Gálatas 5 - Nuevo Testamento Tzeltal de Amatenango

Jun awoꞌtanik xꞌanex ta libre

¹ Te Cristoe la yakꞌotik ta libre, yuꞌun jich me libre ayotik a. Y ma me awakꞌ abaikix ta chukel yuꞌun te mosoile.

² Aꞌibikon awaꞌi, joꞌon jPabloon ya kalbeyex: Teme jaꞌex ya awakꞌ abaik ta yichꞌel te sirkunsisione, te Cristo ma baleukix ya xkꞌot awuꞌunik a.

³ Ya jkꞌan jchaꞌalonbeyex xan: Machꞌauk winikil a te ya yichꞌ sirkunsisione, puersa ya xchꞌuun spasel spisil te tut ya yal te mantaliletik yuꞌun te jMoisese.

⁴ Jaꞌex te ya aleik te tutꞌil libre ya xjilex yuꞌun amulik ta skuenta spasel te mantaliletike, jich la apit abaikix ta stojol Cristo yuꞌun a, sok jich la apit abaikix ta slekil yoꞌtan te Diose.

⁵ Pero te joꞌotike, ta skuenta te Espiritue y sok te xchꞌuunel-oꞌtanile, jich ayotik ta smaliyel te libre ya xkꞌootik yuꞌun te jmultike.

⁶ Porke jun nax ayotik sok te Cristo Jesuse, jich ma baleukix ya xkꞌot a teme kichꞌojtik sirkunsisione o teme ma kichꞌojtikuke. Te tut lom balee jaꞌ te ay xchꞌuunel koꞌtantike. Y te xchꞌuunel-oꞌtanile ya yakꞌ kuxuyinukotik sok te skꞌuxul koꞌtantike.

⁷ Te jaꞌexe lek ayex ta nail. ¿Machꞌa la xchebantesbeyex awoꞌtanik te ya ajilesik ta chꞌuunel te tut batsꞌi jiche?

⁸ Te tut la yalike, ma skuentauk Dios, te jaꞌ a yikꞌex stukele.

⁹ Yuꞌun jich ya yal: “Chꞌin nax levadura ya yichꞌ te ya spajutes spisil te matsꞌe”, xchi me.

¹⁰ Y te joꞌone jich ay ta koꞌtan ta skuenta te Kajwaltike te ma me tut yan ya anopik te jaꞌexe. Pero Dios ya me yaꞌbe kastigo te machꞌatik ya xchebentesbeyex awoꞌtanike, ma yocheluk machꞌauk a.

¹¹ Te joꞌone, kermanotak, te jaꞌuk to ya kakꞌ ta pasel te ya xchꞌuunik yichꞌel te sirkunsisione, maꞌyukon ta tenel yuꞌun te juriyoetik te jichuke. Sok ma kolauk ya yaꞌiyik te skꞌoplal te laj ta krus te Cristoe.

¹² Pero te machꞌatik yipalik ta xchebentesel awoꞌtanik te jaꞌexe, lek te jaꞌuk ya yichꞌik ejchentesel ta jmel nax stukelike.

¹³ Te jaꞌexe, kermanotak, Dios la yikꞌex yuꞌun te libre ya xkꞌoexe. Pero ma me jaꞌuk libre ayex yuꞌun te ya aleik xan amulike. Jaꞌ lek abatin abaik ta juju-tul sok slekil awoꞌtanik.

¹⁴ Porke spisil te mantaliletike jich kꞌo tsꞌakayuk a te ya yal te mantale: “Kꞌux me xꞌawaꞌiy te ajoy ta genteile, jich mismo tutꞌil kꞌux xꞌawaꞌiy aba te jaꞌate.

¹⁵ Ila me abaik, porke te jaꞌexe teme la atiꞌ abaik y sok teme ya atam abaik ta pletoe, tey me ya awilik a te jkꞌaxel ya ajim abaik ae.

Te tutik ya skꞌan te tiꞌbalulile y sok te kuxlejal skuenta te Espiritue

¹⁶ Yuꞌun ya kalbeyex xan: Ja me xꞌaleik te tutꞌil ya skꞌan te Espiritue, y ma me jaꞌuk xꞌaleik te jun awoꞌtanik te tut ma tsaꞌamuk ya skꞌan atiꞌbalulike.

¹⁷ Porke te tutik ma tsaꞌamuk ya skꞌan atiꞌbalulike, jaꞌ skontrainej te Espiritue. Y te Espiritue jaꞌ skontrainej te tutik ma tsaꞌamuk ya skꞌan atiꞌbalulike. Te yane jaꞌ skontrainej te yanetike, y jaꞌ yuꞌun te jaꞌexe ma xjuꞌ awuꞌunik spasel te tut ya akꞌanike.

¹⁸ Pero te Espiritue ya stojutesotik, jich maꞌyukotikix ta sujel yuꞌun a te mantaliletike.

¹⁹ Ben chikan ta ilel te tut ya spasik te machꞌatik ya spasik te tutik ma tsaꞌamuk ya skꞌan te stiꞌbalulike. Ya xꞌantsiwejik, y ya spas mulil, y ya spasik tut skuenta balmilal, y sok tut ya skꞌupin yoꞌtanik.

²⁰ Ya skejan sbaik ta lotil dios y ya snopik uꞌulil. Ya spas kontrainwanej, pleto, sok laꞌoꞌtantayel. Jtsꞌin ya xlaj ilin, y ya stsalawan ta kꞌop, ya spit sbaik y ya smon sjoyik.

²¹ Jꞌil-oꞌtanetik, jmilawetik, jyakubeletik, jpas-kꞌinetik te tut ma tsaꞌamuke, y ay xan yanetik te pajal soke. Jaꞌ ya kakꞌ anaꞌik te jaꞌexe yuꞌun nail a kalbeyex: Te machꞌatik jich ya snop spasele, ma xjuꞌ ya xkꞌot te ba ay ta ajwalil te Diose.

²² Yan te tut ya yakꞌ te Espiritue jaꞌ te skꞌuxul koꞌtantike y sok ay goso ta koꞌtantik, sok bujtsꞌan kꞌinal, sok spisil ya stsꞌijk kuꞌuntik. Sok lek ya kil jbajtik, y ay slekil koꞌtantik, sok jun koꞌtantik,

²³ sok chꞌin ya kakꞌ jbajtik, y sok ya jnaꞌ tutꞌ ayotik sok koꞌtantik. Spisil ito, ni maꞌyuk mantalil te ya yal te ma lekuke.

²⁴ Y te machꞌatik ayix ta skuenta te Jesucristoe yakꞌojikix ta lajel ta krus kꞌoem te stiꞌbalulike. Lajix ta pasel yuꞌunik te tut ma tsaꞌamuk ya skꞌupin spasel te stiꞌbalulike y sok te sbikꞌtal yoꞌtanike.

²⁵ Te ora to teme kuxulotikix ta skuenta te Espiritue, aꞌ kakꞌ jbajtik te ya stojutesotike.

²⁶ Ma me lom toybaukotik. Ma me talel baeluk ya japuj jbajtik ta pleto y mak me kil-oꞌtantay jbajtik.