Hebreos 12 - Nuevo Testamento Tzeltal de Amatenango

Ya me jtojlitik ta kꞌeluyel te Jesuse

¹ Jaꞌ yuꞌun, te joꞌotike joybilotik ta bayal gente te machꞌatik ya yakꞌix ta ilel te xchꞌuunejik Diose. A me jilestik ta xujktik spisil te tut a te ya smakotike y sok te mulil te ya sjoyotike. Y ya me jpastik puersa ta animal te ya xkꞌoj jtajtik te tut ay ta jtojoltike.

² Ya me jtojlitik ta kꞌeluyel te Jesuse, yuꞌun stukel la yakꞌ ta ilel te tutꞌil ay ta chꞌuunel te Diose, sok tsꞌakal juꞌ yuꞌun xchꞌuunel. Te Jesuse kꞌax swokol ta krus, sok maꞌyuk skꞌoplal ta yoꞌtan te tutꞌil kꞌexlaltik sba te milel ta kruse. Porke snaꞌoj, teme kꞌax te swokole, ta patil ya me sta sbujtsꞌ yoꞌtan y ben kontento. Y kꞌo najkajuk ta sbatsꞌil snaktajib te Diose.

³ Jaꞌ yuꞌun, nopaik te tutiꞌ yakꞌ ta ilel te Jesuse te kꞌax swokol yuꞌun bayal kontrainel yuꞌun te jmulawiletike. Jaꞌ yuꞌun, ma me lubanik ni ma me chop abaik.

⁴ Yuꞌun te jꞌaexe ma to ayuk ya ataik milel te ya atsalik a te mulile.

⁵ ¿Me yuꞌun chꞌayix ta awoꞌtanik te Dios yalojbeyex te tutꞌil yal xnichꞌanexe? Ya yal te Sjun Diose: “Kuntikil, ma me apꞌaj te komel yuꞌun te Kajwaltike, ni ma me cheban awoꞌtan te kꞌalal ya skomelate.

⁶ Porke te Kajwaltike ya stojutes te machꞌa kꞌux ta yoꞌtane, y ya yaꞌbe kastigo te machꞌa jich ya yikꞌ tutꞌil xnichꞌane”, te xchie.

⁷ Te tutꞌil ayat ta tojutesele, yuꞌun jich ya xchiknaj te xnichꞌanex te Diose. ¿Me yuꞌun ay jtuluk nichꞌanil te mak xtojutesot yuꞌun te state?

⁸ Pero teme Dios mak stojutesex tutꞌil ya stojutes spisil te yuntikile, yuꞌun ma yal-xnichꞌanukex abi, y ma jaꞌuk Atatik te Diose.

⁹ Sok te kꞌalal chꞌinotik to ae, te jtatik liꞌ ba balmilale ya stojutesotik y ya kakꞌtik ta jkuenta. ¿Tuꞌun te ma jaꞌuk kꞌax to xan ya kakꞌtik ta jkuenta te Jtatik te ay ta chꞌulchane? Yuꞌun jich ya jtatik a te kuxlejal sbajtel kꞌinale.

¹⁰ Te jtatik liꞌ ba balmilale ya stojutesotik te jayeb kꞌaal te jkuxlejaltik te ma jaluke, chikan te tutꞌil ya skꞌan yoꞌtanik ya yakꞌike. Pero te Diose ya stojutesotik yuꞌun ya slekutesotik sok yuꞌun pajal lek ya xkꞌootik jich tutꞌil lek yoꞌtan stukel.

¹¹ Batsꞌi jich, ni maꞌyuk machꞌa lek ya yaꞌiy te tojutesel te tut ora ya xꞌaꞌbote, sino ke ben kꞌux ta aꞌiyel. Pero te machꞌa snopojix te pꞌijutesele, ya me sta bujtsꞌan kꞌinal, jachik tutꞌil smajtan ya stae.

Ma lekuk teme ya jpꞌajbetik te skꞌop Diose

¹² Jich yuꞌun aꞌbeya yichꞌ xan yipik te akꞌabik te ben lubene y sok te sjol awakanik te maꞌyuk spuersae.

¹³ Y leaik te tojil bee, yuꞌun ya xlekub a te awok te koxoubene, sok jich me ya sta xan spuersa a.

¹⁴ Oꞌtaninaik te jun bujtsꞌan kꞌinal ya awaꞌiyik ta apisilike sok te lekuk ay bael te akuxlejalike. Teme ma lekuk te yoꞌtane, maꞌyuk machꞌa ya yilbey sit te Kajwaltike.

