Hebreos 2 - Nuevo Testamento Tzeltal de Amatenango

Tulan skꞌoplal te kolele

¹ Jaꞌ yuꞌun ya me skꞌan ya kakꞌtik ta koꞌtantik ta lek te skꞌop Dios kaꞌiyejtikixe, yuꞌun ma me yauk jpit jbajtik bael te ba sbeelele.

² Te nameye tulan skꞌoplal te mantaliletik te Dios a yakꞌ ta skuenta te angeletike, y te machꞌatik mulawike y sok te machꞌatik maꞌ xchꞌuunik mantale akꞌtalanbot kastigo chikan te smulike.

³ ¿Jaꞌ xan tutꞌil kꞌan kolukotik te joꞌotike, teme ixtaꞌ nax kuꞌuntik te kolel te lom mukꞌe? Yuꞌun jaꞌ mismo te Kajwaltik te stukel nail a yal skꞌoplal te kolel to. Ta patil te machꞌatik la yaꞌiyike la yalbelotik euk te joꞌotike te tutꞌil batsꞌi jich te skꞌoplale.

⁴ Sok jaꞌ snujpꞌ kꞌot te skꞌopik te señailetik te ben tsaꞌam y bayal milagroetik te Dios a yakꞌ ta pasel. Sok ta skuenta te Chꞌul Espiritue te la yaꞌbotik jmajtꞌantik ta skajal skaje, chikan te tutꞌil ya skꞌan yoꞌtane.

Te Jesucristoe pajal a kꞌot sok te yijtsꞌinabe

⁵ Dios maꞌ yakꞌix ta kuentainel yuꞌun angeletik te yachꞌil balmilal ya xchiknaj ta patil te jaꞌ yipalotik ta yalele.

⁶ Pero ay machꞌa la yal te tsꞌibabil jilel ta Sjun te Diose: “¿Tut a te winike? ¿Tuꞌun te ya anaꞌulan sil tiempoe? ¿Tut yuꞌun te ay yajtal awoꞌtan yuꞌun te yal-xnichꞌan winketike?

⁷ Cheꞌoxeb nax kꞌaal te chꞌin la awakꞌ ke te angeletike, pero la awaꞌbey slekilal y sok akꞌel ta jkuenta, y la awaꞌbey ta skuenta te yaꞌtel akꞌabe.

⁸ Spisil la awaꞌbey spas ta mantal”, xchi me. Jich yuꞌun te la yaꞌbey spas ta mantal spisil aye, maꞌyuk tut maꞌ yakꞌ Dios te ma xchꞌuunbot mantal ta skuentae. Pero ma to ya kiltik teme spisil ya xchꞌuunbot smantal yuꞌune.

⁹ Pero ya kiltik te Jesus, jaꞌ te machꞌa cheꞌoxeb nax kꞌaal te Dios chꞌin a yakꞌ ke te angeletike. Te Diose, ta skuenta xkꞌuxul yoꞌtan, la skꞌan te cham Jesus yuꞌun ta spisil genteetik. Te ora to, ta skaj te kꞌax swokol ta milele, aꞌbilix te slekilal sok jich ya xꞌakꞌot ta jkuentae.

¹⁰ Spisil te tutik aye jaꞌ yuꞌun te Diose y jaꞌ ta skuenta te la yichꞌ pasele. Jaꞌ ya skꞌan te spisil yuntikil te ay sparteik te ba ay te slekilale. Jaꞌ yuꞌun, ta skuenta swokol te Jesuse, Dios la xchap te jaꞌ ben tsaꞌam jKoltawanej ya xkꞌot yuꞌunik te Jesucristoe.

¹¹ Porke te machꞌa ya xlekutesote, junik nax Statik ta spisilik. Jaꞌ sluwar te jich aye, te Xnichꞌan Diose ma xkꞌexaw yuꞌun te yijtsꞌinabe.

¹² Jich tutꞌil ya yal te Sjun Diose: “Ya me kal akꞌoplal ta skuenta te kijtsꞌinabe, y ya jkꞌayojinbeyat kayojetik ta skuenta te kongregasione”, xchi me.

¹³ Y la yal xan: “Ta skuenta Dios stukel ya me kakꞌ smukꞌul koꞌtan”, te xchie. Y ya yal xan: “Liꞌ me ayon sok te yuntikil la yaꞌbon te Diose”, xchi me.

¹⁴ Jich tutꞌil jun nax stiꞌbalul te yuntikil te jwol nae, jich euk te Jesuse la yichꞌ stiꞌbalul y xchꞌichꞌel jich tutꞌi gente, yuꞌun ta skuenta te ya xchame jich ya slajinbey spoder te machꞌa ya xmilawane, jaꞌ bi, jaꞌ te pukuje.

¹⁵ Jich a yakꞌix ta libre spisil te machꞌatik pajal kꞌoemik sok mosoetik ta skaj te xiꞌojik milel te jayeꞌ kꞌaal kuxulike.

¹⁶ Yuꞌun ma jaꞌuk a tal yuꞌun te ya skoltay te angeletike, sino ke jaꞌ a tal skoltay te machꞌatik stsꞌumbal te jꞌAbrahame.

¹⁷ Y jaꞌ yuꞌun te puersa pajal a kꞌot sok spisil te yijtsꞌinabe. Jich statal saserdote kꞌot ta stojol Dios te jun yoꞌtan y lek yoꞌtane, yuꞌun jich la xchꞌaybe smulik te genteetike.

¹⁸ Stukel mismo a kꞌax swokol y pasot ta prewa, jaꞌ yuꞌun ta ora to ya xjuꞌ ya skoltay te machꞌatik jich ya spasot ta prewae.