Hebreos 7 - Nuevo Testamento Tzeltal de Amatenango

Te Jesuse sok te jMelquisedeke

¹ Te jMelquisedeke jaꞌ rey yuꞌun te jtejklum Saleme, sok saserdote yuꞌun te Dios te ay ta chꞌulchane. Te kꞌalal sujt tal te jꞌAbraham te xkꞌotuk ta stsalel ta guerra te reyetike, te jMelquisedeke lokꞌ sta y la yaꞌbe bendision.

² Jich te jꞌAbrahame la yaꞌbe te jun ta slajunebal ta spisil te tuti staoj tal te xkꞌotuk ta guerrae. Te jMelquisedec sbiile jaꞌ xyal: “rey te toj ya xchapawane”, te xchie. Y te tutꞌil jaꞌ rey yuꞌun te jtejklum Saleme, te jaꞌ xyal “te bujtsꞌan kꞌinale”, te sbiile jaꞌ xyal xan: “te rey yuꞌun te bujtsꞌan kꞌinale”, te xchie.

³ Ma xchiknaj skꞌoplal te state, ni te smeꞌe, ni te antibo smeꞌ-state; ni ma xchiknaj tut ora a ayin, ni te tut ora a chame. Jaꞌ pajal kꞌoem sok te Xnichꞌan Diose, te jaꞌ saserdote yuꞌun sbajtel kꞌinale.

⁴ Te ora to, aꞌiya awaꞌiyik te tulan skꞌoplal te jMelquisedeke. Yuꞌun te antibo jmeꞌ-jtatik jꞌAbrahame la yaꞌbe te jun ta slajunebal te tutik staoj te xkꞌotuk ta stsalel te reyetike.

⁵ Jich tutꞌil ya yal te mantaliletik yuꞌun te jMoisese, te saserdoteetik te jaꞌ stsꞌumbal te jLevie ya xjuꞌ ya yichꞌ te jun ta slajunebal ya yakꞌ te jtejklume, yuꞌun te jun nax te smeꞌ-statike y jaꞌ stsꞌumbalik te jꞌAbraham ta spisilik.

⁶ Pero te jMelquisedeke, aunke ma jaꞌuk stsꞌumbal te jLevie, la yichꞌ te jun ta slajunebal te stutik yuꞌun te jꞌAbrahame, te jich albil skꞌoplal yuꞌun Dios te ya xꞌaꞌbot yuꞌune. Jich te jMlequisedeke la yaꞌbe bendision te jꞌAbrahame.

⁷ Jpisiltik ya jnaꞌtik te jaꞌ mukꞌ ay te machꞌa ya yakꞌ te bendisione, sok jaꞌ pekꞌ ay te machꞌa ya yichꞌ te bendisione.

⁸ Stalel ya xlajik te saserdoteetik yuꞌun jLevi te jaꞌ la yichꞌik te jun ta slajunebal stutik yuꞌunik te slumalike. Pero te Sjun Diose ya yalbe skꞌoplal te jMelquisedec te jich kꞌoem te tutꞌil ay machꞌa kuxul te ora to.

⁹ Ya xjuꞌ ya kaltik te saserdoteetik te jaꞌ stsꞌumbal te jLevi, te ya yichꞌ ta ora to te jun ta slajunebale, jich a yakꞌik te jun ta slajunebal ta stojol jMelquisedec te tut ora a yakꞌ te jꞌAbrahame.

¹⁰ Porke kꞌalal lokꞌ sta te jMelquisedec te jꞌAbrahame, ay to ta stiꞌbalul a te stsꞌumbal te machꞌa ma to xꞌayin ae.

¹¹ Te jtejklum israele la yichꞌik te mantaliletik ta skuenta te saserdoteetik jLevitaetik, te jaꞌ stsꞌumbalik te jꞌAarone. Pero, ma juꞌemuk yuꞌunik spasel te toj aylan te machꞌatik sigue ya xchꞌuunik te mantaliletike. Jaꞌ sluwar te chiknaj yan saserdote, te ma jaꞌukix ta stsꞌumbal te jꞌAarone, sino ke jaꞌ yuꞌun te jtijkꞌ saserdote yuꞌun te jMelquisedeke.

¹² Porke teme ya xjelon te saserdotee, jich puersa ya xjelon ekꞌa te mantaliletike.

¹³ Y te Kajwaltike, jaꞌ te machꞌa ya xꞌalbot skꞌoplal ta Sjun Dios, jaꞌ te stsꞌumbal te jtijk yuꞌun israele te maꞌyuk machꞌa a aꞌtej ta saserdoteile.

