Hechos 12 - Nuevo Testamento Tzeltal de Amatenango

Cham ta milel te Jacobo y och ta prexo te jPedroe

¹ Te tiempo abi te rey Herodese lijk yilbajin chaꞌoxtul te hermanoetik.

² La yakꞌ mantal ta milel ta puñal te Jacoboe sbankil te Juane,

³ y yuꞌun la yil te ben sniꞌ xyaꞌi te juriyoetike, la yakꞌ ta tsakel euk te jPedroe. Ja akꞌot ta pasel a te skꞌaalel kꞌin te ya sweꞌik waj te ma yichꞌojuk lebadurae.

⁴ Ta patil te tsajkemix ae, te jHerodese la yotses ta prexo te jPedroe. La yakꞌ ta kanantayel yuꞌun chantijk soltaroetik te chanchan tul staoj sbaik te juju-tijkꞌe. Yuꞌun snopoj te jHerodese te ya stejkꞌan ta sitil komon ta patil teme laj te kꞌin Pascuae.

⁵ Jich ay ta prexo te jPedroe, lek kanantaybil. Pero te hermanoetike sigue ya skꞌoponbeyik Dios ta stojol ta spisilik.

Dios a skolta lokꞌel ta prexo te jPedroe

⁶ Pero pajel xanix a te ya xba tejkꞌanek ta sitil komon yuꞌun te jHerodes, mismo ajkꞌubal a wayal to a te jPedroe, lotꞌbil yuꞌun chaꞌtul soltaroetik y chukul ta chaꞌlijk kadena. Y te yan soltaroetike teꞌeyik ba puertae, skananteyejik te prexoe.

⁷ Ora nax a chiknaj tul chꞌul ángel yuꞌun te Kajwaltike, y te yutil prexoe noj ta xojobil. Te chꞌul ángele la slowbe skostiya te jPedroe, y la yalbe: —Jajchan ta ora —xyut. Mismo ora a te kadenaetik te ay ta skꞌab te jPedro xpojlajan koel.

⁸ Te chꞌul ángel la yalbe: —Lapa akꞌuꞌ-apakꞌ y lapa awaw —xchi. Jich a spas te jPedroe y te chꞌul ángele la yalbe xan: —Lapa tal te amam najtꞌil kamixe y tsꞌakliyaon —xyut.

⁹ Te jPedro stsꞌakliyej lokꞌel te chꞌul ángele. Makꞌ snaꞌ me batsꞌi jich te tut ya spas te chꞌul ángele, yuꞌun la skuy ta swayuch nax.

¹⁰ Pero kꞌaxik bael te ba primero jkanane y te nax a kꞌax te ba xchebale, y kꞌalal laj kꞌot te ba puerta takꞌin te ay ta kayae, te puertae stukel nax a jeꞌ bael. Lokꞌik bael. Ta patil te beenikix bael ta jun kaya ae, te chꞌul ángel la swolan jilel te jPedroe.

¹¹ Te jPedroe kꞌo snop kꞌinal, y la yal: “Ta ora to la jnaꞌix te batsꞌi jich te jaꞌ a stikon tal chꞌul ángel yuꞌun te Kajwaltike. Yuꞌun tal skoltayon ta skꞌab te jHerodese, sok te tut snopoj ya spasbikon te juriyoetike”, xchi.

¹² Te tutꞌil la snaꞌix te tuti kꞌot ta pasele, te jPedroe bajt ta sna te xMariae te smeꞌ te Juan te jMarcos jun xan sbiile, te ba stsoboj sbaik bayal ta jtul te yipalik ta skꞌoponel te Diose.

¹³ Kꞌo skꞌojkꞌutay te puerta te ba kayae. Ay jtul achꞌix te xRode sbiile lokꞌ tal, tal yil machꞌa a.

¹⁴ Te kꞌalal la snaꞌbe sba te jaꞌ skꞌop te jPedroe, ben jun yoꞌtan a sujt yuꞌun, pero ma la sjeꞌ te puertae. Xyalet ochel ta yalel te jaꞌ Pedro te ayix ta tiꞌ puertae.

¹⁵ La yalbeyik te achꞌixe: —Yuꞌun xjowiyat —xyutik. Pero te achꞌixe la yal te batsꞌi jiche. La yalik spisilik: —Ma stukeluk. Jaꞌ wan te chꞌul ángel te joyinbil yuꞌune —xchiik.

¹⁶ Pero te jPedroe sigue ya skꞌojkꞌutay te tiꞌ puertae, y te kꞌalal la sjeꞌike y la yilik, lom cham a yaꞌiyik yuꞌun.

¹⁷ Pero te jPedroe la yaꞌbe seña ta skꞌab te yauk xchꞌenlinike, y la yaltalanbe te tutꞌil a lokꞌesot tal ta prexo yuꞌun te Kajwaltike. Sok la yalbe xan: —Albeyaik te Jacobo y sok te hermanoetike te tuti kꞌot ta pasele —xchi. Te nax a lokꞌ bael y bajt ta yan luwar.

¹⁸ Te kꞌalal sakub te kꞌinale, te soltaroetike lijk kꞌop yuꞌunik, porke ma snaꞌik te tuti kꞌot ta pasel ta skuenta te jPedroe.

¹⁹ Te jHerodese la yakꞌ mantal ta leel pero ma staik. La sjojkꞌobe te jkananetike y la yakꞌ mantal ta miltalanel. Ta patil te jich kꞌote, te jHerodese lokꞌ bael te ba Judea y ba kuxuyinuk ta jtejklum Cesarea.

Te tutꞌil a cham te jHerodese

²⁰ Te jHerodese ilinem sok te genteetik yuꞌun te jtejklum Tiro y sok te jtejklum Sidon. Jich te jtejklume la snopik te ya xtal skꞌoponik te jHerodese. Ja nail a slekil-kꞌoponik te jBlasto sbiil te aꞌbil tulan yaꞌtel te rey Herodese, yuꞌun stukel xba skꞌopon te reye te ayuk bujtsꞌan kꞌinal ya yaꞌiyike, porke te ba slumal te reye teꞌ ya staik a te tut ya xtuun yuꞌunike.

²¹ Jich te jHerodese la xatꞌbe skꞌaalel te ya skꞌopon te genteetike. Kꞌalal la sta skꞌaalele la slapbe skꞌuꞌ-pakꞌalul te mukꞌul reye, y jicha lijk skꞌopon te genteetike.

²² Jich te genteetike lijk yalbeyik ta aw: —Dios te machꞌa yipal ta kꞌope, ma winikuk —xchiik.

²³ Ora nax a tal jtul chꞌul ángel yuꞌun te Kajwaltike te ya yakꞌ taek ta chamel te jHerodese, ta skaj te ma jaꞌuk a yakꞌ ta akꞌel ta jkuenta te Diose. Y cham, yuꞌun weꞌot ta lukum te xchꞌujte.

²⁴ Pero te skꞌop Diose pujk bael ta alel ta bayuk nax y mukꞌub.

²⁵ Te jBernabee sok te Sauloe, te kꞌalal laj yoꞌtanik ta mantal ta Jerusalene, sujtik bael ta Antioquia. La yikꞌik bael te Juan te jMarcos te jun xan sbiile.