Hechos 15 - Nuevo Testamento Tzeltal de Amatenango

Junta ta Jerusalen

¹ Ay machꞌatik a laj talik ta estado Judea lijk snojpesik te hermanoetike te puersa me ya yichꞌ sirkunsision ta stiꞌbalulik, jich tutꞌil te ya yal te mantaliletik yuꞌun te jMoisese, teme ya skꞌan xkolik sbajtel kꞌinale.

² Te jPablo sok te jBernabee jicha lijk bayal kꞌop yuꞌunik sok. Jich a yichꞌik tꞌujel te jPablo sok te jBernabee sok xan yanetik yuꞌun ya xbajtik ta Jerusalen ta xchapel te kꞌop sok te apostoletike y sok te ansianoetik yuꞌun te hermanoetik te ba Jerusalene.

³ Jicha tikonlanot bael yuꞌun te jtijkꞌ hermanoetik te ayik ta Antioquiae. Teꞌ kꞌaxik ta estado yuꞌun Fenicia sok ta estado Samariae. Kꞌa yaltalanbe yaꞌiy te hermanoetik te tutꞌil ay bayal machꞌa ma juriyouk te la sjilesix te tut antibo xchꞌuuneje, y la sujtesix yoꞌtanik ta stojol Dios. Spisil te hermanoetike ben jun yoꞌtanik yuꞌun te jich a yaꞌiyike.

⁴ Te kꞌalal kꞌot ta Jerusalen te jPablo sok te jBernabee, te hermanoetik te stsoboj sbaik, sok te apostoletike y sok te ansianoetike ben jun yoꞌtanik a yikꞌik ta stojolik. Y te jPablo sok te jBernabee lijk yaltalanbe spisil te tutik a spas Dios ta stojolike.

⁵ Pero ay chaꞌoxtul fariseoetik te xchꞌuunejikix te Jesuse la stejkꞌan sbaik jajchel, y la yalik: —Puersa me ya kaꞌbeytik yichꞌ sirkunsision te hermanoetik te ma juriyouke, y ya me kalbetik te ya xchꞌuunik te mantaliletik yuꞌun te jMoisese —xchiik.

⁶ Jich a stsob sbaik te apostoletike y sok te ansianoetike yuꞌun ya snopik te tutꞌ ya xchapik te kꞌop to.

⁷ Te jalajikix ta kꞌop ae, te jPedroe la stejkꞌan sba jajchel, y la yaltalanbe: —Hermanoetik, te jaꞌexe anaꞌojik te ayix kꞌaal stꞌujojon Dios ta awolilike te ya kalbey te lek achꞌ kꞌop yuꞌun te kolel te machꞌatik ma juriyouke, yuꞌun jich me ya xchꞌuunik euk.

⁸ Jich te Diose, te snaꞌoj tutꞌ ay te oꞌtanile, la yakꞌ ta naꞌbeyel sluwar te ben tsaꞌam yoꞌtan ta stojol, yuꞌun la yakꞌtalanbe yikꞌ ta yoꞌtanik euk te Chꞌul Espíritu, jich tutꞌil te joꞌotike.

⁹ Te Diose ma yanuk a yilotik sok te machꞌatik ma juriyouke, yuꞌun jich ya spasbe perdon yuꞌun smulik euk ta skuenta nax te la xchꞌuun ta yoꞌtanike.

¹⁰ Jaꞌ yuꞌun, ¿tut yes ya awilbeyik yoꞌtan te ora to te Diose, te ya awaꞌbeyik yijkꞌats te hermanoetik te tut maꞌ juꞌ kuꞌuntik xchꞌuunel sok euk te antibo jmeꞌ-jtatike?

¹¹ Te joꞌotike jchꞌuunejtik te libre ayotikix yuꞌun jmultik ta skuenta slekil yoꞌtan te Kajwaltik Jesuse. Jich tutꞌil la yichꞌikix koltayel euk te jyanlumetike —xchi te jPedroe.

