Gálatas 4 - Nuevo Testamento Tzeltal de Amatenango

¹ Te tut ya jkꞌan kalbeyexe jaꞌ to: Mientras chꞌin to te machꞌa ya yichꞌ jilel te majtanile, jaꞌ pajal sok jtul moso te ay ta skanantayel te sna state, manchuk me jaꞌ yuꞌun ta spisil.

² Ay genteetik te skanantayeje y ya xchapbe te tutik ya skꞌan chapele jaꞌ to teme la sta stiempoil yaloj jilel te state.

³ Jich mismo ya xkꞌot ta jkuentatik ekꞌa. Te kꞌalal chꞌinotik to aye jich ayotik ta skuenta te machꞌatik ay spoderik te ya spasawanik ta mantal liꞌ ba balmilale.

⁴ Pero te kꞌalal la sta stiempoile, Dios a stikon tal te Xnichꞌane te alatayot yuꞌun jtul antse, sok te ay ta skuenta te mantaliletik yuꞌun te Moisese.

⁵ Yuꞌun tal yakꞌ ta libre te machꞌatik ayotik to ta skuenta te mantaliletike, yuꞌun te Diose jich me ya yikꞌotik ta yal-xnichꞌan.

⁶ Y yuꞌun jich me ya xchiknaj a te yal xnichꞌanotikixe, Dios a stikon tal ta koꞌtantik te Espíritu yuꞌun te Xnichꞌane. Jaꞌ mismo te Espiritue ya xkꞌopoj: “Tat”, xchi ta stojol te Diose.

⁷ Jich yuꞌun te jaꞌate maꞌyukatix ta mosoil. Jaꞌ yal-xnichꞌanatix te Diose. Y te tutꞌil yal xnichꞌanexix te Diose, yuꞌun jich ya skꞌan yoꞌtan te ya awichꞌik euk te majtanile.

Te jPabloe ay yajtal yoꞌtan yuꞌun te hermanoetike

⁸ Te nail toe, kꞌalal ma to xꞌanaꞌbeyik sba Dios te jaꞌexe, ayex to ta mosoinel yuꞌun te lotil diosetike.

⁹ Pero ta ora to ya anaꞌbeyikix sba te Diose, o jaꞌ mas lek ta alel te Dios ya snaꞌ abaik te jaꞌexe. ¿Tut yuꞌun te ya sujtex xan ta skuenta te tutꞌil maꞌyuk yip y te maꞌyuk spoderike, y te ya awakꞌ abaik ta mosoinel yuꞌune?

¹⁰ Te jaꞌexe ya akanantayik te kꞌaaleltik, te uetike, te tiempoetike, te jaꞌbiletike.

¹¹ Bayal ya xiꞌon awuꞌunik te lom nax ni ma tuunemuk awuꞌunik te aꞌtel jpasoje.

¹² Kermanotak, awolilikuk jich xꞌapasik tutꞌil joꞌone, porke jich me ya jpas ekꞌa te tutꞌil jaꞌexe. Ma yuꞌunuk ay tut ma tsaꞌamuk apasojbonikix.

¹³ Yuꞌun ya anaꞌik te kꞌalal nail la kalbeyex te skꞌoplal kolele, ta skaj jchamel te juꞌ kuꞌune.

¹⁴ Te chamele jun prewa yuꞌun jaꞌex te ma la achꞌojikon lokꞌel sok ma la apꞌajikon yuꞌun te jchamele. Yuꞌun ben lek la awikꞌikon jich tutꞌil jtul ángel yuꞌun Dios o jich tutꞌil te Cristo Jesuse.

¹⁵ ¿Tut la apasik sok te sbujtsꞌ awoꞌtanik la awaꞌiyike? Ya xjuꞌ ya kalbeyex te jaꞌexe te kꞌan juꞌuk awuꞌunik te ya alokꞌesik te sbakꞌ asitike yuꞌun te ya awaꞌbikone.

¹⁶ Y te ora to, ¿me yuꞌun sujton ta akontraik te jaꞌ nax yuꞌun te la kalbeyex te tut batsꞌi jiche?

