Hebreos 9 - Nuevo Testamento Tzeltal de Amatenango

Te templo ta balmilal y te templo ta chꞌulchan

¹ Te primero tratee ay mantal yuꞌun te ya yal te tutꞌil ay te kultoe, sok ay jun naul pakꞌ templo ta balmilale.

² Te naul pakꞌ te la yichꞌ chapele, jaꞌ nail ay te jkꞌael te Chꞌul Luwar xꞌalbote. Teꞌelan a te kandelerioetike y sok te xmexaul waj te chꞌulutesbil yuꞌun Diose.

³ Ta spat te xchꞌakꞌaelal pakꞌe teꞌey a te Batsꞌi Chꞌul Luwar xꞌalbote.

⁴ Ay jun altar teꞌa te puru oro yuꞌun ya xchikꞌot teꞌa te pome, y teꞌey a te xkaxaul trate te makbil ta oro ta sjoylejal te spate. Te ba kaxae ay jun xaru pasbil ta oro te nojel te manae, y teꞌey ekꞌa te snabateꞌ jꞌAaron te la yakꞌ slujpe, y sok te chaꞌpejch ton te tsꞌibabil a te tratee.

⁵ Ta sba te kaxae teꞌelan a te kerubinetik te jaꞌ seña te teꞌey a te Diose, te yaxintesejik ta xikꞌik te ba ya yichꞌ chaꞌyel te mulile. Pero te ora to ma jaꞌukix puersa ya kalbetik skꞌoplal te tutik to.

⁶ Te tutꞌil jich chaptalanbil, te saserdoteetike sil tiempo ya xꞌochik bael te ba primero jkꞌael te temploe, yuꞌun teꞌ ya spasik a te yaꞌtelik te kꞌayemik ta spasel ta skuenta Diose.

⁷ Pero ta xchaꞌkꞌaelale jaꞌ nax ya xꞌoch a te statal saserdotee, y yal jmel ya xꞌoch ta jun jaꞌbil. Te kꞌalal ya xꞌoche, ya skꞌan ya yichꞌ ochel xchꞌichꞌel chambalametik, yuꞌun ya yakꞌ xchꞌayil smul stukel y sok te xchꞌayil smulik te jtejklum te ma snaꞌik tutꞌil la sta te smulike.

⁸ Jaꞌ to jaꞌ ya yaꞌbotik jnaꞌtik te Chꞌul Espiritue te tutꞌil ma to jamaluk sbeelel te Batsꞌi Chꞌul Luwar te jayeb kꞌaal te yipal to ta stuuntesel ta spasel te tut skuenta Dios te ba primero jkꞌaele.

⁹ Spisil to jaꞌ jun seña yuꞌun te tiempo te ora to. Yuꞌun te smajtan Dios y sok te milbil smajtan te teꞌ ya xꞌaꞌbot a te Diose, ma xjuꞌ te jkꞌaxel libre ya xkꞌot yoꞌtanik te machꞌatik jich ya yichꞌik ta kuenta te Diose.

¹⁰ Skuenta nax xkuxlejalik ta balmilal te tut ya spasike, jich tutꞌil te tut ya sweꞌike, sok te ya yuchꞌike, y te tutik ya spok skꞌabik te skuenta nax slekuteselike. Yuꞌun jaꞌ nax tulan ay skꞌoplal ta pasel jaꞌ to te Dios ya sjelontes te tutꞌil aye.

¹¹ Pero te Cristo xtalukix, y te ora to stukel statal saserdote kuꞌuntik te skuentainej tutik ben tsaꞌam te ayix ta jkuentatike. Te templo te ba yipal ta aꞌtel jich tutꞌil saserdotee, jaꞌ ben tsaꞌam y mas ben mukꞌ yuꞌun te yane. Y ma pasbiluk ta skꞌab genteetik, sok te ma jaꞌuk ta skuenta te balmilal toe.

¹² Te Cristo ochemix bael te ba ay te Batsꞌi Chꞌul Luware. Y ma jaꞌukix ya yakꞌ te xchꞌichꞌel chiboetike y sok te beseroetike, sino ke stukel te xchꞌichꞌele. Jun nax buelta a och bael ta sbajtel kꞌinal, jich a jtatikix ta skuenta te jkoleltik sbajtel kꞌinal.

¹³ Porke te xchꞌichꞌel toroetike y te chiboetike y sok te stanil chꞌin besera te ya xchikꞌot ba altare te ya stsijtsinlanbot te machꞌatik ma lekuk skꞌoplalik yuꞌun te smule, ay yip te ya slekutesbe sbaik ta spatik naxe.

