Hebreos 1 - Nuevo Testamento Tzeltal de Amatenango

Dios kꞌopojix ta skuenta te Xnichꞌane

¹ Te nameye, bayal buelta Dios la skꞌopon te antibo jmeꞌ-jtatike ta skuenta te jꞌalwanejetike. Bayal buelta la skꞌopone sok lebot yuꞌun tutꞌil ya xkꞌot ta yoꞌtanik.

² Te ora to, jaꞌ te slajibal kꞌaal, la skꞌoponotik ta skuenta te Xnichꞌane. Ta skuenta te Xnichꞌane, Dios la spas chꞌulchan balmilal, y jaꞌ a yaꞌbe yuꞌunin spisil te tutik aye.

³ Stukel yichꞌojbey stsaꞌamul slekil te Diose, sok jaꞌ mismo ya yakꞌ ta naꞌel tut yilel te Diose. Ta skuenta skꞌop te bayal spodere, jaꞌ te yipajtesej spisil te tutik aye. Ta patil te la spokotik yuꞌun te jmultike, la snajkan sba ta chꞌulchan ta sbatsꞌil te ba nakal te Diose.

Te Xnichꞌan Diose jaꞌ kꞌax mukꞌ tutꞌil te angeletike.

⁴ Te Xnichꞌan Diose jaꞌ kꞌax mukꞌ a tutꞌil te angeletike, yuꞌun jaꞌ a aꞌbot yuꞌunin sbiil te kꞌax jich tulan tutꞌil te sbiilik te angeletik.

⁵ Porke te Diose ni maꞌ yalbe ni jtuluk te ángele: “Te jaꞌate, jnichꞌanat; la kakꞌ ta ilel te ora to te joꞌon Ataton”, ma xchiuke. Ni maꞌyuk jtuluk ángel jich a yalbey skꞌoplal: “Joꞌon nax Tatilon yuꞌun stukel, y stukel jaꞌ Jnichꞌan”, ma xchiuke.

⁶ Pero te kꞌalal la yakꞌ ta ilel ta balmilal te sba nichꞌane, la yal: “A me skejan sbaik ta skuenta spisil te angeletik yuꞌun Dios”, xchi me.

⁷ Yan te angeletike, jich albil skꞌoplal yuꞌun Dios: “Dios ya yakꞌ te pajal kꞌoemik jich tutꞌil ikꞌ ta angeletik yuꞌune, sok jich kꞌoem tutꞌ yat kꞌajkꞌ te jmantaletik yuꞌune”, xchi.

⁸ Pero te skꞌoplal te Xnichꞌane, jich a yal: “Jaꞌat te Diosate, sbajtel kꞌinal ay te awaꞌtele, y te awaꞌtele toj ya xchapawanat.

⁹ Jaꞌ akꞌanoj te tut leke, y apꞌajoj te tut ma lekuke. Jaꞌ yuꞌun la stꞌujat te Dios, te Dios awuꞌune, y la yaꞌbeyatix sbujtsꞌ awoꞌtan kꞌax jich tutꞌil te ajoꞌtake”, xchi me.

¹⁰ Jich a yal xan: “Te jaꞌate, Kajwal, ta slijkibal la awaꞌbe yiptajib te balmilale, sok jaꞌat mismo la apas te chꞌulchane.

¹¹ Ta spisil ya me xlaj; pero te jaꞌate atalel ayat sbajtel kꞌinal. Spisil ya xlaj jich tutꞌil kꞌuꞌul-pakꞌal;

¹² ya apak jich tutꞌil ya xpakot jun pakꞌ, ya ajeltay jich tutꞌil te machꞌa ya sjeltay skꞌuꞌ-spakꞌ. Pero te jaꞌate atalel ayat atukel, te akuxlejale ma xlaj”, xchi.

¹³ Te Diose ni maꞌyuk a yalbe ni jtuluk te angeletike: “Naklan ta jbatsꞌil, jaꞌ to teme la kakꞌ apuchꞌ ta tekꞌel te akontratake”, ma xchiuk.

¹⁴ Porke spisilik te angeletike abatetik ta spasel yaꞌtel te Diose. Tikonbil ta skoltayel te machꞌatik ya xꞌaꞌbot smajtanin te kolele.