¹⁴ Porke lek naꞌbil te jaꞌ tal ta jtijkꞌ stsꞌumbal Juda te Kajwaltike, y te jMoisese ni maꞌyuk a yal teme ay ya yichꞌ yaꞌtel ta saserdote jaꞌ jtijkꞌ abi.

¹⁵ Y te jich ay to, mas ya xchiknaj ta aꞌiyel te jaꞌ pajal sok te jMelquisedek te achꞌ saserdotee.

¹⁶ Yuꞌun ma jaꞌuk a yichꞌ yaꞌtel ta saserdoteil yuꞌun te tutꞌil tsꞌibabil skꞌoplal sok stsꞌumbal ta mantaliletike. Jaꞌ a yichꞌ yaꞌtel yuꞌun te ay spoder stukel te stalel kuxul te ma xlaje.

¹⁷ Porke jaꞌ to jaꞌ te tutꞌ ay skꞌoplal yuꞌun Dios stukele: “Jaꞌat te saserdoteat yuꞌun sbajtel kꞌinale, jich mismo te tutꞌil jtijkꞌ saserdote ay sok te jMelquisedeke”, xchi me.

¹⁸ Jich yuꞌun te mantaliletik te nameyixe, lajix jil skꞌoplal porke maꞌyuk yip y maꞌ tuun.

¹⁹ Yuꞌun maꞌyuk machꞌa tojob yuꞌun te mantaliletik yuꞌun jMoisese. Jich chiknaj yan te ben tsaꞌam ay spuersa koꞌtantik yuꞌune, te ya xtijilajotik ta stojol Dios yuꞌune.

²⁰ Kꞌalal aꞌbot yaꞌtel te Jesuse, te Dios la yalbe skꞌoplal ta jamal. Pero kꞌalal la yichꞌ yaꞌtelik te yan saserdoteetike, maꞌyuk tut la yichꞌ alel ta jamal yuꞌun.

²¹ Pero te tutꞌ ay te Kajwaltike, ay a albot skꞌoplal stukel, yuꞌun ta Sjun Dios ya xꞌalbot skꞌoplal: “Te Kajwaltike la yal ta jamal y ma yuꞌunuk ya xchaꞌnaulan: ‘Jaꞌat saserdoteat yuꞌun sbajtel kꞌinal, te jaꞌat stsꞌumbalat te jMelquisedeke’, xchi”, xchi me.

²² Jaꞌ yuꞌun te Jesuse stukel ya stejkꞌan sba yuꞌun te achꞌ trate te kꞌax lek tutꞌil te trate te nailtoe.

²³ Lom bayalik te yanetik xan saserdotee, pero juju-tul lajik bael.

²⁴ Pero te Jesus, te ma xcham stukele, ma xjelon te yaꞌtel ta saserdoteile.

²⁵ Jaꞌ yuꞌun ya xjuꞌ ya xkoltawan sbajtel kꞌinal yuꞌun te machꞌatik ya xtijilajik ta stojol Dios ta skuentae. Yuꞌun kuxul sbajtel kꞌinal, yuꞌun ya skꞌanulanbe Dios ta skuentaik.

²⁶ Jich yuꞌun te Jesuse jaꞌ mismo te statal saserdote te ya xtuun kuꞌuntike. Jaꞌ stukel te lek ayix ta stojol Dios, maꞌyuk smul, y makꞌ sleulanix smul. Pitil ay sok te jmulawiletike, y akꞌotix ta sba te chꞌulchane.

²⁷ Ma jichuk te tutꞌil yanetik statal saserdoteetike te puersa ya smilik chambalam te ya yakꞌ ta jujun kꞌaale, jaꞌ nail yuꞌun smul stukele y te nax a yuꞌun te smulik te jtejklume. Porke te Jesuse jmel nax te la yakꞌ sba ta milbil smajtan Dios yuꞌun sbajtel kꞌinale, te kꞌalal stukel mismo a yakꞌ sbae.

²⁸ Te mantaliletik yuꞌun te jMoisese ya yaꞌbe yaꞌtel ta statal saserdote te gente te maꞌyuk yipike. Pero te tuti yal ta jamal te Diose, te la spas ta patil yuꞌun te mantaliletike, la yaꞌbe yaꞌtel ta statal saserdote te Xnichꞌane, te tsꞌakal ya xjuꞌ yuꞌun spasel te yaꞌtele ta sbajtel kꞌinal.