¹⁴ Pero teme jich ay to, jaꞌ to xan mas ay yip stukel te xchꞌichꞌel Cristoe. Yuꞌun ta skuenta te Espíritu te sbajtel kꞌinal aye, Cristo la yakꞌ sba ta milel ta stojol Dios jich tutꞌil milbil smajtan Dios te maꞌyuk smule. Y te xchꞌichꞌele la sakutesbotik koꞌtantik yuꞌun te kaꞌteltik te ya yikꞌotik bael ta lajele. Yuꞌun jich me ya xjuꞌ te ya kakꞌ jbajtik ta abatinel yuꞌun te kuxul Diose.

¹⁵ Jaꞌ yuꞌun, te Jesucristoe jaꞌ tejkꞌanbil ta kꞌop yuꞌun te yachꞌil tratee, yuꞌun tal yakꞌ sba ta lajel yuꞌun la staik perdon yuꞌun smulik te machꞌatik mulawike te ayik ta skuenta te nail tratee. Y yuꞌun te machꞌatik ikꞌbilik yuꞌun te Diose ya me yichꞌ smajtanik sbajtel kꞌinal te stukel yaloj jilele.

¹⁶ Teme ay machꞌa ya spas testamento kꞌop, jaꞌ to ya xkꞌot ta pasel a te ya xcham te machꞌa la spas te stestamentoe.

¹⁷ Yuꞌun te jun testamento kꞌope maꞌ to ayuk lek skꞌoplal teme kuxul to te machꞌa jich yaloje. Yan teme laje, jich ayix skꞌoplal abi.

¹⁸ Jaꞌ yuꞌun te la yichꞌ malel chꞌichꞌe kꞌalal la yichꞌ chapel te nail tratee.

¹⁹ Te jMoisese la yal spisil te mantaliletik ta stojol spisil te jtejklume; ta patil la yichꞌ tsajal tsots y sok jun skꞌab hisopo teꞌ, la smul ta xchꞌichꞌel beseroetik y sok ta xchꞌichꞌel chiboetik te kapbil sok jaꞌe, y la stsijtsinbe te sjunal mantaliletike y jich ta spisil te jtejklume.

²⁰ Jich a yaltalanbe: “Jaꞌ to jaꞌ chꞌichꞌ te ya xchap a te trate te Dios a yalbeyex ta akuentaik te jaꞌexe”, xchi.

²¹ Te jMoisese la stsijtsinbe chꞌichꞌ euk te naul pakꞌ temploe y sok spisil te tutik ya xtuun ta kultoe.

²² Jich la yal te mantaliletike te ya skꞌan ya yichꞌ lekutesel ta chꞌichꞌ ta spisile. Maꞌyuk perdon yuꞌun mulil teme maꞌyuk ya xmal chꞌichꞌe.

Te tutꞌil ya xchꞌay mulil te Cristoe

²³ Puersa la skꞌan yichꞌ malel xchꞌichꞌel chambalametik yuꞌun slekutesel te tutik slokꞌol nax te ay ta chꞌulchane. Pero te tutik ay ta chꞌulchane, puersa majtanil ya skꞌan te kꞌax jich stsaꞌamule.

²⁴ Porke te Cristoe ma och bael te ba templo te pasbil nax yuꞌun te genteetike, te jaꞌ nax slokꞌol te batsꞌi temploe, sino ke mismo ta chꞌulchan a och bael. Te ora to teꞌ ba yakꞌ sba ta ilel ta stojol Dios yuꞌun ya skꞌanbotik tal koltayel te joꞌotike.

²⁵ Y ma yuꞌunuk och bael ta yakꞌulanel milbil smajtan Dios bayal buelta, jich tutꞌil ya spas ta jujun jaꞌbil te statal saserdotee, te ya xꞌoch bael ta Batsꞌi Chꞌul Luwar ta yakꞌel te ma jaꞌuk xchꞌichꞌeluk stukele.

²⁶ Te jichuk a spase, te Cristo bayal buelta ya skꞌan xlaj desde pas tal te balmilale. Pero te batsꞌi jiche, te ora to te jaꞌix te slajibal kꞌaale, te Cristoe jun nax buelta sok ta skuenta sbajtel kꞌinal a kꞌax swokol. Stukel mismo la yakꞌ sba ta milbil smajtan Dios yuꞌun xchꞌayel mulil.

²⁷ Jich tutꞌil jun nax buelta ya xlajik te genteetike, y patil ya xtal te ichꞌel ta kꞌope,

²⁸ jich euk jun nax buelta la yakꞌ sbaix ta milbil smajtan Dios yuꞌun ta xchꞌaybeyel smul bayal genteetik. Patil ya xchiknaj tal ta xchaꞌmelal. Ma yuꞌunuk ya xtal xan ta xchꞌayel mulil, sino ke yuꞌun ya skoltay te machꞌatik ayik ta smaliyele.