Hebreos 13 - Nuevo Testamento Tzeltal de Amatenango

Tutꞌil lek ya yilotik te Diose

¹ Ma me akom abaik te kꞌux ya awil abaik ta juju-tul, jich tutꞌil te machꞌatik jun nax smeꞌ-statike.

² Ma me achꞌay ta awoꞌtanik te lek ya awikꞌ ochel ta anaik te machꞌatik ya xkꞌot ta anaike. Yuꞌun ay machꞌatik maꞌ snaꞌik la yikꞌ ta snaik te angeletike.

³ Naꞌaik me te machꞌatik ayik ta prexoe. Jichuk me kꞌoem ta awoꞌtanik te ayex ta prexo soke. Naꞌaik me te machꞌatik ayik ta ilbajinele. Jichuk me ta awoꞌtanik te ya xkꞌax awokolik soke.

⁴ Ta apisilik akꞌaik me ta jkuenta te nujpunele. Y ma me akapik ta mulil te jun nax awayibike, porke Dios ya yichꞌ jkuenta te machꞌatik ya xꞌantsiweje y te machꞌatik ya xkremiweje.

⁵ Ma me jaꞌuk xbajt ta awoꞌtanik te takꞌine; junuk me awoꞌtanik te tut ay awuꞌunike. Porke jich yaloj te Diose: “Ma me yauk jilesat ni yauk jchꞌojat jilel”, xchi me.

⁶ Jich ya spas ya kaltik sok yip koꞌtantik: “Jaꞌ me ya skoltayon te Kajwale; makꞌ ya xiꞌon yuꞌun te tut ya spasbon te gentee”, xchiotik yuꞌun.

⁷ Naꞌaik me te machꞌatik a aꞌtejik ta atojolik sok te la yalbeyex te skꞌop Diose. Naꞌaik te tutꞌil juꞌ yuꞌunik sok te xkuxlejalike, sok jich me xꞌanopik te tutꞌil la yakꞌ xchꞌuunel yoꞌtanike.

⁸ Te Jesucristoe stalel mismo te wojeye, y te ora to, y ta sbajtel kꞌinal.

⁹ Ma me awakꞌ abaik ta loꞌlayel yuꞌun yanetik nojpesel te ma jaꞌuk yuꞌun te Diose. Jaꞌ lek te ayuk spuersa te koꞌtantike ta skuenta xkꞌuxul yoꞌtan te Diose. Ma me jaꞌuk nax xbajt ta awoꞌtanik te mantal yuꞌun te tutik weꞌeliletike, yuꞌun maꞌyuk tutiꞌ staik a te machꞌa jich ay ta pasele.

¹⁰ Te joꞌotike ay kuꞌuntik jun milbil majtanil te ma xjuꞌ ya sweꞌik te saserdoteetike yuꞌun te antibo naul pakꞌ temploe.

¹¹ Yuꞌun te statal saserdotee ya yichꞌ bael xchꞌichꞌel chanbalametik te ba naul pakꞌ temploe jachik tutꞌil smajtan Dios yuꞌun te ya xchꞌay mulile. Pero te stiꞌbalul chanbalametik abi ya xba chikꞌek ta stiꞌil jtejklum.

¹² Jich euk te Jesuse kꞌax swokol ta milel ta ba stiꞌil jtejklume, yuꞌun ya xchꞌulutes a te machꞌatik yuꞌune ta skuenta te xchꞌichꞌele.

¹³ Konik euk sok te Jesuse ta stiꞌil te jtejklume, y kꞌaxuk jwokoltik jich mismo te ma akꞌot ta jkuenta sok te kꞌax swokol stukele.

¹⁴ Yuꞌun te liꞌ ba balmilal to maꞌyuk jlumaltik te jmel nax ay ta sbajtel kꞌinale, sino ke konikik ta sleel te mukꞌul jtejklum ta patile.

¹⁵ Jaꞌ yuꞌun ya skꞌan jkꞌayojintik sil tiempo te Dios ta skuenta te Jesucristoe. Te kꞌayoj to jaꞌ smajtan Dios ya skꞌan kaꞌbetik. ¡A me jkꞌayojintik sok jtiꞌtik!

¹⁶ Ma me achꞌay ta awoꞌtanik ta spasel te tut leke sok ta spukel ta yan te tut ay awuꞌunike. Porke jaꞌ to, jaꞌ chikꞌbil majtaniletik te lek ya yil te Diose.

¹⁷ Chꞌuunbeyaik me smantal te machꞌatik ya xꞌaꞌtejik ta atojolike y akꞌaik me ta jkuenta. Porke te stukelike jaꞌ ya skanantaybeyex te achꞌulelike, sok snaꞌojik te puersa ya xkꞌo yakꞌik jkuenta ta stojol te Diose. Aꞌbeya sbujtsꞌ yoꞌtanik ta spasel te aꞌtele, y ma me awaꞌbeyik yajtal yoꞌtanik. Yuꞌun teme ya awaꞌbe yajtal yoꞌtanike, ni maꞌyuk tut ya xlokꞌ awuꞌunik a.

¹⁸ Kꞌoponbotik me Dios. Seguro ayotik te jun koꞌtantik ta stojol Dios, sok jaꞌ ya jkꞌantik te lek ya jpastik spisile.

¹⁹ Uniko ya jkꞌanbeyex te ya akꞌoponik Dios yuꞌun teme jich ya skꞌan Dios te ya sujton tal ta ora te ba ayexe.

Bendision y spajtil-oꞌtanil ta slajibal

²⁰ Te Dios yuꞌun butsꞌan kꞌinal la chaꞌkuxes tal te ba animaetik te Kajwaltik Jesuse, te stukel mukꞌul jkanan yuꞌun te karneraetike, ta skuenta xchꞌichꞌel te la xchap a te trate sbajtel kꞌinal aye.

²¹ Jaꞌ me ya stojutesex ta spasel spisil te tut lek ya apasike, jich tutꞌil ya skꞌan yoꞌtan stukele. Sok jaꞌ a spasbotik te tut ya skꞌan stukele, ta skuenta te Jesucristoe. ¡Ay slekilal sbajtel kꞌinal stukel te Cristoe! Jichuk.

²² Kermanotak, awokolikuk junuk awoꞌtan xꞌawichꞌik te jaypꞌal kꞌopetik te atsitselik te la jtsꞌibabeyexe.

²³ Ay tut ya kalbeyex: Kolemix te kermanotik jTimoteoe. Teme ya xjul ta orae, ya me joyin tal te kꞌalal ya xtal kilexe.

²⁴ Albikon xkoltanuk ta spisil te machꞌatik yipalik ta aꞌtel ta atojolike y ta spisil te machꞌatik jtejklumix yuꞌun te Diose. Te machꞌatik ayik ta Italia ya yalbeyex xkoltanuk euk.

²⁵ Te Diose a me yaꞌbeyex te slekil ta apisilik te jaꞌexe. Jichuk.