Hechos 21 - Nuevo Testamento Tzeltal de Amatenango

Te jPabloe bajt ta Jerusalen

¹ Te kꞌalal la jilestik te hermanoetike, mootik bael ta barko, y toj a bootik ta jtejklum Cos. Ta xchebal kꞌaal kꞌootik ta slum Rodas, y te nax a bootik ta jtejklum Pátara.

² Teꞌ kꞌo jtatik jun barko a te ya xbajt ta slum Fenicia, y jaꞌ a mootik bael a.

³ Yipalotik ta kꞌaxel bael a la kiltik te slum Chipre te joybil ta jaꞌe jil kuꞌuntik ta kꞌexom, y toj a bootik kꞌalal ta estado Siria. Pero te barkoe la skoes jilel ijkatsil ta jtejklum Tiro, y teꞌ kootik jilel a.

⁴ Teꞌ kꞌo jtajtik hermanoetik a, y la joyintik jukeb kꞌaal. Te hermanoetike altalanbot yuꞌun te Espiritue te ya yalbeyik te jPabloe te manchuk ya xbajt ta Jerusalene.

⁵ Pero kꞌax te jukeb kaale, lokꞌotik bael. Spisil te hermanoetike sok yinamik y sok yuntikilik la sjoyinotik bael kꞌalal ta tiꞌ jtejklum. Y teꞌ ta tiꞌ mare la jkejan bajtik y la jkꞌopontik Dios.

⁶ Te nax a la jmey jpet bajtik sok jilel, y mootik bael ta barko. Y te hermanoetike la sujt ochel ta snaik.

⁷ Jaꞌ último buelta mootik ta barko a. Jil kuꞌuntik te jtejklum Tiro, y bootik ta jtejklum Tolemaido. Teꞌ kꞌo jpatbeytik yoꞌtanik a te hermanoetike, y la joyin bajtik sok jun kꞌaal.

⁸ Ta xchebal kꞌaal lokꞌotik bael sok te jPabloe y kꞌootik ta jtejklum Cesarea. Teꞌ bootik ta sna te Felipe te yaꞌtelinej yalel ta bayuk te skꞌop Diose. Jaꞌ jtul ta sjukebal te la skoltalan ta aꞌtel te apostoletike. Teꞌ olanotik a.

⁹ Te Felipee ay chantul soltera aꞌchetik yuꞌun te ya yalik euk te skꞌop Diose.

¹⁰ Ayix cheꞌoxeb kꞌaal teꞌeyotik a, te jul te jꞌalwanej yuꞌun Dios te jꞌAgabo sbiil te lijkem ta estado Judeae.

¹¹ Kꞌot te ba ayotike. La yichꞌbe te sinturon jPabloe, la xchuk yokꞌ skꞌab a, y la yal: —Te Chꞌul Espiritue ya yal: “Te yajwal sinturon to jich ya xkꞌo chukek yuꞌun te juriyoetik te ba Jerusalene. Sok ya xꞌakꞌot entregal ta skꞌab jyanlumetik”, xchi me —xchi te jꞌAgaboe.

¹² Te kꞌalal jich a kaꞌitik sok te hermanoetik ta Cesareae, xwokoletotik ta stojol te jPabloe te manchuk ya xbajt ta Jerusalene.

¹³ Pero te jPabloe la sjakꞌ: —¿Tuꞌun te ya xꞌokꞌexe te ya awaꞌbikon yajtal koꞌtane? Te joꞌone dispuesto ayon a teme chukel o milel ya xkꞌo jta ta Jerusalen, teme jaꞌ ta skaj te Kajwaltik Jesuse —xchi.

¹⁴ Te tutꞌil ma juꞌ kuꞌuntik skomele, ma tuti kalbetikix a. La kaltik: —Jaꞌ a pasuk te skꞌanojel yoꞌtan te Kajwaltike —xchotik yuꞌun.

