Hebreos 11 - Nuevo Testamento Tzeltal de Amatenango

Te tutꞌil ay te xchꞌuunel-oꞌtanile

¹ Teme ay xchꞌuunel koꞌtantike, jich seguro ayotik te ya kichꞌtik te tut yipalotik ta smaliyele, sok ya jnaꞌtik te ay tutik te ma xkiltike.

² Te antibo jmeꞌ-jtatike lek a ilot yuꞌun Dios yuꞌun la yakꞌ xchꞌuunel yoꞌtanik ta stojol.

³ Ta skuenta te xchꞌuunel koꞌtantike te ya jnaꞌtik te Dios a spas te balmilale ta skuenta te skꞌope, jich te tut ya kiltik te ora to. Jaꞌ la yichꞌ pasel yuꞌun te tut maꞌyuk ta ilele.

⁴ Ta skuenta xchꞌuunel yoꞌtan, te jꞌAbel la yaꞌbe milbil smajtan Dios te kꞌax tsaꞌam ke te tut la yakꞌ te jCaine. Y jaꞌ yuꞌun Dios la yal ta jamal te toj aye, y la stsakbe te smajtane. Jich yuꞌun, aunke chamenix te jꞌAbele sigue yipal to ta kꞌop kꞌoem sok te xchꞌuunel yoꞌtane.

⁵ Ta skuenta xchꞌuunel yoꞌtan te jꞌEnoc maꞌyuk a cham stukel. Steklejal a ikꞌot bael sok xkuxlejal. Jich ma taotix a, porke ikꞌot bael yuꞌun Dios. Y te Sjun Diose jich ya yal te nail a ikꞌot baele, lek a ilot yuꞌun Dios te jꞌEnoke.

⁶ Pero ma lekuk ya xꞌilot yuꞌun Dios te machꞌa maꞌyuk xchꞌuunel yoꞌtane. Porke te tutꞌil ya xtijilajotik ta stojol te Diose, ya skꞌan te ya jchꞌuuntik te ay te Diose, sok te ya yaꞌbe smajtan te machꞌatik ya sleik te Diose.

⁷ Ta skuenta xchꞌuunel yoꞌtan, te jNoee la yakꞌ ta jkuenta te tut albot yuꞌun Dios kꞌalal la yaꞌbe snaꞌ te tut ya xkꞌot ta pasel te ma to chikanuke. La xchꞌuun y la spas barko yuꞌun ya xkol a sok te yuntikile. Y ta skuenta te xchꞌuunel yoꞌtane, te jNoee la yakꞌ ta ilel smul te gente ta balmilale. Y la sta te kolel te tutꞌil lek a ilot yuꞌun te xchꞌuunel yoꞌtane.

⁸ Ta skuenta xchꞌuunel yoꞌtan, te jꞌAbraham la xchꞌuun te ikꞌel yuꞌun te Diose. Lokꞌ bael yuꞌun teꞌ bajt te ba luwar te Dios ya yalbe te jaꞌ smajtan ya xkꞌote. Lokꞌ bael te ba slumale ni ma snaꞌ te ba ya xbajte.

⁹ Y ta skuenta xchꞌuunel yoꞌtan jich a kuxuyin jich tutꞌil jyanlum te ba luwar te jich albil yuꞌun Dios te ya xꞌaꞌbot ta patile. Kuxuyin ta puru naul pakꞌ, jich mismo tutꞌil te jꞌIsaake y sok te Jacobe, te jich a albotik euk te ya yichꞌik te luwar.

¹⁰ Porke te jꞌAbrahame la smaliy te ya xba slumalin te mukꞌul jtejklum te tulan ay yiptajibe, te jaꞌ la xchap te Diose y stukel a spas.

¹¹ Sok ta skuenta xchꞌuunel yoꞌtan, aunke maꞌyuk yuntikil te Sarae, sok lom mamalix te jꞌAbrahame, aꞌbot to yichꞌ spuersa yuꞌun jun tatil ya xkꞌote. Porke la xchꞌuun ya yakꞌ kꞌouk ta pasel te Diose, sok te ma jowiluk te tut yaloje.

