Gálatas 3 - Nuevo Testamento Tzeltal de Amatenango

Tutꞌ ay te mantaliletike sok te xchꞌuunel-oꞌtanile

¹ Jaꞌex Galataetik, te ma pꞌijukexixe, ¿Machꞌa a yaꞌbeyex chamel? Te tut la kalbetikexe, la kakꞌtik ta ilel ta asitik te Jesucristo te jojkꞌanot ta kruse.

² Jaꞌ nax ya jkꞌan ya awalbikon te tut ya jojkꞌoye: ¿Me la awikꞌik te Espíritu yuꞌun Dios te la achꞌuunik te mantaliletik yuꞌun te jMoisese, o jaꞌ te la achꞌuunik te skꞌop Dios te la awaꞌiyike?

³ jmel ma pꞌijukexix te jaꞌexe. Te tutꞌil a lijkex ta spasel ta skuenta te Espiritue, te ora to ya akꞌan ya ajuꞌutesik ta puersa sok atiꞌbalulik.

⁴ ¿Me jowil nax te bayalix ta jkaj te kꞌax awokolik yuꞌune? Ma jowiluk.

⁵ Te kꞌalal Dios la yaꞌbeyex te Espiritue y la yakꞌ ta ilel milagroetik te ba ayexe, ¿tuꞌun te jich la spase? Ma jaꞌuk yuꞌun te jaꞌex te la achꞌuunik te tut ya yal te mantaliletike. La spas yuꞌun te la achꞌuunik te skꞌop Dios la awaꞌiyike.

⁶ Te jꞌAbrahame, “la xchꞌuun te Diose, y jaꞌ yuꞌun ilot yuꞌun Dios tutꞌil toj aye”, xchi me.

⁷ Jaꞌ yuꞌun, te jaꞌexe ya skꞌan ya anaꞌik te machꞌatik batsꞌi jaꞌ stsꞌunubal te jꞌAbrahame jaꞌ te machꞌatik ay xchꞌuunel yoꞌtane.

⁸ Ta nail to chiknaj ta Sjun Dios te libre xkꞌotik yuꞌun smulik te machꞌatik ma juriyouke yuꞌun te xchꞌuunel yoꞌtanike. Jich Dios la yal ta stojol jꞌAbraham te lekil achꞌ kꞌop to: “Ta spisil nasionetik ya yichꞌ bendision ta akuenta”, xchi me.

⁹ Jich te machꞌatik ya xchꞌuune yichꞌoj bendision jun nax sok te jꞌAbraham te jich a xchꞌuun ekꞌae.

¹⁰ Yan te machꞌatik yaꞌtelinejik xchꞌuunel te mandaliletik yuꞌun jMoisese aylan ta skuenta chꞌayel. Porke te Sjun Dios jich ya yal: “Chꞌayel me ya xbajt machꞌauk a te ma spisiluk ya xchꞌuun spasel te tut tsꞌibabil ta sjunal yuꞌun te mantaliletike”, xchi me.

¹¹ Jaꞌ yuꞌun chikan ta jamal te maꞌyuk machꞌa libre ya xkꞌot yuꞌun smul yuꞌun jaꞌ ya spas te tut ya yal te mantaliletike. Yuꞌun te Sjun Diose ya yal: “Te machꞌa lek ya xꞌilot yuꞌun Dios ta skuenta te xchꞌuunel yoꞌtane, jaꞌ me ya xkuxuyin”, xchi me.

¹² Pero te mantaliletik yuꞌun te jMoisese ma xyichꞌ ta jkuenta te xchꞌuunel-oꞌtanile. Yuꞌun jich ya yal: “Te machꞌa ya xchꞌuun spasel spisil te mantaliletike, ya me xkuxuyin yuꞌun”, xchi me.

¹³ Te Cristoe jaꞌ a yakꞌotik ta libre yuꞌun te kastigo yuꞌun te mantaliletike. Yuꞌun stukel a slajinbe jilel skꞌoplal te chꞌayel ya xbootike. Porke te Sjun Diose ya yal: “Chꞌayel ya xbajt spisil te machꞌa jokꞌol ya xcham ta teꞌe”, xchi me.

¹⁴ Jich a kꞌot ta pasel yuꞌun Dios te tut sjapoj ta skuenta te jꞌAbrahame te jich ya sta ekꞌa te bendision ta skuenta te Cristo Jesus te machꞌatik ma juriyouke. Y yuꞌun ta skuenta te xchꞌuunel koꞌtantike ya kichꞌtik jpisiltik te Espíritu te Dios sjapoje.

