Hechos 10 - Nuevo Testamento Tzeltal de Amatenango

Te jPedro sok te jCornelioe

¹ Ay jtul winik te ay ta jtejklum Cesarea te jCornelio sbiile, te jaꞌ statal yuꞌun sien soltaroetik te Italiano sbiilike.

² Ben jun yoꞌtan xchꞌuunej te Diose sok spisil te machꞌa ay yuꞌun ta snae. Sok bayal ya skꞌeben stakꞌin ta skoltayel te juriyoetike, y sil tiempo ya skꞌopon te Diose.

³ Jun kꞌaal, las tres mal kꞌaal wan a, aꞌbot yil ta stekꞌlejal yilel jtul chꞌul ángel yuꞌun Dios te tal te ba aye, y albot yuꞌun: —Cornelio —xchi a yaꞌiy.

⁴ Te jCornelioe la sle ta kꞌeluyel te ángele y sok xiꞌel la sjojkꞌobe: —¿Tut a Kajwal? —xchi te jCornelio. Albot yuꞌun te ángele: —Dios a yaꞌibeyatix te akꞌope sok la yilix te ya akꞌebenbe atakꞌin yuꞌun ya akoltay a te meꞌbaetike.

⁵ Jaꞌ yuꞌun, ila machꞌa ya atikon bael ta ora te ba jtejklum Jopee, yuꞌun ya xba yikꞌ tal te Simon, te Pedro xꞌalbote.

⁶ Jaꞌ smajanejbe sna te jtul xan Simon te jkꞌaꞌutesej-nujkule te ay sna ta tiꞌmare. Stukel me ya yalbeyat te tut ya skꞌan ya apase —xchi te chꞌul ángele.

⁷ Kꞌalal bajt te chꞌul ángel te yipal ta kꞌop soke, te jCornelioe la yikꞌ tal chaꞌtul te yaj-mantale y sok jtul soltaro te ben jun yoꞌtan xchꞌuunej te Diose sok te ya xchꞌuun mantal sil tiempoe.

⁸ La yaꞌbiyanbe spisil te tutiꞌ albote, sok la stikonlan bael ta jtejklum Jope.

⁹ Ta xchebal kꞌaal, ol wan kꞌaal a, te ayik kꞌal ta be te nopol xkotix ta jtejklum Jope ae, te jPedroe mo bael ta skꞌoponel Dios ta sba na te ba yamakꞌule.

¹⁰ Ben xwiꞌnaj y ya skꞌan xweꞌ. Pero yipal to ta chapel a te weꞌelile ay tuti aꞌbot yil ta stekꞌlejal yilel.

¹¹ La yil a jeꞌ te chꞌulchane y koj tal ta lum te pajal sok sabana pakꞌ yilel te chukbil xchanebal te xchikine.

¹² Te ba yutil te sabana pakꞌe la yil teꞌa spisil ta jkaj chambalametik te ay chaneb yoke sok chanetik y sok mutetik.

¹³ La yaꞌiy te ay machꞌa kꞌopoje te jicha yale: —Jajchan Pedro, mila y weꞌa —xchi a yaꞌi.

¹⁴ La sjakꞌ te jPedroe: —Maꞌuk Kajwal. Te joꞌone maꞌyuk ba jweꞌoj te tut a te ma lekuk skꞌoplale sok te tut lom ilobtik sbae —xchi.

¹⁵ Kꞌoponot xan ta xchaꞌmelal y jicha albot: —Te tut lekubenix yuꞌun te Diose ma me awal te jaꞌate te ma lekuk skꞌoplale —xchi.

¹⁶ Oxmel te jicha aꞌbot yile, y te nax a te sabana pakꞌe sujt moel ta chꞌulchan.

¹⁷ Te jPedro lom yajtal yoꞌtan yuꞌun te tut xyal te tuti aꞌbot yile. Te kꞌalal laj kꞌot ta tiꞌ puerta te winketik. Te yaj-mantal te jCornelioe la sjojkꞌoyik te baꞌ ay sna te Simone.

