Hechos 14 - Nuevo Testamento Tzeltal de Amatenango

Te jPablo sok te jBernabe laj kꞌot ta jtejklum Iconio

¹ Te kꞌalal ayikix ta jtejklum Iconio ae, te jPablo sok te jBernabee ochik bael te ba sinagoga yuꞌun te juriyoetike. Ay bayal yip te skꞌop Dios te la yalike, jich bayal a xchꞌuunik te juriyoetike sok te machꞌatik ma juriyouke.

² Pero te juriyoetik te maꞌ skꞌan a xchꞌuunike la xchebal-kꞌoptayik te machꞌatik ma juriyouke. Jich a lijk snop te ya yakꞌ ta kontrainel te hermanoetike.

³ Pero te apostoletike bayal kꞌaal a jalajik teꞌa. Jaꞌ yip yoꞌtanik te Kajwaltike, jicha juꞌ yuꞌunik yalel te tutꞌil ayotik ta kꞌuxutayel yuꞌun te Kajwaltike. Jaꞌ a yakꞌ ta ilel te tut batsꞌi jich te tut ya yalike yuꞌun te Kajwaltike la yaꞌbe spoderik ta spasel señaetik y sok milagroetik.

⁴ Pero te gente yuꞌun te jtejklume la xatꞌ sbaik yuꞌun. Ay machꞌatik jun yoꞌtan sba sok te juriyoetike y ay machꞌatik jun yoꞌtan sba sok te apostoletike.

⁵ Jich te juriyoetike sok te machꞌatik ma juriyouke la snop skꞌopik sok te jꞌuꞌeletike yuꞌun ya smilik ta wolel ta ton.

⁶ Pero te jPablo sok te jBernabee la yaꞌibeyik sluwar te tut snopojike. Jicha laj bajt ta anel ta jtejklum Listra sok ta Derbe te ay ta estado Licaonia. Jich a yokliyik spisil te estadoe,

⁷ sok teꞌ yalik a te lekil achꞌ kꞌope.

La swolik ta ton ta Listra te jPabloe

⁸ Te ba jtejklum Listrae ay jtul winik teꞌa te ma spas xbeene. Maꞌyuk a been porke ta yayinab to koxouben.

⁹ Te winik to teꞌ nakal ta yaꞌiyel a te tut yipal ta yalel te jPabloe. Te jPabloe la skꞌelube sit, y la yil te ay bayal xchꞌuunel yoꞌtan te ya xlekube.

¹⁰ Jich tulan a skꞌopon: —Jajchan. Toj xtekꞌlat sok te awoke —xyut. Te winike sotset jajchel ta ora, y lijk beenuk.

¹¹ Kalal la yil te gente te tuti spas te jPabloe, lijk yalik ta aw ta licaonia-kꞌop: —Koemik tal ta jtojoltik diosetik te skꞌajtesej sba ta winik —xchiik ta aw.

¹² Jupiter a yalbeyik te jBernabee, y Mercurio a yalbeyik te jPabloe, porke jaꞌ stukel te yipal ta kꞌope.

¹³ Jich te saserdote yuꞌun te Jupitere, te ay stemplo ta stiꞌil jtejklume, la yikꞌ tal toroetik te lek nichimtaybil tale. Y te saserdotee sok te genteetike kꞌan skejan sbaik ta stojol te apostoletike y kꞌan smilbeyik toroetik yuꞌun smajtan.

¹⁴ Pero te kꞌalal la yaꞌiybeyik sluwar te jBernabee sok te jPabloe, la xchꞌiꞌ xkamixik yuꞌun, y la sten sbaik ochel te ba yolil te genteetike, y lijk yalik ta aw:

¹⁵ —Pero moletik, ¿tuꞌun te jich ya apasike? Te joꞌotike winikotik nax euk jich tutꞌil te jaꞌexe. Jaꞌa talotik yuꞌun te tal kalbetikex te ya awijkitayik spasel te tutik ma xtuun ta pasele, sok te ya asujtes awoꞌtanik ta stojol te kuxul Dios te la spas chꞌulchan sok balmilal sok te mare y sok spisil te tutik ay ae.