¹² Jich ma machꞌa kꞌopojix a, y la yaꞌiybeyik sluwar skꞌop te jBernabe sok te jPabloe te la yalik te seña milagroetik te Dios a pasbot ta stojolik ta yolil te machꞌa ma juriyouke.

¹³ Te kꞌalal lajix yoꞌtanik ta kꞌop ae, te Jacoboe la yal: —Kermanotak, aꞌiyaik awaꞌiy te tut ya kalbeyexe.

¹⁴ Te Simone la yalbotikix kaꞌitik te tutꞌil Dios a lijk snaꞌ ta nail to te ya stꞌuj lokꞌel ta yolilik euk te machꞌatik ma juriyouke te machꞌatik jtejklum yuꞌun ya xkꞌote.

¹⁵ Jaꞌ to jich ay skꞌoplal euk te tuti stsꞌibayik jilel te jꞌalwanejetik jich tutꞌil ya yal te Sjun Diose:

¹⁶ “Ta patil ya xchaꞌsujton tal, y ya me jchaꞌpas xan te sna jDavid te jimene. Ya me jpas xan ta achꞌ te tutꞌil jimene, sok ya jtejkꞌan xan moel,

¹⁷ yuꞌun jich me ya xtal sleik Kajwaltik a te yan genteetike. Jaꞌ bi, jaꞌ spisil te jyanlumetik te ikꞌtalanbil ta jkuentae.

¹⁸ Jich yalojix te Kajwaltike, te yakꞌojix ta naꞌel spisil te nameye”, xchi me.

¹⁹ “Jaꞌ sluwaril te ya kal te ma me xꞌawaꞌbeyik yijkatsinik te smantal te machꞌatik ma juriyouke. Aꞌ sjilesik te tut antibo xchꞌuunejike, sok aꞌ sujtes yoꞌtanik ta stojol te Diose.

²⁰ Jaꞌ nax a me jpasbeytik sjunik te ya kalbetik te ma me wakꞌ sweꞌik tiꞌbal te ma lekuke yuꞌun jaꞌ smajtaninej te lotil diosetike, sok a me sjilesik te antsiwejele, sok te makꞌ sweꞌbeyik stiꞌbalul chambalametik te tsꞌotbil nax snukꞌe sok te jich nax chamene, sok te makꞌ sweꞌeik te chꞌichꞌe.

²¹ Porke nameyix ta jujun jtejklum te ya xꞌalot te mantaliletik yuꞌun te jMoisese, y ya yichꞌ kꞌoponel sjunal ta sinagogaetik ta jujun skꞌaalel te kuxo-oꞌtane —xchi te Jacobe.

Pasbot bael sjunik te machꞌa ma juriyouke

²² Te apostoletike sok te ansianoetike y sok spisil te hermanoetike la snopik te ay machꞌa stꞌujik ta yolilik te ya stikonik bael ta jtejklum Antioquia sok te jPablo y sok te jBernabee. Jaꞌa biiltesot te Judas te Barsabas xꞌalbote, sok te Silas, te akꞌtalanbil ta jkuenta yuꞌun te hermanoetike.

²³ Jicha aꞌbot ba yichꞌik te karta te jich a yale: “Joꞌotik apostolotik y sok te ansianoetik te awermanotake, xkoltanuk te kermanotaktik te ma juriyouke, te ayik ta jtejklum Antioquia sok ta Siria y sok ta Cilicia.

²⁴ “La kaꞌibetik sluwar te ay chaꞌoxtul te liꞌ lijkemik baele te ma jtikonejtikuke te la yaꞌbeyex yajtal awoꞌtanik yuꞌun te tuti yalike sok te la yakꞌ aꞌbiyanuk awoꞌtanike. Jaꞌ te la yalbeyex te puersa ya skꞌan ya awichꞌik sirkunsision sok te ya achꞌuunik te mantaliletik yuꞌun te jMoisese.