¹² Jich te jꞌAbrahame, aunke ya xlajix a te yoraile, la to yakꞌ stsꞌumbal te lom bayal jich tutꞌil ekꞌetik ta chꞌulchan y sok jich tutꞌil sjiꞌal te ay ta stiꞌil mar te ma spas ta ajtayele.

¹³ Spisil te gente abi maꞌ yichꞌik te tutik yaloj jilel te Diose te kꞌalal chamike. Pero ay xchꞌuunel yoꞌtanik, sok la yilik ta jakal sok bujtsꞌnaj yoꞌtanik yuꞌun. Sok la yalik te jkꞌaxel nax ayik ta balmilal sok te majanbil nax yuꞌunik te luware.

¹⁴ Y te machꞌatik jich a yalike, jamal ya yakꞌ ta naꞌel te ayik to ta sleel te ba mero slumalike.

¹⁵ Te jaꞌuk ay ta yoꞌtanik te lum te ba laj lokꞌ tale, lek a juꞌ yuꞌunik te sujtikuk bael teꞌ ba aye.

¹⁶ Pero stukelike la skꞌan yoꞌtanik te ben tsaꞌam slumalike, jaꞌ bi, la skꞌan slumalin te chꞌulchane. Jaꞌ yuꞌun Dios mak xkꞌexaw te jaꞌ Dios yuꞌunike, yuꞌun chapojlanbe jun mukꞌul jtejklum.

¹⁷ Ta skuenta xchꞌuunel yoꞌtan te jꞌAbrahame, te kꞌalal Dios a pasot ta prewa yuꞌune, la yikꞌ bael te jꞌIsaac yuꞌun ba yakꞌ ta milbil smajtan Dios.

¹⁸ Jun yoꞌtan kꞌan yaꞌbey smajtanin te úniko xnichꞌane, manchuk me albot yuꞌun te Diose: “Ta skuenta te Isaake bayal me stsꞌumbal ya xkꞌot”, te xchi skꞌoplale.

¹⁹ Yuꞌun te jꞌAbrahame la snaꞌ te ay spoder te Diose asta ya xjuꞌ yuꞌun ya xchaꞌ kuses tal te machꞌatik chamenike. Y jaꞌ yuꞌun te jꞌAbrahame la xchaꞌikꞌon sujtel te xnichꞌane, y jich seña kꞌot te chaꞌkuxele.

²⁰ Ta skuenta xchꞌuunel yoꞌtan te jꞌIsaake la yal te ya yichꞌ bendision ta patil te Jacobe y sok te jꞌEsaue.

²¹ Ta skuenta xchꞌuunel yoꞌtan, te Jacobe, te kꞌalal ya xchamix ae, la yal jilel te ya yichꞌ bendision ta juju-tul te yuntikil Josee. Y la yalbe kola yal ta stojol Dios, jaꞌ skoltayej sba a te snabateꞌe.

²² Ta skuenta xchꞌuunel yoꞌtan te Josee te kꞌalal ya xchamix ae, la yal te israeletike te ya me xlokꞌik bael ta patil te ba slum te Egiptoe, y la yal jilel mantal te tutꞌ ya spasbot te sbakele.

²³ Ta skuenta xchꞌuunel yoꞌtan, te kꞌalal ayin te Moisese te smeꞌ-state la snakꞌ oxeb u, porke la yilik te ben tsaꞌam te chꞌin kereme. Ma xiꞌik yuꞌun te jich yaloj ta mantal te rey te ya yakꞌ ta milel te untike.

²⁴ Y ta skuenta xchꞌuunel yoꞌtan te jMoisese, te kꞌalal winikix ae, ma skꞌan te ya xꞌalinot yuꞌun te yantsil-nichꞌan te rey yuꞌun Egiptoe.

²⁵ Jaꞌ lek a yaꞌiy te pajal ya yichꞌ utel sok te jtejklum yuꞌun Diose, sok maꞌ skꞌan a skꞌupin te cheb oxeb kꞌaal te tutik skuenta mulile.

²⁶ La snop te jaꞌ mas lek te ya xkꞌax swokol ta ilbajinel te machꞌa te tꞌujbil yuꞌun te Diose, ke te jun yoꞌtan yuꞌun te skꞌulejal Egiptoe. Porke jaꞌ ay ta yoꞌtan te ya xꞌaꞌbot smajtan yuꞌun Dios te jich albil te ya xꞌaꞌbote.

