Hebreos 10 - Nuevo Testamento Tzeltal de Amatenango

¹ Porke te mantaliletik yuꞌun te jMoisese jaꞌ nax yaxinal te tutik ben lek te ya xba taluke, y ma jaꞌuk stukel te tut batsꞌi leke. Jaꞌ yuꞌun te mantaliletike ma xjuꞌ yaꞌ stojutes te machꞌatik jujun jaꞌbil ya xtijilaj ta stojol Dios yuꞌun te ya yaꞌbe milbil smantan Dios.

² Te juꞌuk yuꞌun te mantaliletik slekutesel yuꞌun te smulike, makꞌ snaꞌikix me ay smulik te jichuke, sok la sjilesikix ta yakꞌel milbil smajtan te Diose.

³ Pero te milbil smajtan Dios ya yakꞌik ta jujun jaꞌbile jaꞌ ya yaꞌbe snaꞌik te smulike.

⁴ Porke te xchꞌichꞌel toroetike y te xchꞌichꞌel chiboetike ma xjuꞌ ya xchꞌay mulil.

⁵ Jaꞌ yuꞌun, kꞌalal jul ta balmilal te Cristoe, jich a yal ta stojol Dios: “Ma jaꞌuk ya akꞌan te milbil majtanile ni te yan majtanile, sino ke la awaꞌbonix jtiꞌbalul.

⁶ Ma jaꞌuk lek ya awil te chikꞌbil majtaniletike ni te majtaniletik yuꞌun te ya xchꞌay mulile.

⁷ Jich a kal: ‘Liꞌ ayon to, jich tutꞌil tsꞌibabil jkꞌoplal ta june, yuꞌun ya jpas te tut skꞌanojel awoꞌtan, te jaꞌat Diosate’, xchion”, xchi me.

⁸ Nail ya yal te ma skꞌan Dios ni lekuk ya yil te milbil majtaniletik ni te majtanil chambalame, ni te chikꞌbil smajtan yuꞌun te ya xchꞌay mulile, aunke jich ya yakꞌ ta akꞌel te mantaliletike.

⁹ Y patil la yal: Liꞌ talemon to yuꞌun ya jpas te tut ya skꞌan awoꞌtane, te jaꞌat Diosate”, te xchie. Jicha chꞌay te nail milbil majtaniletike, sok la yakꞌ ta sluwar te jun yachꞌile.

¹⁰ Dios la slekutesotikix porke te Jesucristoe la spasbe te skꞌanojel yoꞌtan te Diose te la yakꞌ ta majtanil te stiꞌbalule te la yichꞌ milel jun nax buelta yuꞌun sbajtel kꞌinal.

¹¹ Spisil te saserdote juriyoe jaꞌ yaꞌtelinejik jujun kꞌaal, y sigue ya yakꞌulanik bayal buelta te jich mismo milbil smajtan te Diose. Manchuk me jich ya spas to, ma xjuꞌ ya xchꞌay te muliletike.

¹² Pero te Jesucristoe jaꞌ a yakꞌ sba ta jun milbil smajtan Dios yuꞌun te muliletik yuꞌun sbajtel kꞌinal. Y te nax a najkaj ta sbatsꞌil skꞌab te Diose.

¹³ Teꞌ yipal ta smaliyel a, jaꞌ to teme Dios ya yakꞌbe spuch ta tekꞌel te skontratake.

¹⁴ Porke ta skuenta te jun nax smajtan Diose, jich a stojutes yuꞌun sbajtel kꞌinal te machꞌatik ya xlekubik ta stojol Diose.

¹⁵ Jich mismo ya yalbotik te Chꞌul Espiritue:

¹⁶ “Ya yal te Kajwaltike: ‘Jich ay te trate ya jpas ta patil kꞌalal ya sta skꞌaalele. Ya me kaꞌbe ta yoꞌtan te jmantaliletike y ya me jtsꞌibabe ta spensarik’, xchi me”, xchi.

¹⁷ Sok ta patil la yal: “Mak me ya jnaꞌbeyix a te smulike y sok te tut ma lekuk spasojike”, xchi.

¹⁸ Jich yuꞌun te kꞌalal pasbot perdon yuꞌun te smulike, ma me puersaukix te ya yakꞌik xan te majtaniletik yuꞌun te mulile.

Ya me xtijilajotik ta stojol te Diose

¹⁹ Jaꞌ yuꞌun, kermanotak, te ora to maꞌyuk xiꞌel ya xjuꞌ xꞌochotik te ba ay te Batsꞌi Chꞌul Luwar ta skuenta te xchꞌichꞌlel te Jesucristoe.

²⁰ Jaꞌ me sigue ya jtamtik te achꞌ bee, te sbeelel kuxlejal te stukel a sjambotik te pakꞌ, te jaꞌ mismo te stiꞌbalule.

²¹ Te Jesuse jaꞌ mukꞌul saserdote kuꞌuntik te skuentainej te jtejklum yuꞌun te Diose.

