Hebreos 6 - Nuevo Testamento Tzeltal de Amatenango

¹ Jich yuꞌun sigueukotik bael jaꞌ to te mukꞌul gente ya xkꞌootike. Ya skꞌan te ya xkꞌaxotik bael a te tut primero nojpesel yuꞌun te Cristoe. Ma me yauk xchaꞌsujtotik xan ta snopilanel te tutik ay ta slijkibale: jich tutꞌil te ya sujtes koꞌtantik te tut a jpastik te ya yakꞌotik bael ta lajele, o jich tutꞌil te ya skꞌan chꞌuunel te Diose,

² sok te nojpesel yuꞌun skꞌoplal ichꞌjaꞌe, sok te kajanel kꞌabal ta sjol te hermanoetike, sok te chaꞌkuxel yuꞌun te animaetike, sok te kastigo sbajtel kꞌinale.

³ Jaꞌ to jaꞌ ya skꞌan xkꞌaxotik bael a, teme jich ya skꞌan te Diose.

⁴ Porke te machꞌatik jmel nax a yichꞌik te sakil kꞌinale, y tsaꞌam a yaꞌiyik te majtanil yuꞌun te Diose, y la yichꞌikix te Chꞌul Espiritue,

⁵ y tsaꞌam a yaꞌiyikix te tsaꞌam skꞌoplal te Diose, y sok yaꞌiyikix te ay spoder Dios ta skuenta te yachꞌil balmilale

⁶ Teme chaꞌyalik xane, ma xjuꞌ te ya sujtik xan ta stojol Diose. Porke jaꞌik mismo ya yakꞌik xan ta jijpanel ta krus te Xnichꞌan Diose, y sok ya yakꞌik xan ta ikꞌtinel ta sitil komon.

⁷ Jaꞌ pajal sok te lum te ya yuchꞌ te jaꞌale te ya xko ta sbae, teme ya yakꞌ jun kosecha te ya xtuun yuꞌun te machꞌatik ya xꞌaꞌteje, ya staik bendision yuꞌun te Dios te lume.

⁸ Pero teme chꞌix a yakꞌ o wamale, ni ma baleuk te lume. Jich ma lekuk skꞌoplal yuꞌun te Diose, y ta slajibal ya yichꞌ chikꞌel.

Jun koꞌtantik yuꞌun te tut ya jmalitike

⁹ Pero aunke jich ya kaltik to, kermanotak te jkꞌanojexe, seguro ayotik te lek ayex ta skuenta Dios sok te yipalex ta beel ta sbeelel kolele.

¹⁰ Porke te Diose ben toj yoꞌtan y ma xchꞌay ta yoꞌtan te tut ya apasik te jaꞌexe, y te slekil awoꞌtanik te la awakꞌik ta ilel te la akoltayik te hermanoetik te xchꞌuunejike, jich tutꞌil te yipalex ta spasele.

¹¹ Pero jaꞌ ya jkꞌantik te ta juju-tulex te sigue ya awakꞌik ta ilel te jun awoꞌtanike jaꞌ to ta slajibal kꞌaal, yuꞌun tsꞌakal me ya ataik te tut yipalex ta smaliyele.

¹² Ma jkꞌantik te ya xchꞌajubexe. Jaꞌ ya jkꞌantik te ya atsꞌakliyik te machꞌatik jun yoꞌtanik ta xchꞌuunel te Diose, y te jun yoꞌtan ya smaliyik te tut ya xꞌaꞌbot yuꞌun Dios te sjapoj jilele.

¹³ Te kꞌalal Dios jich a xchap ta stojol te jꞌAbrahame, stukel mismo a yal ta jamal, porke maꞌyuk yan machꞌa mukꞌ xan yuꞌun stukel te ya yal ta jamale.

¹⁴ Y la yal: “Joꞌon ya kaꞌbeyat bayal bendision y ya kakꞌ pꞌoluk bayal te atsꞌumbale”, xchi.

¹⁵ Te jAbrahame jun yoꞌtan a smaliy, y la yichꞌ te tut albil yuꞌun te Diose.

¹⁶ Te kꞌalal ay tut tulan skꞌoplal ya yalik te genteetike, jaꞌ ya staik ta alel te machꞌa mukꞌ xan ke te yuꞌunike, skuenta yuꞌun batsꞌi jich ya xkꞌot te tut ya yalike.

¹⁷ Jaꞌ yuꞌun, Dios la yalbe ta jamal te machꞌatik ya yichꞌik te tut yaloje, te ma xchꞌay ta yoꞌtan te tut yaloj ya yakꞌe. Jaꞌ yuꞌun la stejkꞌan sba ta yalel te tut ya yakꞌe.

¹⁸ Jich ay xchaꞌkajal te tutik te ma xjuꞌ xyaneje, yuꞌun maꞌ xjuꞌ ya sle lot te Diose. Jich la kichꞌtikix yip koꞌtantik te joꞌotik te la jlejtik koltayel yuꞌun Diose, y smukꞌulinej koꞌtantik te ya jmalitik te tut ya yakꞌbotike.

¹⁹ Jaꞌ te smukꞌul koꞌtantik te ya yaꞌbotik te jun koꞌtantik sok te seguro ay te jchꞌuleltike. Jaꞌ pajal sok te ankla takꞌin te ya yaꞌbe yip a te barkoe. Jaꞌ te smukꞌul koꞌtantik te tulan snitojotik te ba ay te pakꞌ te makbil a te templo ta chꞌulchane,

²⁰ te ba och bael Jesus yuꞌun ya sjambotik a te bee. Jicha kꞌot stukel tutꞌil statal saserdote yuꞌun sbajtel kꞌinale, jich tutꞌil te jtijkꞌ saserdote ay sok te jMelquisedeke.