Gálatas 2 - Nuevo Testamento Tzeltal de Amatenango

Te yanetik apostoletike la yikꞌik te jPabloe

¹ Ta patil kꞌaxix katorse jaꞌbil a boon xan ta Jerusalen sok te jBernabee, y la kikꞌ sjoyinon bael te jTitoe.

² Boon porke Dios la yaꞌbonix jnaꞌ te puersa ya xboone. Y teyix ta Jerusalen ay jun junta te ba kalbe yaꞌiyik te stataletik te ayik ta jkuentae. La kaltalanbe te skꞌoplal kolel te la kal te ba ay te machꞌatik ma juriyouke. Te tutꞌil jich a jpase, yuꞌun ma jkꞌan teme maꞌyuk sluwaril ya xjil te tut jpasojixe sok te ya to jpas xane.

³ Pero te jTito te sjoyinejone, te jaꞌ griego stukele, maꞌ sujot ta yichꞌel te sirkunsisione.

⁴ Pero ay jtul cheb palso hermanoetik te ochik tal liꞌ ba ayotik, te mukul nax aylane, yuꞌun talemik ta ilawane te tutꞌil libre ayotikix ta skuenta te Cristo Jesuse. Yuꞌun ya skꞌan yakꞌotik xan ta mosoil yuꞌun te mantaliletike.

⁵ Pero ni chꞌinuk a jchꞌuunbetik te tut ya sujotik aye. Porke jaꞌ ya jkꞌantik te batsꞌi jich te skꞌoplal kolel te jmel nax ay ta akuentaike.

⁶ Pero te machꞌatik ay yaꞌtelik tey ae maꞌyuk tut achꞌ a yalbon. Aunke te joꞌone ma kocheluk te tut aꞌtel yichꞌojike, jich mismo te Diose ma jaꞌuk ya yichꞌ jkuenta te tut yilelike.

⁷ Maꞌyuk tut la yalik, yuꞌun la yilik te Dios la yaꞌbonix ta jkuenta yalel te lek achꞌ kꞌop te ba ay te machꞌatik ma juriyouke. Jich tutꞌil jPedro te jaꞌ ay ta skuenta yaꞌtelinel yalel ta ba ay te juriyoetike.

⁸ Yuꞌun mismo Dios a stikon te jPedro te jaꞌ apostol te ba ay te juriyoetike, jich a stikonon euk te tutꞌil apostol te ba ay te machꞌatik ma juriyouke.

⁹ Jaꞌ yuꞌun te Jacobe, te jPedroe sok te Juane, te jaꞌlan yiptajib te hermanoetike, la snaꞌik te Dios a yaꞌbon ta jkuenta te aꞌtel to. Jaꞌ yuꞌun la xchechbotik jkꞌabtik joꞌon sok te jBernabe, jaꞌ seña te joyinej jbajtik ta aꞌtel. Sok la yalik te joꞌotik ya jkuentaintik te aꞌtel te ba ma juriyouke, y te stukelik ya me xba aꞌtejikuk te ba ay te juriyoetike.

¹⁰ Jaꞌ nax a yalbotik bael te ya me jnaꞌtik tutꞌil ay te meꞌbaetike, te jaꞌ koꞌtaninej spasel sil tiempoe.

Te jPabloe la skom ta kop te jPedro ta Antioquia

¹¹ Pero te kꞌalal bajt ta mukꞌul jtejklum Antioquia te jPedroe, la kalbe ta sit porke ma tsaꞌamuk te tut yipal ta spasel.

¹² Yuꞌun nail a weꞌ sok te machꞌatik ma juriyouke, jaꞌ to te laj kꞌot chaꞌoxtul te machꞌa tikonbil tal yuꞌun te Jacoboe. Jich lijk spit sba, y ma sjoyinlanix ta weꞌel a. Porke jaꞌ a xiꞌ yuꞌun te machꞌatik bayal skꞌoplal ay ta yoꞌtanik te sirkunsisione.

¹³ Y te yan xan hermanoetik juriyoetike jich a lijk snopik te tutꞌil ma tsaꞌamuk snopoj te jPedroe. Y asta te jBernabee jich a kꞌan snopbey euk.

¹⁴ Jaꞌ yuꞌun te kꞌalal la kil te ma jichuk toj ya spasik te tutꞌil ay skꞌoplal te lek achꞌ kꞌope, la kalbey ta sitil komon te jPedroe: “Jaꞌat te juriyoate, jich ya xkuxuyinat te tutꞌil ma juriyoukate. ¿Tut yuꞌun te ya akꞌan ya asuj te machꞌatik ma juriyouk ta spasel jich tutꞌil te juriyoetike?

Spisilik ya staik kolel ta skuenta xchꞌuunel-oꞌtanil

¹⁵ Joꞌotik juriyootik ta kayinabtike, y ma jmulawilukotik, jich tutꞌil te yanetike.

¹⁶ Pero jnaꞌojtik te maꞌyuk machꞌa libre ya xkꞌot yuꞌun smul ta skuenta te ya spas te tut ya yal te mantaliletik yuꞌun te jMoisese. Jaꞌ nax libre ya xkꞌootik yuꞌun jmultik ta skuenta xchꞌuunel te Jesucristoe. Jaꞌ yuꞌun, te joꞌotike jchꞌuunejtikix te Jesucristoe yuꞌun ya skoltayotik yuꞌun jmultik ta skuenta nax te xchꞌuunel-oꞌtanile, y ma jaꞌuk ta skuenta spasel te tut ya yal te mantaliletike. Porke maꞌyuk machꞌa ya xjuꞌ te libre ya xkꞌot yuꞌun smul ta skuenta spasel te tut ya yal te mantaliletike.

¹⁷ Pero teme jaꞌ libre ya xkꞌootik yuꞌun jmultik ta skuenta nax te Cristoe, tey ya xchiknaj a te pajal jmulawilotik sok te yanetike, ¿Me yuꞌun jich ya yakꞌ xmulawotik te Cristoe? Ma jichuk.

¹⁸ Yuꞌun teme ya jchaꞌpas xan te tutꞌil jilemix ta pasel kuꞌune, joꞌon mismo ya jta jmul.

¹⁹ Porke te joꞌone ta skuenta te mantaliletike chamenonix yuꞌun te mantaliletike, yuꞌun jaꞌix kuxulon ta skuenta te Diose.

²⁰ Sok te Cristoe pajal jojkꞌajemon sok ta krus. Y ma joꞌukon xanix ta jkuenta kuxulon, jaꞌix ta skuenta Cristo te kuxulone. Y ta ora to te tutꞌil kuxulon sok te jtiꞌbalule, jaꞌ kuxulonix ta xchꞌuunel koꞌtan ta skuenta te Xnichꞌan Diose. Jaꞌ la xkꞌuxutayon y la yakꞌ sba entregal ta milel ta joꞌon ta jkaj.

²¹ Ma jkꞌan ya jpꞌaj te slekil yoꞌtan te Diose. Yuꞌun yauk xjuꞌ te ya yakꞌotik ta libre yuꞌun jmultik te xchꞌuunel te mantaliletike, jich lom nax a cham te Cristo te jichuke.