Hebreos 5 - Nuevo Testamento Tzeltal de Amatenango

¹ Spisil te statal saserdote te ya xtꞌujot lokꞌel ta yolil te gentee, aꞌbot yaꞌtel yuꞌun ya xkꞌopoj ta stojol Dios, sok yuꞌun ya yaꞌbe smajtan Dios y sok te milbil smajtan Dios yuꞌun muliletike.

² Te saserdote ya xjuꞌ ya xkꞌuxutay te machꞌatik ma snaꞌik kꞌinal y sok te machꞌatik chꞌayemike, yuꞌun pajal maꞌyuk yip yoꞌtan sok.

³ Y ta skaj te maꞌyuk spuersae, ya skꞌan ya yakꞌ milbil smajtan Dios yuꞌun te smule sok euk te muliletik yuꞌun te jtejklume.

⁴ Ni jtuluk ya xjuꞌ te stukel ya yakꞌ sba ta statal saserdotee, sino ke jaꞌ te Dios te machꞌa ya yikꞌ y te ya yakꞌ ta aꞌtele, jich tutꞌil tꞌujot te jꞌAarone.

⁵ Jich mismo te Cristoe, maꞌ sle akꞌel ta jkuenta ta stukel nax te och ta statal saserdotee. Sino ke jich a albot yuꞌun Dios: “Jaꞌat te Jnichꞌanate; la kakꞌ ta ilel te ora to te joꞌon Ataton”, xchi me.

⁶ Y jich a yal xan te Sjun Diose: “Jaꞌat te saserdoteat sbajtel kꞌinale, te jaꞌ te jtijk saserdote ayat sok te jMelquisedec”, xchi me.

⁷ Te kꞌalal ay to ta balmilal a te Cristoe, tulan a kꞌopoj y bayal a okꞌ ta skꞌoponel y ta yalulanbeyel te Diose, te yauk xjuꞌ ya xkoltayot ta spoder yuꞌun te lajele. Y te tutꞌil xchꞌuunej mantale, Dios a aibot yuꞌun.

⁸ Jich yuꞌun te Cristoe, manchuk teme Xnichꞌan Diose, sok swokol a snop xchꞌuunel mantal.

⁹ Te tutꞌil lek a juꞌ yuꞌun spasele, chiknaj ta skuenta te kolel sbajtel kꞌinal yuꞌun spisil te machꞌatik ya xchꞌuunike.

¹⁰ Y Dios a aꞌbot yaꞌtel ta statal saserdote, jich mismo tutꞌil te jtijk saserdote jMelquisedec.

Makꞌ me xlokꞌotik ta chꞌuunel te Diose

¹¹ Ay bayal tut ya skꞌan kaltik yuꞌun te kꞌop to, pero lom wokol ta alel, porke te jaꞌexe chꞌajubenexix, ma xkꞌot ta awoꞌtanik.

¹² Te tutꞌil jalix kꞌaal achꞌuunejik te jaꞌexe, ya skꞌan te jaꞌukexix ya snojpeswanexe. Pero puersa ya to akꞌanik albeyel ta achꞌ te tutik ma tulanuk te nojpesel yuꞌun Diose. Yuꞌun jich ayexix te maꞌyuk a puersaike, ma xjuꞌix awuꞌunik sweꞌel te tulan weꞌelile. Ya to skꞌan ya awuchꞌik te leche.

¹³ Y te machꞌatik jaꞌ ya yuchꞌik te leche, jaꞌ pajal sok te untik ya to xchuꞌune. Ma to kꞌoemuk ta yoꞌtanik te tut toj ta pasele.

¹⁴ Te tulan weꞌelile jaꞌ yuꞌun te mukꞌul gentee, jaꞌ te machꞌatik ya snaꞌik tutꞌil aye. Porke kꞌayemikix ta snaꞌel te tut lek sok te tut ma lekuke.