²⁷ Ta skuenta xchꞌuunel yoꞌtan, te jMoises lokꞌ bael te ba slum Egiptoe. Ni ma xiꞌ yuꞌun teme ya xꞌilin te reye, yuꞌun jaꞌ yipinej yoꞌtan te Diose, te ya sta ta ilel ya yaꞌiy aunke ma chikanuk ta ilele.

²⁸ Ta skuenta xchꞌuunel yoꞌtan, la spas kꞌin yuꞌun te Pascua te jMoisese, y la yal mantal te ya stsijtsinbeyik chꞌichꞌ te puertaetike, yuꞌun makꞌ me xtaot a te sba yuntikilik te israeletike yuꞌun te ángel te ya yakꞌ tal te lajele.

²⁹ Ta skuenta xchꞌuunel yoꞌtanik, te israeletike kꞌaxik ta Tsajal Mar te jich kꞌoem te takin lume. Teꞌ nax a, te kꞌalal jich kꞌan kꞌaxikuk bael ekꞌa te Egiptoetike, multalanot ta jaꞌ stukelik.

³⁰ Ta skuenta xchꞌuunel yoꞌtanik te israeletike, jim te smuroal te mukꞌul jtejklum Jericoe, te kꞌalal la sjoyilanik jukeb kꞌaal.

³¹ Y ta skuenta xchꞌuunel yoꞌtan, te xRahab, te jmulawil antse, ma junuk nax a cham sok te machꞌatik ma xchꞌuunike, porke lek a yikꞌ ta sna te machꞌatik tikonlanbil yuꞌun te israeletike.

³² ¿Tut xan ta mas ya kal a? Ya to skꞌan stiempoil te ya kalbe skꞌoplal te Gedeone, te jBarake, te Sansone, te Jeftee, te jDavide, te Samuele, sok te jꞌalwanejetik yuꞌun Diose.

³³ Ta skuenta xchꞌuunel yoꞌtanik: la stsalik te jtejklumetike, lek a juꞌ yuꞌunik xchapel, la yichꞌik te tut albil yuꞌun te Diose, la smakbeyik stiꞌ te chojetike,

³⁴ la stupꞌik te tulan kꞌajkꞌetik, sok juꞌ yuꞌunik te maꞌyuk a lajik ta puñale. Aꞌbot spuersaik te machꞌatik maꞌyuk spuersaike, ay tulan a laj kꞌot yuꞌun te guerrae, la stsalik te soltaroetik yuꞌun te skontraike.

³⁵ Ay antstik te la yichꞌik chaꞌkusesel te machꞌatik ay yuꞌunike. Ay yax te laj chamik yuꞌun te tulan wokole, maꞌ skꞌanik te ya xjilik ta libree yuꞌun jaꞌ ya skꞌanik te ya xchaꞌkuxik te ba ay te lom tsaꞌamix kuxlejal ae.

³⁶ Ay yan te kꞌax swokolik ta ikꞌtinel y ta majel y ta chukel ta kadena y ta prexo.

³⁷ Y ay yan te laj chamik ta chꞌojel ta ton, ta tuyel ta olil ta seruch, sok ay a lajik ta puñal. Bayuk nax a bajtik, smakoj sbaik ta snujkulel karnera y ta snujkulel chibo. Ayik ta meꞌbaal, wokolajik, y ilbajinlanot.

³⁸ Te genteetik to, maꞌyuk yanetik ta balmilal te pajal ay slekil yoꞌtanik soke. Jich nax a laj bajtik me ta jojchol tꞌantꞌan luwar sok ta witstikil sok ta chꞌentikil sok te ba jutajtik chꞌene.

³⁹ Pero ni jtuluk te la yichꞌik te tut a te ya xꞌaꞌbot yuꞌun te Diose, aunke jun yoꞌtanik xchꞌuunejik te Diose.

⁴⁰ Porke ayotik ta jkuenta yuꞌun te Diose te ya yaꞌbotik te tut a te ben tsaꞌame. Yuꞌun ma me stukelikuk nax ya yichꞌik te tut ben tsaꞌame, ya me kichꞌtik ekꞌa te joꞌotike.