¹⁶ Te namey tale Dios a jilesanot yuꞌun chikan te tutik ya skꞌan ya spasik te gentee.

¹⁷ Pero ma yuꞌunuk maꞌ yakꞌ ta naꞌel te tutꞌil ay te Diose, porke lek te tut ya spase. Yuꞌun stukel te ya yakꞌ taluk jaꞌal ta chꞌulchan ta atojolike, y ya yakꞌ sitinuk spisil te tut ya atsꞌunike. Jich ya xnoj te achꞌujtike yuꞌun jich ben jun awoꞌtanik a —xchiik ta kꞌop.

¹⁸ Aunke la yalbeyik spisil to, pero wokol a juꞌ yuꞌunik skomel te genteetike yuꞌun jaꞌ ay ta yoꞌtanik te ya smilbeyik smajtanin te toroetike.

¹⁹ Ay juriyoetik a laj kꞌot te lijkemik tal ta Antioquia sok ta Iconio, yuꞌun tal xchebal-kꞌoptay te genteetike. Jich a swolik ta ton te jPabloe. La skuyik te chamix jil yuꞌunike, y la xjochik lokꞌel ta tiꞌ jtejklum.

²⁰ Pero te hermanoetik la stsob sbaik tal, tal sjoyik te jPabloe. La stejkꞌan sba jajchel te Pabloe, y chaꞌoch xan bael te ba jtejklume. Ta xchebal kꞌaal la sjiles te jtejklum Listrae, bajt sok te Bernabee ta jtejklum Derbe.

²¹ Patil la yalik te lek achꞌ kꞌop te ba jtejklum Derbee, te ba bayal a yaꞌbeyik xchꞌuun Jesus te genteetike. Ta patil sujtik xan bael ta jtejklum Listra, sok ta Iconio, sok ta jtejklum Antioquia.

²² Te ba luwar ba laj kꞌaxike, la yaꞌbeyik jilel spuersa yoꞌtan te hermanoetike, y la yaltalanbe jilel te jmel nax a wakꞌ xchꞌuunik te Jesuse. La yalbeyik te puersa ay bayal wokol te ya xꞌochotik te ba ay ta ajwalinel te Diose.

²³ Sok la sleik jilel ansianoetik te ba ay juju-tijkꞌ te hermanoetike. La skꞌoponik Dios y la skom sweꞌelik, sok la yakꞌik jilel te skꞌab te Kajwaltik te jaꞌ xchꞌuunejike.

Te jPablo sok te jBernabee sujtik bael ta jtejklum Antioquia te ay ta estado Siriae

²⁴ Jicha kꞌaxik bael ta estado yuꞌun Pisidia y laj kꞌot ta estado yuꞌun Panfilia.

²⁵ Teꞌ yalik a te lek achꞌ kꞌop te ba jtejklum Pergee, y te nax a laj bajt ta jtejklum Atalia.

²⁶ Teꞌ moik bael ta barko a, laj bajt ta Antioquia, te mukꞌul jtejklum te ba kꞌanbot bendision te yauk sjoyin bael ta beel te Diose te aꞌtel te ya xba spasike, ja te juꞌix ta pasel yuꞌunike.

²⁷ Te kꞌalal laj kꞌot ta Antioquiae, la stsobik tal te hermanotike, y la yaltalanbe spisil te tutik a spas Dios ta skuentaike, sok te tutꞌil te Kajwaltik la yaꞌbe xchꞌuunik euk te machꞌatik ma juriyouke.

²⁸ Te jPablo sok te jBernabee bayal kꞌaal a sjoyin sba sok teꞌa te hermanoetike.