te yauk sjilesik te smulike, sok te yauk sujtes yoꞌtanik ta stojol Diose, sok yauk xchiknaj ta yaꞌtelik te sujtemix yoꞌtanike.

²¹ Jich ay sluwaril te la stsakikon te juriyoetik ta temploe y te kꞌan smilikone.

²² Pero yuꞌun te koltayel yuꞌun te Diose, jich jun koꞌtan asta ora to, y spisil chꞌin ta mukꞌ ya kalbe te skꞌop Diose. Maꞌyuk yan te tut ya kalbeyexe, jaꞌ nax ya kal te tut yaloj te jꞌalwanejetike sok te jMoises te jich ya xkꞌot ta pasele:

²³ te puersa ya xcham te Cristoe, pero ta patil teme chame, jaꞌ nail ya xchaꞌkux tal te ba animaetike, yuꞌun ya yalbe skꞌoplal te sakil kꞌinal yuꞌun kolel ta stojol te jlumaltike sok te yanetik nasione —xchi te jPabloe.

Te jPabloe kꞌan yaꞌbe xchꞌuun Cristo te jAgripae

²⁴ Te tutꞌil jich a yal ta kꞌop te jPabloe, te Festoe tulan a kꞌopoj yuꞌun: —Xjowiyat, Pablo. Ta skaj te bayal junetik ya awile, jowiyatix yuꞌun —xchi te Festoe.

²⁵ Pero te jPabloe la sjakꞌ: —Makꞌ xjowiyon, Festoe, te ben lek awoꞌtane. Ay sluwaril te jkꞌope, sok batsꞌi jich te tut ya kale.

²⁶ Liꞌay te rey Agripae te ben lek snaꞌojbe sluwar spisil to, y jaꞌ yuꞌun te jamal yipalon ta kꞌop ta stojole. Porke jich ya kal te ben lek snaꞌbe sluwar spisil te jich aye, porke ma nakꞌaluk te jicha kꞌot ta pasele.

²⁷ Te jaꞌate, rey Agripa, ¿me ya achꞌuun te tut yaloj te jꞌalwanejetike? Ya jnaꞌ te achꞌuuneje —xchi te jPabloe.

²⁸ Te jꞌAgripae la sjakꞌ: —¿Me yuꞌun ora ya awaꞌbon jchꞌuun te Jesuse? —xchi.

²⁹ Te jPabloe la yal: —Me ta ora nax o ma orauk, teme jich ya skꞌan te Diose, ma jaꞌukat nax, koꞌtanuk jich spisil te machꞌatik ya yaꞌibon te jkꞌop te ora to, jichuk ya xkꞌot tutꞌil te joꞌone. Pero ma jaꞌuk ya kal te ya awichꞌik chukel ta kadenae —xchi te jPabloe.

³⁰ Jicha jajch bael te reye, y sok te gobiernoe sok te sBerenicee y sok spisil te machꞌatik te nakajtik ae.

³¹ La spit sbaik bael ta parte, ba yalik tutꞌ ay te kꞌope. Jich a lijk yalbe sbaik: —Te winik to maꞌyuk tut spasoj te ya xjuꞌ ya sta milel yuꞌune, ni ma spas te ya xꞌoch ta prexo yuꞌune —xchiik yuꞌun te jPabloe.

³² Te jꞌAgripae la yalbe te Festoe: —Ya xjuꞌ ya xkol bael te winik to, te ma jichuk a skꞌan stukel te jaꞌ ya xmeltsaanot yuꞌun te mukꞌul rey Cesare —xchi.