¹⁷ Te yanetike ben jun yoꞌtanik ta atojolik te jaꞌexe, pero ma slekilikuk te tut snopoje. Te tut ya skꞌanike jaꞌ te ya slokꞌesex ta jtojol, yuꞌun ben jun awoꞌtanik ya xkꞌoex ta stojolik.

¹⁸ Lek te ya kakꞌtik ta ilel te jun koꞌtantik sok te yane, pero jaꞌ te lek tut jnopojtike. Y jichuk me sil tiempo a, ma me jaꞌuk nax te kꞌalal ayon ta akuentaik aye.

¹⁹ Kuntikilex te ben kꞌuxex ta koꞌtane, ayonix ta wokol nax tak yuꞌun te jaꞌexe, jich tutꞌil jtul meꞌil te ya xlijk swokole. Y sigue ayon bael ta wokol jaꞌ to teme Cristo ya stojutesexe.

²⁰ Ya jkꞌan te ayukonix te ba ayex mismo ora to, yuꞌun ay tut tulan ya kalbeyex. Yuꞌun ma jnaꞌ te tut ayexe.

Seña te xꞌAgar sok te Sarae

²¹ Albikon te jaꞌex ya akꞌan ya awakꞌ abaik ta japuyel yuꞌun te mantaliletik yuꞌun te jMoisese. ¿Meꞌn maꞌ awaꞌiyejikuk te tut ya yal te mantaliletike?

²² Yuꞌun jich tsꞌibabil jilel te ay cheb skermetik te Abrahame. Jtul yuꞌun te skriadae y te jtul xane jaꞌ yuꞌun te batsꞌi yiname te libre ay stukele.

²³ Te yal skriadae jich a ayin te tutꞌil skuenta nax te tiꞌbalulile; pero te yal te machꞌa ay ta libree, ayin skuenta yuꞌun jich ya xkꞌot ta pasel te jich sjapoj te Diose.

²⁴ Te tutꞌil jich aye, ay mukꞌ sluwaril. Te chaꞌtul antstike jich a laj kꞌot te ay cheb tratee. Te june te chiknaj ta wits Sinai, jaꞌ pajal kꞌoem sok te xꞌAgare. Te machꞌatik ay ta skuenta te trate to, ya xꞌayinik yuꞌun mosoil ya xlaj kꞌot.

²⁵ Yuꞌun te xꞌAgare pajal sok te wits Sinai te ay ta Arabiae. Sok jaꞌ pajal kꞌoem sok te ora to te mukꞌul jtejklum Jerusalen, te jun nax ayik ta mosoil sok te yuntikile.

²⁶ Pero te Jerusalen te ay ta chꞌulchan libre ay stukel, y joꞌotik yuntikilotikix.

²⁷ Porke te Sjun Diose jich ya yal: “Kontentoukat, ants te ma xꞌalajate, te jaꞌat te maꞌyuk awuntikile. Awunan yuꞌun te akontentoile, te jaꞌat te maꞌyuk awaꞌiyej tutꞌ ay swokolil te alajele. Porke te ants te jilesbile ay mas yuntikil ke te ants te ay smamlale”, xchi me.

²⁸ Kermanotak, joꞌotik te pajalotik sok te Isaac, yuntikilotik te Diose, jich tutꞌil yaloj.

²⁹ Pero jich tutꞌil te nameye te nichꞌanil te ayin ta smantal te tiꞌbalulile la sten te nichꞌanil te ayin ta yaꞌtel te Espiritue, jich ya xkꞌot ta pasel ekꞌa te ora to.

³⁰ ¿Pero tut ya yal te Sjun Diose? Jich ya yal: “Tikona lokꞌel te akriada sok te yale. Porke te yal kriadaile ma spas te pajal ya yichꞌ te majtanil sok te yal te machꞌa libre aye”, xchi me.

³¹ Jaꞌ yuꞌun kermanotak, ma jaꞌuk yuntikilotik te kriadaile. Ja yuntikilotik te machꞌa libre aye.