Hechos 25 - Nuevo Testamento Tzeltal de Amatenango

Te jPablo tejkꞌanot ta sit te Festoe

¹ Te Festoe kꞌot kꞌo snajkan sba te ba sluwar gobiernoe. Teꞌ ay ta jtejklum Cesareae oxeb kꞌaal a, patil bajt ta Jerusalen.

² Te stataletik yuꞌun te saserdoteetike y sok te statal yuꞌun te juriyoetik te teꞌelan ae ba yaꞌbeyik sjunal smul te jPabloe.

³ La skꞌanbeyik tulan pawor te yauk yal mantal te ya xꞌikꞌot bael ta Jerusalen te jPabloe, yuꞌun te ya smilik jilel ta be a.

⁴ Pero te Festoe la sjakꞌ te ay ta prexo ta Cesarea te jPabloe, sok te snopoj ya xbajtix teꞌae.

⁵ La yaltalanbe: —Jaꞌ yuꞌun te juꞌeletik awuꞌunike ya skꞌan xboon sok ta jtejklum Cesarea. Teꞌ me xba awalik a teme ay tut smulinej te winike —xyut.

⁶ Te Festoe ay wan waxakeb o lajuneb kꞌaal te ay ta Jerusalene, te nax a sujt bael ta jtejklum Cesarea. Xchebal kꞌaal skꞌoel a, ba nakluk te ba ya xchapawane, y la yal mantal te ya xꞌikꞌot tal te jPabloe.

⁷ Te kꞌalal och bael te jPabloe, te juriyoetik te lijkemik tal ta Jerusalene laj tijilajik bael, y lijk slebeyik smul te lom tulan ta skꞌopike. Pero maꞌ juꞌ yuꞌunik yakꞌel ta ilel teme jich te ay smule.

⁸ Te jPabloe la yal: —Te joꞌone maꞌyuk ba jleoj jmul sok ma jkontrainejuk te mantaliletik yuꞌun te juriyoetike, ni jkontrainejuk te temploe, sok ma jkontrainejuk te César te mukꞌul rey ta Romae —xchi te jPabloe.

⁹ Pero te Festoe jaꞌ ya skꞌan te lek skꞌoplal yuꞌun te juriyoetike. Jaꞌ yuꞌun la sjojkꞌobe te jPabloe: —¿Me ya akꞌan xbaat ta Jerusalen yuꞌun teꞌ ya xba jmeltsaanat a te tutiꞌ amulineje? —xchi te Festoe.

¹⁰ Te jPabloe la sjakꞌbe: —Liꞌ ayon te ba ya smeltsaanwan te César te mukꞌul rey ta Romae. Teꞌ ya jkꞌan ya kichꞌ meltsaanel a. Anaꞌojbe sluwar te maꞌyuk tut ma tsaꞌamuk jpasoj ta stojol te juriyoetike.

¹¹ Teme ay tut ma tsaꞌamuk jpasoj te jaꞌ ya xchamon yuꞌune, ma yuꞌunuk ma jkꞌan xchamon. Yan te ma jpasojuk te jayeb mulil ya slebonike, maꞌyuk machꞌa ya xjuꞌ ya yakꞌon entregal ta stojolik. Jaꞌ ya jkꞌan ya smeltsaanon stukel te mukꞌul rey Cesare —xchi te jPabloe.

¹² Jich te Festoe la sjojkꞌobey te sjoꞌtak ta aꞌtele, y te nax a la yalbe: —Te tutꞌil jaꞌ ya akꞌan te ya smeltsaanat te mukꞌul rey Cesare, teꞌ me ya xbaat a —xchi.

Te jPabloe tejkꞌanot ta sit te rey Agripae

¹³ Bayal kꞌaal ta patil te rey Agripae y sok te Bernicee laj bajt ta jtejklum Cesarea, yuꞌun ba spatbe yoꞌtan te Festoe.