Te mantaliletik sok te tut japbile

¹⁵ Kermanotak, jaꞌ ya kalbeyex tutꞌil ay te kuxlejal jujun kꞌaale. Te kꞌalal ya spas jun tratee te jtul winike, teme lek chapal jilel yuꞌune, maꞌyuk machꞌa ya xjuꞌ ya xchꞌay ni ya spꞌoles.

¹⁶ Jaꞌ nax jich, Dios la sjapbey ta skuenta jꞌAbraham y sok te stsꞌumbale. Te Sjun Diose ma jaꞌuk ya yalbe: “spisil te atsꞌumbale”. Jaꞌ ya yal: “te atsꞌumbale”, y “te atsꞌumbale”, te xchie, jaꞌ te Cristoe.

¹⁷ Te tut ya kale jaꞌ to: Dios a spas jun trate sok te jꞌAbrahame y jich a xchap. Jaꞌ yuꞌun te mantaliletik yuꞌun te jMoisese, te jul ta patil te ay kuatrosientos treinta jaꞌbile, ma xchꞌay te trate abi, y ma jichuk nax ya xjil te maꞌyuk yip te tut sjapoj te Diose.

¹⁸ Porke teme jaꞌ ya kichꞌtik te bendision ta skuenta te mantaliletike, ma jaꞌukix a te tut japbile. Pero te Diose la yaꞌbe te tut sjapojbe te jꞌAbrahame te ta majtan naxe.

¹⁹ Jich yuꞌun, ¿tut xan yes a te mantaliletik te? La yichꞌ akꞌel ta patil yuꞌun ya xchiknates a te ma xchꞌuunikix a te mantal te winiketike, jaꞌ to te tal te stsꞌumbal te Abrahame, te sjapoje te Diose te ya xtale. Te mantaliletike jaꞌ albil ta skuenta te chꞌul angeletike, y te jMoisese jaꞌ a tuun ta skꞌasesel.

²⁰ Pero ma puersauk te ay jkꞌasesej-kꞌope te kꞌalal jtul nax machꞌa ya xkꞌopoj. Y te Diose stukel nax a kꞌopoj.

Te tut sluwar te mantaliletike

²¹ ¿Me jaꞌ ya skꞌan xyal te mantaliletik yuꞌun jMoises te jaꞌ skontrainej te tutik sjapoj te Diose? Ma jichuk. Porke te mantaliletik te yauk yakꞌ kuxlejale, jich ya xjuꞌ te libre ay yuꞌun smul te machꞌa jich ya spas te tut ya yal te mantaliletike.

²² Pero jaꞌ chikan te tut ya yal te Sjun Diose te spisil chukajtik yuꞌun te mulile, yuꞌun te machꞌatik ya xchꞌuun te Jesucristoe, jich ya xjuꞌ ya yichꞌik te tut yaloj te Diose.

²³ Te kꞌalal ma to xchꞌuunejtik a te Jesucristoe, te mantaliletike jaꞌ xchukojotik, jaꞌ to te kꞌalal chiknaj te tutꞌil ya skꞌan te ya jchꞌuuntik te Jesucristoe.

²⁴ Te mantaliletike jich kꞌoem tutꞌ mosoil te ya xꞌikot bael yuꞌun untik, te ya stojutesotik bael ta stojol te Cristoe. Yuꞌun teme la jchꞌuuntik te Jesucristoe, ya xjuꞌ te libre ya xkꞌootik yuꞌun te jmultike.

²⁵ Pero te ora to julemix te tutꞌil ay te xchꞌuunel-oꞌtanile. Maꞌyukotikix ta skuenta te mosoile, jaꞌ bi jaꞌ te mantaliletike.

²⁶ Yuꞌun te xchꞌuunel awoꞌtanik ta skuenta te Cristo Jesuse, ta apisilik te jaꞌexe yal xnichꞌanexix te Diose.

²⁷ Porke ta apisilik te la awichꞌikix jaꞌe jich jun nax a kꞌoex sok a te Cristoe, y jich jelonemexix ta skuenta a te Cristoe.

²⁸ Ma kocheluk me juriyo o griego, me mosoil o libre ay, me winik o ants. Porke jun xanix ayex ta skuenta Cristo Jesus ta apisilik te jaꞌexe.

²⁹ Y teme yuꞌunexix te Cristoe, jich stsꞌumbalexix te jꞌAbrahame. Y ya awichꞌik te tutik sjapoj Dios te jich ya spase.