Hechos 11 - Nuevo Testamento Tzeltal de Amatenango

Te jPedroe kꞌo yalbe skꞌoplal te jCornelio ta stojol te hermanoetik te ba Jerusalene

¹ Te apostoletike sok te hermanoetik te ayik ta Judea la yaꞌiyik te xchꞌuunejikix euk te skꞌop Diose te machꞌatik ma jurioyouke.

² Jaꞌ yuꞌun te kꞌalal sujt bael ta Jerusalen te jPedroe, tijot ta kꞌop yuꞌun te hermanoetik te xchꞌuunejik tutꞌil ay te sirkunsisione.

³ La sjojkꞌobeyik: —¿Tuꞌun te ochat ta sna te machꞌatik ma yichꞌojuk sirkunsisione y weꞌat soke? —xyutik.

⁴ Te jPedroe lijk yalbe spisil te tuti kꞌot ta pasel te nail toe:

⁵ —Te joꞌone ayon ta jtejklum Jope a, y yipalon ta skꞌoponel Dios a ay tutꞌi kil ta stekꞌlejal yilel. La kil pajal sok jun sabana pakꞌ yilel te chukbil xchanebal xchikin te yipal tal ta koel ta chꞌulchan te ya xjul te ba ayone.

⁶ Lom lek a jkꞌelu te tut ay ta yutile y la kil bayal ta jkaj chambalametik sok chanetik sok mutetik.

⁷ Y la kaꞌi ay machꞌa kꞌopoj te la yalbone: “Jajchan, Pedro, mila y weꞌa”, xyuton.

⁸ La jakꞌbe: “Ma spas, Kajwal. Porke maꞌyuk ba jweꞌoj te tut ma tsaꞌamuk skꞌoplale sok te tut ilobtik sbae”, xkut.

⁹ Jich te machꞌa ya xkꞌopoj ta chꞌulchane la yalbon xan: “Te tut lekix yuꞌun te Diose ma me awal te ma lekuk skꞌoplale”, xchi a kaꞌi.

¹⁰ Oxmel te jich a yaꞌbelon kile, y te nax a spisil a chaꞌmo bael ta chꞌulchan.

¹¹ Mismo tiempo a, kꞌot oxtul winketik tikonlanbil tal ta jtejklum Cesarea, yuꞌun tal sleikon te ba na ba ayone.

¹² Te Espiritue la yalbon te ya xboon soke, sok te manchuk ya xꞌaꞌabiyan koꞌtan yuꞌune. Y jich a sjoyinikon bael te waktul hermanoetik to. Jpisiltik a ochotik kꞌoel te ba sna jtul winik

¹³ te la yalbotik te la yil tekꞌel jtul chꞌul ángel ta sna te jicha albot yuꞌune: “Tikona bael winketik ta jtejklum Jope yuꞌun ya xba yikꞌ tal te Simon te jPedro jun xan sbiile.

¹⁴ Jaꞌ me ya yalbeyat te tutꞌil ya xjuꞌ xkolat sok spisil te machꞌa ay awuꞌune”, xꞌutot.

¹⁵ Te kꞌalal lijkon ta yaltalanbeyele, tal te Chꞌul Espiritue jul ta skuentaik jich te tutꞌil jul ta jkuentatik ta slijkibale.

¹⁶ Jich a jnaꞌ te tut yaloj te Kajwaltike: “Te Juane la yakꞌ ichꞌjaꞌ ta jaꞌ, pero te jaꞌexe ya me yaꞌbelex awikꞌik te Chꞌul Espíritu”, xchi me.

¹⁷ Jaꞌ yuꞌun teme jich a akꞌtalanbotik yuꞌun Dios te Chꞌul Espiritue, jich tutꞌil te joꞌotik te jchꞌuunetikix te Kajwaltik Jesucristoe, ¿machꞌaon me a te joꞌone te ya jkom ta aꞌtel te Diose? —xchi te jPedroe.

¹⁸ Te kꞌalal jich a yaꞌiyik te hermanoetik ta Jerusalene, ma tuti yalikix a y la yalbeyik slekilal te Diose. Jich a yalik: —Yuꞌun Dios a yaꞌbe sujtes yoꞌtanik yuꞌun smulik te machꞌatik ma juriouke. Jich me ya xkolik sbajtel kꞌinal euk —xchiik.

Te hermanoetik ta jtejklum Antioquia

¹⁹ Ta patil chamenix a te jꞌEstebane, lijk ta ilbajinel te hermanoetike. Jaꞌ yuꞌun ay a laj bajtik ta anel ta slum Fenicia, sok ta slum Chipre, sok ta jtejklum Antioquia. Teꞌ kꞌo yalbeyik skꞌop Dios a te juriyoetike, pero ma jaꞌuk a yalbe te machꞌa ma juriyouke.

²⁰ Pero ay hermanoetik te talemik ta slum Chipre sok ta jtejklum Cirene te laj kꞌot ta jtejklum Antioquiae, y lijk yalbeyik te lek achꞌ kꞌop yuꞌun te Kajwaltik Jesus te machꞌatik ma juriyouke.

²¹ Te spoder te Kajwaltike joyinlanbil yuꞌun, y jich lom bayal a sjilesik te tut nameyix xchꞌuunejike y la xchꞌuunik te Kajwaltike.

²² Kꞌalal te hermanoetik te ayik ta Jerusalene la yaꞌiyik te jich ay skꞌoplale, la stikonik bael ta Antioquia te jBernabee.

²³ Te kꞌalal kꞌot teꞌa te jBernabee la yil te aꞌbilix bendision yuꞌun Dios te machꞌa ma juriyouke y ben jun yoꞌtan yuꞌun. La stsitstalan spisil te ben junuk yoꞌtanik ta stojol te Kajwaltike.

²⁴ Porke te jBernabee ben lek yoꞌtan ta winikil, y nojel ta yoꞌtan te Chꞌul Espiritue, y jun yoꞌtan ta stojol te Kajwaltike. Jich bayal xan gente a xchꞌuun te Kajwaltike.

²⁵ Ta patil te jicha kꞌote, te jBernabee bajt ta jtejklum Tarso yuꞌun ba sle te Sauloe.

²⁶ Kꞌalal la stae, la yikꞌ bael ta jtejklum Antioquia. Teꞌeyik jun jaꞌbil sok a te hermanoetike, la spꞌijuteslan bayal gente. Jaꞌ te Antioquiae te ba nail a aꞌbot sbiilinik Cristoetik te jnopojeletike.

²⁷ Te tiempo abi ay jꞌalwanejetik yuꞌun Dios lijkik tal ta Jerusalen y laj bajt ta Antioquia.

²⁸ Ay jtul te Agabo sbiile, la stejkꞌan sba ta skuenta te Chꞌul Espíritu, sok la yal te ya xtal bayal wiꞌnal ta spisil te balmilale. Jaꞌ kꞌot ta pasel a te kꞌalal ochem ta mukꞌul rey a te jClaudioe.

²⁹ Jich te hermanoetik te ayik ta Antioquiae la snopik te ya stikonbeyik koltayel te hermanoetik te ayik ta slum Judea, chikan te tutꞌil ya xjuꞌ yuꞌunik yakꞌel ta juju-tule.

³⁰ Jich a spasik, sok la stikonik bael ta stojol te ansianoetik te ayik ta Jerusalen. Jaꞌ a yaꞌbeyik bael te jBernabe sok te Saulo te takꞌine.