Hechos 19 - Nuevo Testamento Tzeltal de Amatenango

Ay ta jtejklum Efeso te jPabloe

¹ Te kꞌalal ay to ta jtejklum Corinto a te jꞌApolose, te jPabloe kꞌax tal ta puru witstikil y kꞌot ta Efeso. Teꞌ kꞌo sta bayal hermanoetik a.

² La sjojkꞌolanbe: —¿Me awikꞌojik te Chꞌul Espiritue te kꞌalal la achꞌuunik te Jesuse? —xyut. Te hermanoetike la sjakꞌtalanik: —Ni maꞌyuk kaꞌiyojbetik skꞌoplal teme ay te Chꞌul Espiritue —xchiik.

³ Te jPabloe la sjojkꞌolanbe: —¿Tut yuꞌun te ichꞌjaꞌ te la awichꞌik te? —xchi. Y la sjakꞌtalanik: —Jaꞌ skꞌoplal te tutꞌil a yakꞌ ichꞌjaꞌ te Juane —xchiik.

⁴ Te jPabloe la yaltalanbe: —Jich. Te Juane la yaꞌbe yichꞌjaꞌ te machꞌatik ya sujtes yoꞌtanik yuꞌun smule. Pero la yaltalanbe te jaꞌ ya xchꞌuunik te machꞌa patil ya xtal yuꞌune, jaꞌ bi, jaꞌ te Jesus te Cristoe —xchi.

⁵ Te kꞌalal jich a yaꞌiyike, la yichꞌtalanik jaꞌ ta skuenta te Kajwaltik Jesuse.

⁶ Y te kꞌalal la skajanbe skꞌab ta sjolik te jPabloe, tal ta stojolik te Chꞌul Espiritue. Y jicha lijk kꞌopojuk ta yanetik kꞌop sok ta yalel skꞌop Dios.

⁷ Ay wan lajchaytul ta spisil te winketike.

⁸ Oxeb u a been ta sinagoga te jPabloe. Ma xiꞌ ta yalel teꞌa te skꞌop Diose, y la yalulan jaꞌ to te la xchꞌuun yuꞌun te gente te tutꞌil ay ta ajwalinel te Diose.

⁹ Pero ay machꞌa lom tulan a yakꞌ sbaik, ma skꞌan a xchꞌuunik. Ta sit te gentee lijk sbol-kꞌoptayik te lekil achꞌ be yuꞌun te Jesuse. Jich te jPabloe la spit sba bael te ba ayike, la yikꞌ bael te hermanoetik te ba eskuela yuꞌun te Tirano sbiile. Teꞌ yalulan jujun kꞌaal a te skꞌop Diose.

¹⁰ Jich a spasulan cheb jaꞌbil teꞌa, jaꞌ to te la yaꞌibeyikix sluwar skꞌop Dios a spisil te juriyoetike sok euk te griegoetike te ayik ta estado Asiae.

¹¹ Y Dios a spas mukꞌul milagroetik ta skuenta te jPabloe.

¹² Chikan me jaꞌ te xchukile o jaꞌ te xchujkil xchꞌujte teme la yichꞌbeyik bael te machꞌa ay ta chamele, ora ya xlekub yuꞌun te xchamele y te pukujetik ya xlokꞌ bael ta stojolik.

¹³ Pero ay chaꞌoxtul juriyoetik te ya xbeenik ta kayailtik te ya slokꞌes pukujetik ta stojol te gentee. Kꞌan skꞌan yoꞌtanik te ya slokꞌesik pukujetik ta sbiil te Kajwaltik Jesuse. Jicha lijk yalbe te pukujetike: —Ta sbiil te Jesus te ya yalbe skꞌoplal te jPabloe, ya kalbeyex mantal te ya xlokꞌexe —xchiik.

¹⁴ Jaꞌ to jaꞌ yipalik ta spasel te juktul yuntikil te jtul juriyo-mamal te jꞌEsceva sbiil, te jtul statal saserdotee.

¹⁵ Pero te kꞌalal jich a yalbeyike, te pukuje jakꞌtalanbot yuꞌun: —Ya jnaꞌbe sba te Jesuse, y ya jnaꞌbe sba euk te jPabloe. Pero te jaꞌexe ¿machꞌaex a? —xꞌutalanot.

¹⁶ Mismo tiempo a te winik te ay pukuj ta yoꞌtane, wiluntaylanot yuꞌun. Yuꞌun lom bayal spuersa, tsaltalanot yuꞌun. Jich tꞌaxajtik y ejchꞌenajemik lokꞌel ta anel te ba nae.

¹⁷ La yaꞌiyik spisil te machꞌatik aylan ta jtejklum Efesoe, ay juriyoetik sok te ma juriyouke, y spisilik a la xiꞌik yuꞌun. Jicha pujk ta alel xan ta lek a te sbiil te Kajwaltik Jesuse.

¹⁸ Bayal te machꞌatik xchꞌuunejikix te Jesuse tal yalik ta jamal spisil te tut ma tsaꞌamuk a spasik te nail toe.

¹⁹ Y bayal te machꞌatik yaꞌtelinejik uulile la yichꞌik tal te slibroike, tal xchikꞌik ta sitil komon. Te kꞌalal la yichꞌik jkuenta te stojol te libroetike ay wan sinkuenta mil plata-takꞌin a lok.

²⁰ Jicha pujk xan ta mas te skꞌop Kajwaltike, y la yakꞌ xan ta ilel te spodere.

²¹ Ta patil te kꞌotix ta pasel a to, te jPabloe la snop te ya xkꞌa yil te hermanoetik te ayik ta estado Macedonia sok ta estado Acaya, sok ta patil ya xbajt ta Jerusalen. Sok la yal: —Ta patil teme kꞌaxon ta Jerusalene, puersa ya xboon ta Roma —xchi.

