Gálatas 1 - Nuevo Testamento Tzeltal de Amatenango

Spajtil yoꞌtanik

¹ Joꞌon jPabloon, te apostolon. Ma jaꞌuk tikonbilon yuꞌun te winketike sok ma jaꞌuk la yaꞌbonik kaꞌtel. Jaꞌ la yaꞌbon kaꞌtel te Jesucristoe y sok te Dios Tatile te jaꞌ a xchaꞌkuses tal te Jesuse te ba ay te animaetike.

² Joꞌon sok spisil te hermanoetik te joyinej jbaj soke, ya jtsꞌibay te karta to, te jaꞌ yuꞌun te jayebex te achꞌuunejik Dios te ayex ta estado Galaciae.

³ Te Dios Tatile sok te Kajwaltik Jesucristoe aꞌ yaꞌbeyex te slekil yoꞌtan y sok te bujtsꞌan kꞌinal ta atojolike.

⁴ Te Jesucristoe la yakꞌ sba ta lajel yuꞌun te jmultike, yuꞌun ya skoltayotik te ayotik ta balmilal te ma tsaꞌamuke. Jich tutꞌil la skꞌan yoꞌtan te Tatik Dios kuꞌuntike.

⁵ A me chiknajuk slekilal ta sbajtel kꞌinal. Jichuk.

Maꞌyuk yan skꞌoplal te kolele

⁶ Lom ayon ta ajtal-oꞌtan awuꞌunik te tutꞌil ora nax ya xjakalex bael ta stojol Diose, te la yikꞌex ta skuenta slekil yoꞌtan te Cristoe. Yuꞌun jaꞌ ya apasik seguir te yan kꞌop te kuybil te ya xkolotik yuꞌun.

⁷ Ma yuꞌunuk ay yan skꞌoplal te kolele. Jaꞌ nax te ay machꞌatik ya xchebentesbeyex awoꞌtanik te jaꞌexe. Ya skꞌan ya syanutesik te tutꞌil ay skꞌoplal te kolel yuꞌun te Cristoe.

⁸ Pero teme ay machꞌa ya yalbeyex te skꞌoplal kolel teme ma pajaluk sok te tutꞌil kalojbetikexe, aꞌ bajtuk ta chꞌayel. Manchuk me joꞌotik o jtul ángel te talem ta chꞌulchane.

⁹ Yuꞌun nail kalojbetikex y te ora to jich ya kalbetikex xan: Teme ay machꞌa ya yalbeyex te jun skꞌoplal kolel te ma pajaluk sok te tutꞌil awichojikixe, aꞌ bajtuk ta chꞌayel.

¹⁰ Te joꞌone ma jaꞌuk ya jle te lek jkꞌoplal yuꞌun te winketike, yuꞌun jaꞌ ya jle te lek jkꞌoplal yuꞌun te Diose. Teme jaꞌ ya jkꞌan te lek ayon sok te winketike, ma joꞌukonix a te yaj-aꞌtelon te Cristoe.

Tutꞌil a kꞌot ta apostol te jPabloe

¹¹ Ya kaꞌbeyex anaꞌik, jaꞌex kermanotak, te jich aye: Te skꞌoplal kolel te ya kale, ma jaꞌuk ta skuenta nax te winketike.

¹² Ma teyuk a jta a ni ma teyuk jnopoj a te ta skuenta nax jtul winike, yuꞌun jaꞌ ta skuenta te Jesucristoe stukel mismo a yaꞌbon jnaꞌ.

¹³ Te jaꞌexe awaꞌiyejikix te tut kilel te nail toe te kꞌalal jun ayon sok a te juriyoetike. La jtentalan sok la kilbajinlan te hermanoetik yuꞌun Dios y jnopoj ya jtupꞌbe skꞌoplal.

¹⁴ Te jun nax ayon sok a te juriyoetik, te joꞌone mas nail nail juꞌem kuꞌun ke te jlumale, te joy jba sok ta chꞌile. Porke ben bayal skꞌoplal ta koꞌtan te jkanantayej te skostumbreik te antibo jmeꞌ-jtate.

¹⁵ Pero Dios a stꞌujon ta nail to te ma to xꞌayinon ae, y ta skuenta skꞌuxul yoꞌtan te la yikꞌone.

¹⁶ Te kꞌalal jich a skꞌan yoꞌtane, la yaꞌbon jnaꞌbe sba te Xnichꞌane, yuꞌun jich me ya kalbe skꞌoplal te kolel te ba ay machꞌatik ma juriyouke. Ma jaꞌuk a ba jojkꞌobey te yanetik genteetike,

¹⁷ ni ma ba jojkꞌoy ta Jerusalen te ba ay te apostoletik te nail kuꞌune. Ma jichuk, sinoke boon ta estado yuꞌun Arabia. Patil sujton tal ta Damasco.

¹⁸ Oxeb jaꞌbil ta patil boon ta Jerusalen, yuꞌun ba kil te jPedroe, y teꞌeyon kinse dia a.

¹⁹ Pero maꞌyuk a jta ta ilel te yanetik apostoletike, jaꞌ nax te Jacobo te yijtsꞌin te Kajwaltike.

²⁰ Te tut ya jtsꞌibabeyexe, jamal ya kal ta stojol Dios te ma jlotuke.

²¹ Ta patil boon ta estadoetik yuꞌun Siria sok Cilicia.

²² Y maꞌ snaꞌbikon jba ta sitik te hermanoetik ta skuenta Cristo te aylan ta Judea.

²³ Jaꞌ nax te la yaꞌiyik te ya xꞌalote: “Jaꞌ te machꞌa la stenotik ta nail toe, te ora to yipalix ta yalel te tutꞌil ay skꞌoplal ta chꞌuunel te Cristoe, te nail to kꞌan stupꞌbe skꞌoplale”, xchi te jkꞌoplale.

²⁴ Y la yalbeyik kola yal Dios yuꞌun ta jtojol.