¹⁴ Jalajik teꞌa. Te Festoe lijk yalbe te rey te tutꞌ ay skꞌoplal te jPabloe. La yalbe: —Ay jtul winik liye te yakꞌoj jilel ta prexo te Felixe.

¹⁵ Te kꞌalal ayon ta Jerusalen ae te stataletik yuꞌun te saserdoteetike y sok te moletik yuꞌun te juriyoetike la yaꞌbikon entregal te sjunal smul te jPabloe. La skꞌanbikon te yauk kakꞌ ta milele.

¹⁶ Te joꞌone la kaltalanbe te juꞌeletik yuꞌun Romae ma kꞌayemuk te ay machꞌa ya smil teme ma nailuk ya smeltsaa sok te machꞌa ya xlebot smul yuꞌune. Yuꞌun jich me ya skoltay sba ta kꞌop teme ya xlebot smule.

¹⁷ Jaꞌ yuꞌun te kꞌalal laj tal liye, maꞌ jalatesix a, sinoke ta xchebal kꞌaal ba jnajkan jba te ba ya smeltsaanwanone y la kakꞌ tal ta ikꞌel te winike.

¹⁸ Pero te kꞌalal la spasik presentar yuꞌun te ya slebeyik smule, la jkuy te ay tulan smul yuꞌunike, pero ma jichuk.

¹⁹ Jaꞌ nax a yalik te jaꞌ smulinej yuꞌunik te tutꞌil ay sreligion yuꞌunike. Sok ay jtul te Jesus sbiil te chame, y te jPabloe ya yal te kuxulixe.

²⁰ Pero ma jnaꞌix tut ya jpas yuꞌun a te kꞌop to. La jojkꞌobey te jPablo teme ya skꞌan xbajt ta Jerusalene, yuꞌun teꞌ me xba meltsaajuk a.

²¹ Pero te jPabloe la skꞌan te jaꞌuk ya smeltsaanot yuꞌun te mukꞌul rey César. Jicha kal mantal te sigue ya xꞌoch ta prexoe jaꞌ to te tut ora ya xjuꞌ kuꞌun te ya jtikon bael ta stojol te Cesare —xchi te Festoe.

²² Jich te jꞌAgripae la yalbe te Festoe: —Ya jkꞌan kal euk tut xchi te winike —xchi. Y te Festoe la sjakꞌbe: —Pajel ya me awaꞌibe skꞌop —xchi.

²³ Ta yan kꞌaal te jꞌAgripa sok te sBerenicee ben tsaꞌam a ko xchol sbaik te ba ya stsob sbaike, sok te statal soltaroetike sok te krensipal moletik yuꞌun te jtejklume. Te Festoe la yal mantal te ya xꞌikꞌot tal te jPabloe.

²⁴ La yal te Festoe: —Jaꞌat rey Agripa y moletik te liꞌ jtsoboj bajtike, liꞌiyix ta ajtojolik te winike. Spisil te juriyoetike sleojbe smul ta jkuenta ta Jerusalen sok liꞌ ba Cesareae. Y ma xlaj yoꞌtanik te ya skanbikon xchamele.

²⁵ Pero te joꞌone ni maꞌyuk a jtabe smul te ya kakꞌ ta milel yuꞌune. Pero stukel skꞌanojix te ya skꞌan meltsaanel yuꞌun te mukꞌul rey César, y jnopojix te ya jtikon baele.

²⁶ Pero ma xwejt tut ya jtsꞌibabe bael te kajwal Cesare. Jaꞌ yuꞌun la kikꞌix tal lokꞌel ta atojolik y sok ta atojol, jaꞌat rey Agripa, yuꞌun ta patil teme la ajojkꞌobeyike, jich me ya xwejt te tut ya jtsꞌibabe bael te Cesare.

²⁷ Yuꞌun ma spas ya kaꞌiy teme lom nax ya jtikon bael jtul jchukel teme ma xwejt te tut smulineje —xchi te Festoe.