¹⁵ Oꞌtaninaik te ma me machꞌa ma staik te lekilal yuꞌun te Diose. Ma me ayuk machꞌa jich kꞌoem te tutꞌil jwol wamal te ay yisim te ma lekuk te ya yixlan te gentee.

¹⁶ Ma me ayuk jtuluk te jaꞌexe te ya apasik antsiwejele, sok ma me apꞌajik te tut yuꞌun Dios. Yuꞌun jich tutꞌil la spas te jꞌEsau te ta jun nax weꞌelil la xchon te tut ay yuꞌun te tutꞌil ba alal stukel.

¹⁷ Y te jaꞌexe anaꞌojik te ta patil te kꞌalal kꞌan yichꞌ te bendision yuꞌun te state, pꞌajbil a kꞌot. Manchuk me bayal a okꞌ, maꞌ pasix tut ya yut sba a yuꞌun te tutiꞌ kꞌotix ta pasele.

¹⁸ Te jaꞌexe maꞌ tijilajex jich tutꞌil israeletik te ya xjuꞌ ta pikel te wits te xlaplun kꞌajkꞌ aye, sok te ba ay ben ijk kꞌinal y sok xpumlajan chawuk sok tulan ikꞌ.

¹⁹ Ni ma awaꞌiyejikuk te skꞌop kornetae ni te skꞌop Diose. Te machꞌatik la yaꞌiyik te kꞌop abi la skꞌanbeyik pawor te ma sigueuk ya xkꞌoponlanote.

²⁰ Porke ma xjuꞌ yuꞌunik yaꞌiyel te tut mantalil ya xꞌalbote: “Teme ay machꞌa ya stekꞌ te witse, ya me yichꞌ milel ta wolel ta ton o ta lansa, aunke me jkojt chanbalam”, xchi me.

²¹ Xiꞌbentik sba te tut la yilike. Jaꞌ mismo a yal te jMoisese: “Ben smeton sik yuꞌun xiꞌel ya kaꞌiy”, xchi.

²² Te jaꞌexe tijilajexix te ba wits Sion, y te ba mukꞌul jtejklum yuꞌun te kuxul Dios, jaꞌ te Jerusalen ta chꞌulchane, y te ba bayal ta jmil te angeletik stsoboj sbaik yuꞌun ya skꞌayojinik te Diose,

²³ y sok te ba stsoboj sbaik te machꞌatik nail yuntikil Dios te tsꞌibalanbil sbiil ta chꞌulchane. Tijilajexix ta stojol Dios, te jaꞌ jmeltsaanwanej yuꞌun ta spisile, y sok ta stojol te chꞌulelaletik yuꞌun gente te lek a kꞌax ta stojol te Diose,

²⁴ sok te ba ay Jesus, te tejkꞌanbil ta kꞌop yuꞌun te yachꞌil tratee, sok te ba ay te xchꞌichꞌel te jaꞌ a slekutesotike, te kꞌax ben tsaꞌam ya yalbotik ke te xchꞌichꞌel jꞌAbele.

²⁵ Jaꞌ yuꞌun, kuidado me xꞌanex, ma me apꞌajik te machꞌa ya xkꞌopoj ta jtojoltike. Yuꞌun ma ba kolik te machꞌatik la spꞌajik te Dios te kꞌalal a yikꞌtalan ta kꞌop liꞌ ba balmilale. ¿Y tutꞌil kꞌan kolukotik euk te joꞌotike, teme ya kakꞌtik ta jpatik te machꞌa ya yikꞌotik ta kꞌop kꞌalal ta chꞌulchane?

²⁶ Te tiempo abi, te skꞌop te Dios la snik te balmilale. Pero te ora to ya yal: “Jmel xan ya jnik te balmilale, pero ma jaꞌuk nax te balmilale sino ke jich ekꞌa te chꞌulchane”, te xchie.

²⁷ Te tut la yal: “Jmel xan ya jnik”, te xchie, jich ya jnaꞌtik a te ya sjim te tutik yichꞌoj pasele, te tutik ya xjuꞌ ta nikele. Jaꞌ xanix ya xjil te tut ma spas ta nikele.

²⁸ Te joꞌotike ya xꞌakꞌot anukotik yuꞌun Dios te ba ma spas ta nikele. Ya kalbetik kola yal yuꞌun to, sok ya jkejan jbajtik ta stojol Dios. Tulanuk me skꞌoplal ta koꞌtantik te ya jkejan jbajtik te lek ya yile.

²⁹ Porke te Dios kuꞌuntike jachik tutꞌil kꞌajkꞌ te spisil ya slajine.