Hebreos 8 - Nuevo Testamento Tzeltal de Amatenango

Te Jesuse, tejkꞌanbil ta kꞌop yuꞌun te achꞌ tratee

¹ Te tut mas tulan skꞌoplal te tut yipalotik ta yalele, jaꞌ te ay te statal saserdote kuꞌuntike te nakal ta chꞌulchan ta sbatsꞌil te ba snaktijib te Diose.

² Teꞌeyix ta aꞌtel ta saserdote te ba ay te batsꞌi mero temploe te jaꞌ pasbil yuꞌun te Kajwaltike y ma jaꞌuk pasbil yuꞌun te genteetike.

³ Spisil te statal saserdotee jaꞌ aꞌbil yaꞌtel yuꞌun ta yakꞌel te smajtan Dios y te milbil smajtane. Y jaꞌ yuꞌun te puersa te ay tut ya yaꞌbe smajtanin Dios euk te Jesucristoe.

⁴ Te liꞌuk ay ba balmilale, ni xjuꞌ ya xꞌoch ta saserdote, yuꞌun liꞌ ay saserdoteetik te ya yaꞌbe te smajtan Dios te albil yuꞌun te mantaliletik yuꞌun te jMoisese.

⁵ Pero te saserdoteetik to, jaꞌ nax yaꞌtelinejik ta skuenta te tutik slokꞌol nax y skeawil nax te tutik ay ta chꞌulchane. Y jnaꞌojtik te slokꞌol naxe, porke te kꞌalal kꞌan stejkꞌan naul pakꞌ templo te Moisese, Dios a albot yuꞌun: “Aꞌiya lek awaꞌiy ya apas spisil, chikan te tut yilel te la kakꞌ awil ta witse”, te xchie.

⁶ Pero te statal saserdote kuꞌuntike, mas ben tsaꞌam te yaꞌtel te yipal ta spasele. Jich te achꞌ trate te tejkꞌanbil ta kꞌop ta xchapele, mas ben tsaꞌam, yuꞌun ben tsaꞌam te tut yalojix te Diose.

⁷ Te tojuk a bajt te primero tratee, ma puersauk te ay xchebal tratee.

⁸ Pero te Diose kꞌax ma tsaꞌamuk a sta te genteetik abi, y la yal: “Ya me xtal skꞌaalel te ya jchap jun yachꞌil trate sok te israel y sok Juda.

⁹ Te trate to ma pajaluk sok te la jchap sok te antibo smeꞌstatike kꞌalal la jchech ta jkꞌab yuꞌun te la jlokꞌeslan tal ta slum Egiptoe. Te stukelike ma spasik kumplir te tratee, jich yuꞌun joꞌon a jileslan.

¹⁰ Te trate te ya jchap sok te Israele ta patil, jaꞌ me to: Ya me kaꞌbe ta sjolik te mantaliletik kuꞌune y ya me jtsꞌibabe ta yoꞌtanik. Joꞌon Dioson yuꞌunik ya xkꞌoon, y te stukelike jaꞌ jtejklum kuꞌun.

¹¹ Ma puersaukix te ya spꞌijutes sbaik ta juju-tul te sjoy sbaik ta genteil o te machꞌa jun smeꞌ-statike yuꞌun te ya snaꞌbeyik sba te Kajwaltike, porke spisilik ya snaꞌbikon jba, ta chꞌin ta mukꞌ.

¹² Joꞌon ya jpasbe perdon te tut ma tsaꞌamuk spasojike, ni makꞌ ya jnaꞌbeyix ta mas a te smulike”, xchi te Diose.

¹³ Te kꞌalal Dios ya yal te ay te yachꞌil tratee, yuꞌun ya yal te kꞌaꞌubix te primeroe. Y te tut kꞌaꞌubenixe y te antiboixe, chꞌin xanix ya skꞌan yuꞌun ya xchꞌay bael.