Gálatas 6 - Nuevo Testamento Tzeltal de Amatenango

Koltaya me abaik ta juju-tulex

¹ Kermanotak, teme ya awilik te ay machꞌa yalem ta mulile, te jaꞌex te ayex ta skuenta Espiritue, ya skꞌan ya akoltayik ta sujtesel xan yoꞌtan a. Pero pasaik ta slekil awoꞌtanik. Sok naꞌa me tutꞌil ayex euk, ila me abaik, ma me jichuk ya xkꞌoex te ya ataik sujel ta mulil ekꞌae.

² Koltaya abaik ta xkuchel te ijkatsile, jich me ya xjuꞌ awuꞌunik spasel a te smantal te Cristoe.

³ Teme ay machꞌa skuyoj sbaix te lek aye kꞌalal maꞌyuk tut ya xjuꞌ yuꞌune, stukel nax mismo sloꞌlayej sba.

⁴ Te juju jtul ya skꞌan ya yichꞌ sba jkuenta te tut ya spase, y teme jun yoꞌtan ya yaꞌiy sbae, jichuk me ay ta stukel nax y ma me jaꞌuk ya yil tutꞌ ay te yane.

⁵ Yuꞌun ta juju-tul ay ta skuenta skuchel te tut yilel te yaꞌtele.

⁶ Te machꞌa ya yichꞌ te pꞌijutesel yuꞌun te skꞌoplal te achꞌ kꞌope, ya skꞌan ya spukbe te yaj-maestroe spisil te tut ay yuꞌune.

⁷ Ma me aloꞌlay abaik. Maꞌyuk machꞌa xjuꞌ ya yikꞌtin te Diose. Te tut ya atsꞌune jich mismo ya xlokꞌ awuꞌun.

⁸ Te machꞌa ya stsꞌun sok sbujts yoꞌtan te tut ma tsaꞌamuk ya skꞌan te stiꞌbalule, ja skosecha te lajele. Te machꞌa ya stsꞌun sok sbujtsꞌ yoꞌtan ta skuenta Espiritue, ta skuenta Espíritu jaꞌ skosecha te kuxlejal sbajtel kꞌinale.

⁹ Jich yuꞌun ma me wakꞌ lubukotik ta spasel te tut leke. Porke teme ma xchebaj koꞌtantike, ya me sta stiempoil te ya kilbeyik sit te kaꞌteltike.

¹⁰ Jaꞌ yuꞌun, siluk me tiempo te ya xjuꞌ kuꞌuntike, aꞌ jpastik te tut lek ta spisile. Y mas jaꞌ ta stojol te kermanotaktik te jun nax jchꞌuunejtik sok Diose.

Tsitsel y spajtil-oꞌtanil ta slajibal

¹¹ Ila awilik te jletra te ben mukꞌik te yipalon ta stsꞌibayel ta jkꞌab te ora to.

¹² Te machꞌatik ya skꞌan ya sujex ta yichꞌel te sirkunsisione, jaꞌ nax ya spasik yuꞌun te lek ya xꞌilot yuꞌun a te gentee, skuenta yuꞌun maꞌyukik ta ilbajinej yuꞌun te xchꞌuunejik te laj ta krus kuꞌuntik te Cristoe.

¹³ Pero ni ma jaꞌuk a te machꞌatik ya yichꞌ sirkunsision te ya xjuꞌ yuꞌun spasel spisil te tut ya yal te mantaliletike. Jaꞌ nax ya skꞌanik te yauk awichꞌik sirkunsision te jaꞌexe. Yuꞌun jich me ya stoy sbaik te yauk xjuꞌ yuꞌunik te ya sujex ta yichꞌel te amarkaik ta atiꞌbalulike.

¹⁴ Yan te joꞌone, ni ma xjuꞌ ya jtoy jba yuꞌun. Jaꞌ nax mukꞌ ya kaꞌiy jba yuꞌun te cham ta krus te Kajwaltik Jesucristoe. Yuꞌun ta skuenta nax te cham ta krus te Cristoe, te tutik ay ta balmilale chamenix jilel kuꞌun, y te joꞌone chamenonix yuꞌun te tutik skuenta balmilale.

¹⁵ Porke ta skuenta te Cristo Jesuse ma baleukix a kꞌot teme kichꞌojtik o ma kichꞌojtikuk te sirkunsisione. Te tut balee, jaꞌ te achꞌubenotiquixe.

¹⁶ Spisilik te machꞌa jich xchꞌuunejik ekꞌae, ya yichꞌik te bujtsꞌan kꞌinale y te slekil yoꞌtan Diose, sok spisil te machꞌatik batsꞌi jtejklum yuꞌun te Diose.

¹⁷ Te ora to y ta patil bael ma jkꞌan te ay machꞌa mas ya yaꞌbon jwokole. Yuꞌun te señaetik te kichꞌoj ta jtiꞌbalule, jaꞌ ya xchiknaj a te joꞌon jtul yaj-aꞌtelon te Jesuse.

¹⁸ Kermanotak, te Kajwaltik Jesucristoe aꞌ yaꞌbeyex te slekil yoꞌtan ta apisilik te jaꞌexe. Jichuk.