Hechos 22 - Nuevo Testamento Tzeltal de Amatenango

¹ —Kermanotak, aꞌibeyaik awaꞌi sluwar te tut ya kalbeyexe te tutꞌ ayone —xchi te Pabloe.

² Te kꞌalal la yaꞌibeyik sluwar te kꞌoponlanot ta hebreo-kꞌope, mas a chꞌabajik ta kꞌop. Te jPabloe la yal xan:

³ —Te joꞌone juriyoon. Ayinemon ta jtejklum Tarso ta estado yuꞌun Cilicia. Pero liꞌ chꞌiemon ba Jerusalene. Jaꞌ a spꞌijuteson te jGamaliele, la yaꞌbon jnop te tutꞌil ay te mantaliletik yuꞌun te antibo jmeꞌ-jtatike. Batsꞌi jchꞌuunej te Diose sok spisil koꞌtan, jich tutꞌil ya apasik te ora to te jaꞌexe.

⁴ Te nameye jtsꞌakliyej ta milel te machꞌatik ya stamik te lekil achꞌ be yuꞌun te Jesuse. Ay a jchuk y la kotses ta prexo, sea me winik o antstik.

⁵ Te statal saserdoteetike y spisil te moletike jaꞌ te testigoetik yuꞌun spisil. Stukelik a yaꞌbikon tal kartaetik yuꞌun te kermanotaktik juriyoetik te aylan ta jtejklum Damascoe, y boon, ba jle te hermanoetike yuꞌun ya kikꞌtalan tal liꞌ ba Jerusalene, yuꞌun ya kꞌabe kastigo.

Te jPabloe la yal te tutꞌil a sujtes yoꞌtan ta stojol Diose

⁶ “Pero te kꞌalal ayon kꞌael ta be ae, te nopol ya xkꞌoonix ta Damasco ae, ol wan kꞌaal a, ora nax a chiknaj xojob ta chꞌulchan, xlememet julel jul sjoyon.

⁷ Tꞌuxajon koel ta lum, y la kaꞌi jun kꞌop te jich a yalbone: “Saulo, Saulo, ¿tut yuꞌun te ya awilbajinone?” xyuton.

⁸ La jojkꞌobe: “¿Machꞌaat a, Kajwal? xkut. Y te kꞌope la sjakꞌbon: “Joꞌon Jesuson ta Nazarete, mismo te yipalat ta yilbajinele”, xchi.

⁹ Te machꞌatik sjoyinejon kꞌaele la yilik te xojobe y toj xiꞌelik yuꞌun. Pero maꞌ yaꞌiybeyik sluwar te kꞌop te machꞌa la skꞌoponone.

¹⁰ Te joꞌone la jojkꞌobe “¿Tut skꞌan ya jpas, Kajwal?” xkut. Y te Kajwaltike la yalbon: “Jajchan, pasa seguir te ya xbaat ta Damascoe. Teꞌ me ya xkꞌo yalbelat a spisil te tut ya skꞌan ya apase”, xyut.

¹¹ Pero te xojobe chok a jilon yuꞌun. Te joꞌtake xchechojikon ochel ta skꞌabik te ba Damascoe.

¹² Teꞌey jtul winik a te jꞌAnanias sbiile te lek xchꞌuunej te mantaliletik yuꞌun te jMoisese, y ben lek skꞌoplal yuꞌun spisil te juriyoetik te aylan ta jtejklum Damascoe.

¹³ Te jꞌAnaniase tal yilon. Te kꞌalal kꞌot ta ba ayone, la yalbon: “Hermano Saulo, ya me xjamix te asite”, xchi. Jicha jam ta ora te jsite y la kil te jꞌAnaniase.

¹⁴ Te nax a la yalbon xan: “Te Dios yuꞌun te jmeꞌ-jtatike, la stꞌujat yuꞌun ya yakꞌ anaꞌ te tut snopoj ta yoꞌtane, yuꞌun jich me ya awil te Machꞌa toj yoꞌtane y ya awaꞌibe skꞌop te ya xlok ta stie.

¹⁵ Yuꞌun jaꞌat testigo ya xkꞌoat yuꞌun ta stojol spisil te balmilale y jaꞌ ya awal te tut la awil sok te tut la awaꞌiye.

¹⁶ Y te ora to, ¿tut xan a te ya amaliye? Jajchan, kꞌana ichꞌjaꞌ. Kopojan ta skuenta te Kajwaltike, yuꞌun jich me ya spokbeyat lokꞌel a te amule”, xyuton te jꞌAnaniase.

