Hebreos 3 - Nuevo Testamento Tzeltal de Amatenango

Te Jesuse mas mukꞌ skꞌoplal te tutꞌil te jMoisese

¹ Jaꞌ yuꞌun kermanotak, te jaꞌex te ayexix ta jtejklum yuꞌun te Diose te la yikꞌexix Dios te yuꞌun ya xkꞌoexe, jaꞌ me xꞌanaꞌ ta awoꞌtanik te Cristo Jesuse, te jaꞌ apostol sok mukꞌul saserdote te jchꞌuunejtike.

² Yuꞌun te Jesuse jun yoꞌtan ta stojol Dios te jich a aꞌbot spas te aꞌtel to, jich tutꞌil te jMoises te jun yoꞌtan a aꞌtej ta spisil te ba sna te Diose.

³ Pero te Jesuse ya skꞌan te mas ya xꞌakꞌot ta kuenta ke te jMoisese, jich tutꞌil te jpas-nae mas ya skꞌan xꞌakꞌot ta jkuenta ke te nae.

⁴ Spisil te naetike puersa ay machꞌa a spas, pero te Diose stukel a spas spisil te tutik aye.

⁵ Jich yuꞌun, te jMoisese, jich tutꞌil aj-aꞌtelil te jun yoꞌtan yuꞌun spisil te ba sna te Diose. Y te aꞌtel yuꞌune, jaꞌ te ya yalbe skꞌoplal te tutik ya xba yal ta patil te Diose.

⁶ Yan te Cristo te Xnichꞌan Diose, jun yoꞌtan skuentainej spisil te sna Diose, jaꞌ te joꞌotike, teme jmel nax jun koꞌtantik kꞌalal ta slajibal kꞌaale, te ben tsaꞌam yipalotik ta smaliyele.

Te kuxo-oꞌtan yuꞌun te jtejklum yuꞌun Diose

⁷ Jaꞌ yuꞌun, jich tutꞌil te ya yal te Chꞌul Espíritu ta Sjun Diose: “Te ora to teme ya awaꞌiyik te jaꞌex te tut ya yal te Diose,

⁸ ma me atulantes te awoꞌtanike, jich tutꞌil te yanetik te la skontrainonik y la spasikon ta prewa ta jochol tꞌantꞌan luwar.

⁹ Teꞌ spasikon ta prewa a te antibo ameꞌ-atatik te jaꞌexe, manchuk me la yilik te tutik aꞌtel a jpas te ay kuarenta jaꞌbile.

¹⁰ Jaꞌ yuꞌun ma tsaꞌamuk a kil te jkaj gente abi, y la kal: ‘Sil tiempo ayikuk bael ta chꞌayel sok te yoꞌtanike, y ma skꞌanik ya stambikon te jbee’, xchion.

¹¹ Jaꞌ yuꞌun ilinon, y la kal te makꞌ xꞌochik te ba luwar te kuxo-oꞌtan kuꞌune”, xchi te Chꞌul Espiritue.

¹² Kermanotak, ila me abaik te ma me ayuk jtuluk te jaꞌex te ma lekuk awoꞌtanike yuꞌun te ya apit abaik ta stojol te kuxul Diose sok te ma xꞌachꞌuunike.

¹³ Jaꞌ ya skꞌan yoꞌtik to talel bael xꞌatsits abaik ta jujun kꞌaale, skuenta yuꞌun ni jtuluk a te jaꞌex te ya ataik loꞌlayel yuꞌun te mulile te ya yakꞌ xtulanub te awoꞌtanike.

¹⁴ Porke yuꞌun te ya xjuꞌ te jun nax ya xkꞌootik sok te Cristoe, jaꞌ ya skꞌan te jun koꞌtantik kꞌalal ta slajibal kꞌaal jich tutꞌil te smukꞌul koꞌtantik ay kuꞌuntik ta slijkꞌibale.

¹⁵ Jich tutꞌil ya yal te Diose: “Te ora to teme ya awaꞌiyik te jaꞌex te tut ya yal te Diose, ma me atulantes te awoꞌtanike jich tutꞌil te yanetik te la skontrainik te Diose”, xchi me.

¹⁶ ¿Machꞌatik a te la skontrainik Dios ta patil te yaꞌiyejbeyik skꞌop te Diose? Jaꞌ spisil te machꞌatik te ikꞌtalanot tal lokꞌel yuꞌun jMoises ta slum Egiptoe.

¹⁷ ¿Sok machꞌatik te kuarenta jaꞌbil ilinem Dios ta stojolike? Jaꞌ te machꞌatik mulawik sok te laj chamik jilel ta jochol tꞌantꞌan luware.

¹⁸ ¿Y machꞌatik a albot skꞌoplal yuꞌun Dios te makꞌ xꞌochik te ba ay luwar te kuxo-oꞌtan yuꞌune? Jaꞌ te machꞌatik maꞌ xchꞌuunbeyik smantale.

¹⁹ Y teꞌ ya kiltik a te maꞌ spas a ochik baele porke maꞌ xchꞌuunik.