¹⁵ Kꞌax cheꞌoxeb kꞌaal, ta patil la jchap bajtik y bootik ta Jerusalen.

¹⁶ La sjoyinotik bael chaꞌoxtul hermanoetik te aylan ta Cesareae, sok la yikꞌotik bael ta sna jtul mamal Mnason sbiil, te talem ta jtejklum Chipree, te namey xchꞌuunej te Jesuse. Jaꞌ la yaꞌbotik jmajantik te snae.

Te jPabloe ba yulutay te Jacobo

¹⁷ Kꞌalal kꞌootik ta mukꞌul jtejklum Jerusalene, te hermanoetik ben jun yoꞌtanik a yikꞌotik.

¹⁸ Ta xchebal kꞌaal la joyintik bael te jPabloe, yuꞌun ba yulutay tal te Jacobo, y teꞌeyik spisil a te ansianoetike.

¹⁹ Te jPablo la spatalanbe yoꞌtan, y te nax a la yaltalanbe te tutik a spas Dios ta stojol sok te machꞌatik ma juriyouke.

²⁰ Te kꞌalal la yaꞌiybeyik sluware, la yalbeyik kolayal Dios yuꞌun, y la yalbeyik te jPabloe: —Lek ay, hermano Pablo, la awilix te ay bayal ta jmil juriyoetik te xchuꞌuunejikix te Jesuse, y spisilik tulan skꞌoplal ta yoꞌtanik te puersa ya skꞌan chꞌuunel te mantaliletik yuꞌun jMoisese.

²¹ Sok yaꞌiyojbeyik sluwar spisil te juriyoetik te aylan ta yanetik luware te ya anojpes te ma puersauk ya xchꞌuunik te tut yaloj te jMoisese, y ya awaltalanbe te makꞌ yaꞌbeyik sirkunsision te yuntikilike, sok te ma puersauk ya xchꞌuunik te kostumbre kuꞌuntike.

²² ¿Tut ya skꞌan jpastik? Yuꞌun ya me stsob sbaik tal te jlumaltik teme la yaꞌi te julematixe.

²³ Jaꞌ lek te jich ya apase: Te liye ay chantul winketik te ay tut yalojik ta stojol Diose.

²⁴ Ikꞌa, joyina bael, baan lekutesa akꞌoplal sok y jaꞌat me xꞌalokꞌesbe stojol te ya awakꞌ ta joxel ajolike, yuꞌun jich me ya xjoxtalanbot ekꞌa. Jich me ya yilik ta spisilik te ay ta chꞌuunel awuꞌun te mantaliletike, sok te ma jichuk te tut ya yalik ta atojole.

²⁵ Yan te machꞌatik ma juriyouk te xchꞌuunejikix te Kajwaltike, la kalbeytikix bael ta jun te tut jnopojtike te ma spas ya sweꞌik tiꞌbal teme ta skuenta ídoloe, sok te chꞌichꞌe, sok stiꞌbalul chambalam te tsꞌotbil nax snukꞌe, sok te makꞌ sꞌantsiwejike —xchiik.

La stsakik ta yutil templo te jPabloe

²⁶ Jich te jPabloe la yikꞌ bael te chantul winketike y ta xchebal kꞌaal ba slekutes skꞌoplal sok. Te nax a och bael ta templo, yuꞌun ba yalik tut kꞌaalil ya stsꞌakay skꞌaalel te ya xlekub skꞌoplalike, jaꞌ biꞌ, jaꞌ te tut kꞌaalil ya skꞌan ya yakꞌik ta juju-tul te milbil smajtꞌan Diose.

²⁷ Pero kꞌalal ya stsꞌakayix a te jukeb kꞌaale, ay juriyoetik te talemik ta estado Asia la yilik te jPablo te ay ta yutil temploe. La slijkesik kꞌop sok te gentee, y la sjumik ta tsakel te jPabloe.