¹⁸ Te kꞌalal laj kꞌote, tulan a sjojkꞌobeyik teme teꞌ smajanej na a te Simon te jPedro xꞌalbote.

¹⁹ Te jPedroe yipal to ta snopel a te tut xyal te tuti aꞌbot yile, te albot yuꞌun te Chꞌul Espiritue: —Ila awil, oxtul winketik ya sleat.

²⁰ Jajchan, koan bael y baan sok. Ma me tut xyal awoꞌtan, porke joꞌon jtikonej tal —xchi.

²¹ Te jPedroe ko bael y la yalbe te winketike: —Joꞌon te ya aleikone. ¿Tut a te talemex yuꞌune? —xchi.

²² Te winketike la sjakꞌik: —Jaꞌ stikonejotik tal te statal soltaro te jCornelio sbiile te toj ta winikile. Xchꞌuunej Dios, sok te ben kꞌanbil yuꞌun te juriyoetike. Jtul chꞌul ángel yuꞌun Dios a albot yuꞌun te ya stikonat ta ikꞌel, yuꞌun te ya xbaat ta snae. Yuꞌun jich me ya yaꞌibe sluwar te tut ya awalbeye —xchiik.

²³ Jich te jPedroe la yikꞌ ochel ta na, y teꞌ kꞌax ajkꞌubal yuꞌunik a. Ta yan kꞌaal, te jPedroe bajt sok te winketike, y la sjoyin bael chaꞌoxtul hermanoetik te aylan ta jtejklum Jopee.

²⁴ Ta yan to xan kꞌaal laj kꞌot te ba jtejklum Cesareae te ba yipal ta maliyel yuꞌun te jCornelioe. Sok spisil te machꞌatik ay yuꞌune y sok te yamigotak te ben skꞌanoj sba soke.

²⁵ Te kꞌalal kꞌot te jPedroe te ba nae, te jCornelioe lokꞌ sta y la skejan sba ta yok ta yakꞌel ta jkuenta.

²⁶ Pero te jPedroe la yakꞌ jajchuk, y la yalbe: —Tejkꞌan aba, yuꞌun te joꞌone winikon euk, jich tutꞌil te jaꞌate —xchi.

²⁷ Yipal to ta kꞌop sok a, och bael y teꞌ kꞌo sta bayal genteetik a.

²⁸ Te jPedroe la yaltalanbe: —Te jaꞌexe anaꞌojik sluwar te juriyoeitk te ma xjuꞌ ya sta sba sok te jyanlumetike, ni ma xjuꞌ ya xꞌochik ta sna. Pero te Diose la yaꞌbonix kil te ma xjuꞌ ya kal te ma lekuk skꞌoplal jtuluk gentee, sok ma xjuꞌ ya jpꞌaj.

²⁹ Jaꞌ yuꞌun maꞌyuk tuti kal te xkꞌo yalbelon tale, jun koꞌtan aꞌ talon. Jaꞌ yuꞌun ya me awalbikon tut yuꞌun te xkꞌo awakꞌikon tal ta ikꞌele —xchi te jPedroe.

³⁰ Te jCornelioe la sjakꞌ: —Ayix ta chanebal kꞌaal jich wan ora to, liꞌiyon a ba jnae, jkomoj jweꞌel y yipalon ta skꞌoponel Dios a las tres mal kꞌaal a, kꞌalal la kil a chiknaj jtul winik te xlemet nax skꞌuꞌ-spakꞌe.

³¹ La yalbon: “jCornelio, Dios a yaꞌibeyatix te akꞌope, y la snaꞌix te tut la apas te la akꞌeben atakꞌin yuꞌun la akoltay a te meꞌbaetike.

³² Jaꞌ yuꞌun tikona tal ta ikꞌel te Simon te jPedro te xꞌalbote, te ay ta jtejklum Jopee, te smajanejbe sna te jtul xan Simon te jkꞌaꞌutesej-nujkul te ay sna ta tiꞌmare”, yuton.

³³ Jich a jtikonat tal ta ikꞌel ta ora nax, y ben lek awoꞌtan te talatixe. Te ora to liꞌ tsobolotikix ta jpisiltik ta stojol te Diose, y ya jkꞌan ya kaꞌitik spisil te tut yalojbeyat tal te Kajwaltik te ya awalbotike.

