Hechos 20 - Nuevo Testamento Tzeltal de Amatenango

Te jPabloe bajt ta Macedonia sok ta Grecia

¹ Te kꞌalal komix a te kꞌope, te jPabloe la yakꞌ tal ta ikꞌel te hermanoetike, yuꞌun ya stsitstalan jilel. Te nax a laj skꞌoponlan jilel y stukel bajt ta slum Macedonia.

² La yulutay spisil luwaretik te baꞌatik ay te hermanoetike y bayal a yaꞌbe jilel spuersa yoꞌtan. Y patil kꞌot ta estado Grecia.

³ Teꞌ jalaj oxeb u a te jPabloe. Skꞌan xmoix bael ta barko a, yuꞌun ya xbajt ta estado Siria, kꞌalal la yaꞌi te chapbil skꞌoplal ta milel yuꞌun te juriyoetike. Jich a snop te ya xchaꞌsujt bael ta yok te ya xkꞌax xan ta estado Macedoniae.

⁴ Jaꞌ a sjoyinlan bael te Sópater te xnichꞌan jPirroe te lijkem tal ta jtejklum Berea, y sok Aristarco sok Segundo te talemik ta Tesalónicae, sok Gayo te talem ta Derbe, sok jTimoteo, y sok jTiquico, y sok jTrofimo te talemik ta estado Asiae.

⁵ Te hermanoetik to nalajik bael y ba smaliyotik ta jtejklum Troas.

⁶ Yan te joꞌotike la jmalitik a kꞌax te kꞌin te ya sweꞌik waj te ma yichꞌojuk levadurae. Lokꞌotik bael te ba jtejklum Filipose. Mootik ta barko. Ta yoꞌebal kꞌaal la jta bajtik sok ta jtejklum Troas te machꞌatik nalajemik baele. Teꞌ jalajotik jukeb kꞌaal a.

Ulutaywan ta jtejklum Troas te jPabloe

⁷ Te primero kꞌaal yuꞌun te semanae la jtsob bajtik sok te hermanoetik ta sweꞌel waj ta skꞌuenta te Kajwaltike. Te jPabloe lijk spꞌijutes te hermanoetike. La snaꞌ te pajel xanix ya xlokꞌ baele, jaꞌ yuꞌun jalaj ta kꞌop asta la sta olil ajkꞌubal.

⁸ Te ba jtsꞌoboj bajtik ta jun kuarto te toyol aye ay bayal kantil tsuntalanbil teꞌa.

⁹ Sok ay jtul soltero kerem Eutico sbiil snajkanej sba ta bentana. Te tutꞌil jalaj ta yalel skꞌop Dios te jPabloe, lijk ta nikubajel te soltero kereme, y tamot lek ta wayel. Chꞌay ta koel kꞌalal ta yoxkajal te nae, y chamen a xjachik bael.

¹⁰ Jich te jPabloe ko bael ta ora, kꞌo spajkan sba ta sba te soltero kereme y la spet. Y la yalbe te hermanoetike: —Ma awakꞌ yajtal awoꞌtanik. Kuxul to —xchi.

¹¹ Te nax a chaꞌsujt moel te jPabloe. La xetꞌ te waje la sweꞌ sok te hermanoetike. Y lijk xan ta kꞌop te jPabloe asta sakubel kꞌinal. Jicha bajt.

¹² Jich te soltero kereme kuxul a ikꞌot bael ta sna. Bayal a yichꞌ spuersa yoꞌtanik yuꞌun.

Lokꞌ bael ta jtejklum Troas bajt kꞌalal ta jtejklum Mileto

¹³ Te joꞌotike nalajotik bael y mootik bael ta barko. Kꞌootik kꞌalal ta jtejklum Aso. Teꞌ kꞌa kikꞌtik a te jPabloe, yuꞌun jicha skꞌan te bajt ta yok stukele.

¹⁴ Kꞌalal la jta bajtik sok ta jtejklum Asoe, la joyin bajtik sok bael ta barko, y bootik kꞌalal ta jtejklum Mitilene.

¹⁵ Lokꞌotik bael te ba jtejklum Mitilenee, ta xchebal kꞌaal kꞌaxotik ta yelaw jtejklum Quío. Ta yoxebal kꞌaal kꞌootik ta jtejklum Samos. Teꞌ kꞌax ajkꞌubal kuꞌuntik a te ba Trogilioe. Ta xchanebal kꞌaal kꞌootik ta jtejklum Mileto.

¹⁶ Jicha beenotik yuꞌun la snop te jPabloe te makꞌ ya xjalajotik ta estado Asiae. Jich maꞌ bootik ta jtejklum Efeso, yuꞌun te jPablo ya skꞌan te yauk xkꞌot ta ora ta Jerusalen, yuꞌun teꞌ me ayix a te ya xkꞌot skꞌaalel Pentecostese.

Te jPabloe la yaltalanbe jilel te ansianoetik te talemik ta jtejklum Efesoe

¹⁷ Te kꞌalal ayotikix ta jtejklum Mileto ae, te jPabloe la yakꞌ tal ta ikꞌel te ansianoetik yuꞌun te hermanoetik ta jtejklum Efesoe.

¹⁸ Te kꞌalal laj kꞌote, la yaltalanbe: —Te jaꞌexe anaꞌojik te tut kilel la awilikon te jayeb kꞌaal ayon ta awolilik jaꞌto te jul joyinex ta primero ta estado Asiae.