²² Jich a stikon bael ta Macedonia chaꞌtul jꞌayudante yuꞌun, jaꞌ te jTimoteo sok te jꞌErastoe. Yan te jPabloe jaloj to xan jilel ta estado Asia stukel.

Lijk bayal kꞌop ta jtejklum Efeso

²³ Te tiempo abi lijk bayal kꞌop ta jtejklum Efeso ta skꞌaj te lekil achꞌ be yuꞌun te Jesuse.

²⁴ Jaꞌ a slijkes kꞌop te jtul winik Demetrio sbiil te yaꞌtelinej spasel tutik ta platae. Te winik to ya spas ta plata xchꞌin lokꞌol xchꞌul naul te yaj-santuik xDianae. Bayal sganar ya xlokꞌ yuꞌun sok a te sjoꞌtak te ya xchonike.

²⁵ Te jDemetrioe la stsob te sjoꞌtake sok yan te pajal yaꞌtelik soke, y la yaltalanbe: —Moletik, te jaꞌexe anaꞌojik te teꞌ jtaojtik jkꞌulejaltik a te tut kaꞌtelinejtik spasele.

²⁶ Pero te jaꞌexe awilojikix y awaꞌiyejikix te jPablo xꞌalbote yipal ta yalel te ma jaꞌuk diosetik te pasbil ta skꞌab winketike. Y jich a yakꞌ kꞌotukix ta yoꞌtanik bayal te gentee, ma jaꞌuk nax liꞌ ba Efesoe, kasi jich euk ta spisil te estado Asiae.

²⁷ Ma me lekuk, porke te jchonbajeletike ya me xchꞌaybotik. Sok jich euk te chꞌulna yuꞌun te kaj-santutik xDianae ya me xchꞌay skꞌoplal te bayuk nax ya xꞌalote. Jich me ya xpꞌajot te tutꞌ ay smukꞌul te kaj-santutik xDianae te jaꞌ chꞌuunbil yuꞌun spisil te estado Asiae sok ta spisil te balmilale —xchi te jDemetrioe.

²⁸ Te kꞌalal jich a yaꞌiyike, bayal a laj ilinik yuꞌun y lijkik ta aw: —¡Viva te xDiana te dios yuꞌun te efesioetike! —xchiik ta aw.

²⁹ Jicha lijkik ta kꞌop spisil te jtejklume. Te genteetike la stsakik te jGayo sok te jꞌAristarco te cheb winketik te talemik ta Macedonia te sjoyinejik te jPabloe, y la xjochik ochel kꞌalal ba ya stsob sbaik te jtejklume.

³⁰ Te jPabloe kꞌan ochuk bael teꞌa, kꞌan ba skꞌopon te gentee, pero te hermanoetik ma yakꞌik ochel.

³¹ Sok ay chaꞌoxtul juꞌeletik yuꞌun te Asia te amigo ay sok te jPabloe, la stikonik mantal ta albeyel te manchuk ya xꞌoch bael te ba ay te komon kꞌope.

³² Te ba ay te komon kꞌope te yane ay tut ya yalik ta aw, y te yane yan euk te tut ya yalike. Porke te gente te lijkem kꞌop yuꞌunike jaꞌ bayal te ma snaꞌ tut yuꞌun te stsoboj sbaike.

³³ Pero te juriyoetike la swetꞌik ochel ta kꞌop te jꞌAlejandroe, yuꞌun ya yalbe sluwar tut yuꞌun te kꞌope. Te jꞌAlejandroe la xbech-kꞌabtay te gentee te yauk xkomik ta kꞌope, yuꞌun ya yalbe ta lekil kꞌop ta sit te jtejklume.

³⁴ Pero te kꞌalal la snaꞌik te mismo juriyo te jꞌAlejandroe, ay wan chebuk ora awunik: —¡Viva te xDiana te dios yuꞌun te efesioetike! —xchiik ta aw.

³⁵ Jich te sekretario yuꞌun te jtejklume te kꞌalal juꞌ yuꞌun skomel ta gente, la yal: —Jlumal efesioetik, spisil gente ta balmilal snaꞌoj te jtejklum to ay ta skuenta skanantayel te chꞌulna yuꞌun te kaj-santutik xDianae te koem tal ta chꞌulchane.

³⁶ Maꞌyuk machꞌa ya yal te ma jichuke. Chꞌenanik te jaꞌexe, ma me tuti pasik teme ma anopojikuk leke.

³⁷ Porke te winketik to te jaꞌex awikꞌojik tale, maꞌyuk tut yelkꞌanejbe te chꞌulnae, sok maꞌyuk ya stoyba-kꞌoptayik te kaj-santutik xDianae.

³⁸ Yan te jDemetrio sok te sjoꞌtak ta aꞌtele, teme ay tut ya skꞌanik parte yuꞌune, jaꞌ sluwar te ay alkal ya xchapawane. Jaꞌ aꞌ ba yalbeyik te jꞌuꞌeletike y juju-tul aꞌ ba kꞌopojikuk teꞌa.

³⁹ Sok teme ay tut yan ya ajojkꞌoyike, jaꞌ xꞌajojkꞌoyik a te ay komon kꞌop kuꞌuntik ae.

⁴⁰ Porke ma wokoluk ya slebotik jmultik te ajwalile yuꞌun te kꞌop lijkem kuꞌuntike. Yuꞌun ma jnaꞌ tut ya kaltik teme la sjojkꞌobelotik te tut sluwar te xniketotik ta kꞌope —xchi te sekretarioe.

⁴¹ Te kꞌalal laj yoꞌtan ta kꞌope la stikonlan bael te genteetike.