²² Jaꞌ yuꞌun ya skꞌan xtijilajotik ta stojol Dios sok spisiluk me koꞌtantik y sok xchꞌuunel koꞌtantik te batsꞌi seguroe. Sakubenuk me te koꞌtantik yuꞌun te tut ma lek ya jnoptike, y sapbiluk me te jtiꞌbalultik ta puro lekil jaꞌ.

²³ Junuk me koꞌtantik, ma me tut xyal koꞌtantik. Ya me jnaꞌtik te tut yipalotik ta smaliyel, sok te xchꞌuunel koꞌtantik te ya kaltik ta jtiꞌtike. Porke te Diose ya skꞌoes ta pasel te tut yalojbotik te ya spasbotike.

²⁴ Ya me jletik tutꞌil ya jkoltay jbajtik ta juju-tul skuenta yuꞌun ay xan mas xkꞌuxul koꞌtantik a, sok skuenta yuꞌun ya jpastik te tut leke.

²⁵ Ma me jkom bajtik te ya jtsobilan bajtik, jich tutꞌil ya spasik te jtul chebe. Ya me skꞌan ya kaꞌbe bajtik spuersa koꞌtantik ta juju-tul. Y jaꞌuk to a te kꞌalal ya kiltik te xnopet ya xtal te skꞌaalel yuꞌun te Kajwaltike.

²⁶ Porke teme skꞌanojel koꞌtantik sigue ya xmulawotike, aunke jnaꞌojtikix te tut batsꞌi jiche, ma me ayukix ta mas te milbil smajtan Dios yuꞌun te jmultike.

²⁷ Jaꞌ xanix ya jmalitik te kastigo te xiꞌeltik sba, te tut ora ay ichꞌel ta kꞌope, y sok te kꞌajkꞌ ya xtil te ya slajin te machꞌatik skontrainejik te Diose.

²⁸ Te kꞌalal ay machꞌa maꞌ xchꞌuun te mantaliletik yuꞌun te jMoisese, sok teme ay cheb o oxeb testigoetik yuꞌun te tut spasoje, ya xꞌakꞌot bael ta lajel yuꞌun, sok ma pichꞌukix ta oꞌtanil ya xkꞌot a.

²⁹ ¿Me yuꞌun ma xkꞌot ta awoꞌtanik te jaꞌexe te mas to xan tulan kastigo ya sta te machꞌatik ya xpuchꞌik ta tekꞌel te Xnichꞌan Dios y te ya spꞌajbeyik te xchꞌichꞌele, sok te machꞌatik ya yixta-kꞌoptay te Espíritu yuꞌun Dios te jaꞌ kꞌuxutaylanbil yuꞌune? Te xchꞌichꞌele jaꞌ te la xchap jil a te tratee, sok te ya slekuteswane.

³⁰ Jnaꞌojtik te Kajwaltik te yaloj jilele: “Joꞌon aꞌbilonix ta jkuenta te xchapele; te joꞌon ya kaꞌbe stoje”, xchi me. Y jich yaloj xan: “Te Kajwaltike jaꞌ ya yichꞌ jkuenta te jtejklum yuꞌune”, xchi me.

³¹ ¡Xiꞌeltik sba teme yalotik ta skꞌab te kuxul Diose!

³² Pero naꞌaik me te jaꞌexe te tiempo a kꞌaxixe, te kꞌalal la awichꞌik te sakil kꞌinale. Naꞌaik me tutꞌil kujch awuꞌunik te tulan wokoletik te tulan la awichꞌik kontrainele.

³³ Ay la awichꞌik pꞌajel y ilbajinel ta sitil komone, y ay la ajoyin abaik sok te machꞌatik kꞌax swokolike.

³⁴ Te jaꞌexe la xpichꞌin awoꞌtanik te machꞌatik aylan ta prexoe. Y asta jun awoꞌtanik te la awakꞌik bael ta pojel te tut ay awuꞌunike, yuꞌun anaꞌojik te tut ay awuꞌunik ta chꞌulchan te mas ben tsaꞌame sok te sbajtel kꞌinal ay stukele.

³⁵ Ma meꞌ chꞌay yip awoꞌtanik ta stojol Dios, porke jaꞌ me ya yichꞌbeyex te jun mukꞌul majtanile.

³⁶ Te jaꞌexe puersa ya skꞌan xjuꞌ awuꞌunik te wokole, yuꞌun jaꞌ ya apasik te tut ya skꞌan yoꞌtan te Diose y jich ya awichꞌik te tut a te stukel yaloje.

³⁷ Yuꞌun te Sjun Diose jich ya yal: “Ora me, batsꞌi ora me ya xtal te machꞌa ya xtale, ma jalukix.

³⁸ Y te machꞌa toj ya xꞌilot yuꞌun te xchꞌuunel yoꞌtane, ya me xkuxuyin. Pero teme sujtex ta apatike, ma kontentoukon yuꞌun”, te xchie.

³⁹ Y te joꞌotike ma jachikukotik tutꞌil te machꞌatik ya sujt ta spatike, te chꞌayel ya xlaj bajtik yuꞌune. Jaꞌ pajalotik sok te machꞌatik ya staik te kolele porke ay xchꞌuunel yoꞌtanik.