Filipenses 4 - Nuevo Testamento Tzeltal de Amatenango

Junuk me awoꞌtanik sil tiempo ta skuenta te Kajwaltike

¹ Jaꞌ yuꞌun, kermanotak te ben kꞌuxex ta koꞌtane, te ya jnaꞌulanex, te ben xpichꞌex ta koꞌtane sok ben jun koꞌtan awuꞌunik, te jaꞌ jkoronaex kꞌoem yuꞌun Dios, sigueuk me jun awoꞌtanik ta skuenta te Kajwaltike.

² Swokoluk te xꞌEvodiae y jich euk te Sintikee, te junuk nax me ayik, jich tutꞌil hermanaetik ta skuenta te Kajwaltike.

³ Y jaꞌat te jun awoꞌtan te joy jbajtik ta aꞌtele, ya jkꞌan ya akoltayik te hermanaetik to te la spasik puersa te la skoltayon ta yalel te skꞌoplal kolele, sok euk te jClementee y sok te yanetik te jun nax a aꞌtejon soke. Te sbiilike tsꞌibalanbilix te ba sjunal te kuxlejale.

⁴ Junuk me awoꞌtanik sil tiempo ta skuenta te Kajwaltike. Ya jchaꞌalonbeyex xan: Junuk me awoꞌtanik.

⁵ Ta apisilik a me chiknajuk slekil awoꞌtanik ta sit te genteetike. Te Kajwaltike nopol xtalix.

⁶ Ma me tut ya yakꞌ yajtal awoꞌtanik yuꞌun. Jaꞌ ya skꞌan ya akꞌoponik Dios yuꞌun ta spisil te tut ya xtuun awuꞌun, y albeyaik kolayal ekꞌa.

⁷ Jich me ya yaꞌbeyex butsꞌan kꞌinal te Diose te jaꞌ ben tsaꞌam te ma xjuꞌ yuꞌun snaꞌel te winike. Y te bujtsꞌan kꞌinal to ya me snojesbeyex te awoꞌtanik sok te apensarik, porke te jaꞌexe jun nax ayex ta skuenta te Cristo Jesuse.

Jaꞌ xꞌanopik spisil te tut leke

⁸ Ta slajibal kermanotak, jaꞌ xꞌanopik spisil te tut batsꞌi jiche, sok ta spisil te tut tsaꞌam ta alele: jaꞌ bi jaꞌ spisil te tut toje, ta spisil te tut leke, ta spisil te tut lek skꞌoplale, sok ta spisil te tut lek ta nopele. Nopaik ta spisil te tut ben leke y sok te tut ben tsaꞌame.

⁹ Jaꞌ kꞌayesa abaik a te tut la kaꞌbeyex anopike y sok te tsitsel a kaꞌbeyexe. Te tut la awaꞌiyik a kale y te tut la awilik a jpase jich me xꞌapasik, y ya me sjoyinex te Diose te ya yakꞌ bujtsꞌan kꞌinale.

Smajtꞌan Dios la yakꞌik te filipenseetike

¹⁰ Ben jun koꞌtan ta skuenta te Kajwaltike yuꞌun te la anaꞌonik xane. Ma jaꞌuk ya kal te chaꞌyemon ta awoꞌtanike, yuꞌun ma la ataik te tutꞌil ya akoltayikone.

¹¹ Ma yuꞌunuk ya kal te ay jwokol ta meꞌbale, yuꞌun la jnopix te junuk koꞌtan a te tut ay kuꞌune.

¹² Kilojix te tutꞌil ay te meꞌbale sok kilojix te tut ora ya jta bayale. Jnopojix tut ya jpas teme ay tutikuk ya xtal ta jkuentae, jich mismo teme lek ya xnojone o teme ayon ta wiꞌnale, teme ay bayal sobra o maꞌyuke.

¹³ Ta spisil ya xjuꞌ kuꞌun ta skuenta Cristo te jaꞌ ya skoltayone.

¹⁴ Pero te jaꞌexe lek te la anaꞌikon te tutꞌil ay jwokole.

¹⁵ Te kꞌalal boon ta Macedoniae te lijk kal te skꞌoplal yuꞌun te kolele, úniko jaꞌex te hermanoetik ta Filipose la atikonbikon koltayel.

¹⁶ Yuꞌun te kꞌalal ayon ta Tesalónica ae, ma junuk nax buelta te jaꞌex la atikonbikon bael te majtanil te tuun kuꞌune.

¹⁷ Ma yuꞌunuk te jaꞌ nax te ya jkꞌan jmajtane. Te tut ya jkꞌane, jaꞌ te jaꞌex te lek ya xkꞌoex ta sit te Diose.

¹⁸ Te tut la atikonbikon tale, la kichꞌix ta spisil, y asta ay sobra kuꞌun. Te tut la atikonbikon ta skuenta te Epafroditoe ben bayal to xan kichꞌoj. Jich a kꞌot tutꞌil jun majtanil te ben tsaꞌam yikꞌ te chikbil majtanil te ben smuyet ya yaꞌiy te Diose.

¹⁹ Te Dios kuꞌune ya me yaꞌbeyex spisil te tut palta ya awaꞌiyike, jich tutꞌil te slekilal skꞌulejal te ay yuꞌun te Cristo Jesuse.

²⁰ Ay slekilal sbajtel kꞌinal te Jtatik Diose. Jichuk.

Spajtil-oꞌtanil ta slajibal

²¹ Xkoltanukex ta apisilik jaꞌex te jtejklumex yuꞌun Dios sok te Jesucristoe. Te hermanoetik te sjoyinejone la stikonbeyex spajtil awoꞌtanik euk.

²² Sok la stikonbeyex spajtil awoꞌtanik ta spisil te machꞌatik jtejklum yuꞌun te Diose. Jaꞌ bayal ya spatbeyex awoꞌtanik te machꞌatik jꞌaꞌteletik yuꞌun te César ta Romae.

²³ Te Kajwaltik Jesucristoe aꞌ yaꞌbeyex te slekil yoꞌtan ta apisilik te jaꞌexe. Jichuk.