²⁸ Lijk awunikuk: —Israeletik, laꞌ koltayaotik. Te winik to jaꞌ te ya xbeen ta bayuk ta snojpesel te gente te maꞌyuk ta akꞌel ta jkuenta te jlumaltike, sok te mantaliletik yuꞌun te jMoisese, y sok te templo kuꞌuntike. Sok ta ora to la yikꞌix ochel ta templo te jyanlumetik te ma spas ya xꞌochik bael teꞌae. Jich a ixtaꞌajix te chꞌul templo kuꞌuntike —xchiik ta kꞌop.

²⁹ Jich a yalik yuꞌun achꞌ to nax a yilik te jPablo te sjoyinej ta jtejklum te Trofimo sbiil te talem ta Efesoe, y la skuyik te jPablo la yikꞌtalan ochel ta temploe.

³⁰ Spisil te jtejklum xniketik lijkel ta kꞌop, y te gentee xyalajan kꞌoel. La stsakik te jPabloe y la xjochik lokꞌel te ba yamakꞌul temploe, y ora nax a stsꞌusik te spuertaul temploe.

³¹ Ya skꞌan smilikix a, te kꞌalal kꞌot kꞌop ta stojol te statal jtijk soltaroetik te tutꞌil lijk bayal kꞌop yuꞌun te mukꞌul jtejklum Jerusalene.

³² Te statal soltaroe la stsob te soltaroetike y sok te stataletike y xyalajan kꞌael te ba ay te gentee. Te kꞌalal la yilik te statal soltaro sok te soltaroetike, te gente la skom sbaik ta smajel te jPabloe.

³³ Jich te statal soltaroe tijilaj bael, la yakꞌ ta tsakel te jPabloe, sok la yal mantal te ya xchukik ta chaꞌlijk kadenae. Patil la sjojkꞌoy machꞌa a y tut spasoj.

³⁴ Pero te yane yan tuti yal ta aw, y te yane yan tuti yal. Te statal soltaroe maꞌ yaꞌibe sluwar porke xchꞌeetik nax ta kꞌop. Jaꞌ yuꞌun la yakꞌ bael ta ikꞌel te ba skuartel te statal soltaroe.

³⁵ Te kꞌalal kꞌot te ba jujukaj smoibal te sbeelel kuartele, te soltaroetike puersa a xkꞌechik moel te jPabloe ta skaj te wetꞌbil yuꞌun spisil te jtejkꞌume.

³⁶ Porke spisil te stsꞌaklajan kꞌoel a y xꞌawlajan kꞌael ta yalel: —¡Aꞌ chamuk! —xchiik.

Te jPabloe kꞌan skoltay sba ta kꞌop ta stojol te gentee

³⁷ Te kꞌalal ya yotsesikix bael ta kuartel ae, te jPabloe la sjojkꞌobe te statal soltaroe: —¿Me ya xjuꞌ ya xkꞌopojon ta atojol jtsꞌinuk? —xyut. Te statal soltaroe la sjakꞌbe: —¿Me ya anaꞌ xkꞌopojat ta griego-kꞌop? xyut.

³⁸ ¿Me ma jaꞌukat te egipto-winik te ay jun tiempo te la slijkes bayal kꞌope, sok te la yikꞌ bael ta tꞌantꞌan kꞌinal kuatro mil guerrilleroetike? —xchi.

³⁹ Te jPabloe la yalbe: —Te joꞌone juriyoon. Jaꞌ jlumal te jtejklum Tarsoe te ay ta estado yuꞌun Cilicia, te jun jtejklum te ben tulan skꞌoplale. Pero, awokoluk, aꞌbon permiso te ya jkꞌopon te gente —xchi te jPablo.

⁴⁰ Te statal soltaroe la yaꞌbe permiso, y te jPabloe la stejkꞌan sba te ba kajomtik moibale. La xbech-kꞌabtay ta skomel te gentee. Te kꞌalal chꞌabajik ta kꞌope, la skꞌoponlan ta hebreo-kꞌop. Jich a yal: