Hechos 17 - Nuevo Testamento Tzeltal de Amatenango

Lijk bayal kꞌop ta jtejklum Tesalónica

¹ Te jPablo sok te Silase laj bajt ta jtejklum Anfípolis sok ta jtejklum Apolonia, y te nax a laj kꞌot ta jtejklum Tesalónica te ba ay jun sinagoga yuꞌun te juriyoetike.

² Te jPalboe bajt ta sinagoga jich tutꞌil kꞌayem a ta pasele. Ta jujun kꞌaal ta skꞌaalel te kuxo-oꞌtane, teꞌ yalulan sok a te tut ya yal te Sjun Diose. Jich a spasulan oxeb semana.

³ Jaꞌ a yalbe yaꞌilan te tutꞌil puersa kꞌax swokol ta milel te Cristoe, y ta patil chame, sok puersa chaꞌkux tal te ba ay animaetike. Sok la yaltalanbe: —Jaꞌ mismo te Jesus te ya kalbeyexe, jaꞌix te Cristoe —xchi.

⁴ Ay juriyoetik te la xchꞌuunike, y la sjoyin sbaik sok te jPablo sok te Silase. Jich a xchꞌuunik bayal griegoetik te xiꞌojik te Diose. Y ben bayal antstik te lom jkꞌulejike.

⁵ Pero te juriyoetik te maꞌ skꞌan a xchꞌuunike lijk slaꞌ-yoꞌtanik yuꞌun. La stsobik tal cheb oxeb chꞌajil winketik te ma tsaꞌamuk yaꞌtelik te xjoylajan ta kayae, jich xniketik lijkel ta kꞌop, y jicha lijk kꞌop te ba jtejklume. La yochintaybeyik sna te Jasone yuꞌun ya sleik te jPablo sok te Silase, yuꞌun ya yikꞌik lokꞌel xba yakꞌik entregal ta skꞌab te gentee.

⁶ Pero maꞌ staik teꞌa. Jaꞌ a xjochik lokꞌel te Jasone sok chaꞌoxtul te hermanoetike, yuꞌun ba yakꞌik entregal ta stojol te juꞌeletik yuꞌun te jtejklume. Xꞌawlajanik: —Te winketik to yipalik ta slijkesel kꞌop ta spisil balmilal, y laj julix ekꞌa liꞌye.

⁷ Jaꞌ yikꞌoj ta sna te Jasone. Spisilik ya xkꞌaxintaybeyik te smantal te mukꞌul rey César te ay ta Romae, yuꞌun ya yalik te ay yan rey, te jaꞌ te Jesuse —xchiik ta kꞌop.

⁸ Te kꞌalal jich a yaꞌiyik te gentee sok te juꞌeletike, lijkik ta kꞌop yuꞌun.

⁹ Pero te Jason sok te yan hermanoetike la yakꞌik jilel smultaik yuꞌun ya xkomtalanot a, y koleslanot bael.

Te jPablo sok te Silase ayik ta jtejklum Berea

¹⁰ Ajkꞌubalix a te hermanoetike ora stikonik bael kꞌalal ta jtejklum Berea te jPablo sok te Silase. Te kꞌalal laj kꞌot teꞌae, toj a laj bajt ta sinagoga yuꞌun te juriyoetike.

¹¹ Te juriyoetik te ayik ta jtejklum Bereae ay srazonik, ma pajaluk sok te machꞌatik ay ta jtejklum Tesalónicae. Ben jun yoꞌtanik la yaꞌiybeyik sluwar te tuti altalanbot yuꞌun te jPabloe. Jujun kꞌaal ya yilik ta Sjun Dios teme jich te tut ya xꞌaltalanbote.

¹² Jich chꞌin ma spisiluk a xchꞌuunik, y jich bayal a xchꞌuunik euk te jkꞌulej griego antstik te ichꞌbil ta jkuentae sok euk te winketike.

¹³ Pero te kꞌalal la yaꞌiyik te juriyoetik te ay ta Tesalónicae te yipal ta yalel skꞌop Dios ta Berea te jPabloe, laj bajtik ta Berea kꞌo xchebal-kꞌoptayik te gente teꞌae.

¹⁴ Pero te hermanoetike ora a stikonik bael kꞌalal ta tiꞌmar te jPabloe. Yan te Silas sok te jTimoteoe jil ta Berea stukelik.

¹⁵ Te machꞌatik la sjoyinik bael te jPabloe xkꞌo yakꞌik jilel kꞌalal ta jtejklum Atenas. Te nax a sujtik bael te machꞌatik xkꞌo yakꞌik jilele, sok yichꞌojik bael mantal ta stojol te jTimoteo sok Silas yuꞌun ya xba stsob sbaik sok ta ora te jPablo teme ya xjuꞌ yuꞌunike.

Ay ta jtejklum Atenas te jPabloe

¹⁶ Te jPabloe yipal ta smaliyel ta jtejklum Atenas a te Silas sok te jTimotoe. Lom bayal a yakꞌ yajtal yoꞌtan yuꞌun te la yil te puru lotil dios nojel a te jtejklume.

¹⁷ Jaꞌ yuꞌun ba yaꞌbiyanik sok te juriyoetik sok te yan te xiꞌojik te Diose te ba sinagoga yuꞌunike. Y jujun kꞌaal la yaꞌbiyan sok te machꞌa ya stsob sba sok ta parkee.

¹⁸ Ay maestroetik yuꞌun te epikureoetike sok te estoikoetike lijk sjojokꞌobe sba sok te jPabloe. Ay la yalik: —¿Tut a te ya yal chawchꞌunetel to? —xchiik. Te yane la yalik: —Yuꞌun wan yipal ta yalbeyel skꞌoplal achꞌ diosetik —xchiik. Jich a yalik, yuꞌun te jPabloe yipal ta yaltalanbeyel te lekil achꞌ kꞌop yuꞌun te Jesuse sok te chaꞌkuxele.

¹⁹ Jich a yikꞌik bael ta stojol te junta Areópago sbiil te kꞌayemik te ya stsob sbaik ta yaꞌiyel te kꞌope. Y la sjojkꞌobeyik teꞌa: —¿Me ya xjuꞌ te ya kaꞌibetik sluwar te achꞌ pꞌijutesel te awichꞌojbotik tale?

²⁰ Yuꞌun lom yan ya kaꞌitik te tut ya awalbotike, y ya jkꞌan ya jnaꞌtik tut xyal —xchiik.

²¹ Porke spisil te atenasetik sok te machꞌatik teꞌ ayik a te talemik ta yan luware, jaꞌ nax ya skꞌupinik te ya yaꞌiyik sok te ya yalik tutikuk nax achꞌ kꞌopil te ya xꞌalot yaꞌiyike.

²² Te jPabloe la stejkꞌan sba ta yolilik te junta Areópagoe y la yal: —Jaꞌex atenasetik, te jaꞌexe ay bayal sbujts awoꞌtanik ta xchꞌuunel te diosetike,

²³ yuꞌun la kil te bayuk nax luwaril chꞌuunbil awuꞌunike. La jta ta jun altar te teꞌ tsꞌibabil a: “Jaꞌ yuꞌun te Dios te ma jnaꞌbeytik sbaeꞌ, xchi. Jaꞌ yuꞌun te Dios achꞌuunejik te ma xꞌanaꞌbeyik sbae, jaꞌix te machꞌa ya kalbeyex skꞌoplale.

²⁴ “Te Dios te la spas balmilal y sok spisil te tutik ay teꞌae, jaꞌ yajwal te chꞌulchane sok te lume. Makꞌ snain temploetik te pasbil ta skꞌab te winketike,

²⁵ sok ma yuꞌunuk ayuk tut ya xjuꞌ ya kaꞌbetik stukel. Yuꞌun stukel te yakꞌoj kuxuyinukotike sok te ya kichꞌtik ikꞌe sok yakꞌojbotik spisil te tutik ya xtuun kuꞌuntike.

²⁶ “Ta skuenta nax jtul winik, Dios a xchiknates spisil ta jkaj genteetik yuꞌun ya xkuxuyin ta spisil balmilal. Ta slijkibal to tal te tiempoe chapalix yuꞌun te skajal-skaj te yorailike sok te tutꞌil kuxul te jujun luware,

²⁷ yuꞌun jich ya sleik a te Diose. Ya jtajtik ta leel teme ya xjuꞌ kuꞌuntik sleele, porke ma jakaluk ay ta jtojoltik ta jujutulotik te Diose.

²⁸ Porke ta skuenta Dios kuxulotik, sok ya xnijkotik, sok te tutꞌ ayotike. Jich tutꞌil yaloj chaꞌoxtul te jpas-junetik awuꞌunike, la yalik: “Stsꞌumbalotik te Diose.” te xchie.

²⁹ Jaꞌ yuꞌun te tutꞌil stsꞌumbalotik te Diose ma me jkuytik te Dios pajal sok te tut a te pasbil ta oro sok ta plata o ta ton te pasbil ta skꞌab winik te stukel nax a snop ta yoꞌtan te la spase.

³⁰ Te Diose maꞌyuk tuti yal yuꞌun te jich yipal kꞌaal ayikix tal ta spasel te gente te ma snaꞌbe sluware. Yan te ora to ya spasix ta mantal spisil genteetik ta bayuk te ya sujtes yoꞌtanik ta stojole.

³¹ Yuꞌun snaꞌojix te Diose te tut kꞌaalil ya yichꞌbe jkuenta yaꞌtel te gentee, ta skuenta te jtul winik te la stꞌuje, jaꞌ te Jesuse. Jamal a akꞌtalanbot yil spisil te kꞌalal la xchaꞌkuses tal te ba ay animaetike —xchi te jPabloe.

³² Te kꞌalal jich a yaꞌiyik te chaꞌkux tal te ba ay animaetike, ay lijk ta ikꞌtinwanej yuꞌun. Y te yane la yalik: —Yan to buelta ya kaꞌitik xan te tut la awale, xchiik.

³³ Jich te jPabloe la xchꞌojtalan jilel te ba tsobajtike.

³⁴ Pero ay yan la stsꞌakliyik bael te jPabloe y la xchꞌuunik. Jich tutꞌil te jDionisio te ay yaꞌtel ta junta yuꞌun te Areópagoe, y sok jtul ants Dámaris sbiil, sok xan yanetik.