¹⁹ Sil tiempo joyinejex, chꞌin kakꞌoj jba te tutꞌil ayon ta mantaltesel yuꞌun te Kajwaltike. Y bayal a kokꞌetay jba, sok kꞌax bayal jwokol yuꞌun prewaetik te tut kꞌan spasbikon te juriyoetike.

²⁰ Pero maꞌ komon ta yalel ta atojolik te tutꞌil ya xlekubex yuꞌune. La jpꞌijutesex ta sitil komon y sok ta anaik ta juju-tul.

²¹ Jamal a kalbe te juriyoetike sok te machꞌatik maꞌ juriyouke te ya skꞌan ya sujtes yoꞌtanik yuꞌun smulik ta stojol Dios, sok te ya xchꞌuunik te Kajwaltik Jesucristoe.

²² Y te ora to ya xboon ta Jerusalen yuꞌun puersa ya yikꞌon bael ya kaꞌi te Espiritue. Ma jnaꞌ te tut ya xkꞌo spasbelon teꞌae.

²³ Jaꞌ nax ya jnaꞌ te ba kꞌaxon ta spisil te jtejklumetike, te Espiritue ya yalbon te ya smaliyon te prexoe sok te bayal wokole.

²⁴ Pero makꞌ yakꞌ yajtal koꞌtan yuꞌun. Ma kocheluk te tutꞌ ay te jkuxlejale. Jaꞌ nax tulan skꞌoplal ta koꞌtan te ben jun koꞌtan ya jlokꞌes te jayeb kꞌaal ay ta jkuentae, jaꞌ to te ya xkꞌot koraile. Sok te ya juꞌutes kaꞌtel te yakꞌojbon te Kajwaltik Jesuse te jamal ya kal te tutꞌil ay te lekil achꞌ kꞌop yuꞌun te slekil yoꞌtan te Diose.

²⁵ “Te ora to jnaꞌojix te ni jaymel ya awilbikon xan sit jaꞌex ta apisilik te la kalbeyex te tutꞌil ay ta ajwalinel te Diose.

²⁶ Jaꞌ yuꞌun jamal ya kalbeyex te ora to, ma ta jkuentaukix teme chꞌayel ya xbaexe,

²⁷ porke la kalbeyexix spisil te tut ay ta yoꞌtan te Diose, ni maꞌyuk tuti jmuk ta koꞌtan.

²⁸ Jaꞌ yuꞌun ila me abaik, y kanantayaik me spisil te hermanoetik ta kongregasione te ba yakꞌojbeyex awaꞌtelik ta kanantawanej te Chꞌul Espiritue, yuꞌun ya akanantayik te machꞌatik xchꞌuunejikix te Kajwaltike, te stukel smanoj ta xchꞌichꞌele.

²⁹ Ya jnaꞌ te kꞌalal boemonix ae, ya xtal yan jich tutꞌil tiꞌawal teꞌtikil tsꞌiꞌ te ya xlijk yilbajin jichuk karnera te hermanoetik te ma xpichꞌuk yoꞌtane.

³⁰ Y ta awolilik ya xlijk te machꞌatik ya yakꞌik ta nopel lotil kꞌop yuꞌun jich me ya stsꞌakliyot bael yuꞌun te hermanoetike.

³¹ Jaꞌ yuꞌun, kuxa me awoꞌtanik. Naꞌulanaik me, sil tiempo te oxeb jabꞌil te kꞌajkꞌal y ajkꞌubal ma jkom jba te la jtsitsulanexe, sok la kokꞌetay jba te yauk xkꞌot ta awoꞌtanike.

³² “Te ora to, kermanotak, ya kakꞌex ta kanantayel yuꞌun te Diose sok yuꞌun te skꞌop te kꞌuxutaybilotik yuꞌune. Ay spoder stukel te ya yakꞌ xchꞌiex ta skuenta Espíritu sok ya me yaꞌbeyex spisil te tut yaloj ta stojol te jtejklum tꞌujbil yuꞌune.

³³ Maꞌyuk machꞌa bikꞌtaj koꞌtan yuꞌun stakꞌin, ni ayuk machꞌa kꞌupinbe skꞌuꞌ-spakꞌ.

³⁴ Te jaꞌexe anaꞌojik te aꞌtejon ta jkꞌab ta sleel te tuti tuun kuꞌun sok te joꞌtake.

³⁵ Sil tiempo a kaꞌbeyex awilik te tutꞌil ya skꞌan ya xꞌaꞌtejotik ta jpisiltike, yuꞌun jich me ya jkoltatik te machꞌatik ay nesesidad yuꞌunike. Naꞌaik me te jich yaloj te Kajwaltik Jesuse: “Jaꞌ me ben tsaꞌam slekil te machꞌa ay tut ya yakꞌe ke te machꞌa ya yichꞌe”, xchi me —xchi te jPabloe.

³⁶ Ta patil te jich a yale, te jPabloe la skejan sba ta skꞌoponel Dios sok spisil te ansianoetike.

³⁷ Spisilik ben xlaj okꞌ, y la smey spet sbaik sok te jPabloe, y la yujtsꞌiyik.

³⁸ Y ben tristeik porke altalanbot te maꞌyukix tut ora ya yilbeyik site. Te nax a la sjoyinik bael te ba ay te barkoe.