Hebreos 4 - Nuevo Testamento Tzeltal de Amatenango

¹ Jaꞌ yuꞌun, kuidado me ya skꞌan xꞌanotik te tutꞌil ay to ta jkuentatik te sjapoj Dios te ya xjuꞌ xꞌochotik te ba luwar te kuxo-oꞌtane. Jaꞌ me ma lek teme ay jtuluk te jaꞌex te ma xkꞌo ataike.

² Porke jich euk te joꞌotike la yalbelotik te skꞌoplal te kolele, jich tutꞌil albilik te antibo jmeꞌ-jtatike. Pero te stukelike maꞌ tuun yuꞌunik te la yaꞌiyike, porke maꞌ xchꞌuunik te tutꞌ ay skꞌoplale.

³ Pero te joꞌotike, te jchꞌuunejtikixe, ya xꞌochotik bael te ba luwar yuꞌun kuxo-oꞌtan te yaloj jilel skꞌoplal te Diose, te la yale: “Jaꞌ yuꞌun, ilinon yuꞌunik. Jich a kal te makꞌ xꞌochik bael te ba luwar yuꞌun kuxo-oꞌtan kuꞌune”, xchi me. Pero te Diose juꞌemix te yaꞌtele jaꞌ to te kꞌalal la spas te balmilale.

⁴ Yuꞌun ay ba ya yal te Sjun Diose te skꞌoplal te sjukebal kꞌaale: “Dios la xkux yoꞌtan yuꞌun ta spisil te yaꞌtel ta sjukebal kꞌaale” te xchie.

⁵ Y ya yal xan te Sjun Diose: “Makꞌ xꞌochik bael te ba luwar yuꞌun kuxo-oꞌtan kuꞌune”, xchi me.

⁶ Ta skaj te maꞌ xchꞌuunike, ma ochik bael te machꞌatik nail a yaꞌiyik te skꞌoplal kolele. Te ora to ay to jtul cheb te ya skꞌan xꞌochik te ba luwar yuꞌun kuxo-oꞌtane.

⁷ Jaꞌ yuꞌun, te Diose la slebe xan jun skꞌaalel, jaꞌ te ora to. Bayal kꞌaal ta patil, Dios la yalbe xan skꞌoplal te jun skꞌaalel te ora to. Jaꞌ la yal ta skuenta David ta Sjun Dios te la kaltikixe: “Te ora to teme ya awaꞌiyik te jaꞌex te tut ya yal te Diose, ma me atulantes te awoꞌtanike”, xchi me.

⁸ Te juꞌuk yuꞌun te Josue te la yakꞌ ochel te ba luwar yuꞌun kuxo-oꞌtan te israeletike, te Diose ma slebey yan skꞌaalel te jichuke.

⁹ Jaꞌ yuꞌun ay to jilem jun kuxo-oꞌtan yuꞌun te jtejklum yuꞌun Diose.

¹⁰ Porke te machꞌa ya xꞌoch bael te ba luwar yuꞌun kuxo-oꞌtan yuꞌun te Diose, ya xkux yoꞌtan yuꞌun te yaꞌtele, jich tutꞌil te Dios la xkux yoꞌtan yuꞌun te yaꞌtele.

¹¹ Jaꞌ yuꞌun ya skꞌan kakꞌtik puersa te ya xꞌochotik te ba luwar yuꞌun kuxo-oꞌtane. Yuꞌun ma me machꞌa sigueuk ya yakꞌ ta ilel jich tutꞌil la spasik te machꞌatik maꞌ xchꞌuunike.

¹² Porke te skꞌop Diose, kuxul y ay spoder. Jaꞌ mas ay ye ke te puñal te chaꞌmejch yee. Najt ya xꞌoch kꞌalal ta oꞌtanil y sok ta chꞌulelal, jaꞌ to te ba kꞌalal kuxul te gentee, y ya xchiknates ta jamal te pensaretik y te tutik ya snop te oꞌtanile.

¹³ Ni maꞌyuk tut a te spasoj Dios te ya xjuꞌ ya snakꞌ sba ta stojole; spisil jamal ta ilel ya yil ta sit stukel te machꞌa ya yichꞌbotik jkuenta te kaꞌteltike.

Te Jesuse stukel te mukꞌul saserdotee

¹⁴ Te Jesuse, te Xnichꞌan Diose, jaꞌ mukꞌul saserdote kuꞌuntik te ochemix bael ta chꞌulchane. Jaꞌ yuꞌun ya skꞌan sigue jun koꞌtantik ya jchꞌuuntik te tut ya kal ta jtiꞌtike.

¹⁵ Yuꞌun te mukꞌul saserdote kuꞌuntike ya xjuꞌ te ya snaꞌbotik yoꞌolil jbajtik te maꞌyuk kiptike, porke jich a kꞌax yuꞌun prewa euk jich tutꞌil te joꞌotike. Pero te stukele maꞌyuk a mulaw.

¹⁶ Jaꞌ yuꞌun junuk koꞌtantik tijilajukotik bael te ba ay snaktajib te Dios kuꞌuntik te lek skꞌanojotike, yuꞌun ya me yakꞌ xkꞌuxul yoꞌtan ta jtojoltik. Ta slekil yoꞌtan ya me skoltayotik te tut ora ya jkꞌantik koltayele.