Te jPabloe la yal te tutꞌil a tikonot bael te ba ay machꞌatik ma juriyouke

¹⁷ Kꞌalal sujton tal liꞌ ba Jerusalene, boon ba jkꞌopon Dios ta templo, y ay tuti kil ta stekꞌlejal yilel.

¹⁸ Jaꞌ a kil te Kajwaltike, y la yalbon: “Sabajan lokꞌan bael ta ora liꞌ ba Jerusalene, porke ma xyaꞌbelat ta jkuenta te jkꞌoplal te yipalat ta yalele”, xyuton.

¹⁹ Te joꞌone la kalbe: “Kajwal, snaꞌojik te ya xboilanon ta sinagogaetik te ya xba kikꞌ tal, ya xtal kakꞌ ta prexo te machꞌatik ya xchꞌuunate, y lek ya jmajtalan tal.

²⁰ Y te kꞌalal milot te awaj-aꞌtel jꞌEstebane te ya yalbeyat akꞌoplale, joꞌon mismo teꞌeyon ekꞌa. Akuerdo ayon ekꞌa te milote, y joꞌon a jkanantaybe skꞌuꞌ-spakꞌ te machꞌatik jmilawetike”, xkut.

²¹ Pero te Kajwaltike la yalbon: “Baan me, porke joꞌon ya jtikonat bael ta jakal ta yanetik nasion”, la yuton —xchi te jPabloe.

Te Pabloe akꞌot entregal ta stojol te statal soltaroe

²² La yaꞌiyik te jich a yal te jPabloe. Jicha lijkik ta yawutayel: —¡Te winik to makꞌ skꞌan xkuxuyin! ¡Aꞌ chꞌayuk skꞌoplal liꞌ ba balmilale! —xchiik ta yawutayel.

²³ Sigue yipalik ta yawutayel y la sjimulan skꞌuꞌ-spakꞌik y la sjop xchꞌojik moel tsꞌubilum.

²⁴ Jaꞌ yuꞌun te statal soltaroe la yakꞌ mantal te ya yikꞌik ochel te jPabloe te ba skuartele, y la yakꞌ mantal te ya yaꞌbeyik aresiale, yuꞌun jich me ya yal a te tut sluwar te ya xꞌawutayot yuꞌun te gentee.

²⁵ Pero te kꞌalal chukulix yuꞌunik a te ya yaꞌbeyik aresiale, te jPabloe la sjojkꞌobe te statal jtijkꞌ soltaro te teꞌey ae: —¿Me jaꞌ wan awichꞌoj awaꞌtelik yuꞌun te ya awaꞌbeyik aresial jtul jromano te ma to chapojikuk teme ay smule? —xchi te jPabloe.

²⁶ Te kꞌalal jich yaꞌi te statal jtijk soltaroe, bajt y ba yalbe te statal soltaroe. Jich a yal: —¿Tut ya skꞌan ya apas? Te winik to, jromano —xchi.

²⁷ Jich te statal soltaroe tijilaj bael te ba ay te jPabloe y la sjojkꞌobe: —¿Me jich te jromanoate? —xyut. Te jPabloe la sjakꞌbe: —Jich —xchi.

²⁸ Te statal soltaroe la yalbe: —Te joꞌone bayal takꞌin a laj kuꞌun a te ochon ta romanoile —xchi. Y te jPabloe la sjakꞌbe: —Te joꞌone teꞌ ayinemon a —xchi.

²⁹ Jich te machꞌatik kꞌan smajik te jPabloe la skꞌej sbaik bael ta stojol. Jich te statal soltaroe, kꞌalal la yaꞌiy te jromano te jPabloe, xiꞌ yuꞌun te xchukoj ta kadenae.

Te jPabloe bajt ta stojol te machꞌatik ay yaꞌtelik yuꞌun te juriyoetike

³⁰ Ta xchebal kꞌaal, te statal soltaroe yoꞌtanuk ya skꞌan yaꞌibe sluwar tut smulinej yuꞌunik te jPablo te juriyoetike. La spolbe te kadenaetik te chukul yuꞌun ae, y la yakꞌ mantal te ya stsob sbaik te stataletik yuꞌun te saserdoteetike sok spisil te machꞌatik ay yaꞌtel yuꞌun te juriyoetike. Te nax a la slokꞌesik tal te jPabloe, y ba yakꞌ te ba stsoboj sbaike.