²⁵ Jaꞌ yuꞌun la jnoptik ta komon te jaꞌ lek la jbiiltestik cheb kermanotaktik ta koliltik te ya xtal yilexe. Jaꞌ jun nax ya xtal sok te kermanotaktik Bernabe sok te jPabloe, te ben kꞌux ta koꞌtantike,

²⁶ te xtuchꞌoj yoꞌtanik teme te ya xlajik yuꞌun a ta skaj te Kajwaltik Jesucristoe.

²⁷ Jaꞌ yuꞌun la jtikontikix tal te Judase sok te Silase. Jaꞌ me ya yalbeyex awaꞌiyik ta personal tut ay sluwaril te kꞌop to.

²⁸ Yuꞌun jaꞌ lek ya yaꞌi te Chꞌul Espiritue sok lek a kaꞌitik euk te maꞌyuk yan mantal te ya kakꞌtik achꞌuunike, jaꞌ nax te tut ben tulan skꞌoplale.

²⁹ Jaꞌ te makꞌ me ya aweꞌbeyik stiꞌbalul chambalametik te ya xmilbot smajtanin te lotil diosetike, sok ma me aweꞌik chꞌichꞌ, ni te stiꞌbalul chambalametik te tsꞌotbil nax snukꞌe, y sok ma me antsiwejanik. Teme ya akom abaik ta spasel to, jich toj ayex bael abi. Ila me abaik kꞌael”, xchiik ta jun.

³⁰ Jich a tikunot bael te winketike, y laj kꞌot ta jtejklum Antioquia. La stsob te hermanoetike y la yaꞌbe entregal te kartae.

³¹ Kꞌalal la skꞌoponik te karta te hermanoetike, ben kontento la sujt yuꞌun te tuti altalanbot teꞌae.

³² Te Judas sok te Silase ay smajtanik yuꞌun yalel skꞌop Dios. Jich a sjunutesbe yoꞌtanik y la yaꞌbe spuersa yoꞌtan te hermanoetik yuꞌun te tutiꞌ yalike.

³³ Te tutꞌil jalajix teꞌae, te hermanoetike la yakꞌik sujtel. Ben jun yoꞌtanik a spatbeyik bael yoꞌtan, yuꞌun ya sujtik bael ta stojol te machꞌatik tikonlanbil tal yuꞌune.

³⁴ Pero te Silase la snop te ya to xjil ta Antioquiae,

³⁵ sok jicha te jPablo sok te jBernabee, teꞌ to jilik euk a. La sjoyin sbaik sok xan bayal te machꞌatik la snojpeslane, y sok la yalbe te skꞌop Kajwaltike.

Te jPabloe xchaꞌmelal ya xlokꞌ bael ta spukel a te lek achꞌ kꞌope.

³⁶ Cheꞌoxeb kꞌaal ta patil, te jPabloe la yalbe te jBernabee: —Konik, kon kiltik xan tal te hermanoetik te aylan ta mukꞌul jtejklumetik te ba kalojtik te skꞌop Kajwaltike, yuꞌun xba kiltik tal tut yilelik —xchi.

³⁷ Te jBernabee kꞌan yikꞌ bael te Juan te jMarcos te jun xan sbiile.

³⁸ Pero te jPabloe la yal te ma spas ya yikꞌ bael, porke te jMarcose jaꞌ te chꞌojawan jilel ta slum Panfiliae, te ma skꞌan a sjoyin bael ta spasel te aꞌtele.

³⁹ Tulan a skꞌopon sbaik yuꞌun, sok jich a spit sbaik. Te jBernabee jaꞌ a yikꞌ bael te jMarcose. Moik bael ta barko, laj bajt ta slum Chipre.

⁴⁰ Yan te jPabloe jaꞌ a stꞌuj te ya sjoyin bael te Silase. Jich te hermanoetike la skꞌanbeyik bendision te ya sjoyinik bael te Kajwaltike. Jicha laj bajtik.

⁴¹ Kꞌaxik bael ta estado Siria y sok estado Cilicia. Kꞌa yaꞌbeyik spuersa yoꞌtan te juju-tijkꞌ hermanoetike.