Te tuti yal ta sna te jCornelio te jPedroe

³⁴ Te jPedroe jicha lijk yal: —Te ora to kꞌotix ta koꞌtan te batsꞌi jich te Dios pajal ya yil spisil te genteetike.

³⁵ Ta bayal nasionil lek ya yil te machꞌa ya xchꞌuunot yuꞌune sok te machꞌa lek te tut ya spase.

³⁶ Dios a stikon ta alel ta stojol te stsꞌumbal israeletik te jaꞌ ay bujtsꞌan kꞌinal ta skuenta te Jesucristoe te jaꞌ Ajwalil yuꞌun spisil te genteetike.

³⁷ Te jaꞌexe lek ya anaꞌik te tuti kꞌot ta pasel ta spisil te ba slum juriyoetike. Lijk ta slum Galilea, te kꞌalal lajix yoꞌtan ta yalbeyel skꞌoplal ichꞌjaꞌ a te Juane.

³⁸ Awaꞌiyejbeyik sluwar skꞌoplal te Jesus te talem ta jtejklum Nazaret. Te Dios a yaꞌbe spoder y la yaꞌbe yikꞌ te Chꞌul Espiritue. Y te Jesuse bayuk nax a been ta spasel te tut leke y ya slekuteslan spisil te machꞌatik ayik ta ilbajinel yuꞌun te pukuje. Jicha juꞌ yuꞌun spasel porke joyinbil yuꞌun te Diose.

³⁹ Y joꞌotik testigootik yuꞌun spisil te tuti spas te Jesus te ba estado yuꞌun Judeae y sok ta Jerusalen. Ta patil la smilik, la sjojkꞌanik ta krus.

⁴⁰ Pero te Diose la xchaꞌkuses tal ta yoxebal kꞌaal, sok la yaꞌbotik kiltike.

⁴¹ Ma spisiluk a yaꞌbe yil te jtejklume; joꞌotik nax te namey stsaojotik te Diose te jaꞌ testigootik yuꞌune. Te joꞌotike weꞌotik sok y uchꞌaotik sok te kꞌalal chaꞌkuxemix tal a te ba animaetike.

⁴² Stukel a stikonotik te ya kalbeytik skꞌoplal te jtejklume, sok te ya kakꞌ jbatik ta testigo yuꞌune. Porke Dios a yaꞌbeyix yaꞌtel ta yichꞌel jkuenta te machꞌatik kuxajtik toe sok te machꞌatik chamenikixe.

⁴³ Spisil te jꞌalwanejetike yalojbeyikix skꞌoplal te Jesuse y yalojik te machꞌa ya xchꞌuunike ya staik perdon yuꞌun te smulike —xchi te jPedroe.

Te machꞌatik ma jurioyouke aꞌbot yikꞌik te Chꞌul Espiritue

⁴⁴ Yipal to ta kꞌop a te jPedroe kꞌalal jul ta skuentaik te Chꞌul Espíritu spisil te machꞌatik la yaꞌiybeyik sluwar te tuti yale.

⁴⁵ Y te hermanoetik juriyoetik te sjoyinejik tal te jPedroe lom yan a yilik te majtan nax a pujk ta skuentaik te Chꞌul Espíritu te machꞌatik ma juriyouke,

⁴⁶ yuꞌun la yaꞌiyik te kꞌopojik ta yanetik kꞌop ta yalbeyel kolayal te Diose.

⁴⁷ Te jPedroe jich a yal: —¿Machꞌa kꞌan skom teme ya xꞌaꞌbot yichꞌik jaꞌ te genteetik to te aꞌbotix yikꞌik te Chꞌul Espiritue, jich tutꞌil te joꞌotike? —xchi.

⁴⁸ Y la yal mantal te ya xꞌakꞌtalanbot ichꞌjaꞌ ta skuenta te Jesucristoe. Ta patil la skꞌanbeyik pawor te jPedroe te ya to sjoyinik jun chebuk kꞌaale.